Deer ko Piin Ma Bieg
• Lucifer e ir ba ngochol ni ma fanay fare Bible ni fan ku Satan?
Fare ngochol ni Lucifer e taab yay ni rayog ni ngan bieg u Bible ma ke mus ni in e version ko Bible e bay riy. Ni bod fare King James Version e kan thiliyeg fare Isaiah 14:12 ni gaar: “Uw rogon ni kam mul u tharmiy, O Lucifer, ni gur fak e kakadabul!”
Fare thin ni Hebrew ni kan thiliyeg ni “Lucifer” e be yip’ fan e “en be gal gal ramaen.” Fare Septuagint e be fanay fare thin ni Greek ni be yip’ fan e “en ma fek e tamilang i yib.” Ma, boch e Bible e kan thiliyeg fare thin ni Hebrew riy ni fare “t’ufan e kakadabul” ara fare “T’ufan e Rran.” Machane fare Latin Vulgate rok Jerome e be fanay fare “Lucifer” (en ma fek e tamilang), ma ireray fan ni rayog ni ngan bieg e re thin nem u Bible nib thilthil e version riy.
Mini’ e cha’ ney ni Lucifer? Fare bugithin ni “en be galgal ramaen,” ara “Lucifer,” e yira pirieg ko yiiy rok Isaiah ni be motochiyelnag ngak piyu Israel ni nga rogned e “thin ni proverbial nib togopuluw ko pilung nu Babylon.” Ere re n’ey e bang ko thin ni ka nog ni fan ko am nu Babylon. Maku reb ni be dag ni fare bugithin ni “en ni be galgal ramaen” e ka nog ni fan ko girdi’ ma gathi fan ko kan ma rayog ni ngan guy ko fapi thin ni gaar: “Yira fekem nga Sheol.” Sheol e ir e low ko girdi’ ni ke yim’—ma gathi gin ni ma par Satan ni fare Moonyan’ riy. Maku reb, e piin kar guyed Lucifer ni kan gafgownag ni aram rogon e kar fithed ni ra gaargad: “Ireray fare pumoon ni ke rurug e fayleng?” Ba tamilang ni, “Lucifer” e reb e girdi’, ma gathi reb e kan.—Isaiah 14:4, 15, 16.
Mang fan ni kan weliy murung’agen e am nu Babylon ni yibe pining e sorok ngak ni aram rogon? Susun ni ngeb ngan’dad ni fare pilung nu Babylon e ka nog ni en ni be galgal ramaen u tomren ni kan kirebnag ma ka nog ni yibe moningnag. (Isaiah 14:3) Lem nib kireb ni ufanthin e ke k’aring fare pilung nu Babylon ni nge tolangnagrad ngak e piin ni ba liyegrad. Rib ufanthin e re am nem ma aram fan ni kan weliy murung’agen ni gaar: “Bay gu wan nga tharmiy. Ma nggu tay e chiya rog u daken fapi t’uf rok Got, ma nggu par u daken fare burey ni yima muulung riy, ni bay u bang ko lel’uch nrib palog. . . . Nggu ta’ ni nge taareb rogomow e en Th’abi Tolang.”—Isaiah 14:13, 14.
“Fapi t’uf rok Got” e yad e piin pilung ni yib u tabinaw rok David. (Numbers 24:17) Ka nap’an David i yib, ma “pi t’uf nem” e ur gagiyeggad ko Burey nu Zion. Tomren ni toy Solomon fare tempel u Jerusalem, ma munmun ma fare ngochol ni Zion e kan ta’ ni fithingan fare mach nib polo’. U tan fare m’ag ko Motochiyel, ma urngin e pumoon ni piyu Israel e kan motochiyelnag ngorad ni nguur milekaggad i yan nga Zion ni dalip yay u lan taareb e duw. Ma aram, ke mang “fare burey ni yima muulung riy.” Bochan ni ke mudugil laniyan’ Nebuchadnezzar ni nge gel ngak e pi pilung nu Juda min chuwegrad ko re burey nem, ma aram me weliy e tin be lemnag ni aram e bayi tolangnag ir nge par ni kab tolang ko “pi t’uf nem.” Susun ni nge pining e sorok ngak Jehovah ya ke gel ngorad, machane de rin’ yab tolangan’ ni i tay ir nga luwan Jehovah. Ere tomren ni kan gothey fare Babylon ni yibe moningnag mi nog ni “en be galgal ramaen.”
Ere ufanthin ni tay fapi pilung nu Babylon e be dag yaan e ngongol rok “fare got ko re m’ag ney”—ni Satan ni fare Moonyan’. (2 Korinth 4:4) Maku ir be’ ni ri baadag ni ngeb gelngin ma be yim’ ni bochan ni nge ta’ ir ni nge tolang ku Jehovah Got. Machane fare Bible e de pining Satan ni Lucifer.