“Ma Pow’iyeg Nga Tooben Fagi Ran nib Mmocha’”

NGIYAL’ ni ba gel e yal’ ko fapi binawen e Bible, ma rib t’uf rok fapi saf ni ngar unumed e ran ni gubin e rran. Eram, reb e maruwel rok e tachugol saf nib ga’ fan ni nge ayuweg e yu ran’ i gamanman rok ngar unumed e ran. Yu ngiyal’ ma piin tachugol saf e ma l’ing e ran u luwed, nge puog nga lan ban’en ni yima ta’ e ran ngay ma rayog ni nge unum e saf. (Genesis 29:1-3) Machane ngal’an e n’uw, ma yu yang ni bay u tooben e lul’ nib achig nge pi lul’ ni gagang’ e bay e gin ni “boor e ran riy mab fel’ ni ngan toffan riy” mab gapas.​—Psalm 23:2.

En tachugol saf nib fel’ e susun ni nge nang ko uw e rayog ni nge pirieg e ran riy nge boch e pan nib galunglung ni fan ko fa ran’ i saf rok. Tin manang u murung’agen bang e binaw e ra ayuweg ni nge par nib fas e pi saf rok. David, ni ir be’ ni i par ni boor e duw ni ma chuguliy e saf u daken e pi burey nu Judea, e i taareb rogonnag e kanawo’ ni ma pow’iy Got e girdi’ riy ko tirok ban’en nga reb e tachugol saf ni ma pow’iy e pi saf rok ko gin ni bay boor e pan riy nib galunglung nge ran ni ma pi’ e yafas. I gaar David, “Ma pow’iyeg nga tooben e ran nib mocha’,” ara’ rogon ni thiliyeg reb e Bible.​—Psalm 23:1-3, New International Version.

Boch e duw ni ke yan nga tomren, me fanay Jehovah e fanathin ni ba chuchugur rogon ko binem u daken Ezekiel ni profet rok. Me micheg ni nge kunuy e girdi’ rok ko pi binaw ni kar wargad ngay, ni bod e en tachugol saf ni kunuy e pi saf rok. “Bay gu fekrad i yib . . . ko binaw rorad mu ugu duruwiyrad u daken e pi burey u Israel, u tooben e pi lul’,” aram e n’en ni ke micheg ngorad.​—Ezekiel 34:13.

Maku ri baadag Jehovah Got ni nge pi’ e ran nib spiritual. Fare babyor ni Revelation e be weliy murung’agen “fare lul’ ni bay e ran ko yafas riy” ni yib u tagil’ Got. (Revelation 22:1) Fare pong ni ngan unum e ran ko re lul’ ney e ke yan ngak urngin e girdi’. “Urngin e girdi’ ni baadag e [rayog] ni nge unum e ran ko yafas ni dariy puluwon.”​—Revelation 22:17, NW.

Re ran ko yafas ney ni be yip’ fan ban’en e ireray e yaram rok Got ni fan ko yafas ndariy n’umngin nap’an. Urngin e girdi’ ma rayog ni nge tabab ni nge unum e re ran ney ma aram e nge ‘fek e tamilangan’ u murung’agen e ani kari mus ni ir e bin riyul’ e Got nge ani ke l’og, ni Jesus Kristus.’​—John 17:3.