“Gur Reb e Ppin ni Rib Fel’”

Pi thin ney ni rib fel’ e ka nog ni yibe n’uf fare rugod nu Moab. Ruth fithingan, ma ke yim’ e pumoon rok me ir leengin fak Naomi ni be’ nu Israel. Immoy u Israel ni sogonapan 3000 e duw kakrom, u nap’an ni piin tapuf oloboch e ur gagiyeggad u rom, ma kar ni nang ni Ruth e ir be’ ni rib fel’. (Ruth 3:11) Uw rogon ni fel’ u wan’ e girdi’? Mini’ e ra fel’ rogon ko tin ni i dag?

Dabi kay “fare flowa ko malmal,” ma un Ruth ko maruwel ni ba gel ma ba n’uw nap’an ma fek boch ban’en ni kan pag u milay’ u tomuren e mokun woldug, ma bochan ni ma maruwel nib gel ma arfan ni ka nog boch e thin nib fel’ u murung’agen. Yugu aram rogon ni kan yarmiy ban’en ni fan ni nge baud boch e maruwel rok, me par ni be maruwel nib elmirin ma ke rin’ ban’en ni ke pag rogon ko tin ni yibe lemnag. Kari aw nib puluw e yafas rok ko thin ni be yog e Bible u murung’agen leengiy ni ngan pining e sorok ngak, mab salap, ma ma maruwel nib elmirin.​—Proverbs 31:10-31; Ruth 2:7, 15-17.

Bochan e pi felngin Ruth ni ba​—sobutan’, ma ma pag fan ma ba’ e t’ufeg nib yul’yul’ rok—​me par nkari fel’ u wan’ e girdi’. I pag e gallabthir rok nge binaw rok, ni de ra athapeg nrayog ni nge un ko mabgol nge ayuweg e yafas rok me fel’ boch rogon, me magey rok Naomi. Maku, kari weliy Ruth ni baadag ni nge pigpig ku Jehovah, ni aram fare Got ko chitiningin e pumoon rok. Rogon ni ke dag feni ga’ felngin, ma chep nu Bible e be yog ni “kab fel’ [ngak Naomi] nga medlip i fak ni pumoon.”​—Ruth 1:16, 17; 2:11, 12; 4:15, NW.

Yugu aram rogon ni piin ni ppin ni ma un ngak Ruth e karogned nib fel’ murung’agen, ma tin ni rib ga’ fan e rogon ni be lemnag Got murung’agen e pi felngin nge rogon ni ke taw’athnag me mang reb e ga’ rok Jesus Kristus. (Matthew 1:5; 1 Peter 3:4) Tin ni rin’ Ruth e gathi kemus ni piin Kristiano ni ppin e ba fel’ ni nge fol riy ya fan ko urngin e girdi’ ni ma yog ni yad be pigpig ku Jehovah!