Kam Fal’eg Rogom ni Ngam Un Nga Reb e Mur ni Ke Fal’eg Jehovah ni Fan Ngodad?
1. Faanra ngan tay reb e mur nib ga’, ma mang e yima rin’ u m’on riy?
1 Ra ngan ngongliy reb e mur, ma boor e maruwel ni yira rin’. Ya yira gay e ggan, min lith, ngemu’ mfin ni mur. Thingar ni yarmiy rogon ni ngan pi’ e ggan. Ku thingar ni fal’eg rogon e gin ni yira tay e mur riy. Maku piin ni kan piningrad ko fare abich e thingar ra fal’eged rogorad, nib ga’ ni piin ni yad ma par nib palog. Yugu aram rogon nib gel e maruwel ni yira tay riy machane felfelan’ nra tay e pi tafager nge chon e tabinaw u taabang e ra yan nga lon e maruwel ni kan tay. Dabki n’uw nap’an ma ra tay e Pi Mich Rok Jehovah reb e District Convention ni kenggin e “Mu Tedan’med ko Matnag!” Yu yang e ba ga’ e muulung ni yira tay riy ma yu yang e danga’. Kan tabab i yarmiy e tin ni yira rin’ u nap’an e re muulung ney nge gubin ban’en nib l’ag ngay. Ma gad gubin ni yibe piningdad ni ngad uned ngay. Ere thingar da fal’eged rogodad ya nge yog nda uned ko re muulung ney ni yira tay ni bod ba mur ni ke ngongliy Jehovah ni fan ngodad.—Proverbs 21:5.
2. Mang e thingar da rin’ed u m’on ko convention ni yira tay e biney e duw?
2 Nge Yib Angin Ngom: Kam fal’eg rogon ni ngam un ko re muulung ney ni bod e mur ni ke fal’eg Jehovah ni fan ngodad, fa? Faanra ba t’uf ni ngam ning e matal rom ko maruwel, mag rin’. Kam mu’ i lemnag e gin ni ngaum man riy ko muulung nge gin ni ga ra par riy fa dawor? Faanra bay e piin pilibthir ara piin nib m’ar ni yad ra un ko re muulung ney nib t’uf e ayuw rorad, ma thingari yarmiy e piin piilal u m’on riy.—Jeremiah 23:4; Galatia 6:10.
3. Mang fan ndab da uned nga reb e convention ndan ni yarmiy ni ngad uned ngay?
3 Boch e nam e yira tay e international convention riy. Biney e muulung e ba mutrug e ulung ni kan piningrad ngay. Nap’an ni kan fal’eg rogon e re convention nem ma ke sumarnag e branch ofis ko yungi n’en ni yira tay e re convention nem riy oren e girdi’ ni yira piningrad. Faanra un reb e walag nga reb e convention ni dan yarmiy ni nge un ngay ma rayog ni nge pag urngin e girdi’ u lan tafen e muulung.
4. Mang e ra ayuwegdad ni ngada fal’eged rogodad u m’on ni nge tabab e muulung rodad?
4 Mu gay rogon ni ngam taw ko gin ni yira muulung riy ndawori tayim ya nge yog nim pirieg bang ni ngam par ngay. Mu gay rogon ni ngam yaliy e babyor ni bay e welthin ni yira pi’ u daken u m’on ni nge tabab e muulung. Re n’ey e ra ayuwegem nge yog nim tiyan’um u nap’an e muulung. (Ezra 7:10) Nap’an nra tabab e musik mag par nga but’ ngam telim ngay mag fal’eg rogom ni ngam un ko tang nge meybil.
5. Uw rogon ni ngeb angin e muulung ni yira tay ngak chon e tabinaw?
5 Faanra par girdien e tabinaw u taabang u nap’an e re muulung ney ma rayog ni nge ayuweg e gallibthir pi fakrad ni ngar tedan’rad ko n’en ni yibe weliy. (Deuteronomy 31:12) Yibe pi’ e athamgil nga laniyan’ urngin e girdi’ ni ngar pithiged e Bible rorad u nap’an ni yibe beeg e Bible. Faan ga ra yoloy nga but’ e tin nib ga’ fan ni yibe weliy ma ra ayuwegem ni ngar mu fal’eg e motoyil. Ma tomren e muulung ma rayog ni ngam beeg bayay e pi n’en ni kam yoloy nge puguran ngom e tin nib ga’ fan ni kan weliy. Ngad gayed rogon ndab ud nonnongad u nap’an e muulung ma ngkud guyed rogon ndab darod nga wen ni yugu dariy fan. Faanra bay e cell phone rom ma ga offnag nge siy i magawonnigem u nap’an e muulung, fa reb e magawonnag boch e girdi’. Ma tomren e muulung ma rayog ni ngad weliyed boch e girdi’ e tin ni kad filed ko rorran nem.
6. Mang e ba t’uf ni ngad lemnaged u murung’agen e mad ni gad ra chuw ngay?
6 Mad ni Ngan Chuw Ngay: Kakrom e pi’ Jehovah e motochiyel ngak piyu Israel ni ngar t’et’ared tabanggin e mad rorad mar ted e tret ngay nib raen blue. (Numbers 15:37-41) Re motochiyel nem e ma puguran ngorad ni yad ba thil ko yug nam ni bochan e yad ma liyor ngak Jehovah. Ngiyal’ ney e mad nib yalen ni gad ma chuw ngay u nap’an e convention rodad e rayog ni ngad gagiyelgad riy ni gad ba thil ko girdi’ ko re fayleng ney. Tomren e convention e ra guy e girdi’ rogon e mun mad ni gad ma tay ma yad ra nang ni gad e girdi’ rok Jehovah. Ere mu fal’eg i lemnag e re miti mad ni ga ra chuw ngay.
7. Uw rogon nrayog ni ngada machibnaged boch e girdi’ ko binaw ni yira tay e convention riy?
7 Mu Weliy e Machib: Faanra mu fal’eg rogom u m’on riy ma rayog ni ngam machibnag yugu boch e girdi’ u nap’an ni kam man ni ngam un ko convention. Nap’an e convention ma bay bochi yang i babyor ni gad ma tay ko mad rodad ni bay fithingdad riy nge ulung rodad. Immoy reb e walag nge ppin rok nranow nga tafen e damunmun u tomren bayay e convention me dag e gi babyor nem ngak e en ni be pi’ e ggan me gaar: “Kam guy yugu boch e girdi’ ni kar ted e re badge ney?” Me yog faen ni ma pi’ e ggan ngak ni ke guy ma de nang fan e re badge nem. Aram me tabab fare walag i machibnag facha’ me pining ni nge un ko re convention nem.
8. Uw rogon ni nge m’ug ni gad be pining e magar ngak Jehovah ko re mur ney ni ke ngongliy ni fan ngodad?
8 Yugu aram rogon ni bay e piin ni yad ra pi’ e welthin nge piin ni yira interviewnagrad, machane Jehovah ni Chitamangidad nu Tharmiy e ir e ke fal’eg e re mur ney ni fan ngodad. (Isaiah 65:13, 14) Be m’ug ni gad be pining e magar ngak e En ni ke fal’eg e re mur ney ni fan ngodad ni faan gad ra un ngay ma gad felfelan’ ko urngin e ggan ni machib ni ke tay ni fan ngodad. Ere kam fal’eg rogom ni ngam un ko re mur ney?