Mu Gayiy E Bin Riyul’ E Gapas Ma Ga Par Riy!

“En ni ba adag ni ngi par nib falfalan’, . . . e thingari pi’ keru’ ko tin nib kireb nge rin’ e tin nib fel’, ma thingari gayiy e gapas ngi i par riy.”—1 PETER 3:10, 11.

1. Mang thin nib gilbuguwan ni yog Isaiah nra riyul’?

“BAY ra pirdiiyed e pi sayden rorad ngar ngongliyed talin e maruwel riy ni ma gi’ e but’, mi yad yodoromnag e pi sarey rorad nge mang yar ni yima th’ab papa’ngin e woldug ngay. Pi nam e dab kur mahlgad bayay, ma dab kur fal’eged rogorad bayay ni fan ko mahl.” (Isaiah 2:4) Pi thin ney nib gilbuguwan e bay ko tochuch ko fare United Nations u New York City, machane yugu demtrug ma re ulung nem e de lebuguy. Machane ri ra riyul’ e pi thin nem ya aram e thin ni yog Jehovah Got.​—Isaiah 55:10, 11.

2. Mang e ra buch ko “tin ni bay yib e rran nga m’on,” ni be weliy morngaagen ko Isaiah 2:2, 3?

² Pi thin nem ko Isaiah 2:4 e aram bang ko reb e thin ko profet u morngaagen e bin riyul’ e gapas​—ma riyul’ ni be lebug ko ngiyal’ ney. U m’on ni kan weliy ni bay dabkun mahl ma dabkun fl’eg talin e mahl, ma be yog e re thin ko profet nem ni gaar: “Tin ni bay yib e rran nga m’on e re burey ni bay e tempel rok Jehovah riy e bayi par ni ir e ba th’abi tolang. Pire’ e nam ni bay ra bad ngay, ma girdi’ ko pi nam nem e bayi lungurad: ‘Nga darod ko fare burey rok Jehovah, ko tempel rok fare Got rok Jakob; ya ngad filed e n’en ni ba adag ni ngad rin’ed; mu udarod ko yu pa’ i kanawo’ ni ke turguy ni nga darod riy.’ Machib rok Jehovah e yib u Jerusalem’ ke par u Zion be non ngak e tirok e girdi’.”​—Isaiah 2:2, 3.

Rayog ko Girdi’ Nge Gapas Thilrad

3. Uw rogon me pig be’ nib tacham nge gapas?

³ U m’on nrayog ni nge lek e girdi’ kanawoen e gapas ma thingara filed e kanawo’ rok Jehovah. Faanra yira fol ko machib rok Jehovah ma aram e ra pingeg e lem nge ngongol ku be’ ma aram e rayog ku be’ nib tacham ni nge gapas laniyan’. Uw rogon nrayog e re n’ey? Roma 12:2 e begaar: “Dab mu folgad ko ngongol ni yibe rin’ u roy u fayleng, machane mpied gimed ngak Got nge piliyegmed, ni aram e kari piliyeg lanin’med ni polo’. Ma aram e rayog ni ngam nanged e tin nib m’agan’ Got ngay ni tin nib fel’, nib fel’ u wan’ Got ma rib yal’uw.” Faanra gad ra suguy lanin’dad ko pi motochiyel ni bay ko Thin Rok Got ma aram rogon ni gad ma piliyeg lanin’dad fa ngad pow’iyed nga yugu reb e kanawo’. Ngan fil e Bible u gubin ngiyal’ e ra ayuwegdad ngad rin’ed e re n’ey ma ra ayuwegdad ngad micheged e n’en ke m’agan’ Jehovah ngay, ma aram e rayog ni ngad guyed nib tamilang e kanawo’ ni thingar darod ngay.​—Psalm 119:105.

4. Uw rogon ni nge yin’ be’ e bin nib biech i pangin nib gapas nga daken?

⁴ Thin riyul’ ko Bible e gathi ke mus ni ma piliyeg lanin’dad ya ku ma piliyeg e ngongol rodad nge pangidad. Ma ayuwegdad ngad rin’ed e n’en ni yog apostal Paul ni gaar: “Ere mu n’iged pangimed ni kakrom ni ir e um pired riy ni fare pangin ni kakrom ni ar’ar nib kirb e bannag nge kirebnag . . . Gum’ircha’med nge lanin’med e thingari pig ni polo’ nge beech. . . Thingar mon’ed nga dakenmed e bin nib beech i gimed ni bod rogon e munmad, ni bin nib beech i gimed ni Got e sunumeg ni bod ir, ma ke gagiyel u daken e bin riyul’ e wok nib yal’uw ma mmat’aw ni ke yog ngomed.” (Efesus 4:22-24) Fare gelngin ni ma piliyeg lanin’uy e bay u fithik’ i lanin’uy. Ya ma pig me gel iyan rogon ni be gel iyan feni t’uf Jehovah rodad nge pi motochiyel rok, ma ma n’igin ngad manged e girdi’ nib gel ko tirok Got ban’en mab gapas.

5. Uw rogon nra ayuweg fare “motochiyel nib biech” ni pi’ Jesus ngak pi gachalpen ni ngar pared u fithik’ e gapas?

⁵ Rib t’uf ni ngan piliyeg lanin’uy ya arrogon ni yog Jesus ngak pi gachalpen u m’on fini yim’ ni gaar: “Nggu pi’ reb e motochiyel nib beech ngomed, nge bigimed me t’uf bigimed rok. Rogon ni um pired ni gimed ba t’uf rog, e aram rogon nthingar um pired nra bigimed ma ba t’uf rok bigimed. Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:34, 35) Aram rogon e t’ufeg ni dag Kristus nder siin, ma ma chugumiy e pi gachalpen nga taabang. (Kolose 3:14) Kari mus ni piin ni ke m’agan’rad ngay ni ngar folgad ko re “motochiyel ney nib beech” e ra yog fare gapas ni yib rok Got ngorad. Ma bay e girdi’ ko ngiyal’ ney ni yad be yodorom fa?

6. Mang fan ni ma par e Pi Mich Rok Jehovah u fithik’ e gapas, ni aram ban’en nib math keru’ ko girdi’ nu fayleng?

⁶ Pi Mich Rok Jehovah e yad ma athamgil ni ngar t’ufeged urngin e pi walag u gangin e fayleng. Yad e girdi’ u gubin e nam nu fayleng, machane dar ura uned ko magawon ko fayleng, ni mus u nap’an ni yibe diiliy lanin’rad ko politic nge teliw. Yad e girdi’ ni ke taareb lanin’rad, ma Jehovah e be skulnagrad, ma yad be par u fithik’ e gapas. (Isaiah 54:13) Yad ma par u mathilin e magawon ko politic, ma dar ura uned ko mahl. Boch i yad e immoy ni yad e piin tacham ma kar paged e re ngongol nem e chiney. Ya kar manged e Kristiano nib t’uf e gapas rorad, mi yad folwok rok Kristus Jesus. Ma yad ma fol ko n’en ni yog Peter ni gaar: “En ni ba adag ni ngi i par nib felfelan’ e thingari dab ki yog e thin nib kireb, ma thingari tal ndab ki i lifith l’ugun. Ma thingari pi’ keru’ ko tin nib kireb nge rin’ e tin nib fel’, ma thingari gayiy e gapas ngi i par riy.”​—1 Peter 3:10, 11; Efesus 4:3.

Piin ni Be Par u Fithik’ e Gapas

7, 8. Mu weliy morngaagen boch e girdi’ ni kar paged e mahl mi yad gayiy e bin riyul’ e gapas. (Kum weliy morngaagen yugu boch e girdi’ ni kam nang morngaagrad.)

⁷ Rami Oved e immoy faram ni reb e ga’ u ba ulung i salthaw ni ka nog e antiterrorist squad ngay. Kan fil rogon ngak ni nge li’ e pi toogor rok ngar m’ad. Kari passig ko nam rok ni piyu Israel nge mada’ ko ngiyal’ ni ke pirieg ni ke dabuy e pi rabbi ni nge leengiy be’ nu Asia, ya ir e Gentile ni girdi’ ni gathi yad e Jew. Ma aram me tabab ni nge gayiy e thin riyul’ ko Bible. Ma ke mada’nag e Pi Mich Rok Jehovah. Ur filed e Bible u taabang me mich u wan’ ni dabkiyog ni nge passig ko nam rok. Ya t’ufeg ko Kristiano e ra k’aring ni nge dabki un ko mahl me pag talin e cham me fil rogon ni nge t’ufeg e girdi’ ni gubin mit. Ma kari gin ngay u nap’an ni ke yib e babyor ngak ni be gaar, “Rami ni gur walageg nib t’uf rog”! Mang fan ni ke gin ngay? Ya en ni ke yoloy e re thin nem e reb e Mich nu Palestine. Begaar Rami: “Kari gu gin ngay ya yu Palestine e yad e pi toogor rog, ma ireray bagayad ni be yog ni gag ‘walagen.’” Chiney ma Rami nge leengin e yow ma par ko bin riyul’ e gapas u kanawo’ rok Got.

⁸ Georg Reuter, e immoy ko salthaw nu German ni kar ranod nga Russia u fithik’ e yargel u nap’an e bin l’agruw e mahl ko fayleng. Ma de n’uw nap’an nga tomren me kankanan’ ko n’en ni be yog Hitler ni be lemnag ni nge gagiyegnag e fayleng ni polo’. Nap’an ni ke sul nga tafen u tomren fare mahl, me tabab i fil e Bible u taabang ko Pi Mich Rok Jehovah. I yoloy ni gaar: “Chiney ma be tamilang iyan u wan’ug. Kug nang fan ni gathi Got e be n’igin urngin e ma li’ girdi’ . . . ma kug fil ni ke m’agan’ug ngay ni ra fl’eg Got gangin e fayleng me mang paradis ma piin ni ma fol rok e ra par riy ndariy n’umngin nap’an. . . . Ke uf Hitler u morngaagen fare ‘Gagiyeg ko Biyu’ e Duw’ rok machane kari mus ni 12 e duw ni ke gagiyeg​—ma rib kireb! Ya Kristus ma gathi Hitler. . . e ra gagiyegnag e fayleng u lan reb e biyu e duw.” Chiney ma ke pag 50 e duw ni be maruwel Georg ni ir e ta mol’og ko gapas ma be un ko re maruwel nem nib full-time.

9. Uw rogon ni be micheg e n’en ni buch ko Pi Mich Rok Jehovah u Nazi Germany ni dar rusgad ma yad ba gapas?

⁹ Nap’an e gagiyeg ko Nazi me par e Pi Mich Rok Jehovah u Germany nib yul’yul’ ku Got mar pared u mathlin e magawon ko pi nam, me ere chiney ni ke pag 50 e duw nga tomren ma aram e mich riy ni ba t’uf Got rorad ma yad ba adag e gapas. Fare booklet ni fl’eg fare United States Holocaust Memorial Museum u Washington, D.C., e begaar: “Girdi’ u tan e gagiyeg ko Nazi e ur gafgownaged e Pi Mich Rok Jehovah nib elmirin. . . . Baga’ ni dar rusgad ya dar paged e teliw rorad, ni yugu demtrug rogon ni yibe li’rad, kan gafgownagrad u lan e concentration camp ma boch i yad e kan li’rad kar m’ad, ma aram ma boor e girdi’ ni ur guyed e re n’em e ur ted farad.” Miki gaar: “Nap’an ni kan pag e girdi’ ko pi camp nem me ul’ul’ e Pi Mich Rok Jehovah ko maruwel rorad mi yad non ngak urngin e girdi’ min machibnagrad.”

Baga’ Rogon ni ra Thil

10. (a) Mang e ba t’uf ni nge thil ni nge yib e bin riyul’ e gapas? (b) Mang e be yog ko Daniel u morngaagen?

¹⁰ Be lemnag e Pi Mich Rok Jehovah ni rayog ni ngar feked iyib e gapas ya ngar pingeged e girdi’ ni boor ngar uned ko Kristiano mar pared u mathilin e magawon ko pi nam fa? Danga’! Ra nge sul e gapas nga fayleng ma kab baga’ e n’en nib t’uf ni ngan thiliyeg. Be mang e re n’em? Gagiyeg ko girdi’ ni ma ruw raba’nagey, ma ma gafgownagey, ma ba wagey e thingari chuw me yib e gagiyeg ko Gil’ilungun Got nga luwan, ya arrogon ni fil Jesus ko pi gachalpen ni ngar yibilayed. (Matthew 6:9, 10) Machane uw rogon nra buch e re n’em? Ke pig i changar rok Daniel ni profet me tamilangnag ni nap’an e tin tomren e rran ma Gil’ilungun Got e ra bod ba malang ni baga’ ‘u taban bangi war nib tolang ndariy be’ ni math ngay,’ ma ra aw nga reb e liyos ni be yip’ fan e pi gagiyeg ko fayleng. Ma aram ma ra gaar: “Ngiyal’ ni bayi gagiyeg e pi pilung nem e aram e bayi sunumeg Got nu tharmiy reb e gagiyeg ndariy e rofen nra mus. Ma binem e gagiyeg e dariy be’ nra gel ngay biid, machane bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.”​—Daniel 2:31-44.

11. Uw rogon nra thiliyeg Jehovah e n’en nib t’uf ni nge yib e gapas?

¹¹ Mang fan ni ra buch e re n’ey nib elmirin? Ya ke micheg Jehovah ni ra biechnag e fayleng me chuweg urngin e piin ni be kirebnag ma yad be alitnag. (Revelation 11:18) Ra buch e re n’ey u nap’an ni ra un Jehovah ko mahl nib mat’aw ngak Satan nge fayleng rok nib kireb. Revelation 16:14, 16 e begaar: “Yad [aram e thin nib kireb] e kan ni moonyan’ ni yad ma ngongliy e maang’ang. Dalip e kan ney e ka ranod ngak e pi pilung [pi tayugang ko am] u fayleng ni polo’ ni ngar kunuyed yad nga taabang ni fan ko mahl ni fan ko fare rran ni baga’ fan, ni Rran rok Got ni Gubin ma Rayog Rok. Me kunuy fapi moonyan’ e pi pilung nga taabang nga bang ni ka nog yu Har–Magedon ngay ni thin ni Hebrew.”

12. Ra uw rogon e Armageddon?

¹² Ra uw rogon e Armageddon? Gathi bod e nuclear apocalypse ara yugu reb e ban’en nib kireb ni ra n’igin e girdi’. Danga’ ya aram e mahl rok Got ma ra taleg urngin e mahl ko girdi’ ma ra thang mit urngin e piin ni ma n’igin e mahl. Aram e mahl ni ra tay Got ni nge yibnag e bin riyul’ e gapas ni fan ko piin ni ba t’uf e gapas rorad. Arrogon, ra yib Armageddon ya ke m’agan’ Jehovah ngay. Ma dabi sowath. Ke thagthagnag nga laniyan’ Habakkuk ni profet ni nge yoloy ni gaar: “Dawori taw nga nap’an ni nge yib i m’ug. Machane ngalan’ e be yib nib machreg, ma n’en ni ku gog ngom e bay yib i m’ug. Bay mu lemnag nib sowath ni be yib machane ngam sonnag; ya ra yib i m’ug ko ngiyal’ ni kug dugliy, ma dabi sowath.” (Habakkuk 2:3) Bochan ni gadad bogi girdi’ ma sana gad be lemnag nib sowath ni be yib, machane ra rin’ Jehovah nib tayim. Ra yib Armageddon ko ngiyal’ ni ke m’ay i dugliy rok Jehovah.

13. Mang e ra rin’ Got ko fa en ni ir tapgin e kireb ni Satan ni Moonyan’?

¹³ Re n’ey ni ra rin’ e ra bing e kanawo’ me yib e bin riyul’ e gapas! Machane ra nge dugil e bin riyul’ e gapas ma ka bay ban’en ni ba t’uf ni ngan rin’​—ni aram e ngan chuweg e en ni ir tapgin ni ma ruw raba’nagey, nge fanenikay, nge magawon. Ma aram e n’en ni kan yiiynag u lan e Bible ni ra buch​—ran nin’ Satan nga lan e low ni ir e en ma k’aring e mahl me ir chitamangin e malulfith l’igin. Ke guy apostal John e re n’ey ma bay ko Revelation 20:1-3 ni begaar: “Ma aram mu gguy ba engel ni be yib u tharmiy nga but’, ni bay e kiy ko fare low nib toar u pa’ nge ba chen nib n’uw nib tomal. Me kol fare dragon ni ir fare porchoyog ni ke kakrom, ni aram fare Moonyan’ ara Satan me m’ag nge tay ni aram rogon nib biyu’ e duw. Me yin’ fare engel fare moonyan’ nga lan fare low nib toar, me loknag nge mu’ me pag e hang nga daken ni bochan e nge dabkiyog ni nge bannag girdien e pi nam nge yan i mada’ ko ngiyal’ ni ke m’ay fare biyu’ i duw.”

14. Mang e rayog ni ngan weliy u morngaagen rogon nra gel Jehovah ngak Satan?

¹⁴ Re n’ey e gathi ba lik’ay; ya aram e n’en ni micheg Got​—ma begaar e Bible: “Dabiyog ni nge lifith Got l’igin.” (Hebrews 6:18) Ere ke yog Jehovah u daken Jeremiah ni profet ni gaar: “‘Gag Jehovah ni gub gol, ma gu ma rin’ e tin nib yal’uw nge tin nib mat’aw u fayleng. Ereray e pi n’en ni gub adag. I gag Jehovah e ku gog e pi thin ney.” (Jeremiah 9:24, NW) Ma ngongol Jehovah nrogon nib yal’uw mab mat’aw, ma ma felan’ ko gapas ni ra fek iyib nga fayleng.

Gagiyeg Nra Tay e Pilung ko Gapas

15, 16. (a) Ke mel’eg Jehovah mini’ ni nge mang Pilung? (b) Mang e kan weliy morngaagen e re gagiyeg nem ma mini’ e ra un ngay?

¹⁵ Ke pi’ Jehovah mat’awun e gagiyeg ngak e bin riyul’ e Pilung ko Gapas ni Jesus Kristus ya ra yibnag e bin riyul’ e gapas ko urngin e piin ni ma par u tan Gil’ilungun, ma aram rogon ni kan yiiynag u Isaiah 9:6, 7 ni gaar: “Kan ni gargeleg bochi tir ngodad! Ka ni pi’ bochi pagel ngodad! Me ir e bayi mang pilung rodad. Ma bay nog fithingan ni “Tafonow nrib Manigil mab Gonop,” nge “Chitamangiy ni Manemus,” nge “Pilung ko Gapas.” Gelngin nib pilung e bay i ga’ iyan; gin ni bay i gagiyeg riy e yugu bay i par u fithik’ e gapas . . . I Jehovah ni Gubin ma Rayog Rok e ke turguy ni nge rin’ urngin e pi n’ey.” Miki yiiynag e Psalm u morngaagen e gagiyeg nra tay e Messiah nib gapas me gaar: “Mi i mon’og e tin nib mat’aw u n’umngin nap’an e yafos rok, mi i par e gapas u n’umngin nap’an ni bay e pul ni be mat ramaen.”​—Psalm 72:7.

¹⁶ Ku ra un 144,000 e girdi’ ni kan dugliyrad ko kan ni thothup ni yad pi walagen Kristus mi yad un ngak ko gagiyeg u tharmiy. Yad ra un ngak Kristus me yoloy Paul morngaagrad ni gaar: “Mi Got ni ir e ma pi’ e gapas ngodad e dab ki n’uw nap’an me pirdiiy Satan u tan e rifrif u aymed. Ngi i ayuwegmed Somol rodad i Jesus.” (Roma 16:20) Arrogon, yad ra un ngak Kristus u tharmiy mi yad gel ngak Satan ni Moonyan’ ni tacham!

17. Mang e thingarda rin’ed nge yog ni ngad uned ko bin riyul’ e gapas?

¹⁷ Ere baaray e deer, Mang e thingar mu rin’ ma ga un ko bin riyul’ e gapas? Kari mus ni kanawoen Got e ra yibnag e bin riyul’ e gapas, ma bay boch ban’en nthingar mu rin’ ni nge yog ngom. Thingar mu par u tan pa’ fare Pilung ko Gapas ma ga chel ngak. Fan e re n’ey e thingari mich u wan’um ni Kristus e ir e Tabiyul’ nge Maligach ko girdi’ ni yad e tadenen. Ke yog Jesus e pi thin ney nib gilbuguwan ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Ke m’agan’um ngay ni nge michan’um ku Kristus Jesus ni ir fa En ni Got e l’og ni nge yibnag e bin riyul’ e gapas min thapeg e girdi’ ngak fa? Dakuriy yugu reb e ngochol u tan e tharmiy ni rayog ni nge yibnag e gapas nib mudugil. (Filippi 2:8-11) Mang fan? Ya Jesus e ir e En ni Mel’eg Got. Ir e bin th’abi ga’ e tamol’og ko gapas ni immoy u fayleng. Ga ra motoyil ngak Jesus ma ga lek kanawoen fa?

18. Mang e susun ni ngad rin’ed ma gad fol ko pi thin rok Jesus ni bay ko John 17:3?

¹⁸ Yog Jesus ni gaar: “Baara’ ira e yafos ndariy n’umngin nap’an, ni aram e nge nangem e girdi’ ni kari mus ni gur e bin riyul’ e Got mi yad nang ko mini’ Jesus Kristus ni ir e kam l’og ke yib.” (John 17:3) Ereray e ngiyal’ ni ngan fil e thin riyul’ u gubin ngiyal’ ma ngan un ko pi muulung ko Pi Mich Rok Jehovah u lan e Kingdom Hall. Pi muulung ney e ra k’aringem ngam wereg e thin ni kam fil nge athap rom ngak yugu boch e girdi’. Ku gur e rayog ni ngam mang reb e tamol’og ko gapas rok Got. Rayog ni ngam par u fithik’ e gapas e chiney nfaanra pagan’um ku Jehovah Got ya arrogon ni yog ko Isaiah 26:3 ko fare New International Version ni gaar: “Ga ra pi’ e gapas ngak e en ni be par nib mudugil laniyan’, ya ma pagan’ ngom.” Mini’ e susun ni nge pagan’um ngak? “Gimed e girdi’, nge pagan’med ngak Jehovah u gubin ngiyal’ ya Jah Jehovah e ir e War ndabi m’ay biid.”​—Isaiah 26:4.

19, 20. Mang e bay nga m’on ko piin ni ma gayiy e gapas e chiney mi yad par riy?

¹⁹ Nge mudugil lanin’um e chiney ni ngam un ko yafas ni manemus u lan e fayleng nib biech mab gapas. Be micheg e Thin Rok Got ngodad u Revelation 21:3, 4, ni gaar: “Chiney e keb i par tafen Got nga fithik’ e girdi’! Bayi par rorad, ma bay ra manged girdien. Mi Got e bay i par rorad, mi ir e bayi mang Got rorad. Ma bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.” Gathi aram rogon e gapas ni ga ba adag ni ngam un ngay nga m’on fa?

²⁰ Ere dab kum pag talin e n’en ni micheg Got. “Machane piin ni yad mmunguy e bay ra pired u daken e fayleng u fithik’ e gapas, mu ur pired u fithik’ e gapas ni yad ba felfelan’. Mup’ owchem ngak e en nib fel’ mu um yaliy e tin ni be rin’ e en nib mat’aw; ya ra par e cha’ nem u fithik’ e gapas gabul nge langleth.” (Psalm 37:11, 37, NW) Nap’an nra taw ko rofen nem nib falfalan’, ma ngad pininged e magar riy ma ngad gaargad, “Ke yib e bin riyul’ e gapas! Ke magar Jehovah Got, ni ir tapgin e bin riyul’ e gapas!”

Rayog ni Ngam Weliy?

◻ Mang e rayog ni nge ayuweg be’ nge thiliyeg e lem rok nge ngongol rok?

◻ Uw rogon ni dag e Pi Mich Rok Jehovah ni ba t’uf rorad e bin riyul’ e gapas?

◻ Mang e ra rin’ Jehovah ngak e piin ni ma mon’eg e fanenikay nge mahl?

◻ Mang e ra rin’ e gagiyeg rok fare Pilung ko Gapas ni fan ko girdi’?

[Sasing ko page 12]

Yira par u fithik’ e gapas u tan e gagiyeg rok fare Pilung ko Gapas

[Sasing ko page 13]

Gali moon ney e ur thiliyegew e kanawo’ rorow mi yow gayiy e gapas

Rami Oved

Georg Reuter