Pigpig Rok E Pi Tamol’og Ko Gapas Rok Got

“Ri ban’en nib manigil ni nga ni guy be’ ni kan tay e thin nga l’ugun ke milekag u daken e pi burey ke yib . . . ni morngaagen e gapas.”​—ISAIAH 52:7.

1, 2. (a) Rogon ni kan yiiynag u Isaiah 52:7, ma be mang fare thin nib fel’ ni ngan wereg? (b) Mang fan e re thin nem ko Isaiah ni profet ni fan ko piyu Israel nkakrom?

BAY e thin nib fel’ ni ngan wereg! Aram fare thin nib fel’ ni morngaagen e gapas​—ni bin riyul’ e gapas. Aram e thin nra thapeg e girdi’ ngak Got ma ma sor fan ko Gil’ilungun Got. Kakrom me yoloy Isaiah morngaagen e re n’em ma bay ko Isaiah 52:7 ni begaar: “Ri ban’en nib manigil ni nga ni guy be’ ni kan tay e thin nga l’ugun ke milekag u daken e pi burey ke yib, ni ke fek e thin nib fel’ iyib, ni morngaagen e gapas. Ke yib i yog ni ke gel Somol, me gaar ngak Zion: ‘Got rom e ir e pilung!’”

² I thagthagnag Jehovah nga laniyan’ Isaiah ni profet ni nge yoloy e pi thin nem nga but’ ni fan ko piyu Israel kakrom maku fan ngodad ko ngiyal’ ney. Ri mang fan e pi thin nem? Ngiyal’ ni ke yoloy Isaiah e pi thin nem ma kan kol piyu Israel nu le’luch min fekrad nga Assyria. Me munmun, ma piyu Israel nu yimuch ni yu Judah e kan fekrad nga Babylon. Aram e ngiyal’ ni bay e wagey nge kireban’ riy ya de fol e girdi’ rok Jehovah ma aram e dakuriy e gapas u thilrad Got. Yog Jehovah ngorad ni ngongol rorad nib kireb e be n’igin nge kirebnag thilrad Got. (Isaiah 42:24; 59:2-4) Machane u daken Isaiah me yiiynag Jehovah ni ran bing e garog nu Babylon. Ma ra puf rogon e girdi’ rok Got mi yad sul ko binaw rorad mar toyed e tempel rok Jehovah. Ma ran sulweg Zion nga rogon, ma ran liyor ko fa bin riyul’ e Got biyay u Jerusalem.​—Isaiah 44:28; 52:1, 2.

3. Uw rogon ma thin ni kan micheg ngak yu Israel ni ngan sulwegrad nga rogon e ku aram ba thin ko profet u morngaagen e gapas?

³ Re thin ko profet ney ni be micheg ni ran thap ngak Got e ku be yiiynag u morngaagen e gapas. Nap’an nran sulweg piyu Israel ko fare binaw ni ke pi’ Jehovah ngorad ma aram e mich riy ni be runguyrad Got ma kar kalgadngan’rad. Ma ra m’ug ni ke gapas thilrad Got.​—Isaiah 14:1; 48:17, 18.

“Got Rom e ke Mang Pilung!”

4. (a) Uw rogon nrayog ni ngan nog ni ‘ke mang Jehovah pilung’ ko duw ni 537 B.C.E.? (b) Boch e duw nga tomren ma uw rogon ni ke n’igin Jehovah boch ban’en ni fan ko girdi’ rok?

⁴ Nap’an ni ke thapeg Jehovah e girdi’ ngak ko 537 B.C.E., ma bpuluw ni ngan nog e pi thin ney ngak Zion ni begaar: “Got rom e ke mang pilung!” Rriyul’ ni Jehovah e ir e “Pilung ndariy n’umngin nap’an.” (Revelation 15:3) Machane ngiyal’ ni ke thapeg e girdi’ rok ma aram ban’en ni ka fini rin’ me dag gelngin nge mat’awun. Kari lingagil ni ke dag ni kab gel gelngin ko bin th’abi gel e nam ko girdi’ ko ngiyal’ nem. (Jeremiah 51:56, 57) Ma boch e makath nib togopuluw ko girdi’ rok e kan taleg ni bochan gelngin e kan ni thothup rok Jehovah. (Esther 9:24, 25) Boor yay ni ke k’aring Jehovah e pi pilung nu Medo-Persia ni ngar lebuguyed e tin nib m’agan’ ngay. (Zekariah 4:6) Pi n’en ni buch ko ngiyal’ nem e kan weliy morngaagen u lan e pi babyor ko Ezra, nge Nehemiah, nge Esther, nge Haggai, nge Zekariah ni fan ngodad. Ma ran sul nga daken e pi thin nem ma ra gelnag e michan’ rodad!

5. Mang boch ban’en nib baga’ fan e yibe tamilangnag u Isaiah 52:13–​53:12?

⁵ Machane n’en ni buch ko 537 B.C.E. nge tomren e ke mus ni tabolngin ban’en. Ya tomren ni yiiynag Isaiah morngaagen e ngiyal’ nran sulweg nga rogon ni bay ko guruy ni 52, me yoloy morngaagen e wub rok fare Messiah. (Isaiah 52:13–53:12) U daken fare Messiah, ni Jesus Kristus, ma ra pi’ Jehovah e thin ni ra thapeg e girdi’ ngak ma ra yibnag e gapas ni kab baga’ fan ko n’en ni buch ko 537 B.C.E.

Fa Bin Th’abi Ga’ e Ta Mol’og Rok Jehovah ni ma Garareg e Gapas

6. Mini’ e en th’abi ga’ ni ta mol’og rok Jehovah ni ma wereg e gapas, ma mang fare thin ni ir e ke puluw ngak?

⁶ Jesus Kristus e bin th’abi ga’ e ta mol’og rok Jehovah ni ma garareg e gapas. Ir e Thin Rok Got, ya ma afuweg e thin rok Jehovah. (John 1:14) Boch nga tomren ni ke un Jesus ko taufe u lan fare lul’ ni Jordan me yan nga lan tafen e muulung u Nazareth me sak’iy nga lang ni nge bieg fare thin ni bay ko Isaiah guruy ni 61 ni be yog e n’en nib mil fan ngak ni nge rin’. Pi thin nem e ke tamilangnag ni kan l’og ni nge machibnag ko girdi’ ni “bay ni pagrad” ma “bay ra guyed ban’en” ma bayi fel’ thilin Jehovah nge girdi’. Machane gathi ke mus ni wereg Jesus e thin u morngaagen e gapas. Ya ke l’og Got ni nge fl’eg e kanawo’ me yib e gapas ni ra par ndariy n’umngin nap’an.​—Luke 4:16-21.

7. Mang angin e gapas u thildad Got u daken Jesus Kristus?

⁷ Ngiyal’ ni kan gargelnag Jesus ma ke m’ug boch e engel ngak e pi tachugol saf u Bethlehem, mi yad pining e sorok ngak Got mar gaargad: “Ke sorok Got ni bay ko thal nth’abi tolang e tharmiy, ma nge yib e gapas nga fayleng ngak e piin ni yad ba fel’ u wan’ Got.” (Luke 2:8, 13, 14) Arrogon, ra yib e gapas ngak e piin ni ba fel’ u wan’ Got ya ke mich u wan’rad ko n’en ni pi’ ni fan ngorad u daken Fak. Ma mang fan e re n’em? Yugu aram rogon ni kan gargelnag e girdi’ ni yad e tadenen machane rayog ni ngar pared nib biech u p’eowchen Got, me fel’ thilrad. (Roma 5:1) Ere ra gapas lanin’rad ni dariy yugu reb e ban’en ni rayognag e re n’em. Ngiyal’ ni ke turguy Got ma ran pithig e girdi’ ko m’ar nge yam’ ni aram wenegan e denen ni af rok Adam. Ma dabki par e girdi’ nib malmit ara biling, ara magutgut. Yira chuweg e meewar fithik’ i dow nge m’ar u lolugey. Ma rayog ni ngan par nib flont u fithik’ e falfalan’ ndariy n’umngin nap’an.​—Isaiah 33:24; Matthew 9:35; John 3:16.

8. Yira pi’ e gapas rok Got ngak mini’?

⁸ Chon mini’ e yira pi’ e gapas rok Got ngorad? Yira pi’ ngak urngin e piin ni ke mich Jesus Kristus u wan’rad. I yoloy apostal Paul ni gaar: ‘I Got e turguy ni nge sulweg urngin ban’en ngak u daken Kristus. Mi Got e ngongliy e gapas u thilin e girdi’ nge ir u daken rachaen Jesus ni map’ u daken fa ley i gek’iy.’ Miki yog fare apostal ni pi n’en ni nge sulweg ngak e “tin ni bay u tharmiy”​—ni aram e piin ni ra un ngak Kristus nga tharmiy ko gagiyeg. Maku ba muun ngay e “pi n’en ni bay u fayleng”​—ni aram e piin ni ra par u fayleng ni manemus u Paradis. (Kolose 1:19, 20) Bochan ni ke mich u wan’rad e maligach ni pi’ Jesus ma bochan ni yad ma fol rok Got u polo’ i gumercha’rad ma aram ma ke fel’ thilrad Got ni yad e fager.​—Mu taarebnag ko James 2:22, 23.

9. (a) Ra diin nfaanra ke gapas thilmew Got ma rayog e gapas u thilmed e yugu girdi’? (b) Mang mat’awun ni pi’ Jehovah ku Fak ni bochan e nge yibnag e gapas nga gubin yang?

⁹ Rib ga’ fan ni nge gapas thilmew Got! Ya faanra dariy e gapas u thilmew Got ma dabiyog e gapas u thilmed yugu girdi’. Gapas u thilin Jehovah nge girdi’ e aram e def ko bin riyul’ e gapas u fayleng. (Isaiah 57:19-21) Rib puluw ni Jesus Kristus e ir e Pilung ko Gapas. (Isaiah 9:6) Ya daken e rayog ni nge fel’ thilin Got nge girdi’ riy, ma ke pi’ Jehovah mat’awun ni nge gagiyeg. (Daniel 7:13, 14) Ma be micheg Jehovah morngaagen e gagiyeg nra tay Jesus ni gaar: “Gin ni bay i gagiyeg riy e yugu bay i par u fithik’ e gapas.”​—Isaiah 9:7; Psalm 72:7.

10. Mang kanawo’ ni tay Jesus ya ke wereg e thin rok Got ni morngaagen e gapas?

¹⁰ Urngin e girdi’ e ba t’uf rorad e thin rok Got u morngaagen e gapas. Ke tay Jesus e kanawo’ ni nga un lek ya ke pasig i weliy morngaagen. Ke machibnag u lan e tempel u Jerusalem, ngu daken e burey, ngu daken e kanawo’, nge ngak be’ ni ppin nu Samaria ni bay ko luwed, nge ngak e girdi’ u tabinaw rorad. Urngin yang ni bay e girdi’ riy, ma ke machibnag Jesus u morngaagen e gapas nge Gil’ilungun Got.​—Matthew 4:18, 19; 5:1, 2; 9:9; 26:55; Mark 6:34; Luke 19:1-10; John 4:5-26.

Kan Skulnagey ni Nga un Lek Luwan’ Ay Kristus

11. Mang maruwel e ke skulnag Jesus ko pi gachalpen?

¹¹ I fil Jesus ngak pi gachalpen ni ngar machibnaged e thin rok Got u morngaagen e gapas. Ur nanged ni ke mil fan ngorad ni ngar uned ko machib ni bod rogon Jesus ni ir fare “mich nib yul’yul’ mab riyul’” rok Jehovah. (Revelation 3:14; Isaiah 43:10-12) Ur sapgad ku Kristus ni ir e An be pow’iyrad.

12. Uw rogon ni dag Paul ko uw fene ga’ fan e maruwel ko machib?

¹² I weliy apostal Paul ko uw fene ga’ fan ni ngan un ko machib ni gaar: “Ya begaar e babyor nib thothup: ‘En nra michan’ ngak Kristus e dabi kireban’.’” Ere dariy be’ ni ra michan’ ku Jesus Kristus ni ir e Ani Dugliy Jehovah ni nge thapgeg e girdi’ ngak ni ra kireban’. Ma yugu demtrug ko be’ ko kun nam, ya ki gaar Paul: “Re bugithin ney e ke uneg urngin e girdi’ ngay, ya dariy ban’en nib thil rok piyu Israel nge piin ni gathi yad piyu Israel; i Got e taab Somol rorad ni yad gubin, ma ri ma taw’athnag urngin e piin ni yad ma pining fithingan. Ni bod ni be yog e babyor nib thothup ni begaar, ‘En nra pining fithingan Jehovah ni nge ayuweg e ra fas ni ke thap ngak Got.’” (Roma 10:11-13) Machane uw rogon nrayog ni nge nang e girdi’ morngaagen e re n’ey?

13. Mang e ba t’uf ni nge yog ni nge rung’ag e girdi’ fare thin nib fel’, ma mang e rin e pi Kristiano u nap’an e bin som’on e chibog nib puluw ngay?

¹³ I fith Paul boch e deer u morngaagen e re n’em ma fel’ ni nge lemnag urngin e tapigpig rok Jehovah. I fith fare apostal ni gaar: “Ra diin mi yad non ngak ni faanra dawori michan’rad ngak? Ma ra diin me michan’rad ni faanra dawor rrung’aged e thin rok? Ma ra diin mi yad rung’ag nifaanra danir machibnag e thin rok? Ma ra diin min machibnag e thin rok ni faanra dab nol’og e piin ni ngar machibniged e thin rok nga ranod ngar machibgad?” (Roma 10:14, 15) Babyor ni chepin e tin som’on e Kristiano e ma micheg ni piin pumoon nge piin ppin nge piin fel’ yangaren nge piin pillibthir e yad gubin e ur folgad rok Kristus nge pi apostal rok. Ur passiggad i wereg fare thin nib fel’. Ma ur folwokgad rok Jesus mar machibnaged e girdi’ u gubin yang. Dubrad ni ngar paged taabe’ me ere ur machibnaged e girdi’ u mit e tabinaw iyan ngu yu gin ni tagil’ e yoor.​—Acts 17:17; 20:20.

14. Uw rogon ni ke riyul’ ni ba “gamog” “ay” e piin ni ma wereg fare thin nib fel’?

¹⁴ Machane gathi gubin e girdi’ ni yibe machibnagrad e ur golgad ngak e pi Kristiano. Machane ke riyul’ e thin ni yog Paul ni bay ko Isaiah 52:7. Som’on me fith e re deer ney ni, ‘Ra diin min machibnag e thin rok ni faanra dab nol’og e piin ni ngar machibniged e thin rok nga ranod ngar machibgad?’ Miki gaar: “Ni bod rogon ni be yog e babyor nib thothup ni begaar: ‘Rib gamog ayrad e piin ni kar feked i yib e thin nib fel’ ni yib rok Got!’” Baga’ ni dada lemnaged nib gamog aydad. Me ere mang fan e re thin nem? Ya ma yan e girdi’ u ayrad ni ngar machibnaged e yugu girdi’. Ma ay ni aram rogon e be yip’ fan e girdi’. Ma dabi siy ni piin ni ur rung’aged fare thin nib fel’ ni weliy e pi apostal nge pi gachalpen Jesus u nap’an e bin som’on e chibog e ur lemnaged nib gamog e pi Kristiano nem. (Acts 16:13-15) Maku ri yad ba gamog u p’eowchen Got.

15, 16. (a) Uw rogon ni dag e tin som’on e Kristiano ni riyul’ ni yad e ta mol’og ko gapas? (b) Mang e ra ayuwegdad ngad uned ko machib ni bod rogon e pi Kristiano u nap’an e bin som’on e chibog?

¹⁵ Pi gachalpen Jesus e ur weliyed morngaagen e gapas, mar wereged u fithik’ e gapas. Yog Jesus ko pi gachalpen ni gaar: “Ma ngiyal’ ni gimed ra yan riy nga lan reb e naun, e som’on e nge lungumed, ‘Nge yib e gapas ngak girdien e re naun ney.’ Ya faanra bay be’ riy nib t’uf e gapas rok, mi gimed pag e gapas ni ka mogned nge par u daken; ma faanra dangay, mi gimed fulweg morngaagen e gapas ni ka mogned.” (Luke 10:5, 6) Sha·lohmʹ ara “gapas,” e aram bugithin nu Jew ni yad ma yog u nap’an ni ngan mada’nag be’. Machane kab boor ban’en nib l’ag ko n’en ni yog Jesus. Pi gachalpen ni kan dugliyrad e yad e “ta mol’og ni pa’ Kristus,” mar pininged ko girdi’ ni lungurad: “Ngam paged Got nge pingegmed e toogor rok ngam manged pi tafager rok.” (2 Korinth 5:20) Kar folgad ko n’en ni yog Jesus ngorad mar weliyed ngak e girdi’ morngaagen Gil’ilungun Got nge rogon nra ayuwegrad. Piin ni ur motoyilgad ngay e kan flaabnagrad; ma piin ni ur dabuyed e kar lusgad.

¹⁶ Ku aram rogon ni ma machibnag e Pi Mich Rok Jehovah e girdi’ ko ngiyal’ ney. De sum rorad fare thin nib fel’ ni yad ma wereg ngak e girdi’; ya sum rok e Ani l’ograd ngar ranod. Ma kan tay chilen ngorad ni ngar wereged. Ma faanra ba adag e girdi’ ma rayog ni nge yib e flaab ngorad. Ma faanra dubrad, ma aram e yad be kirebnag e gapas u thilrad Jehovah Got nge Fak ni Jesus Kristus.​—Luke 10:16.

Gapas u Fithik’ e Fayleng ni ke Wagagey

17. Susun uw rogon e ngongol rodad ko ngiyal’ nra togopuluw e girdi’ ngodad, ma mang fan?

¹⁷ Baga’ fan ko pi tapigpig rok Jehovah ni dabra paged talin ni yad e ta mol’og ko gapas rok Got ndemtrug ko ba adag e girdi’ fa danga’. Girdi’ nu fayleng e yad ma tugthin ma yad ma damumuw mi yad t’ar e thin nga daken e girdi’ ni dubrad. Sana ku aram rogodad faram. Machane kad don’ed nga dakendad e bin ni biech i gadad ma gathi gad bang ko fayleng, me ere dab uda boded yad. (Efesus 4:23, 24, 31; James 1:19, 20) Ma demtrug ko uw rogon ni ma ngongol e girdi’ ngodad ma gad ra fol ko re thin ney ni gaar: “Mu rin’ed urngin e tin nrayog romed ngam pired ni ba aw e gapas u thilmed nge urngin e girdi’.”​—Roma 12:18.

18. Susun uw rogon e ngongol rodad nfaanra ra non e pi tayugang ko am nib togopuluw ngodad, ma mang fan?

¹⁸ Sana gad ra sak’iy u p’eowchen e pi tayugang ko am ni bochan e machib ni gad ma tay. Sana yad ra gelnag e thin rorad ngodad mi yad tay chilen ngodad ni ngad weliyed ko mang fan ni kad rin’ed ban’en fa mang fan ni dabda uned ko boch ban’en. Sana yad ra adag ni ngar nanged ko mang fan ni gad ma wereg fare thin rodad​—ni aram e thin ni ma tamilangnag e pi teliw ni googsur ma ma tamilangnag ni ra m’ay e re m’ag ney. Faanra gad ma tay fan e kanawo’ ni tay Kristus ma aram e gad ra par nib munguy ma gad ra tay farad. (1 Peter 2:23; 3:15) Boor yay ni pi tayugang ko teliw fa yugu boch e girdi’ ni baga’ lungurad e be diliiy e pi tayugang ko am. Ere faanra ngam pi’ e fulweg ngorad nib munguy ma yad ra nang ni gathi gad be togopuluw ngorad ma gathi gad be k’aring e wagey u lan e binaw. Ra ngan fulweg ni aram rogon ma ra k’aring e girdi’ ni ngar ted fadad, mi yad ayuwegdad, ma ra gapas thildad e girdi’ ni ba adag.​—Titus 3:1, 2.

19. Mang boch ban’en ni der ma un e Pi Mich Rok Jehovah ngay?

¹⁹ Pi Mich Rok Jehovah e yad ba lingagil u gangin e fayleng ya darir uned ko wagey ko fayleng. Dabra uned ko magawon u thilin girdien reb e ganong nge reb, ngu thilin girdien baraba’ e teliw nge baraba’, ngu thilin reb e am nge reb. (John 17:14) Thin Rok Got e ma tay chilen ngodad ni ngad “ted fan e piin ni baga’ lungurad,” me ere dabda uned ko wagey ni ka nog e civil disorder ni ma togopuluw ko n’en ni ke tay e am chilen. (Roma 13:1) Dariy biyay ni ke un e Pi Mich Rok Jehovah ko makath ni ngan chuweg reb e am. Ri dabiyog ni ngar uned ko wagey fa cham ni ran li’ e girdi’ ngar m’ad ya yad ma fol ko n’en ni tay Jehovah chilen ko pi tapigig rok ni Kristiano! Tin riyul’ e Kristiano e gathi ke mus ni yad ma weliy morngaagen e gapas; ya yad ma par nib puluw ko n’en ni yad ma machibnag.

20. Uw rogon e ngongol ko Babylon nib Gilbuguwan ni fan ko gapas?

²⁰ Ma piin ni yad owchen e pi yuraba’ i teliw nu Kristendom e ba math’ keru’ ko re n’ey ya gathi yad e pi ta mol’og ko gapas. Ya pi yurba’ i teliw ko Babylon nib Gilbuguwan​—ni aram e pi galesiya ko Kristendom nge pi yuraba i teliw ni de mich Kristus u wan’rad​—e goo ur rogned e fel’ ngay, mar ted tanggin, mar pow’iyed e pi mahl ko pi nam. Ma kur k’aringed ni ngan togopuluw ngak min li’rad ngar m’ad e pi tapigpig rok Jehovah nib yul’yul’. Revelation 18:24 e be weliy u morngaagen Babylon nib Gilbuguwan ni gaar: “ni pirieg rachaen e pi profet nge girdien Got u lan; er rogon, ni rachaen urngin e piin ni kan li’rad u fayleng.”

21. Mang e ma rin’ e piin nib yul’yul’ u nap’an ni yad ma guy e ngongol ko girdi’ rok Jehovah nib thil ko piin ni ma un ko pi yuraba’ i teliw ni googsur?

²¹ Fa bin riyul’ e teliw e gathi bod e pi yuraba’ i teliw nu Kristendom ngu Babylon nib Gilbuguwan ya bay gelngin ni nge taarebnagan’uy. Yog Jesus Kristus ngak e tin riyul’ i gachalpen ni gaar: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:35) Aram e mit e t’ufeg ni kab gel’ ko ngan laniyan’ ni bochan e nam rorad ara bochan e liw rorad, ara bochan rogon fene fel’ rogorad, ara bochan e ganong rorad. Bokum milyon e girdi’ e kar guyed e re n’ey mi yad yog ngak e pi tapigpig rok Jehovah ni kan dugliyrad ni gaar: “Gamad ra un ngomed, ya kug rung’aged ni bay Got romed.”​—Zekariah 8:23.

22. Uw rogon u wan’dad e maruwel ko machib ni ka bay nib t’uf ni ngan rin’?

²² Gadad e girdi’ rok Jehovah ere ri gad ba falfalan’ ko n’en ni kan rin’, machane dawori m’ay e maruwel. Ya tomren ni ke yung e awoch me ayuweg e milay’, ma dabi tal e en ni tamilay’ ko maruwel. Ya ka ma maruweliy nge mada’ ko ngiyal’ ni ngan kunuy e woldug. Ngiyal’ ni mokun woldug e ba t’uf ni ngan athamgil nib elmirin’ nge m’ay. Ma chiney ma ba elmirin e mokun girdi’ ni yibe tay ko piin ni ma liyor ko fa bin riyul’ e Got. Ereray ba ngiyal’ ni ngar ni falfalan’. (Isaiah 9:3) Rriyul’ ni yima togopuluw ngodad ma boch e girdi’ e dariy fadad u wan’rad. Ma sana bay boch i gadad nib m’ar nib ubchiya’, fa ba magawon u lan e tabinaw rodad, fa gad ba gafgow ko salpiy. Machane bochan ni ba t’uf Jehovah rodad me ere gad ma athamgil. Fare thin ni yog Got ni ngad wereged e baga’ fan ni nge rung’ag e girdi’. Ya aram e thin u morngaagen e gapas. Rriyul’, aram ba thin ni ke machibnag Jesus​—fare thin nib fel’ ko Gil’ilungun Got.

Mang e Fulweg Rom?

◻ Uw rogon ni ke lebug e thin ko Isaiah 52:7 ko yu Israel kakrom?

◻ Uw rogon ni ke mang Jesus e en th’abi ga’ ni ta mol’og ko gapas?

◻ Uw rogon ni ke puluwnag apostal Paul e thin ko Isaiah 52:7 ko maruwel ko pi Kristiano?

◻ Mang e ba l’ag ko maruwel rodad ko ngiyal’ ney ni gad e pi ta mol’og ko gapas?

[Sasing ko page 8]

Pi Mich Rok Jehovah e bod Jesus ni yad e ta mol’og ko gapas rok Got

[Sasing ko page 10]

Ma par e Pi Mich Rok Jehovah nib gapas ni yugu demtrug ko uw rogon e thin ko Gil’ilungun Got u wan’ e girdi’