KENGGIN E RE KE BABYOR NEY | MANG E RAYOG NI NGE RIN’—GIL’ILUNGUN GOT NI FAN NGOM?

Uw Rogon Nra Yib Angin Gil’ilungun Got Ngom?

Sana kam nang ko tin nib m’on e article ni Gil’ilungun Got e ban’en nib ga’ fan u wan’ e Pi Mich Rok Jehovah. Maku dabisiy nri ga baadag ni kam nang murung’agen e pi tow’ath u tan Gil’ilungun Got ni kan weliy. Machane, sana ga be lemnag ni pi n’em ni kan micheg e ba mo’maw’ ni nge yib i riyul’.

Gab gonop ni faanra ga be kol ayuw, ma dabi mich u wan’um gubin ban’en ni ga ra rung’ag. (Proverbs 14:15) U boch e kanawo’ e faanra ga be rin’ ni aram rogon ma ga be fol ko n’en ni rin’ piyu Berea kakrom.a Som’on ni kan weliy murung’agen fare thin nib fel’ ngak piyu Berea, me riyul’ e pi thin nem u wan’rad ni gathi bochan ni yad baadag ni nge yib i riyul’, ya kar fal’eged i yaliy u lan e Babyor nib Thothup ni bochan e “ngar guyed ko riyul’ e tin ni ke yog Paul fa.” (Acts 17:11) Re n’ey e be yip’ fan ni piyu Berea e kar taarebrogonnaged fare thin nib fel’ ni kar rung’aged ko n’en ni be yog e Bible. Munmun, ma ke mich u wan’rad ni fare thin nib fel’ e riyul’ ni yib ko Thin rok Got.

Pi Mich Rok Jehovah e yad be piningem ni ngkum rin’ e re n’ey. Rayog ni ngam taarebrogonnag e n’en ni ke mich u wan’ e Pi Mich Rok Jehovah u murung’agen Gil’ilungun Got ko n’en ni be fil e Bible ni faan ga ra un ko fol Bible ni dariy puluwon.

Faan ga ra un ko fol Bible, ma gathi kemus ni ga ra nang murung’agen Gil’ilungun Got, ya rayog ni ngam nang e fulweg u boch e deer nib ga’ fan.

Uw e kad bad riy?
Mang fan e yafos?
Mang fan ni ke pag Got e gafgow?
Mang e ma buch rodad u nap’an ni kad m’ad?
Yira gothey e fayleng, fa?
Mang e ra ayuweg girdien e tabinaw ni ngar pirieged e felfelan’?

Ma n’en nth’abi ga’ fan e ga ra fil e Bible ma rayog ni ngam ‘chugur ngak Got.’ (James 4:8) Ma faan ga ra chugur ngak ma rayog ni ngam nang ko uw rogon nra ayuwegem Gil’ilungun Got e chiney i yan nga m’on. I meybil Jesus ngak e Chitamangin ni gaar: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.”—John 17:3.

Rayog ni nge fanay e Pi Mich Rok Jehovah e re babyor ney ni ngan fil e Bible ngom.

Ra ga baadag ni ngan fil e Bible ngom ndariy puluwon, mag fith reb e Pi Mich Rok Jehovah ara mu yoloy bang e request ni bay ko www.jw.org. (Mu guy fare thin ni be gaar, MOG NI NGAN FIL E BIBLE NGOM ni bay ko home page)

a Berea e reb e mach u Macedonia kakrom.

Fan nib Ga’ Fan Gil’ilungun Got u Wan’ Folake

Dawori n’uw nap’an, nnog ngak bochi pin ni ragag e duw yangaren ni Folake fithingan ni nge yoloy bangi babyor ni fan ko skul rok ni kenggin e “N’en Nth’abi Ga’ Fan u Wan’ug.” I mel’eg Folake ni nge yoloy fan nri baadag ni ma weliy murung’agen Gil’ilungun Got ko girdi’.

I yog Folake ni gaar: “Gil’ilungun Got e reb e am nib riyul’, machane dabiyog ni ngan guy, ni yugu aram rogon ni ga ra tay e tiligiy!”

I ulul Folake ngay nge yoloy murung’agen e pi tow’ath ni be sonnag nra yibnag Gil’ilungun Got. I yoloy murung’agen boch e magawon nra chuweg Gil’ilungun Got ni gaar: “Ma kireban’ug u nap’an ni gu ra guy e girdi’ ndariy taferad ni yad be par u kanawo’ nge piin bitir ni yad be yim’ ko bilig u ga’ngin yang e fayleng.” Me ulul ngay ni gaar, “Kug felfelan’ bayay u nap’an ni kug beeg e Isaiah 65:21.” Re verse ney e be micheg ngak e girdi’ ni yad ra par u tan Gil’ilungun Got ni gaar: “Girdi’ e bay ra toyed e naun mi yad par u lan, ma gathi yugu be’ e bay yib i par ngay. Bay ra yunged e woldug ni grapes me fel’ rogorad u logowen, ma gathi yugu boch e girdi’ e bay ur unumed.”

Ki yog Folake ni be sonnag e ngiyal’ nra fanay Got Gil’ilungun ni nge chuweg gubin mit e m’ar. Ke fanay fare thin ni bay ko Revelation 21:4 ni be yog ni bayi n’ag Got “urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith.” Bin tomur e thin ni ke yoloy e be weliy murung’agen Jehovah nge Gil’ilungun ni aram e re n’en nrib t’uf rok. Ere rib tamilang ni Gil’ilungun Got e rib ga’ fan u wan’ e re buliyel ney!