Reb E Kanawo’ Ni Kab Fel’

BE MAGAFAN’ e Pi Mich Rok Jehovah nga rogon ni ke war e tirok Got ban’en u wan’ e girdi’ u fayleng nge rogon ni ke garer iyan e ngongol nde yalen nge machib ko teliw nde mudugil. Ma aram fan ni yu ngiyal’ e yima yog e fundamentalist ngorad. Machane aram rogorad fa? Danga’. Yugu aram rogon ni ba mudugil u wan’rad e machib ko teliw rorad, ma gathi yad e piin ni fundamentalist nga rogon ni yima weliy fan e re thin nem. Ya dar towasariyed e pi tayugang ko am ni ngar motochiyelnaged ban’en ni ke mich u wan’rad, ma dar mahlgad u kanawo’ ko girdi’ nde taareb lanin’rad. Kar pirieged reb e kanawo’ ni kab fel’. Yad be folwok rok e En ni Be Pow’iyrad ni Jesus Kristus.

Ke mich u wan’ e Pi Mich Rok Jehovah ni bay e tin riyul’ ko teliw u Bible. (John 8:32; 17:17) Machane be fil e Bible ngak e Kristiano ni nge ngongliy e ngongol nib gol, fel’, sumunguy, ma bpuluw e lem riy​—ni aram rarogon ndabi pag rogon. (Galatia 5:22, 23; Filippi 4:5) U lan e babyor ni yoloy James u Bible, e yibe pi’ e athamgil nga laniyan’ e pi Kristiano ni nge yog “fare gonop ni yib u tharmiy” ngorad, ya ba “machalbog, ma ku er rogon ni ma fl’eg thiliy nge aw e gapas riy, ma ma sumunguynigey, ma ma fl’eg owchey nge thin ngak e girdi’, ma ba sug ko runguy ma ma k’uf ni ngongol nib fel’.” Ma aram me gaar James: “Ma tin nib mat’aw e ngongol e wom’engin ni yib ko awoch ni piin ni ma fl’eg thiliy e ra yunged u fithik’ e gapas.”​—James 3:17, 18.

Der pag e Pi Mich Rok Jehovah talin ni i tiyan’ Jesus ko tin nriyul’. Ya i yog ngak Pontius Pilate ni gaar: “Ni gargelnigeg ngaray nga fayleng ni bochan e nggu weliy morngaagen e tin riyul’.” (John 18:37) Yugu aram rogon ni ir be’ nib pasig ni nge mon’ognag e tin riyul’, de guy rogon ni nge towasariy e girdi’ ni ngar folgad riy. Ya, ke guy rogon ni nge pug e tafinay rorad nge gum’ercha’rad. Manang Jesus ni “mmat’aw ma ba fel’” e En ni Chitamangiy u tharmiy, ma ra turguy e ngiyal’ nge rogon nra chuweg e tin ni googsur nge tin nde mat’aw u fayleng. (Psalm 25:8) Ere de guy rogon ni nge towasariy e girdi’ nde taareban’rad ngak. Machane ke guy e pi tayugang ko teliw ko ngiyal’ nem ni yad be towasariy Jesus ni nge lekrad.​—John 19:5, 6.

Ba mugudil e Pi Mich Rok Jehovah ko machib ko teliw rorad, ma yad be ngongliy e gafarig nib fel’. Ni wod e apostal Paul, ke mich u wan’rad ni ke mus ni “taareb e Somol, ma yigoo taareb e michan’, ma taareb e taufe” ni bay. (Efesus 4:5) Maku yad manang e thin ni yog Jesus ni gaar: “Garog ko yafos e ba wen’in, ma kanawo’ ni yan ngay e mmo’maw’, ma ba lich e girdi’ ni be pirieg.” (Matthew 7:13, 14) Machane, dabra towasariyed yugu boch e girdi’ ni ngar folgad ko pi n’en ni ke mich u wan’rad. Ya yad be folwok rok Paul ma yad be “wenig” ngak gubin e girdi’ ni baadag ni ngar “manged pi tafager rok.” (2 Korinth 5:20) Baaray e bin ni kab fel’ e kanawo’.

Ri ba thil rogon ni ma maruwel e fundamentalism ko teliw e ngiyal’ ney. Piin ni fundamentalist e ma maruwel u boor e kanawo’​—nib muun ngay e cham​—ni fan ni ngar towasariyed e girdi’ ko n’en nib mich u wan’rad. Faan yad ra rin’ ma aram e kar manged bang e am ko politics. Machane, yog Jesus ngak pi gachalpen ni susun ni gathi yad “bang ko fayleng.” (John 15:19; 17:16; James 4:4) Bpuluw ko pi thin nem, ma ma par e Pi Mich Rok Jehovah u mathilin e pi magawon ko politics ko pi am. Ke weliy e simbung nu Italy ni Foripagina fithingan ni darur “towasariyed e girdi’ ni ngar rin’ed ban’en; rayog ni ngan fol ko pi n’en ni yad ma yog ara ngan pag e thin rorad.” Mang wenegen ni yib riy? Fare thin nib gapas nu Bible e be pug e tafinay rok urngin mit e girdi’ nu fayleng, ni mus ko piin ni yad e fundamentalist kafram.​—Isaiah 2:2, 3.

Reb e Fayleng nib Fel’ e Gafarig Riy

Manang e Pi Mich Rok Jehovah ni dabiyog ni nge pithig e girdi’ e pi magawon ni bay ni be magafan’ e piin ni fundamentalist ngay. Dabiyog ni ngam towasariy be’ ni nge mich Got u wan’ ara nge mich u wan’ e pi n’en ni ke mich u wan’um. Lem ni aram rogon e ke yan i aw ko boch e magawon kakrom, ni bod e Crusades, nge fare Inquisition, nge rogon ni kan guy rogon ni ngan “thiliyeg” rogon e Indian nu Meriken. Machane, faanra be pagan’um ngak Got, ma ra m’agan’um ngay ni nge par e magawon u pa’ Got.

Be weliy e Bible ni ke dugliy Got e tayim ni nge th’ab e girdi’ e pi motochiyel rok ma aram me k’aring e gafgow nge amith. Ke chugur ni nge m’ay e re tayim nem. Be gagiyeg Jesus nib Pilung u Gil’ilungun Got u tharmiy e ngiyal’ ney, ma dabki n’uw nap’an ma ra chuweg e re Gil’ilungun nem e pi am ko girdi’ ma ra gagiyegnag e girdi’ u fayleng u gubin e rran. (Matthew 24:3-14; Revelation 11:15, 18) Angin nra yib riy e ra paradis iyan e fayleng ma ra yoor e tin nib mat’aw nge gapas riy. Nap’an e ngiyal’ nem ma ra nang gubin e girdi’ rogon ni ngar liyorgad ngak fa bin riyul’ e Got. Ya “piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.” (Psalm 37:29) Gafarig ni bod e runguy, thin nriyul’, ngongol nib mat’aw, nge tin nib fel’ e ra gel rok gubin e girdi’ ni yad be fol rok Got.

I sap fa en ni yoloy e psalm ko re ngiyal’ nem me gaar: “Ke chag nga taabang e runguy nge tin nriyul’; ma tin nib mat’aw nge gapas​—e kar falangow. Tin nriyul’ e ra yoor u fayleng, ma tin nib mat’aw e ra sap nga but’ u tharmiy. Maku, Jehovah e re pi’ e tin nib fel’, ma ra yib angin e n’en ni gad be maruweliy u pa’dad. U p’eowchen ma ra yan e tin nriyul’, ma ra fl’eg rogon ko yan rok.”​—Psalm 85:10-13.

Yugu aram rogon ndabiyog ni ngad thiliyeged rarogon e fayleng e ngiyal’ ney, machane ra bagadad ma rayog ni nge yog e tirok Got ngak. Ere rayog ni ngad guyed rogon ni ngad woded e girdi’ ni baadag Got ni ngar liyorgad ngak u lan e bin nib biech e fayleng. Ma aram e ngiyal’ nra par u fithik’ e girdi’ nib sumunguy ni ke weliy e en ni yoloy e psalm u morngaagen ni i gaar: “Piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba falfalan’.” (Psalm 37:11) Ra ayuweg Got e girdi’ ni ma rin’ e tin nib m’agan’ ngay ma ra flaabnagrad, ma i micheg nra yog e tin nib fel’ ngorad nga m’on. I gaar e apostal John: “Re fayleng ney nge urngin ban’en ni bay riy ni be yim’ e girdi’ ni bochan e bayi m’ay, machane en nra rin’ e tin nib m’agan’ Got ngay e ra par nib fos ndariy n’umngin nap’an.”​—1 John 2:17.

[Sasing ko page 7]

Be pining e Pi Mich Rok Jehovah ni nge nang urngin e girdi’ fare thin nib fel’ u morngaagen Gil’ilungun Got