Fan nib Ga’ Fan GIL’ILUNGUN GOT u Wan’ Jesus

Rogon ni bay ko tin nib m’on e article e n’en nib ga’ ni rin’ Jesus e aram e i “machibnag ngak e girdi’ e Thin Nib Fel’ ni murung’agen e gagiyeg rok Got.” (Luke 8:1) I athamgil ko yan u but’ nib palog u lan yu Israel, ya nge yag ni fil murung’agen Gil’ilungun Got ko girdi’. Fa aningeg i Gospel e be weliy murung’agen e machib ni i tay Jesus, mab pag e 100 yay ni ke weliy murung’agen Gil’ilungun Got. Yooren ko pi thin nem e Jesus e i weliy, machane ku boor e thin ni yog ni murung’agen Gil’ilungun Got ndan yoloy nga but’!​—John 21:25.

Mang nib ga’ fan u wan’ Jesus Gil’ilungun Got u nap’an ni immoy u fayleng? Reb i fan, e manang Jesus ni ir e ke mel’eg Got ni nge mang Pilung u Gil’ilungun. (Isaiah 9:6; Luke 22:28-30) Machane Jesus e de nameg ni nge gel gelngin ara nge gilbuguwan. (Matthew 11:29; Mark 10:17, 18) Maku de weliy murung’agen Gil’ilungun Got ni bochan e nge fel’ rogon riy. Fan nib ga’ fan Gil’ilungun Gota u wan’ Jesus e bochan ni manang e n’en nrayog ni nge rin’ e re am nem ni fan ngak e piin ni yad ba t’uf rok, nge n’en nrayog ni nge rin’ ni fan ngak e Chitamangin u tharmiy, nge pi gachalpen ni yad ba yul’yul’ ngak.

N’EN NRA RIN’ GIL’ILUNGUN GOT NI FAN NGAK E CHITAMANGIN JESUS

Rib gel e t’ufeg rok Jesus ngak e Chitamangin. (Proverbs 8:30; John 14:31) Ma tayfan pi fel’ngin e Chitamangin ni bod rogon e t’ufeg Rok, nge rogon ni Ma runguyey, nge rogon Nib mat’aw. (Deuteronomy 32:4; Isaiah 49:15; 1 John 4:8) Ba mudugil ni dabun Jesus ni ma rung’ag e pi ban ni yima weliy u murung’agen e Chitamangin, ni bod ni Got e der ma lemnag e gafgow ni be tay e girdi’ ma baadag ni ngad gafgowgad. Ireray reb i fan nib pasig Jesus ni nge machibnag fare “thin nib fel’ ni murung’agen e Gagiyeg rok Got”​—ma manang nra munmun ma yira nang e tin riyul’ u murung’agen e Chitamangin. (Matthew 4:23; 6:9, 10) Uw rogon nra rin’ e re n’ey?

Ra fanay Jehovah Gil’ilungun ni nge fek i yib boch ban’en nra yib angin ko girdi’. Bayi ‘n’ag urngin e lu’ u owchen’ e piin ni yad ba yul’yul’. Ra chuweg Jehovah e pi n’en ni be k’aring e girdi’ ni ngar yorgad, ma ke micheg ni aram e “dab ku unim’, ma dab ki i kireban’uy, ma dab ku un yor, ma dab ku un amith.” (Revelation 21:3, 4) Ra fanay Got Gil’ilungun ni nge chuweg gubin mit e gafgow ko girdi’.b

Ere, dab da gingad ngay nri baadag Jesus ni nge weliy ngak e girdi’ murung’agen Gil’ilungun! Manang ni ireram e re am nra tamilangnag feni rib gel gelngin e Chitamangin, maku ir be’ ni ma runguy e girdi’. (James 5:11) Maku manang Jesus nra yib angin Gil’ilungun Got ngak e piin ni yad ba t’uf rok ni yad ba yul’yul’.

N’EN NRA RIN’ GIL’ILUNGUN GOT NI FAN KO PIIN NI YAD BA YUL’YUL’

U m’on ni nge yib Jesus nga fayleng, ma immoy u tharmiy ko Chitamangin. I fanay Got Jesus ni nge sunumeg urngin ban’en nib muun ngay e pi n’en ni bay u lan e lang ni yira ngat ngay ni bod e pi t’uf nge re fayleng ney nib fel’ yaan, nge gubin mit e gamanman ni bay riy. (Kolose 1:15, 16) Machane, n’en nrib ‘fel’ u wan’’ Jesus e aram e girdi’.​—Proverbs 8:31.

Yira nang feni rib t’uf e girdi’ rok Jesus u daken e machib ni tay. Nap’an ni tabab ko machib me tamilangnag ni ke yib nga fayleng ni nge “machibnag e thin nib fel’” ngak e piin nib t’uf e ayuw rorad. (Luke 4:18) Machane, gathi kemus ni weliy Jesus rogon nra ayuweg e girdi’. Ya boor yay ni i dag ko ngongol rok nib t’uf e girdi’ rok. Bod nnap’an ni muulung e girdi’ nib pire’ ni ngar motoyilgad ngak me ri “taganan’ ngorad me golnag e piin ni yad mm’ar u fithik’rad.” (Matthew 14:14) Nap’an ni dag be’ nib moon ni bay ba mit e m’ar rok nrib gel e amith riy nib mich u wan’ nrayog ni nge golnag Jesus e m’ar rok ni faanra ba m’agan’ ngay, ma aram me golnag Jesus fare moon ni bochan nib t’uf rok. I golnag u fithik’ e runguy me gaar ngak: “Mm’agan’ug ngay, ere nge chuw e daraw rom!” (Luke 5:12, 13) Nap’an ni guy Jesus Maria ni fager rok ni be yornag Lazarus ni walagen ni ke yim’ “me ri taganan’” ma aram me “yor.” (John 11:32-36) I rin’ Jesus ban’en ni yira ngat ngay, ni aram e faseg Lazarus ko yam’ ni yugu aram rogon ni ke gaman aningeg e rran nnap’an ni ke yim’!​—John 11:38-44.

Machane, manang Jesus ni ku bay ba ngiyal’ ni ku ra yim’ Lazarus bayay. Manang nra boch nga m’on ma piin ni ke golnagrad ko m’ar e ku yad ra m’ar bayay, ma piin ni ke fasegrad ko yam’ e ku yad ra yim’ bayay. Machane, ku manang Jesus ni kemus ni Gil’ilungun Got e rayog ni nge chuweg e pi magawon ney ndariy n’umngin nap’an. Ireray fan ni gathi kemus ni ngongliy boch e maang’ang, ya ki machibnag fare “Thin Nib Fel’ ni murung’agen e gagiyeg rok Got” u fithik’ e pasig. (Matthew 9:35) Pi maang’ang nem ni i ngongliy Jesus e be dag e pi n’en nra rin’ Gil’ilungun Got ni fan ngak gubin e girdi’ u ga’ngin yang u fayleng ni dabki n’uw nap’an. Gad ra guy e n’en ni be micheg e Bible u murung’agen e ngiyal’ nem.

• Dakuriy e m’ar.

  Ngiyal’ nem ma “pi malmit e bay ra guyed ban’en ma piin ni biling e bay rrung’aged ban’en. Piin ni mugutgut e bay ra oggad nga lang nguur churu’gad, ma piin ndabiyog ni ngar nonod e bay ur tolulniged e felfelan’.” Maku “dariy be’ ni be par u lan e nam rodad ni bay ki yog nib m’ar.”​—Isaiah 33:24; 35:5, 6. 

• Dakuriy e yam’.

  “Piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.”​—Psalm 37:29.

  “Ma Somol ni Th’abi Tolang e bayi kirebnag gelngin e yam’ ni manemus! Bayi faley e lu’ u owchen gubin e girdi’.”​—Isaiah 25:8, BT.

• Piin ni kar m’ad e ku yad ra fos bayay.

  “Ba’ ba ngiyal’ ni be yib ni bayi taw ngay ma gubin e yam’ ni bay u lan e low ni bayi rung’ag laman, mi yad yib u lan e low rorad nga wuru’.”​—John 5:28, 29.

  ‘Bay ni faseg urngin e girdi’ ko yam’.’​—Acts 24:15.

• Dakuriy be’ ni ku ra par ndariy e tabinaw rok maku daki t’uf ni ngan un ko maruwel ni fan ko salpiy.

  “Girdi’ e bay ra toyed e naun mi yad par u lan, ma gathi yugu be’ e bay yib i par ngay. Bay ra yunged e woldug ni grapes me fel’ rogorad u logowen, ma gathi yugu boch e girdi’ e bay ur unumed. . . . Pi n’en ni kar muruwliyed e ri bayi fel’ rogorad riy.”​—Isaiah 65:21, 22.

• Dakuriy e mahl.

  “Be taleg e pi mahl ni yibe tay u fayleng i yan.”​—Psalm 46:9.

  “Pi nam e dab kur mahlgad bayay, ma dab kur fal’eged rogorad bayay ni fan ko mahl.”​—Isaiah 2:4.

• Dabki lich e ggan.

  “Binaw e ke yib e ggan riy; Got, ni Got rodad, e ke fal’eg waathdad.”​—Psalm 67:6.

  ‘Bayi par e nam nib sug ko grain; me sug daken e yungi ted ko woldug.’​—Psalm 72:16.

• Dakuriy e gafgow.

  “Piin ba t’uf e ayuw rorad e gathi gubin ngiyal’ ni yira pagtilrad.”​—Psalm 9:18, BT.

  “Piin ni gafgow e yad ra wenig ngak ni nge ayuwegrad ko gafgow ni ke yib ngorad ma ra chuwegrad u fithik’, ma ku er i tay e piin ni gafgow ni dabi siy ni ngan ayuwegrad ma kan pagrad nda ni ayuwegrad. Ma runguy e piin ni meewar ma ba gafgow; ma ayuweg e pogofan rok e piin ni gafgow.”​—Psalm 72:12, 13.

Faan ga ra lemnag e pi n’ey ni kan micheg ni bay rogon ko fare Gil’ilungun Got, ma gur, ga ra nang ko mang fan nib ga’ fan e re n’em u wan’ Jesus? Nap’an ni immoy u fayleng ma ri baadag ni nge weliy murung’agen Gil’ilungun Got ngak e piin ni yad ra motoyil, ya manang ni aram e n’en nra chuweg e pi magawon ni gad be guy e ngiyal’ ney.

Gur, ga ma felfelan’ ko pi n’en ni ke micheg e Bible u murung’agen Gil’ilungun Got? Faanra arrogon, ma uw rogon nrayog ni ngkum fil boch murung’agen e re am nem? Ma mang e rayog ni ngam rin’ ya nge yib angin e pi tow’ath u tan Gil’ilungun Got ngom? Bin tomur ko pi article ney e ra pi’ e fulweg ko pi deer nem.