Nge Pagan’med Ngak Jehovah
1. Mang kenggin fare convention ma mang fan nib puluw ko ngiyal’ ney?
1 “Jehovah e ir ba Got ni Tapufthin,” e yoloy Isaiah. “Ba felfelan’ e piin ni ke pagan’rad ngak Somol.” (Isa. 30:18) Bay boor e thin ko Bible u murung’agen rogon ni ke pufthinnag Got e pi toogor rok ma ke ayuweg e pi tapigpig rok ni yad ba yul’yul’. Mang e be fil ko re n’ey e piin ni ma liyor ku Jehovah ko ngiyal’ ney? Mang e rayog ni ngad rin’ed ni ngad fl’eged rogon ni fan ko “fare Rran rok Jehovah ni reb e rran ni ba ga’ ma ba gel e gafgow nra fek i yib”? (Joel 2:31, 32) Fare District Convention ni “Deliverance at Hand!” e ra k’aringdad ngad lemnaged e pi deer nem ma ngad yaliyed gadad. Ra ayuwegdad ngad pared ni gad be pagan’ ngak Jehovah.
2. Uw rogon nrayog ni ngad daged ni gad ma tay fan fare district convention?
2 Kam yarmiy ni nge yib angin ngom ko ra reb e muulung ko re convention nem? Susun, kam mog ko ani ga’ ko maruwel rom ni dabiyog ni ngam un ko maruwel ko pi rran nem ni bay fare convention? Dabmu lemnag ni gathi ri baga’ fan e re n’ey. Ngam meybil ku Got u murung’agen. Ma aram ma ngam ning ko ani ga’ ko maruwel. (Neh. 2:4, 5) Maku susun ndaba sagaalgad ni ngad yarmiyed e karro, nge gin ni gad ra par, nge yugu boch ban’en nib t’uf ni ngan rin’. Faan gad ra fl’eg rogon ni aram rogon ma gad be tay fan e ggan rok Jehovah nib spiritual. Piin piilal e ra tedan’rad ni ngar ayuweged e piin nib t’uf e ayuw ni ngar yarmiyed ni ngar uned ko fare convention, ma ngar ayuweged e piin nib ilal u lan e ulung.—Gal. 6:10.
3. Uw rogon nrayog ni ngad ngongolgad uw rogon ni ma pining e sorok ku Jehovah?
3 Ngongol nib Fel’ ni ma N’uf Got: Nap’an ni gad ma muulung u taabang ko pi convention ma ngongol rodad e ma pi’ e mich ko girdi’ u lan e binaw. Mang e ba t’uf ni ngada rin’ed? Nap’an ni gad bay ko hotel, ara tafen e damunmun, ara yu gin ni fan ko business ko fare binaw ni bay fare convention, ma piin ni gad ma non ngak e susun ni ngar falfalan’gad ni bochedad ya gad be dag felngin e Kristiano, ni bod e k’adan’ nge sumunguy, nge t’ar laniyan’, nge fel’ laniyan’. (Gal. 5:22, 23; Fil. 4:5) Susun ni ngan par ko bitir u gubin ngiyal’. (Prov. 29:15) Ngongol rorad nib fel’ e ra pining e sorok ku Jehovah ma ra felan’nag gum’erchaen!—Prov. 27:11.
4. Uw rogon nrayog ni ngad ted fan Jehovah u daken e munmad rodad nge yaadad?
4 Ngam Munmad ma Ngam Fl’eg Yaam Nrogon: Ra bagadad ma rayog ni ngad ayuweged nge fel’ e ulung u wan’ e girdi’ ni faanra gad ra siy i chuw ko mad nib faddish, ara pag rogon, ara de puluw. Gad e pi tapigpig rok Got ere n’en nth’abi ga’ fan e ngochol rok Jehovah ma gathi ngad rin’ed e tin ni gad ba adag. Piin ni lolugen e tabinaw e mmil fan ngorad ni ngar guyed ni girdien e tabinaw rorad e ra munmad uw rogon nib yaram mab puluw u gubin ngiyal’.—1 Tim. 2:9.
5. Mang fan ni susun ni ngad pared nib fel’ e munmad rodad nge yaadad ko ngiyal’ ni gad be fafel ni bod rogon e ngiyal’ ni gad ra un ko convention?
5 Ma gathi de ga’ fan uw rogon e munmad u nap’an ni gad be fafel u hotel, ara kantin, ara tafen e damunmun. Ba puluw ni ngad chuwgad ko mad ni fan ko convention u nap’an ni gad ra yan ko abich u tomren e muulung. Ngad ted fare babyor ni convention badge card ko mad rodad ma aram rogon nrayog ni ngad wereged e machib u fithik’ e sabethin.—2 Kor. 6:3, 4.
6. Uw rogon nrayog ni ngad ayuweged ngan tay fare convention nib yaram nge falfalan’? (Mu guy “Puguran ko Convention.”)
6 I yiiynag Isaiah ni gaar: “Jehovah e be sonnagmed ni ngam sulod ngak me ayuwegmed, ya gubin ngiyal’ ni ma rin’ e tin nib mat’aw.” (Isa. 30:18) Bochan ni gad ma pining e magar ku Jehovah ya ke runguydad ma ke gol ngodad ma aram e ra k’aringdad ngad ted fan u daken e ngongol rodad nge munmad rodad u nap’an ni gad ma muulung ko pi convention. Ngan n’uf Got u daken fare District Convention ni “Deliverance at Hand!” ma ra ayuwegdad ni ngad pared ni nge be pagan’dad ngak!
[Kahol ko page 5]
Puguran ko Convention
◼ Ngam par ko chiya’ u m’on nra tabab fare muulung ma aram ma rayog ni ngan tababnag nib yaram.
◼ Ngam fek iyib e ggan ni ngam kay ko misiw ma dabmu chuw ko convention.
◼ Ba tolang puluwon ni ngan tay e district convention. Ngad daged ni gad ma tay fan ma ngad pied e ayuw.
◼ Dabmu fl’eg e wagey ko cell phone rom nge pager rom.