Mini’ E Ra Magay Ko Fare Rran Rok Jehovah?

“Fare rran e be yib ni be yik ni bod tafen e nifiy.”​—MALAKI 4:1, NW.

1. Uw rogon ni weliy Malaki rogon tomuren e re m’ag ni kireb ney?

FARE fropet ni Malaki e thagthag Got nga laniyan’ ni nge yoloy boch e yiiy u boch ban’en nib gel e marus riy ni bayi buch ni dabki n’uw nap’an. Pi n’eney ni nge buch e gubin e girdi’ nu fayleng ni ra bit’ ngorad. U Malaki 4:1 e ke mu’ i weliy ni gaar: “‘Mu sapgad! fare rran e be yib ni bay taw ngay, ma urngin e girdi’ nib uf nge girdi’ nib kireb e bay ra yikgad ni bod e pan nib melik. Chirofen n’em e bay ra yikgad,’ ‘ni bod ba ke gek’iy nra un lik’ngin ngay nge urngin yang riy,’ aray rogon ni be yog Somol ni gubin ma rayog rok.” Ere uw feni fel’ rogon e re magothgoth nem ni yira tay ko re m’ag ni kireb ney? Ra bod ba ke gek’iy ni kan gothgothey lik’ingin ni dabki tugul bayay.

2. Uw rogon ni weliy boch e scripture murung’agen e rran rok Jehovah?

² Rayog ni ngam fith ko, ‘Mang “rran” e be weliy fare profet ni Malaki?’ Taab rran ko fa bin ni ke weliy ko Isaiah 13:9, (NW) ni faan be tamilangnag ni be gaar: “Mu sap! Fare rran rok Jehovah e ir rok e be yib, ni dariy e runguy riy ma rib gel e damumuw riy, ni bochan ni ngan fal’eg e fayleng nge mang ban’en nyira gin ngay, me thang mit e piin ni ta denen ngar chuwgad riy.” Zefaniah 1:15 (NW) e ke pi’ rogon e re n’eney ni gaar: “Ro rran nem e ba rran ko damumuw ni rib gel, ba rran ko ngochngochan’ nge amith, nge yoko’ nge magothgoth, ba rran ko lumor nge lumolang, ba rran ko manileng nib dib’ag ma rib talumor.”

“Fare Gafgow ni Baga’”

3. Mang ma aram “fare rran rok Jehovah”?

³ N’en th’abi ga’ ni ra lebug ko fare yiiy rok Malaki e, “fare rran rok Jehovah” e ba tayim u ba ngiyal’ ni ba’ fare “gafgow nib ga’.” Ki yog Jesus ni gaar: “Ya gafgow ko re ngiyal’ nem e ri kab mal’af ni kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ko bin daba’ e rran, fa ki yib reb e gafgow ntaareb rogon ngay.” (Matthew 24:21) Ayugu mu lemnag gelngin e mochuch ni ke pirieg e fayleng, ni rib ga’ nu nap’an e 1914. (Matthew 24:7-12) Ya, yigoo bin l’agruw e mahl ko fayleng me fek e yafas rok e girdi’ ni yoor ko 50 milyon! Machane, “fare gafgow nib ga’” e ra m’ug ni rib gel ni dabi chugur ni nge taareb gelngin ko ti nem e gafgow. Re n’enem, e taareb rogon ko fare rran rok Jehovah, ni yan i mus ko Armageddon, ni aram e keb i mus fa tin tomuren e rran ko re m’ag ni kireb ney.​—2 Timothy 3:1-5, 13; Revelation 7:14; 16:14, 16.

4. Nap’an ni ra yan i m’ay fare rran rok Jehovah, ma mang e pi n’en ra buch?

⁴ Ra tomuren e re rran rok Jehovah nem, ma birok Satan e fayleng nge piin ni ma pi’ e ayuw ngak e bay ni thirifrad u but’ ngar chuwgad. Bin Som’mon e yira thang urngin e teliw ni googsur. Me migid ma aram e bayi m’ug e gechig rok Jehovah nib togopuluw ko tirok Satan ni aram e piin ni ta folchuway nge pi am. (Revelation 17:12-14; 19:17, 18) Yiiy rok Ezekiel e gaar: “Ma lan e kanawo’ e bay ron’ed e pi silver rorad ngay, ma bay ra fanenikayed e gol rorad. Demtrug rogon ma silver fa gol rorad e dabiyog ni nge chuwegrad ko rran ko damumuw rok Jehovah.” (Ezekiel 7:19, NW) Ku murung’agen e re rran nem e ki yog Zefaniah 1:14 (NW) ni gaar: “Fare rran rok Jehovah nib ga’ e ke chugur. Ke chuchugur, ma be yib ni rib papey.” Uw rogon ni be yog e Bible murung’agen fare rran rok Jehovah, aram e thingarda turguyed ni nga udi ngongolgad nib puluw ko tin nib mat’aw nib t’uf ni ngan rin’ ku Got.

5. Mang e n’en ni ke pirieg e piin ni bay madgun fithingan Got rorad?

⁵ Tomuren ni ke m’ay i yog ko mang e ra rin’ fare rran rok Jehovah ko fayleng ku Satan, ma Malaki 4:2 e yoloy ni yog Jehovah ni gaar: “Ngomed e piin ni bay madgun fithingag u wan’med fare yal’ ko tin nib mat’aw e ri bayi mat, nga dakenmed nge yib ni bay e pi n’en ni ma golnagey u pon; ma ri bay mu marod nga mutmuted e but’ ni bod pi fak e garbaw ni kar sugsuggad.” “Fare yal’ ko tin nib mat’aw” e aram Jesus Kristus. I ir e “tamilang ko tirok Got ban’en.” (John 8:12) Jesus e be gal ramaen ni be golnagey, bin som’mon e be golnagey ko tirok Got ban’en, ni ir e kad pirieged e chiney, mfini golnag e dowef ni polo’ ko bin nib biech e fayleng. Ni bod ni yog Jehovah, ni piin ni kan golnagrad e “bay ranod ngaur yit’yit’ed e but’ ni bod rogon pi fak e garbaw ni ke sugsug” ma kar falfalan’gad ni kan pagrad nga wuru’ e chum.

6. Mang madenom ni kan gel ko mahl e ra falan’ e pi tapigpig rok Jehovah ngay?

⁶ Uw rogon e piin ni yad be dariy fannag e pi n’en nib t’uf rok Jehovah? Malaki 4:3 (NW) e be yog ni gaar: “‘Gimed e girdi’ [Pi tapigpig ku Got] e ri bay mu t’ed nga but’ e piin ni kireb, bay ra boded e thiab u tan e rifrif u aymed ko ro rran ni bay gu maruwel,’ aray e n’en ni ke yog Jehovah ko pi salthaw.” Girdi ni ma ta’ fan Got e dabra uned i gothey e fayleng rok Satan. Ba dake, “ra u rot’ed e piin ni kireb nga but’” ya be yip’ fan ni yad ra un ko re madenom nem ni fan e kan gel ko mahl u tomuren fare rran rok Jehovah. Nta’ reb e madenom nib ga’ u tomuren ni faan ni li’ e salthaw rok Pharaoh u lan e Red Sea. (Exodus 15:1-21) Yira chuweg Satan nge fayleng rok u nap’an fare gafgow nib gel maku arrogon ni kiyi ra madenomnag ni kan gel ko mahl. Piin ni ba yul’yul’ ni yad ra fas ko re rran rok Jehovah e yad ra tolul nga lang ni be lungurad: “Ngad falfalan’gad me falan’dad ni bochan ni ir e ke thapegdad.” (Isaiah 25:9, NW) Uw feni yira falfalan’ e ngiyal’ nem ni nap’an ni ra yan i tamilang feni gel gelngin Jehovah ma kan klinnag e fayleng ni bochan ni ngan par riy ni ke aw e gapas!

Kristiano ni Googsur ni Be Ngongol ni Bod Rogon Yu Israel

7, 8. Mu weliy ko uw rogon piyu Israel ko tirok Got ban’en u nap’an Malaki.

⁷ Piin ni yad ra taw ko gin baadag Jehovah e aram e piin yad ra pigpig ngak, de taareb rogon ko piin ni gathi aram rogon. Taareb rogon ko ngiyal’ ni yoloy Malaki e tirok e babyor. U lan e duw ni 537 B.C.E., tini magay u Israel e kuni fulwegrad nga rogon u tomuren 70 e duw ni ke kalbusnagrad piyu Babylon. Machane, tomuren reb e chibog, ma fare nam ni kan fulweg nga rogon e ra tababgad ko togopuluw nge ngongol ni kireb. Oren e girdi’ e daki ta’ fan fithingan Jehovah; mi yad dariy fannag e pi motochiyel rok nib mat’aw; mar alitnaged e tempel rok nguu ra feked i yib e gamanman nib malmit, ma ba mugutgut, ma ba m’ar nga ur pied ni maligach; ma yad be n’ag pi leengirad ni ra leengiyed nap’an ni ka yad ba pagel.

⁸ Aray fan, ni yog Jehovah ngorad ni gaar: “Bay gub ngomed nggu pufthinnagmed, ma bay gu welthin nib togopuluw ngak e piin ni yad ma pig, nge piin ni yad ma par e girdi’ ni gathi mabgol rorad, nge piin ni yad ma lifith l’ugun’rad u tafen e puf oloboch, nge piin ni yad ma bannag e piin ni ke yim’ figirngiyrad nguur feked ban’en rorad, nge girdi’ nu bang, nge piin ndarir ted fag, . . . I gag e Somol ma ri dab gu thil.” (Malaki 3:5, 6) Machane, i pining Jehovah e piin ni yad ra pi’ keru’rad ko kanawo’rad nib kireb ni gaar: “Mu sulod ngog, mu gu sul ngomed.”​—Malaki 3:7.

9. Uw rogon ma yiiy rok Malaki e ke lebug e gini ba achig riy?

⁹ Pi thin nem e ki lebug ko bin som’mon e raay e duw ko C.E. Boch e Jew ni ra magaygad e u ra pigpiggad ngak Jehovah ma ra manged bang u reb e “nam” nib biech ni yad e pi Kristiano ni kan dugliyrad, ni aram e ke un ngay e piin ni gathi yu Israel. Machane tin yoor ko girdi’ ni ri yad piyu Israel e ra dariy fannaged Jesus. Ma aram fan ni yog Jesus ko re nam nu Israel nem ni gaar: “Mu sap! Ere chiney e bay nn’ag e tabinaw rom.” (Matthew 23:38; 1 Korinth 16:22) U lan e duw ni 70 C.E., ni bod ni kan weliy u Malaki 4:1, ni ba “rran . . . ni be yik’ ni bod ba tafen e nifiy” keb ngak e piin ni yad piyu Israel. Min kirebnag yu Jerusalem nge tempel riy, ma ni reportnag nib pag reb e milyon e girdi’ e yim’ ni bochan e uyungol, nge wagey nge chamnag e liw ara tolang, nge cham ni tay e salthaw nu Roma. Machane, piin ni yad be pigpig ku Jehovah e ra thaygad ko gafgow nib gel.​—Mark 13:14-20.

10. Uw rogon ma boch e girdi’ nge tayugang’ ko teliw e yad be rin’ e n’en i rin’ piyu Israel ko bin som’mon e chibog?

¹⁰ Girdi’, ni rib ga’ ni Kristiano ni googsur, e yad be rin’ e n’en i rin’ e nam nu Israel ko bin som’mon e chibog. Tayugang nge girdi’ ni yoor ni Kristiano ni googsur e ki yad baadag e motochiyel ko teliw rorad ko tin riyul’ nthin rok Got ni ke fil Jesus. Pi tayugang ko teliw e yad e rib kireb e rorad. Kar siyeged ni ngar fanayed fithingan Jehovah, ni kukura chuweged ko tirorad e Bible. Kar dariy fannaged Jehovah ko machib rorad ni dariy u Bible, ni bod rogon e machib ko gafgow ni manemus u infierno, nge Trinitas, nge yaal ni dabi yim’, nge girdi’ ni sum u boch ban’en. Aray fan ni yad e kar mitheged e pi n’en nib t’uf ni ngan pining e sorok riy ngak Jehovah, ni bod ni i rin’ e pi prist ko ngiyal’ ni immoy Malaki.

11. Uw rogon ni ke dag e pi yuraba’ i teliw nu fayleng ko ri mini’ e yad be pigpig ngak?

¹¹ Lan e 1914, ko ngiyal’ ni tabab e tin tomuren e rran, ma pi yuraba’ i teliw ko re fayleng ney, ni be pow’iy e piin ni yad be yog ni yad e Kristiano, ma be m’ug e eni rriyul’ ni yad be pigpig ngak. Nap’an fa gal mahl ko fayleng, muur tayed yad ko tirorad e girdi’ ni ngar uned ko mahl ni bochan e der taareban’ e pi nam, ni kuyu gu ra girdi’ ko teliw rorad ma yad ra li’. Thin rok Got e be gagiyelnag e piin ni yad be fol rok Jehovah nge piin ni der fol: “Pi fak Got nge pi fak fare Moonyan’ e be gagiyel e thil u thilin urngin e girdi’ ni der ngongol nib mat’aw e de yib rok Got, maku e ri tay e eni de t’uf walagen rok. Ya ireray e re thin ni ku u murungaaged ko tabolngin, ni nge bagadad ma thingari t’uf rok bagadad; gathi nge bod Kain, ni yib ko eni ba kireb ma ke li’ walagen ni pumoon ke yim’.”​—1 John 3:10-12, NW.

Yiiy ni Be Lebug

12, 13. Tin ngan e yiiy e ke lebuguy e pi tapigpig rok Got ko birodad ney e tayim?

¹² Tomuren e bin taareb e mahl ko fayleng ko 1918, ma Pi Mich rok Jehovah e ra guyed ni de dubuy e pi Kristiano ni googsur nge urngin raba’ e pi teliw ni googsur. Ma ka aram nap’an i yib, me yan e pong ngak e piin ba fel’ gum’ircharad: “Mired pi girdieg ngam chuwgad rok!, mired ngam chuwgad rok! Ya thingar dab mu uned ko denen ni be ngongliy, ya thingar dab mu uned ko gechig ni bay nta’ ngak! Ya denen rok e ke yan ke tun ko tharmiy, ni dawori pag Got talin e ngongol rok nib kireb.” (Revelation 18:4, 5) Piin ni yad baadag ni ngar pigpig gad ngak Jehovah e ra tababgad i klinnag nge chuw chubungen e teliw ni googsur rorad mar tababgad ko machib u gaangin yang e fayleng ni murung’agen fare Gil’ilungun ni ke m’ay i ngongliy, nib maruwel ni ngan mu’nag u m’on ni nge mus e re m’ag ni kireb ney.​—Matthew 24:14.

¹³ Re n’eney e bochan ni nge lebug fare yiiy ko Malaki 4:5, ni fa gini yog Jehovah riy ni gaar: “Machane u m’on ndawori taw e re Rran nem rok Somol, ni aram fare Rran ni ba ga’ ma ba gel e gafgow riy, e bay gu l’og fare profet i Elijah nge yib ngomed.” Re yiiy nem e yay ni m’on ni lebug e aram e fare maruwel ni rin’ John ni ma taufe, ni i yan u yaan Elijah. John e i rin’ ba maruwel ni bod e maruwel rok Elijah u nap’an ni i taufenag e Jew ni kar kalgadngan’rad ko denen rorad nib togopuluw ko Motochiyel ni kan micheg. Ma bin ba ga’ fan e, John e ma m’on rok fare Messiah. Machane, maruwel rok John e kemus ni bin som’mon ni ke lebug ko fare yiiy rok Malaki. Jesus, ko ngiyal’ ni i weliy murung’agen John e bod ni ir e bin l’agruw e Elijah, miki dugliy ni ku ra yib bayay e maruwel ko “Elijah” nga m’on.​—Matthew 17:11, 12.

14. Mang e maruwel ni rib ga’ fan ni thingari lebug u m’on ni nge mus e re m’ag ni kireb ney?

¹⁴ Yiiy rok Malaki e dag ni re maruwel ney ku Elijah nib ga’ e yira mu’nag u m’on ni ngeb “fare rran rok Jehovah nib ga’ ma ba gel e marus riy.” Rorran nem e ra yan i mus ko mahl nib gel ma ba papey ni be yib ko fare rran rok Got ni Gubin ma rayog rok, u Armageddon. Fan e re n’eney e aram e Tomuren e re m’ag ni kireb ney ma tabolngin fare Biyu’ i duw ni nge gagiyeg fare Am rok Got nu tharmiy u tan pa’ Jesus Kristus ni kan pilungnag ni nge rin’ reb e maruwel nib tolang maku bod e n’en i rin’ Elijah. Ma ri bod ni ka nog ko re yiiy nem, u m’on ni nge gothey Jehovah e re m’ag ni kireb ney, ma piin ni yad bod Elijah e chiney, ni be ayuwegrad bokum e milyon e Kristiano ni athap rorad e ngar pared u fayleng, e ri yad ba pasig ni yad be rin’ fare maruwel ni ngan fulweg nga rogon e liyor nib machalbog, min n’uf fithingan Jehovah, min fil e tin riyul’ u Bible ko piin ni yad bod e saf.

Jehovah e Be Towaathnag e Pi Tapigpig Rok

15. Uw rogon ni de pag Jehovah talin e pi tapigpig rok?

¹⁵ Jehovah e be towaathnag e piin ni yad be pigpig ngak. Malaki 3:16 e be gaar: “Ma girdi’ ni ba’ madgun Somol u wan’rad e ur welthingad rorad, mi i motoyil Somol ngorad me rungaag e thin ni yad be yog. Bay ba ke babyor rok ni kan yoloy ngay murung’agen e piin ni bay madgun Somol u wan’rad ma ri yad be ta’ fan.” Ka nap’an Abel i yib, me Got e ki i yoloy ba ke babyor, ni aram e ba’, fithingan e piin ni dabi pagtalin fithingrad ko yafas ni manemus. Aray e pi n’en ni gaar Jehovah: “Mfeked i yib nga tempel taab guruy u ragag guruy e tin ni ba’ romed nrogon, nge yib e ggan ngaram. Mu skengniged gag, mi gimed guy ni bay gu bing mban e tharmiy mu gu puog nga dakenmed e pi n’en nib fel’ nge pag e fol riy.”​—Malaki 3:10.

16, 17. Uw rogon ni ke towaathnag Jehovah e girdi’ rok nge maruwel rorad?

¹⁶ Jehovah e rib mudugil ni ke towaathnag e piin ni yad be pigpig ngak. Uw rogon? Reb e kanawo’ e be gel e tamilangan’ ko tin nib m’agan’ ngay. (Proverbs 4:18; Daniel 12:10) Ma reb e be pi’ wom’engin e machib rorad ni yira ngat ngay. Boor e girdi’ ni ba yul’yul’ gum’ircharad ni kar uned ngorad ko bin riyul’ e liyor, ma aram urngin e pi cha’ ney ni gothon “ba ulung nib ga’ . . . nrabad u gubin e nam nge ganong nge gubin mit e girdi’ nge gubin e thin, . . . ni yad be non nib ga’ lamrad, ni yad be gaar: ‘Kanawoen magmad thap ngak Got e yib rok fare Got romad, ni ir e ke par nga tagil’, nge fare fak e saf.’” (Revelation 7:9, 10) Re ulung ni baga’ ney e kan gagiyelnag u reb e kanawo’, ni kan ngat ngay ma piin baaram ni yad ba gel ko pigpig ngak e chiney e urngirad e ke pag nel’ e milyon u lan boor ko 93,000 e ulung u gaangin yang e fayleng!

¹⁷ Towath ni be pi’ Jehovah e ku kan guy ni Pi Mich rok Jehovah e yad e th’abi yoor e babyor ni thin ko Bible ni yad be yoloy yad be wereg i yan. Ngiyal’ ney, ma 90 milyon ken e babyor ni Wulyang Ntagil’ e Damit’ nge Awake! ni yibe fal’eg u reb e pul, Fare Wulyang Ntagil’ e Damit’ e kan piliyeg e thin riy nga 144 e thin, ma Awake! e 87. Ma ba ken e babyor ni yima fanay ko fol Bible ni The Truth That Leads to Eternal Life, ngongliy ko duw ni 1968, e yibe pi’ ni ke pag e 107 e milyon ken ma kan piliyeg nga 117 mit e thin. Ma ba ken e Rayog ni Ngam Par ni Gab fas u Paradis u Fayleng, nni pi’ ko duw ni 1982, e ke pag e 81 milyon ken ma kan piliyeg nga 131 mit e thin. Fa ken ni Knowledge That Leads to Everlasting Life, e ni pi’ ko duw ni 1995, ma ke mada’ ko chiney ma ke pag 85 milyon ken ma 154 e thin ni kan piliyeg ngay. Ma fachi ken ni Mang e Ba T’uf ni Ngad Rin’ed ku Got?, e ni yoloy ko 1996, ma kan wereg ni 150 milyon ken ma 244 e thin ni kan piliyeg ngay e chiney.

18. Mang fan ni gadad be falfalan’ ko tirok Got ban’en ni ke fel’ rogodad riy ni yug aram gelngin e togopuluw?

¹⁸ Tirok Got ni ke fel’ rogoy riy e ri yibe falfalan’ ngay ni yugu aram rogon nib gel e togopuluw ma ba n’uw nap’an ni ma yib ko fayleng ku Satan. Re n’eney e be dag nriyul’ fare thin ko Isaiah 54:17: ni gaar: “‘Machane dariy ba talin e cham nni ngongliy nra maadad ngom, urngin e piin ni yad rayog ni gab kireb e bay e fulweg riy ni ga ra pi’ ngorad. Bay gu ayuweg e pi tapigpig rog, mu gu gagiyegnagrad ngar gelgad,’ I Somol e ke yog e pi thin ney.” Uw feni pagan’ e pi tapigpig rok Jehovah ni yad ra nang ni gin baga’ ko yiiy ni ra lebug ko Malaki 3:17 e fan ngorad ni gaar: “‘Yad ra mang e girdi’ rog ni rib mudugil,’ ko ‘rorran i n’en ni gu ra fal’eg bayang ni yugub thil ni fan ngorad,’ aray rogon ni yog Jehovah ko pi salthaw.’”

Falfalan’ ni Yibe Pigpig Ngak Jehovah

19. Uw rogon nib thil e piin ni yad be pigpig ngak Jehovah ko piin ni danga’?

¹⁹ Nen nib thil u thilin e pi tapigpig rok Jehovah nib yul’yul’ nge piin ni yad be par ko fayleng rok Satan e be gagiyel i yan u nap’an ni be yan e tayim. Malaki 3:18 e ke yog ni gaar: “Girdi’ rog e bay kur guyed bayay e n’en nib thil u thilin e piin ni yad mmat’aw nge piin ni yad be ngongliy e kireb, ngu thilin e en ni be pigpig ngog nge en nder pigpig ngog.” Boor e pi n’eney nib thilthil ma reb u fithik’ e piin ni yad be pigpig ku Jehovah e yad be rin’ u fithik’ e falfalan’ nib gel. Boor fan e re n’eney ma reb u fithik’ e fare athap nib pag felngin ni ba’ rorad. Bay e pagan’ rorad nib gel ngak Jehovah ni faani gaar: “Gub aray ni nga gu sunmiy reb e tharmiy nge reb e fayleng nib biech; ma tin kakrom ban’en e bay ni pagtalin, ma gathi bay kib nga gum’irchaey. Machane mu, falfalan’gad e girdi’, mi gimed falfalan’ ni manemus ko pi n’en ni bay gu sunmiy.”​—Isaiah 65:17, 18; Psalm 37:10, 11, 29; Revelation 21:4, 5.

20. Mang fan ni gadad bogi girdi’ ni gadad ba falfalan’?

²⁰ Ba mich u wan’dad e n’en ni ke micheg Jehovah ni girdi’ rok nib yul’yul’ e yad ra magay ko fare rran rok nib ga’ mi ni fekrad nga lan fare fayleng nib biech. (Zefaniah 2:3; Revelation 7:13, 14) Ma ngiyal’ ni bochi yad e bochan ni ke pillibthir, ara mm’ar, fa mmaadad nib tomgin ma sana yad ra yim’ u m’on riy, ma ke micheg Jehovah ni ra fasegrad ko yam’ mi yad par ni manemus. (John 5:28, 29; Titus 1:2) Yugu aram rogon ni e magawon nge gafgow rodad, ma nap’an ni gad ra mada’nag e re rran ney rok Jehovah, ma rib yoor fan ni ngad manged e piin th’abi falfalan’ u daken e fayleng.

Uw Rogon Ni Ngam Pi’ e Fulweg?

• Be mang “fare rran rok Jehovah”?

• Uw rogon ma yuraba’ i teliw nu fayleng e yad be yan u rogon yu Israel ni kakrom?

• Tin ngan e yiiy e ra lebuguy e pi tapigpig rok Jehovah?

• Uw rogon ni ke towaathnag Jehovah e girdi’ rok?

[Picture on page 17]

Bin som’mon e chibog e ‘yik yu Jerusalem ni bod ba tafen e nifiy’

[Pictures on page 19]

Jehovah e ma pi’ e tin ba t’uf rok e piin ni yad ma pigpig ngak

[Pictures on page 20]

Bochan e athap rorad nib pag feni fel’, ma pi tapigpig rok Jehovah e rriyul’ ni yad ba falfalan’