Ngongol Nra Pining e Sorok Ngak Got

1. Mang fan nib gagiyel e Pi Mich Rok Jehovah u nap’an ni yad ra un ko district convention?

¹ Nap’an nra guydad e girdi’, mab mom ni ngar nanged ni gad be un nga reb e district convention. Girdien e news e yad ma yog ngak girdien fare binaw ni gad bay u rom. Pi walag e ba ga’ ni yad ma par u hotel ma yad ma yan nga tagil’ e abich, ma ma guy girdien fare binaw ni be fanay e pi walag e convention badge. Bay boch e fonow nrayog ni nge ayuwegdad ni nge yag ni ngad pininged e sorok ngak Got u daken e ngongol rodad nib fel’ u nap’an ni gad bay ko fare binaw ni yira tay e convention riy.​—1 Pet. 2:12.

2. Uw rogon ni ngad n’ufed Got u daken e munmad rodad nib yalen u nap’an ni gad bay ko fare binaw ni yira tay e convention riy?

² Rogon e Munmad nib Yalen: Ba ga’ nib fel’ u wan’ e girdi’ e munmad rodad nib yalen u nap’an ni gad ra un ko convention. Machane, ku ra nang e girdi’ ni ku gad ba thil ni faanra ba yalen e munmad rodad u nap’an ni nga darod ni ngad pared nga reb e hotel, nge nap’an ni gad ra yan nga bang ko abich, nge nap’an ni gad ra yan nga kantin ko chuway’. Ere, yugu aram rogon nde t’uf ni ngad fanayed e mad ni gad ma chuw ngay u nap’an e convention, machane ba puluw ni ngad munmad gad nib yalen. Ya thingari guy e girdi’ ni gad ba thil ko girdi’ ndawor nanged e tin riyul’. (Rom. 12:2) Ma kub t’uf ni ngad fanayed e badge rodad, ya nge nang e girdi’ ni ngad uned ko convention, ma rayog ngki mab e kanawo’ ni ngan machib, maku rayog ni nge poydad e pi walag.

3. Uw rogon ni ngad daged e gum’an’ nge ngongol nib fel’?

³ Gum’an’ nge Ngongol nib Fel’: Ngiyal’ ney e ke yoor e girdi’ ni kemus ni yad e yad be lemnagrad ma dabkur pininged e magar ngak be’, ere nap’an ni gad ra dag e gum’an’ nge ngongol nib fel’, ma rayog ni ngad fal’eged laniyan’ e piin ni yad be guydad ni bod rogon girdien e maruwel ko hotel nge tagil’ e abich! (2 Tim. 3:1-5) Nap’an ni gad ra tay e chiya ni fan ngodad ara ngad uned ko line ni ngad feked e pi babyor nib beech, mab t’uf ni ngad lemnaged yugu boch e girdi’. (1 Kor. 10:23, 24) Tomuren ni ke un reb e pumoon nga reb e convention ko yay nsom’on me yog ni gaar, “Dariy ban’en ko pi welthin ni ku gu manang e rofen nem, machane n’en ni gu baadag, ma dab gu pagtalin e aram e ngongol ni dag e Pi Mich Rok Jehovah.”

4. Mang fan ni ngad lemnaged rogon ni ngad pied e ayuw u nap’an e convention nfaanra rayog?

⁴ Piin nib M’agan’rad Ngay ni Ngar Pied e Ayuw: Tin riyul’ e Kristiano e yimanangrad ni yad baadag ni ngar pied e ayuw. (Ps. 110:3) Gur, rayog ni ngam pi’ e ayuw ko pi maruwel u nap’an e convention? Nap’an reb e convention, ma sogonap’an 600 e pi walag ni pumoon nge ppin e kar uned ko klin u m’on ni tabab fare convention. Girdien e maruwel e rogned nra gaargad: “Ireray ban’en ni kug gingad ngay, ya ba mo’maw’ ni nggu lemnaged urngin e pi girdi’ ney ni ngar ognaged yad ni ngar uned ko maruwel.” Ri gadad ba felfelan’ ni ngad uned ko bin migid e convention ko duw ni 2013, ya gathi kemus ni ngad motoyilgad ma gad fil boch ban’en ni yib rok Got, ya ku rayog ni ngad pininged e sorok ngak.

[Kahol ko page 3-6]

Boch Ban’en Ni Yibe Puguran ni Fan ko District Convention ko 2013

◼ Ngal’an e Muulung: Yira bing e mab ko fare naun ni yira tay e convention riy ko 8:00 ni kakadbul. Ra tabab e musik ni gubin e rran ko 9:20. Ma aram e susun ni gubin e girdi’ ni ngar pared ko chiya rorad ya nge yag ni tabab e muulung nib yaram. Yira yog murung’agen e bin tomur e tang nge meybil ko rofen ni Sabado nge Biyernes ko 4:50 ni mithigyal’, ma ra Madnom ma yira yog e bin tomur e tang nge meybil ko 3:35 ni mithigyal’.

◼ Gin ni Ngan Tay e Karrow riy: U gubin yang ni yira tay e convention riy mab mudugil e gin ni ngan tay e karrow riy. Dariy puluwon e gin ni ngan tay e karrow riy ma en nib m’on e ba mudugil ni bay e gin nra tay e karrow rok riy. Yu ngiyal’ mab mo’maw’ ni ngan pirieg bang ni ngan tay e karrow riy, ere faanra rayog min yan u taareb e karrow. Bay e gin ni kan dugliy ni fan ngak e piin ni yad ba mugutgut, ma ra bay e babyor ko karrow rorad ni be micheg e re n’ey ma rayog ni ngar ted e karrow rorad ko gin ni kan fal’eg ni fan ngorad.

◼ Chiya ni Kan Tay ni Fan Ngak Boch e Girdi’: Chiya ni ngan tay e kemus ni fan ngak girdien reb e tabinaw ara piin ni kar uned u taareb e karrow ara piin ni yad be un ko fol Bible. Ba mudugil urngin e chiya ni fan ngak e piin pilibthir nge piin ni yad ba m’ar, ere sana dabiyog ni ngar pared urngin girdien e tabinaw rorad u taabang. Ere ba t’uf ni ngan tay e pi chiya nem ni fan ngorad nge piin ni be ayuwegrad.​—1 Kor. 13:5.

◼ Abich ko Misiw’: Ngan fek e ggan ko misiw’ ya nge dab ni chuw ko gin ni yibe tay e convention riy. Rayog ni ngan tay e ggan nga lan reb e cooler nib achig.

◼ Salpiy ni Ayuw: Rayog ni ngad daged ni gad be tayfan e yaram ko convention ni aram e ngad pied e ayuw ni fan ko fare maruwel ni yibe tay u ga’ngin yang e fayleng. Ra kan pi’ ni check ma ngan yoloy e “Watch Tower” ngay.

◼ Falay: Faanra ba t’uf e falay rom ma ga fek, ya dariy ko convention.

◼ Sus ni Yira Fanay: Gubin e duw ma bay be’ ni ma maad’ad ni bochan e miti sus ni kan fanay, nib ga’ ni high heeled. Bfel’ ni ngam mel’eg e sus nra yan em ngay nib fel’ rogon ma ga ra yan ko gin nde pach, nge tawo’ ma dab mu dol riy.

◼ Girdi’ nib Mo’maw’ ni Ngar Rung’aged Ban’en: Yira tay fare program ko convention ko FM radio frequency. Ma faanra ga baadag ni ngam motoyil ngay, mab t’uf ni ngam fek reb e FM receiver nge earphone riy.

◼ Baby Strollers nge Lawn Chairs: Dab ni fek e Baby strollers nge lawn chairs ko gin ni bay e convention riy. Machane rayog ni ngan tay e chiya ni fan ko piin bitir nga tooben e gallabthir rorad ni ngar pired ngay.

◼ Florida: Pi convention rodad e ba ga’ ni yima tay ko pi naun ni bay e air con riy mab man e winda riy. Ere rayog ni ngad daged e t’ufeg nfaanra dab da fanayed e florida nib elmerin bon nrayog ni nge magawonnag boch e girdi’.​—1 Kor. 10:24.

◼ Babyor ni Please Follow Up (S-43): Susun ni ngan fanay e re babyor ney nfaanra kan pirieg be’ ni baadag e machib u nap’an e convention. Ra kan yoloy e re babyor ney ma ngan pi’ nga Book Room ara ngan pi’ ko en ni secretary ko ulung u m’on ni ngam sul ko binaw rom.

◼ Tafen e abich: Mu pining e sorok nga fithingan Jehovah u daken e ngongol rom nib fel’ u nap’an ni ga bay u tafen e abich. Ngam munmad nib fel’ rogon. Mu tay e tip nfaanra ireray e n’en ni yima rin’.

◼ Hotel:

(1) Ra kemus ni taareb e singgil e ngam par riy, ma ireram e bin ni nga mog ni ngan tay rom. Ra reb e singgil ma bay urngin e girdi’ nrayog ni nge par riy.

(2) Faanra dawori buch ban’en ngom nib tomgin, ma dab mu siyeg ni nge dab mu par ko fare singgil ni kam pi’ puluwon. Ma faanra kam nang ndab kum par ko fare singgil, mag non ngak girdien fare hotel ya nge yag ni ngki par be’ ko fare singgil. (Matt. 5:37) Ma faanra dab kum par ko fare singgil mab t’uf ni nge yag reb e cancellation number ngom. Dab ni fulweg e salpiy ni kam depositnag nfaanra ka mog ndab kum par ko fare singgil ni taareb e rran u m’on ni ngam par riy.

(3) Ga ra fanay e debit ara credit card rom, ma girdien fare hotel e ra “kol” e salpiy rom ni nge yan nga puluwon fare singgil ni kam par riy nge ku boch ban’en u langgin nrayog ni ngam kirebnag. Ma dabiyog ni ngam fek e re salpiy nem ni kar koled nge mada’ ko ngiyal’ ni kam pi’ puluwon urngin ban’en.

(4) Ngam fek e laggage cart ko ngiyal’ nib t’uf rom, ma ga sulweg nib papey ya nge yag ni ngki fanay be’.

(5) Faanra ireray ban’en ni yima rin’ ko binaw rom, ma ngam pi’ e salpiy ara tip ngak girdien e maruwel ko fare hotel u nap’an ni yad ra ayuwegem ko chugum rom ara ngar klinnaged lan e singgil rom.

(6) Ra bay e singgil nrayog ni ngan lum riy, ma rayog ni ga ra lith e ggan rom.

(7) Bay e ggan ni yima pi’ ni fan ko kakadbul nge coffee ara ice, mab fel’ ni dab ni gathathay ara ngan adbey, ya fan ngak e girdi’ ni yad be par ko fare hotel.

(8) Gubin ngiyal’ ni ngan dag wom’engin gelngin Got nib thothup u nap’an ni yibe non ngak girdien e maruwel ko fare hotel. Ya boor e girdi’ ni yad be ayuweg, ma yad baadag ni ngad golgad ngorad, ma ngad gum’an’niged gadad.

(9) Piin gallabthir e ba t’uf ni gubin ngiyal’ ni ngar fal’eged i yaliy e bitir rorad u nap’an ni yad be yan ko elevator, nge lan e swimming pool, nge lan e lobby, nge lan tafen e exercise.

(10) Puluwon reb e singgil reb e rran e bay ko fare Recommended Lodging List ndariy e tax riy. Faanra ka nog ni ngam pi’ puluwon e singgil rom ni boor, mag non ngak girdien e Rooming Department ko convention nib papey.

(11) Faanra sum reb e magawon ni bay rogon ko fare singgil ni ga be par riy ko fare hotel, mag non ngak girdien e Rooming Department ko convention ya nge yag ni ngar ayuweged gur.

◼ Volunteer Service: Demtrug be’ ni baadag ni nge pi’ e ayuw, mab fel’ ni nge non ngak girdien fare Volunteer Service Department ko convention. Piin bitir nib lich e duw rorad ko 16 e ku rayog ni ngar pied e ayuw, ma rayog ni ngar maruwelgad e gallabthir rorad u taabang ya nge yag ni ngan fal’eg i yaliyrad.