Yira Fal’eg Lanin’dad ko Tirok Got Ban’en
1. Mang angin nra yib ngodad ni bochan fare district convention ni yira tay ko re duw ney?
1 Re fayleng rok Satan ney e be par nib gafgow ko tirok Got ban’en, machane Jehovah e be fal’eg laniyan’ e pi tapigpig rok. (Isa. 58:11) Fare district convention ni yira tay u gubin e duw e aram ban’en ni ma pi’ Jehovah ni nge fal’eg lanin’dad. Ke chugur fare convention ko biney e duw, ere uw rogon nrayog ni ngad fal’eged rogodad ya nge yib angin ngodad?—Prov. 21:5.
2. Mang boch ban’en nib t’uf ni ngad fal’eged rogodad riy?
2 Faanra dawor mu fal’eg rogom, ma ngam yarmiy e schedule rom ni fan e ngam un ko re convention nem. Kam lemnag n’umngin nap’an ni ngam man ngam taw nga Kingdom Hall u m’on ni dawori tabab fare convention, fa? Dabisiy ni dubdad ni ngad paged ban’en ko re muulung ney ni ke fal’eg Jehovah rogon ni fan ngodad! (Isa. 65:13, 14) Kam yarmiy e gin ni ngam man riy ko re muulung ney, fa?
3. Mang boch ban’en ni ngad rin’ed nra ayuwegdad nge tabinaw rodad nge yib angin fare convention ngodad?
3 Mang e ra ayuwegem ngam tiyan’um u nap’an e re convention ney? Faanra rayog ma ngam mol nib fel’ rogon ko re nep’ u m’on ko convention. Mu nap’an e convention mag sap ko en ni be pi’ e welthin. Mag pithig e Bible rom ma ga beeg urngin e thin ko Bible ni ka nog. Mu yoloy boch ban’en nga but’. Ba fel’ ni nge par girdien e tabinaw u taabang ya nge yog ko piin gallabthir ni ngar ayuweged e bitir rorad ngar tedan’rad. (Prov. 29:15) Rayog ni ngam weliyed murung’agen fare convention u taabang ko balayal’. Ma nap’an e Fol Bible ni Tabinaw mi gimed weliy boch ban’en ni kam rung’aged ko fare convention ni rayog ni nge fal’eg lanin’med.
4. Uw rogon nrayog ni ngad ayuweged boch e girdi’ ko ulung ni nge fel’ lanin’rad?
4 Ngan Ayuweg Boch e Girdi’ Min Fl’eg Lanin’rad: Gad ba adag ni ngad fal’eged laniyan’ boch e girdi’ ko tirok Got ban’en. Bay boch e publisher ni ke pilibthir fa boch e girdi’ ko ulung nib t’uf e ayuw rorad ni ngar uned ko fare convention, fa? Rayog ni ngam pi’ e ayuw ngorad, fa? (1 John 3:17, 18) Piin piilal nge group overseer e susun ni ngar guyed rogon ni ngan ayuweg e pi publisher nib t’uf e ayuw rorad.
5. Uw rogon ni gad ra wereg e invitation ko fare convention? (Mu guy fare kahol.)
5 Dalip e wik u m’on ko convention ma gad ra wereg e invitation ko girdi’ ni bod ni gad ma rin’. Urngin e ulung ni ngar nameged ni ngar wereged e pi invitation u lan urngin e binaw. Ma faanra ka bay boch e invitation ni ke magey ma nap’an e convention ma rayog ni ngan fanay ko machib u fithik’ e sabethin. Yira weliy murung’agen e re n’ey u nap’an e convention. Pi invitation ni danir lemnag ni ngan fanay u nap’an e convention e rayog ni ngan pi’ ngak reb e attendant u nap’an ni kan un ko convention u Kingdom Hall. Mu tay bang e gi babyor ney rom ya ba t’uf ni ngam beeg u nap’an e bin tomur e welthin.
6. Uw rogon nrayog ni ngad daged e ngongol nib fel’ u nap’an e convention?
6 Ngongol nib Fel’ e ma Fl’eg Lanin’uy: Ngiyal’ ney e be par e girdi’ ni “ke mus ni yad e yad be lemnagrad” ma darur lemnaged yugu boch e girdi’, ere rib fel’ ni ngaum chag ko pi Kristiano ni yad ma athamgil ni ngar daged e ngongol nib fel’! (2 Tim. 3:2) Susun ni ngad daged e ngongol nib fel’ u nap’an ni gad ra yan nga Kingdom Hall, ma dab ud wagageygad. Ma kemus ni yigoo chon e tabinaw rodad ara girdi’ ni kad bad u taareb e karrow e ngad ted e chiya ni fan ngorad. Ngad folgad ko n’en ni ke yog e en ni ir e chairman u nap’an nra yog ni ngad pared ko chiya rodad ya ngad motoyilgad ko musik u m’on nra tabab e muulung. Maku ngad achignaged lingan e cell phone rodad ya nge dabi yan lingan u nap’an e muulung. Maku dab un sabethin, ara un text, ara un kay ban’en, ara un yanyan u lan e Kingdom Hall ndariy fan.
7. Uw rogon ni nge bagadad me fal’eg laniyan’ bagadad u nap’an ni gad ra chag nga taabang?
7 Ngan Chag ngak e Pi Walag: Nap’an e convention ma rayog ni ngad chaggad ngak pi walagdad ni Kristiano. (Ps. 133:1-3) Mang fan ndab mu athamgil ngam non ngak pi walagdad? (2 Kor. 6:13) Ngam nameg ni ngam non ngak e piin ni kafin ra uned ko muulung. Nap’an ni kan tal ko misiw’ ni ngan abich ma aram e ngiyal’ nib fel’ ni ngan rin’ e re n’ey. Ere mu fek boch e ggan ngam abichgad u taabang ya nge dab mman nge bang ngam chuw’iy e ggan ara nga tafen e abich, ya nge yog e fager ngom nib fel’.
8. Mang fan ni ngad ognaged gadad ni ngad pied e ayuw u nap’an e convention, ma uw rogon nrayog ni ngad rin’ed?
8 Ri ma fel’ lanin’dad u nap’an ni gad ma pigpig e pi walagdad u taabang! Ere rayog ni ngam ognagem ni ngam pi’ e ayuw ko klin, fa? (Ps. 110:3) Faanra boor e girdi’ nra maruwel u taabang ma bay e felfelan’ riy, ma ra mom e maruwel.
9. Mang fan ni susun ni ngad tedan’dad ko ngongol rodad nge rogon yaadad u nap’an fare convention?
9 Ngongol Rodad e Ma Fal’eg Laniyan’ e Girdi’: Ngad daged e ngongol nib fel’ u nap’an e convention, ma gathi kemus u nap’an ni yibe pi’ e welthin. Piin ni yad ra un ko fare convention e susun ni ngar guyed e n’en nib thil u thilin e Pi Mich Rok Jehovah nge piin ni gathi yad e Pi Mich. (1 Pet. 2:12) Munmad rodad nge yaadad u nap’an e convention ngu tafen e abich e susun ni nge n’uf Jehovah. (1 Tim. 2:9, 10) Susun ni ngad pied e tip ko piin ni ma maruwel u tafen e abich ni faanra ba puluw. Faanra bay e badge rodad, ma ra nang e girdi’ ni gad e Pi Mich Rok Jehovah. Ma aram e rayog ni ngkud weliyed ngorad murung’agen fare convention.
10. Mang boch ban’en ni ke buch ni be dag ni ngongol ko Kristiano e ra ayuweg e girdi’ ni ngar nanged ni ireray e tin riyul’?
10 Ra uw rogon u wan’ e girdi’ e ngongol rodad nib fel’ u nap’an fare convention? Rogon ni yog reb e shimbung e faen nib ga’ u reb e naun ni kan fanay u nap’an e convention e ke gaar: “Rib gol e girdi’. Gamad ba adag ni ngar muulungad ko re naun ney u gubin e duw.” Fa binem e duw e immoy be’ ni gathi ir reb e Mich ni yan e sayfu rok nga bang u lan reb e hotel ni be par boch e walag riy ni yad be un ko convention. Kan sulweg fare sayfu ko en nib ga’ ko fare hotel me yog ngak fare moon ni fen fare sayfu ni gaar: “Rib fel’ ni be un e Pi Mich Rok Jehovah ko convention u roy, ya boor i yad ni be par ko re hotel ney. Faan gomanga danga’, ma sana dab ni pirieg e sayfu rom.”
11. Mang e susun ni ngad nameged u nap’an nra chugur e convention, ma mang fan?
11 Dabki n’uw nap’an me taw ko convention ko biney e duw. Boor e tayim ni kan fanay ma ba gel e athamgil ni kan tay ni ngan fal’eg boch e welthin nrayog ni nge fal’eg laniyan’ e girdi’. Ere ngam nameg ni ngam un ko re convention ney ni reb e rran nib polo’ ma ga fal’eg rogom ni fan ko pi n’en ni ke ngongliy Jehovah nge ulung rok ni fan ngom. Mu guy rogon ni ngam pi’ e athamgil nga laniyan’ boch e girdi’ u daken e ngongol rom nib fel’, ma ga chag ko pi walag u fithik’ e felfelan’. Faan ga ra rin’ ni aray rogon, ma aram e rayog ni ngam lem ni bod be’ ni un ko convention fa binem e duw ni gaar, “Dariy ban’en nib fel’ ni bod e re n’ey!”
[Blurb ko page 4]
Dalip e wik u m’on ko convention ma gad ra wereg e invitation ko girdi’ ni bod ni gad ma rin’
[Blurb ko page 6]
Munmad rodad nge yaadad u nap’an e convention ngu tafen e abich e susun ni nge n’uf Jehovah
[Blurb ko page 7]
Mu turguy u wan’um ni ngam pi’ e athamgil nga laniyan’ boch e girdi’ u daken e ngongol rom nib fel’, ma ngam chag ko girdi’ u fithik’ e felfelan’
[Kahol ko page 4-7]
Boch Ban’en ni Yibe Puguran ni Fan ko 2011 District Convention
◼ Ngal’an e Muulung: Ra tabab e muulung ko 9:20 ni kakadbul. Ran bing e mab ko 8:00 ni kakadbul. Nap’an nra tabab e musik ma susun e ngad pared ko chiya rodad ya ke chugur ni nge tabab e muulung.
◼ Chiya ni Yibe Tay ni Fan Ngak Boch e Girdi’: Kemus ni ngan tay e chiya ni fan ko girdi’ nu tabinaw rodad nge piin ni ma un ngodad nge piin ni gadad ma fil e Bible ngorad.—1 Kor. 13:5.
◼ Abich ko Misiw’: Ngam fek e ggan rom ko misiw’ ya nge dab mu chuw ko convention. Rayog ni ngam tay e ggan nga lan e cooler nib achig.
◼ Salpiy ni Ayuw: Rayog ni ngad daged ni gad be tayfan e yaram ko convention ni aram e ngad pied e ayuw ni fan ko fare maruwel ni yibe tay u ga’ngin yang e fayleng. Ra kan pi’ ni check ma ngan yoloy e “Christian Congregation of Jehovah’s Witnesses” ngay.
◼ Maad’ad: Faanra maad’ad be’ nib tomgin u nap’an e convention ma nga nog ngak reb e attendant, ya nge yog nni ayuweg. Faanra ba t’uf ma nge callnag e 911.
◼ Falay: Faanra ba t’uf e falay rom ma ga fek ya dariy ko convention.
◼ Fagi Babyor ni Please Follow Up (S-43): Susun ni ngan fanay fare babyor ni ngan weliy u murung’agen be’ ni kan machibnag u nap’an fare convention. Piin publisher e susun nra bagayad ma bay reb fa l’agruw e re babyor ney rok u nap’an ni ngar bad ko convention. Faanra kan yoloy ke m’ay ma ngan pi’ e re babyor ney nga Book Room ara en ni secretary ko ulung u nap’an ni kam sul ko binaw rom.—Mu guy fare November 2009 Machib ko Gil’ilungun, ko page 4.
◼ Tafen e Abich: Ngam n’uf Jehovah ko ngongol rom nib fel’ u lan tafen e abich. Ngam tay reb e salpiy ni fan ko piin ni yad ma maruwel u rom ni faanra ba puluw.
◼ Ngam Pi’ e Ayuw nga Boch e Maruwel: Ra gel e felfelan’ rodad u nap’an e convention ni faan gad ra pi’ boch e ayuw ko maruwel. (Acts 20:35) Piin ni baadag ni ngar uned ngay e susun ni nga ranod ko Volunteer Service Department u lan fare convention. Pi bitir ni dawori gaman 16 e duw rorad e rayog ni ngar uned ko gallabthir rorad ara yugu be’ nib ilal ko maruwel.
[Kahol ko page 5]
Uw Rogon ni Gad Ra Wereg fare Invitation?
Gad be guy rogon ni ngad wereged e babyor u ga’ngin yang e gin ni gad ma machib riy, ere susun ni dabi yoor ban’en ni ngad weliyed. Rayog ni ngad gaargad: “Siro’. Baaray reb e invitation ni gamad be wereg u ga’ngin yang e fayleng. Baaray e girom e babyor. Rayog ni ngam fek ngam beeg.” Keru’ e gi invitation nem e ra pug e tafinay ko girdi’, ere mu guy rogon nge guy u nap’an ni ga ra pi’ ngak. Mu pi’ e gi babyor ney nib felfelan’um ngay. Nap’an ni yibe wereg e pi invitaion ney ko weekend maku rayog ni ngan chagiy e magazine ngay.