Ngiyal’ ni Nga Nog e Tin nib Mith

Rogon ni ngan ayuweg ni dab nog e tin nib mith e rayog ni nge yibnag e gapas ara cham. Machane bay e tayim ni nga nog e tin nib mith? Mu tiyan’um ko n’en ni be yog Amos ni profet u murung’agen e Got rok ni gaar: “Dabi rin’ Jehovah taa ban’en nfaanra dawori yog e tin nib mith ngak fapi profet ni tapigpig rok.” (Amos 3:7, NW) Rayog ni ngada filed ban’en ko pi thin ney u murung’agen e tin nib mith. Rayog ni nge dabi yog Jehovah murung’agen e tin nib mith ni ba’ n’umngin nap’an ma aram mfini yog ngak boch e girdi’. Uw rogon ni ngada folwokgad rok Jehovah u roy?

Yu ngiyal’, ma piin kan dugliyrad ni ngar gafaliyed girdien e ulung ko Kristiano e kara pirieged nib fel’ ni ngan ayuweg ndabi nang e girdi’ murung’agen e tin nib mith. (Acts 20:28) Ni bod ni, bochan yad be lemnag e tin nra ayuweg e ulung, sana ngara dugliyed ni dabni weliy murung’agen boch e yaram ara maruwel ni yima rin’ u lan e ulung ni kan thiliyeg nge mada’ ko ngiyal’ ni ke taw nga nap’an ni kan dugliy.

Machane u roy, baga’ fan ni nga nog nib tamilang ngak e piin nib l’ag ngay, ko wuin ma mang e ngan rin’ min nang e tin nib mith. Ra nang e pi cha’ nem nib l’ag ngay ko wuin e yira weliy e re n’enem ngak e girdi’ ma rayog ni nge ayuwegrad ngar th’abed gulungrad.​—Proverbs 25:9.