Boch Ban’en ni Yibe Puguran ni Fan ko Convention
Ngal’an e Muulung: Yira bing e mab ko gin ni ngan tay e muulung riy ko 8:00 ni kakadbul. Ma ra tabab e musik ko 9:20 ni kakadbul. Nap’an nra tabab e musik, ma susun ni ngad pared ko chiya rodad ya nge yag ni tabab e muulung nib fel’ rogon. Yira mu’ ko muulung ko 5:00 ni blayal’.
‘Ngan Pining e Sorok ngak Jehovah’ u Daken e Tang: Girdi’ rok Got kakrom e ur pininged e sorok ku Jehovah u daken e tang. Maku arrogon e ngiyal’ ney ni pi tang ni yima yon’ e ku bang ko liyor ni gad ma tay ngak Jehovah. (Ps. 28:7) Ere, u m’on ni nge tabab e regional convention ma bay e musik ni yira cheleg ni nge motoyil e girdi’ ngay. Re musik ney ni yira cheleg e gathi kemus ni ngan motoyil ngay, ya be ayuwegdad ni ngad filed murung’agen Jehovah nge rogon ni ngad liyorgad ngak. Ere, nap’an nra yog fare chairman ni dabki n’uw nap’an me tabab fare musik, ma aram e ngiyal’ nra be’ me gay e chiya ni nge par ngay me motoyil nib fel’ rogon ko fare musik ko bin ni ngan sabethin. Faan gad ra rin’ e re n’ey, ma be m’ug riy nib ga’ fan u wan’dad e maruwel nib gel ni ke tay e pi walag ko fare Watchtower orchestra. L’agruw yay u reb e duw ni ma yan e pi walag ni yad e yad be pi’ puluwrad nga Patterson, New York, ya nge yag ni ngar maruwelgad boch e walag u taabang mar fal’eged boch e musik ya nge yag ni ngad motoyilgad ngay u fithik’ e felfelan’. Tomuren ni yira motoyil ko re musik ney, ma aram e gubin e girdi’ ni ngar pininged e sorok ngak Jehovah u daken e tang.
Gin ni Ngan Park Riy: Faanra ba milfan e gin ni ngan park riy ko ulung, ma aram e demtrug e gin nrayog ni nge park be’ riy ni be yan u rogon e en ni ke yib nib m’on. Ba ga’ nde ga’ e gin nrayog ni ngan park riy, ere faanra rayog ni nge yan boch e girdi’ u taareb e karrow mab fel’. Yigoo piin ni bay e babyor ko karrow rorad ni fan ko piin ni yad ba m’ar e rayog ni ngar ted e karrow rorad ko gin ni kan tay ni fan ngak e piin nib m’ar.
Chiya ni Yibe Tay ni Fan Ngak Boch e Girdi’: Nap’an ni yira bing e mab ni kakadbul, ma dab mu gurgur ngam man ko gin ni ngan par riy ni ngam mel’eg e re chiya ni ga baadag ni nge m’ug ni gowa yibe sagreng ko mini’ e nge par ko gin th’abi fel’. Faanra ud paged fadad u boch ban’en ni bochan e ngad ayuweged boch e girdi’ ma aram e ra m’ug ni gadad e tin riyul’ e Kristiano, ma re n’ey e rayog ni nge k’aring e girdi’ ni ngar pininged e sorok ngak Got. (John 13:34, 35; 1 Kor. 13:5; 1 Pet. 2:12) Yigoo chon e tabinaw rodad, ara piin ni gad be yan u taab karrow, ara piin ni gad be fil e Bible ngorad e rayog ni ngad ted e chiya ni fan ngorad. Dab mu tay e chugum rom u daken e chiya ndamur lemnag ni ngam par ngay. Faan ga ra fol ko pi yaram ney ma aram e ra mom rok boch e girdi’ ni ngar pirieged e chiya ni ngar pared ngay. Bay boch e chiya ni kan tay ni fan ngak e piin pilibthir nge piin ni yad ba m’ar. Bochan nde yoor e pi chiya ney, ma kemus ni taabe’ ara l’agruw ni’ ni yow be ayuweg facha’ ni ke pilibthir ara ke m’ar e rayog ni ngar unew ko par ko pi chiya ney.
Nge Yalen e Munmad Rodad: Rogon e munmad rodad u nap’an e convention e thingari yalen ma dabi m’ug riy rarogon e munmad ko girdi’ nu fayleng. (1 Tim. 2:9) Mus ko ngiyal’ u m’on nge tomuren fare convention u nap’an ni gad ma yan ni ngad rin’ed boch ban’en ni ngad chuweged e chalban rodad ngay ma susun nga i yalen e munmad rodad. Ere, gad ra felfelan’ ngay ni ngad fanayed e badge rodad ma dab da tamra’gad ngay ni ngad machibnaged e piin ni yad ra fith e deer ngodad. Rogon e munmad rodad nge ngongol rodad u nap’an ni gad ra un ko convention e gathi kemus nra k’aring e girdi’ ni ngar adaged ni ngar rung’aged fare thin nib fel’, ya ku ra felfelan’nag gum’irchaen Jehovah.—Zef. 3:17.
Ngan Gonopiy Rogon ni Ngan Fanay e Cell Phone nge Ipad nge Ku Boch Ban’en: Gad ma dag ni gad ma tay fan e girdi’ u nap’an e convention ni faan gad ra achignag lingan e cell phone rodad ara tablet ara yugu boch ban’en ya nge dabi magawonnag yugu boch e girdi’. Faan gad ra fanay e camera ara video recorder ara yugu reb e ban’en ma thingar dab da magawonnaged boch e girdi’. Ku gad be tay fan e girdi’ ni faanra dab ud textgad ara ud e-mailgad u nap’an ni yibe muulung.
Abich ko Misiw’: Mu fek e ggan rom ko misiw’ ya nge dab mu chuw ko gin ni yibe tay e convention riy. Rayog ni ngam fek e cooler nib achig ni bay e ggan rom riy mag tay nga tan e chiya rom. Dabiyog ni ngan fek e cooler nib ga’ ara melor nib ga’ nga lan e gin ni ngan muulung riy.
Salpiy ni Ayuw: Rayog ni ngad daged ni gad be tayfan e yaram ko convention ni aram e ngad pied e ayuw ni fan ko fare maruwel ni yibe tay u ga’ngin yang e fayleng. Faanra ke pi’ be’ e check ma nge yoloy e “Watch Tower” ngay.
Falay: Faanra ba t’uf e falay rom mag fek, ya dariy ko gin ni yira tay e convention riy. Piin ni yad ma fek e chusa ni fan ko piin ni bay e m’ar ko suga rorad e nap’an ni yad ra mu’ i fanay e pi n’ey ma thingar ra n’aged ko gin ni yima n’ag ngay, ma dab ra n’aged nga tafen e dow ko gin ni yibe tay e convention riy ara hotel ni yad be par riy.
Boch Ban’en ni Ngan Kol Ayuw Riy: Ngan kol ayuw ndab ni sirgig ara ni dol’. Gubin e duw ni bay be’ ni ke maad’ad ni bochan e sus ni ke chuw ngay nib ga’ ni high heel ara sus nib tolang wurilen ay. Ba fel’ ni ngan mel’eg e sus nrayog ni ngan chuweg ey ngay nib fel’ rogon, ma nap’an yira yan u bang nde pach, ara kan yan ko tawo’ ma dab ni dol’ riy.
Girdi’ nib Mo’maw’ ni Ngar Rung’aged Ban’en: Faanra yira weliy fare program ko convention ko FM radio frequency, mab t’uf ni ngam fek reb e FM radio nib achig nge earphone riy.
Baby Strollers nge Lawn Chairs: Dab ni fek e baby strollers nge lawn chairs nga lan e gin ni yira tay e convention riy. Machane, rayog ni ngan tay e chiya ni fan ko piin bitir nga tooben e gallabthir rorad ni ngar pired ngay.
Florida: Yooren e convention e yima tay ko naun ni bay e air con riy mab man e winda riy. Ere, ba fel’ ni ngad thiygad ko florida nde ga’ bon ya rayog ni nge magawonnag boch e girdi’.—1 Kor. 10:24.
Babyor ni Please Follow Up (S-43): Susun ni ngan fanay e gi babyor ney u nap’an ni kan pirieg be’ ni baadag e machib u nap’an e convention. Ra kam yoloy e re babyor ney ma ngam pi’ nga Book Room ara ngam pi’ ko en ni ir e secretary ko ulung u m’on ni ngam sul ko binaw rom.
Tagil’ e Abich: Mu pining e sorok nga fithingan Jehovah u daken e ngongol rom nib fel’. Ngam munmad nib yalen. Mag tay e tip ni faanra ireray e n’en ni yima rin’.
Hotel:
Ra kemus ni taareb e singgil ni ngam par riy, ma ireram e bin ni nga mog ni ngan tay rom. Ra reb e singgil ma bay urngin e girdi’ nrayog ni nge par riy.
Dab mu siyeg ni ngam par ko singgil ni kam pi’ puluwon. Machane, faanra ke buch ban’en nib tomgin, ma dabkiyog ni ngam par ko re singgil nem, ma gog ko girdi’ ni yad be maruwel ko fare hotel ya nge yag nni pi’ e re singgil nem ku be’ ni nge par riy. (Matt. 5:37) Faanra dab kum par ko fare singgil, mab t’uf ni nge yag reb e cancellation number ngom. Faanra mog ndab kum par ko fare singgil u reb e rran u m’on ko rofen ni susun e ngam par riy, ma dab ni fulweg e salpiy rom.
Faanra kam fanay e debit ara credit card, ma yira kol e salpiy rom ni nge yan nga puluwon fare singgil ni kam par riy nge ku boch ban’en u langgin nrayog ni ngam kirebnag. Ma dabiyog ni ngam fek e salpiy ko account rom nge mada’ ko ngiyal’ ni kam chuw ko fare hotel.
Mu fek e luggage cart ko ngiyal’ nib t’uf rom, ma ga sulweg nib papey ya nge yag ni ngki fanay be’.
Faanra ireray e n’en ni yima rin’ ko binaw rom, ma ga pi’ e salpiy ara tip ngak girdien e maruwel ko fare hotel u nap’an ni kar ayuweged gur ko chugum rom ara u nap’an ni kar klinnaged e singgil rom.
Goo singgil ni yira pagey ni ngan lum riy e ir e rayog ni ngam lum u langgin.
Bay e ggan ni yima pi’ ni fan ko kakadbul, nge coffee, nge ice. Ere, ba fel’ ndab ni gothogothey ara ni adbey e pi n’ey ya fan ko girdi’ ni yad be par ko fare hotel.
Gubin ngiyal’ ni ngan dag wom’engin gelngin Got nib thothup u nap’an ni yibe non ngak girdien e maruwel u hotel. Boor e girdi’ ni yad be ayuweg, ere yad baadag ni ngan gol ngorad, min gum’an’ u puluwrad.
Piin gallabthir e ba t’uf ni ngaur fal’eged i yaliy e bitir rorad ni gubin ngiyal’ u nap’an ni yad be yan ko elevator, ngu nap’an ni yad bay ko swimming pool, ngu lobby, nge gin ni yima exercise riy.
Puluwon e singgil ni bay ko fare Recommended Lodging List e aram puluwon e pi singgil nrayog ni ngan par riy nde un e tax ngay. Faanra yugu ba pag urngin puluwon e singgil ni ka nog ngom ni ngam pi’, ma gog ko Rooming Department ko convention nib papey.
Faanra ke sum e magawon ni bay rogon ko singgil ni ga be par riy ko fare hotel, ma gog ko Rooming Department ko convention ya nge yag nra ayuweged gur.
Volunteer Service: Demtrug be’ ni baadag ni nge pi’ e ayuw, mab fel’ ni nge non ngak girdien e Volunteer Service Department ko convention. Bitir nib lich e duw rorad ko 16 e ku rayog ni ngar pied e ayuw, ma rayog ni ngar maruwelgad e gallabthir rorad ara en ni yad be par rok u taabang ya nge yag ni un yaliyrad.