Tedan’ Ni Gad Be Tay E Ka Baga’ Fan E Chiney

“Ere mu fal’eged rogomed ngam pired, ya da mu nanged e chirofen ni bay yib e Somol romed riy.”​—MATTHEW 24:42.

1, 2. Mang e be micheg ni gad be par ko tomren e re m’ag ney?

“MAHL e aram e n’en ni ke gagiyegnag e bin ni reliw’ e chibog.” Arrogon e thin rok be’ ni Bill Emmott fithngan. Be yog ni gubin ngiyal’ ni ka nap’an e girdi’ ma bay e mahl nge cham, machane me gaar: “Gathi ba thil e bin ni reliw’ e chibog ni bochan rogon ni kan cham, ya ke thil ni bochan gelngin e mahl riy. Aram e chibog ni somm’on ni kan mahl u ga’ngin yang e fayleng . . . Ma gathi ke mus ni taareb e mahl ni un mahl u fayleng iyan ya u lan e re chibog nem e un mahl u ga’ngin yang e fayleng ni l’agruw yay.”

² I yog Jesus Kristus u m’on riy ni “bay reb e nam me cham ngak reb e nam, gin nsuwon reb e pilung e bayi mahl ko gin nsuwon reb e pilung.” Machane pi mahl nem e ke mus ni bang ko “wub rok Kristus nge tomren e re m’ag ney.” Ya ki yog Jesus ni ku ra yib e uyungol nge liliy nge duru’. (Matthew 24:3, 7, 8; Luke 21:6, 7, 10, 11) U boor e kanawo’ e ke gel e pi riya’ nem ma ke yoor. Ke yoor e kireb ni ke fl’eg e girdi’ ma ke m’ug e kireb rorad u rogon lanin’rad ngak Got nge yugu boch e girdi’. De yalen e girdi’ ma ke yoor e bugel nge cham. Kab t’uf e salpiy rok e girdi’ ma de t’uf Got rorad, ma ke mus ni fafel e yad be lemnag. Urngin e pi n’en ney e ma micheg ni gad be par ko ngiyal’ ni “mo’maw’ ni ngan par riy.”​—2 Timothy 3:1-5.

3. Uw rogon fapi “pow” ko ngiyal’ ney u wan’dad?

³ Me gur, uw rogon rarogon e girdi’ ni be ubchiya’ iyan u wan’um? Boor e girdi’ ni dariy fan u wan’rad ni ke gel e gafgow u fayleng ya kar mechamgad ngay. Boor e girdi’ nib tolang ara piin nib llowan’ ni dar gonopiyed fan e “pi pow” ni be m’ug; maku de pi’ e pi tayugang’ ko pi yurba’ i teliw e kanawo’ ngodad. (Matthew 16:1-3) Machane i yog Jesus ngak pi gachalpen ni gaar: “Ere mu fal’eg rogomed ngam pired, ya da mu nanged e chirofen ni bay yib e Somol romed riy.” (Matthew 24:42) Gathi ke mus ni be yog Jesus ngodad ni ngada tedan’dad ya be yog ni ngada “fal’eged rogodad ngada pared.” Faan gad ra par ni yugu gad be tedan’dad ma be yip’ fan ni gad ba od ma kada fl’eged rogodad. Gathi ke mus ni ngada nanged ni gad be par ko tin tomren e rran ara ngada nanged nib mo’maw’ e par ko ngiyal’ ney. Ya thingari mich u wan’dad ni “ke chugur nga tungun urngin ban’en.” (1 Peter 4:7) Ra mich u wan’dad ma tayan’ ni gad be tay e ra gel boch. Ere fare deer ni ngada lemnaged e ba aray: “Mang e ra gelnag e michan’ rodad ni ke chugur e tomur?”

4, 5. (a) Mang e ra gelnag e michan’ rodad ni ke chugur tomren e re m’ag nib kireb ney, ma mang fan? (b) Mang reb e n’en ni ba taareb rogon ko ngiyal’ u nap’an Noah nge wub rok e ani Fak e Girdi’?

⁴ Amu lemnag rarogon e fayleng u m’on ko reb e riya’ ni ke mus ni taa biyay ni buch ni ka nap’an e girdi’​—⁠ni aram e Day ko Noah. Kari gel e kireb rok e girdi’ ko ngiyal’ i n’em me “taganan’” Jehovah. Me gaar: “Bay gu thang owchen urngin e girdi’ ni kug sunumeg, ndemturug e gin’en ni yad bay riy.” (Genesis 6:6, 7) Ma aram e n’en ni rin’. I tamilangnag Jesus ni ra taareb rogon e ngiyal’ ney ko ngiyal’ nem u nap’an Noah. Be gaar: “Wub nra tay e en ni Fak e Girdi’ e ra bod e n’en nrin’ ko fa ngiyal’ i n’em nnap’an Noah.”​—Matthew 24:37.

⁵ Bpuluw ni ngan lemnag ni rogon laniyan’ Jehovah ngak e re fayleng ney e ba taareb rogon nga laniyan’ ngak e fayleng u m’on ko fare Day ko Noah. Ke thang e girdi’ nib kireb u nap’an Noah, ere mmich ni ra thang e re m’ag nib kireb ney. Faanra tamilang u wan’dad ni ba taareb rogon e ngiyal’ nem u nap’an Noah ko ngiyal’ rodad ney ma ra gel e michan’ rodad ni ke chugur tomren e re m’ag nib kireb ney. Mang boch ban’en nib taareb rogon? Bay lal ban’en. Bin somm’on e n’en ni ba taareb rogon e bay e ginang ni bay yib e riya’ ni ri dabi siy ni ra yib.

Yi Be Ginangey U Morngaagen E “Pi N’en Ni Dawor Ni Guy”

6. Mang ginang ni pi’ Jehovah u nap’an Noah u m’on ni ke yib e riya’?

⁶ Nap’an Noah e ke gaar Jehovah: “Dab gu tay e girdi’ ngar pired ni yad ba fos ndariy n’umngin nap’an, ya dowrad e ra yim’. Chiney i yan nga m’on e dab kur pired ni yad ba fos nge pag 120 e duw yangarrad.” (Genesis 6:3) I yog Got e re thin nem ko duw ni 2490 ko B.C.E. ma aram e duw ni tabab e ngiyal’ ko tomur ko re m’ag nib kireb nem. Amu lemnag e n’en ni be yip’ fan e re thin nem ngak e girdi’ ko ngiyal’ i n’em! Ra gaman 120 e duw ma ra “pi Jehovah e ran nge tharey e fayleng nge thang mit urngin ban’en nib fos. Ma urngin ban’en ni bay u daken e fayleng ni bay yim’.”​—Genesis 6:17.

7. (a) Mang e rin’ Noah u nap’an nnog ngak ni ra yib e Day nge tharey e fayleng? (b) Mang e gad ra rin’ ni bochan e kan ginangdad ni ra yib tomren e re m’ag ney?

⁷ Ka nog ngak Noah ni bokum e duw u m’on riy ni ra yib e riya’, mab llowan’ Noah ya i fanay e re tayim nem ni nge fl’eg rogon ya nge magay nib fas. Be gaar apostal Peter: “Michan’ rok Noah ngak Got e ir e ayuweg Noah nge motoyil ko tin ni yog Got ngak ni murung’agen e pi n’en ni bayi taw, ni bogi ban’en ndabiyog ni nge guy Noah e ngiyal’ nem. Me fol ko tin ni ke yog Got ngak ni nge rin’, me toy fare barkow ni ark fithngan, ni re ark nem e ir e faseg Noah nge girdi’ ko tabinaw rok.” (Hebrews 11:7) Ma gadad? Ke gaman 90 e duw ni ka nap’an ni tabab e ngiyal’ ko tomur ko duw ni 1914. Rib mich ni gad bay ko “ngiyal’ ko tomur.” (Daniel 12:4) Mang e thingar da rin’ed ya kan ginangdad? Be gaar e Bible: “En nra rin’ e tin nib m’agan’ Got ngay e ra par nib fos ndariy n’umngin nap’an.” (1 John 2:17) Ere aray e ngiyal’ ni ngada rin’ed e n’en nib m’agan’ Jehovah ngay ni ri gad be tayan’ ngay.

8, 9. Mang ginang ni kan pi’ e ngiyal’ ney, ma uw rogon ni kan wereg e re ginang ney?

⁸ Ngiyal’ ney ma piin ni ma fil e Bible e kar filed riy ni ke m’ay I pufthinnag e re m’ag ney ma bay nthang. Mmich u wan’dad ni arrogon, fa? Mu tay fanam iyan riy ko n’en ni yog Jesus Kristus ni rib tamilang ni gaar: “Ya gafgow ko re ngiyal’ nem e ri kab mal’af ni kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daba’ e rran.” (Matthew 24:21) Miki yog Jesus ni ra yib ni ir e Tapuf Oloboch ni ke duguliy Got ya nge dareg e girdi’ ni bod rogon ni ma rin’ e ani ma gafaliy e saf ni ma dareg e pi saf ko pi kaming. Ma piin nib kireb e “bay ni pi’rad ko gechig ndariy n’umngin nap’an; ma piin ni yad mmat’aw e bay ranod ko yafos ndariy n’umngin nap’an.”​—Matthew 25:31-33, 46.

⁹ Ma ginang Jehovah e girdi’ rok ni gubin ngiyal’ ma ma rin’ u daken fare “tapigpig nib yul’yul’ mab gonop” ni ma pi’ e ggan ni machib ngak e girdi’ rok Got. (Matthew 24:45-47) Ma ka nog ngak urngin e nam, nge ganong, nge urngin miti thin nge girdi’ ni “nge yib madgun Got ngomed, mi gimed ta’ fan nga feni sorok! Ya ke taw nga nap’an ni nge pufthinnag e girdi’.” (Revelation 14:6, 7) Bang ko fare machib u morngaagen Gil’ilungun Got ni ma wereg e Pi Mich Rok Jehovah u fayleng iyan e aram e ginang ni dabi n’uw nap’an ma ra chuweg Gil’ilungun Got e pi am ko girdi’. (Daniel 2:44) Dab ni dariy fannag e re ginang ney. Ya Got ni Th’abi Gel e ma rin’ e n’en ni ma yog. (Isaiah 55:10, 11) I rin’ u nap’an Noah ma ku ra rin’ ko ngiyal’ rodad ney.​—2 Peter 3:3-7.

Ke Garer E Ngongol Ko Darngal

10. Uw fene kireb e ngongol nde yalen u nap’an Noah?

¹⁰ Ngiyal’ rodad ney e ba taareb rogon ko ngiyal’ u nap’an Noah u yugu reb e kanawo’. Ke tay Jehovah chilen ngak e bin somm’on e pumoon nge ppin ni “ngar diyengow nge yoor pi fakrow” ere nge par e pumoon nge ppin nrogon ni ke sunumiyrow Got ma ngar rin’ew nib yalen u lan e mabgol. (Genesis 1:28) Machane nap’an Noah e ke togopuluw boch e engel kar uned ko ngongol ko darngal. Kar bad nga fayleng, mar fanayed e dowef ni downgin e girdi’, mar pared e piin nib ppin ni yad pidorang me sum pi fakrad ni yad e Nephilim​—ni yad e girdi’ maku yad e kan. (Genesis 6:2, 4) Kan taarebnag e denen ko pi engel ney ko tin puwlag nrin’ u Sodom nge Gomorrah. (Jude 6, 7) Aram fan ni ke garer e ngongol ko darngal ko ngiyal’ i n’em.

11. Uw rogon yalen e girdi’ e ngiyal’ ney nib taareb rogon ko ngiyal’ u nap’an Noah?

¹¹ Uw rogon yalen e girdi’ ko ngiyal’ ney? U lan e tin tomren e rran ney e n’en ni ka baga’ fan u wan’ e girdi’ e aram e par ko pumoon nge ppin. I weliy Paul u morngaagen e pi girdi’ ney ni “dakurir tamra’gad; ma kar paged yad nga pa’ e kireb, ma yad be ngongliy urngin mit e puwlag ndarir yog ni ngar taleged yad riy.” (Efesus 4:19) Ke garer e tin puwlag, ma yima par ni dawor ni mabgol, ma yima darngalnag e piin ni bitir; ma par e pumoon nge pumoon nge ppin nge ppin. Boch i yad e “ke yib e gechig riy nga fithik’ i dowrad ni wenegan e kireb ni yad be ngongliy” ya ke yib e m’ar ni tomal ngorad, ma ke wer e tabinaw rorad ara ke yib yugu boch e kireb ngorad.​—Roma 1:26, 27.

12. Mang fan ni thingar da guyed rogon ni ngada fanenikayed e kireb?

¹² Nap’an Noah e ke pi’ Jehovah e Day nge tharey e fayleng me yib tomren e girdi’ ni ma ngongliy e ngongol ko darngal. Dab da paged talin ni ngiyal’ rodad ney e ba taareb rogon nga nap’an Noah. Fare “gafgow ni ba ga’” e ra thang owchen e “girdi’ ni ma ngongliy e darngal, ara yad ma par e piin ni gathi mabgol rorad, ara yad e pumoon ni ma darngalnag e pumoon.” (Matthew 24:21; 1 Korinth 6:9, 10; Revelation 21:8) Ere ri baga’ fan ni ngada guyed rogon ni ngada fanenikayed e kireb ma ngada paloggad ko pi n’en ni ra pow’iydad ko ngongol ko darngal!​—Psalm 97:10; 1 Korinth 6:18.

“Ke Sug E Fayleng Ko Bugel”

13. Mang fan ni ke “sug e fayleng ko bugel” u nap’an Noah?

¹³ I weliy e Bible u morngaagen ban’en nib gagiyel u nap’an Noah ni gaar: “Machane urngin e tin ni ka ba’ e girdi’’ e yad gubin ni yad ba kireb u p’eowchen Got ma ke sug e fayleng ko bugel.” (Genesis 6:11) Bugel e gathi ban’en ni ka fini sum. Ya Cain ni fak Adam e i li’ walagen ni dariy ban’en ni ke bucheg. (Genesis 4:8) I tunguy Lamech reb e tang ni be uf ni bochan e ke thang e fan rok reb e pagal ni be yog ni i rin’ ni be ayuweg e yafas rok, ma aram fene gel e bugel ko ngiyal’ i n’em. (Genesis 4:23, 24) Machane ban’en nib thil u nap’an Noah e gelngin e bugel. Pi engel ni ur togopuluwgad ngak Got mar mabgolgad e pi ppin nu fayleng me sum pi fakrad ni Nephilim​—me gel e bugel ma dariy biyay ni aram fene gel e tacham u fayleng. Pi Nephilim ney ni yad ba ga’ e ka nog e “Tafabguy” ngorad ni bochan e yad ma cham ngak e girdi’. (Genesis 6:4, footnote) Aram fan ni ke “sug e fayleng ko bugel.” (Genesis 6:13) Amu lemnag fene gel e magawon rok Noah ni nge chuguliy chon e tabinaw rok u fithik’ e kireb ko ngiyal’ nem! Machane “ke mus ni Noah u fithik’ e girdi’ ni ke fel’ u wan’ Got.”​—Genesis 7:1.

14. Uw rogon ni ke “sug e fayleng ko bugel” e ngiyal’ ney?

¹⁴ Immoy e bugel ni ka nap’an e girdi’. Machane ngiyal’ ney e bod rogon e ngiyal’ u nap’an Noah ya kada guyed e bugel ni ke gel iyan. Gad be rung’ag e thin u morngaagen e cham u tabinaw, nge terrorism, nge mahl ni yibe thang owchen miti girdi’, ara girdi’ e be li’ e girdi’ ni dariy tapgin. Ma kub muun e mahl ngay ni be map’ rachaen e girdi’ riy. Ke sug e fayleng ko bugel biyay. Mang fan? Mang tapgin e bugel ni be garer iyan? Fulweg ko gali deer ney e be tamilangnag ban’en ni ku ba taareb rogon nga nap’an Noah.

15. (a) Mang fan ni ke yoor e bugel ko tin tomren e rran? (b) Mang e ke pagan’dad ngay ni ra buch rodad?

¹⁵ Nap’an ni kan duguliy Gil’ilungun Got u tharmiy ko duw ni 1914, fare pilung ni Jesus Kristus e ke rin’ ban’en ni ba ga’ fan. Ke tharbog Satan ni Moonyan’ nge pi moonyan’ rok u tharmiy nga fayleng. (Revelation 12:9-12) U m’on ko fare Day ko Noah e ke chuw e pi engel ni dar folgad u tharmiy ni yad e kar turguyed ni ngar chuwgad; machane ngiyal’ ney e kan tharbograd u fithik’ e yargel. Ma chiney e dabki yog rorad ni ngar fanayed downgin e girdi’ ni fan e ngar pared e piin ni ppin. Ere ke kankanan’rad ma yad ba dumumuw ma yad ba tamdag ko gechig ni bay yib ngorad, ere yad be suruy e girdi’ nge pi ulung rorad ni ngar uned ko kireb nge bugel ni kab gel ko kireb u nap’an Noah. Ke thang Jehovah e fayleng u nap’an e Day ko Noah u tomren ni ke sug e fayleng ko kireb ni bochan e pi engel ni kar togopuluwgad nge pi fakrad. Dariy e maruwar riy ni ku arrogon e n’en ni ra rin’ e ngiyal’ ney! (Psalm 37:10) Machane piin ni yad be tayan’ e yad manang ni dabi n’uw nap’an ma ngan thapegrad.

Yibe Machibnag Fare Thin

16, 17. Mang e bin aningeg e n’en nib taareb rogon ko ngiyal’ u nap’an Noah nge ngiyal’ rodad ney?

¹⁶ Bin aningeg e n’en nib taareb ko ngiyal’ ney nge nap’an Noah e aram e maruwel ni kanog ngak Noah ni nge rin’. I toy Noah reb e arke ni ba ga’. Ma ku ir reb e “tamachib.” (2 Peter 2:5) Mang thin ni i machibnag? I machibnag Noah e girdi’ ni ngar kalgadngan’rad ma be ginangrad ni ra yib e mogothgoth. I yog Jesus ni girdi’ ko ngiyal’ nem e “dar ur nanged e n’en ni bay yib ngorad nge yan i mada’ ko ngiyal’ ni ba aram ni yib e ran the tharey e fayleng me fekrad ni yad gubin.”​—Matthew 24:38, 39.

¹⁷ Ku arrogon e Pi Mich Rok Jehovah ni yad ma athamgil ni ngar rin’ed fare maruwel ni kan pi’ ngorad ni ngar machibnaged fare thin u morngaagen Gil’ilungun Got u fayleng iyan. Ke chugur ni gubin yang u fayleng ni rayog rok e girdi’ ni ngar bieged ara ngar rung’aged e machib ko thin ko nam rorad. Yima ngongliy 25,000,000 ken ko gubin e Watchtower ni be wereg e thin u morngaagen Gil’ilungun Jehovah ma yima ngongliy ni 140 miti thin. Riyul’ ni yibe machibnag fare thin nib fel’ u morngaagen Gil’ilungun Got “u gubin yang u fayleng ni nge urngin e girdi’ me nang.” Ma nap’an ni ra m’ay e re maruwel nem ma dabi siy ni ra yib e tomur.​—Matthew 24:14.

18. Uw rogon nib taareb rogon wenegan e machib rodad e ngiyal’ ney ko wenegan e machib u nap’an Noah?

¹⁸ Dariy e mo’maw’ riy ni ngada lemnaged ni kan moningnag Noah nge chon e tabinaw rok ma kan dariy fannagrad ya girdi’ ko ngiyal’ nem e dar yalengad ma dar nanged e machib nriyul’. Machane ke yib e tomur ko re m’ag nem. Maku arrogon e tin tomren e rran ni ra yoor e piin ni “bay ur moninggad ngomed.” Machane be yog e Bible ni “Chirofen ni rran rok Somol e bayi taw ni bod rogon ba moro’ro’.” (2 Peter 3:3, 4, 10) Ma ra yib ko ngiyal’ ni kan duguliy. Dabi sowath. (Habakkuk 2:3) Gad ba gonop ni faan nguuda tedan’dad ngay!

Ke Mus Ni Buchuw E Girdi’ Ni Ke Magay Nib Fas

19, 20. Mang e ba taareb rogon ko Day ko Noah nge mogothgoth ko tomren e re m’ag ney?

¹⁹ Gathi ke mus nib taareb rogon e ngiyal’ u nap’an Noah nge ngiyal’ ney ni bochan e kireb ko girdi’ nge rogon ni kan thangrad. Ya i magay e girdi’ nib fas ko fare Day ni ke tharey e fayleng, ere ku ra moy e piin ni ra magay nib fas u nap’an ni ran thang e re m’ag ney. Piin ni kar magaygad nib fas ko fare Day ni tharey e fayleng e yad e piin nib sobut’an’ ni dar ngongolgad nrogon e girdi’ ko ngiyal’ nem. Kar folgad ko ginang rok Got ma kar pared nib dar ko piin nib kireb ko ngiyal’ nem. Be gaar e Bible: “Ba fel’ Noah u wan’ Jehovah.” “I par Noah ni ba’ Got rok. Machane urngin e tin ni ka ba’ e girdi’ e yad gubin ni yad ba kireb u p’eowchen Got.” (Genesis 6:8, 9) U fithik’ urngin e girdi’ ko ngiyal’ nem ma ke mus ni taareb e tabinaw “ni ri in e girdi’ e ranod nga lan e re ark nem​—⁠ni yad meruk u gubin​—⁠e ra fosgad nde li’rad e ran.” (1 Peter 3:20) Me tay Jehovah Got chilen ngorad ni gaar: “Ngam diyengad nge yoor pi fakmed ni fan e piin ni owchemed e nge mang yad e ra pired u gubin yang u daken e fayleng.”​—Genesis 9:1.

²⁰ Ke micheg e Thin Rok Got ngodad ni reb e “muulung ni pire’ ni pire’” e ra “thapgad ngaray u fithik’ fare gafgow ni ba ga’ ntay ngorad.” (Revelation 7:9, 14) In e girdi’ ko re ulung ni baga’ nem? Be gaar Jesus: “Ma garog ko yafas e ba wen’in, ma kanawo’ ni yan ngay e mmo’maw’, ma ba lich e girdi’ ni be pirieg.” (Matthew 7:13, 14) Ga ra taarebnag urngin e girdi’ nu fayleng e ngiyal’ ney ni yad bokum billion ko urngin e piin ni ra magay nib fas ko fare gafgow ni baga’ ma yad buchuw. Machane bay ni pi’ e taw’ath ngorad nib taareb rogon ko bin ni kan pi’ ngak e piin ni kar magaygad nib fas ko fare Day ni tharey e fayleng. Sana rayog rok e piin ni ra magaygad nib fas ni ngar diyengad boch nge mang pi fakrad bang ko fare m’ag nib biech u fayleng.​—Isaiah 65:23.

“Mu Tedan’med”

21, 22. (a) Uw rogon ni ke fel’ rogom riy ni bochan e kan fil morngaagen e Day ni tharey e fayleng? (b) Mang e thin ko Bible ni fan ko duw ni 2004, ma mang fan ni ngada folgad ko re thin nem?

²¹ Yugu aram rogon ni ke kakrom fare Day ni tharey e fayleng, bay e ginang riy ni thingar da tedan’dad ngay. (Roma 15:4) Ba taareb rogon e ngiyal’ u nap’an Noah nge ngiyal’ rodad ney ere thingar da nanged ni baga’ fan e pi n’en ni be buch ya be ginangdad ni bay yib Jesus ni bod ba moro’ro’ ni nge gechignag e piin nib kireb.

²² Chiney e be gagiyegnag Jesus Kristus e maruwel ni yibe toy ban’en nib fanathin. Yibe toy ban’en ni bod ba ark ni aram e paradis nib spiritual ni fan ko piin ni yad ma liyor ngak Got ni ngar pared riy ni yad ba pagan’ ma ngar magaygad nib fas riy. (2 Korinth 12:3, 4) Faan gad ra magay nib fas ko fare gafgow ni baga’ ma thingar nguuda pared u lan e re paradis nem. Ya u charen e re paradis nib spiritual nem e bay e m’ag rok Satan ni ra fek e piin ni yad ra chuchuw. Ere thingar da “tedan’dad” ma ngada fl’eged rogodad ni fan ko rran rok Jehovah.​—Matthew 24:42, 44.

Ka Ga Manang?

• Mang fonow ni pi’ Jesus u morngaagen e wub rok?

• Mang e taarebnag Jesus e wub rok ngay?

• Mang boch e kanawo’ nib taareb rogon e ngiyal’ rodad ney ko ngiyal’ u nap’an Noah?

• Gad ra fl’eg i lemnag rogon nib taareb rogon nap’an Noah nge ngiyal’ ney ma susun uw rogon lanin’dad?

[Blurb on page 7]

Thin ko Bible ni fan ko duw ni 2004 e: “Mu tedan’med . . . Mu fal’eged rogomed ngam pared.”​—Matthew 24:42, 44.

[Picture on page 4]

I fol Noah ko ginang ni yib rok Got. Ku arrogodad ni gad be fol, fa?

[Picture on page 5]

“Wub nra tay e en ni Fak E Girdi’ e ra bod e n’en nrin’ ko fa ngiyal’ i n’em nnap’an Noah.”