Report Ko Piin Ma Wereg E Machib Ko Gil’ilungun
Reb e Kingdom Hall ni Kan Pi’ e Madalia Ngay
FARE Ministry of Environment u Finland e ke mel’eg fare duw ni 2000 ni aram fare “Duw ni Ngan Fal’eg Yaan Tooben i Yan.” Bagayad e piin ta yarmiy ban’en e ke yog ni fan ni “kan mel’eg ni ngan fal’eg yaan tooben i yan e nge mang kenggin e n’en ni ngan rin’ ko fare duw ni fan ni ngan puguran ngodad ni gadad gubin e tin bay angin ko yafas rodad nge dowdad ni gubin e rran e tin ni ba liyegdad nib galunglung.”
Rorran ni January 12, 2001, i yib reb e babyor nga tochuch ko Pi Mich Rok Jehovah u Finland ni fare Finnish Association of Landscape Industries e ke pi’ ngorad. I weliy fare babyor ni fare Kingdom Hall ko Pi Mich Rok Jehovah u Tikkurila e kan pi’ reb e madalia ngay ni fan ni kan fal’eg rogon yaan tooben i yan ni rib fel’ rogon nge milay’ rorad ni rib yaram ni ireram kenggin e n’en ngan rin’ ko re duw nem. Me ulul fare babyor ngay ni “yaan lan e yoror nge tooben i yan e rib fel’ yaan ma rib fel’ rogon ndemtrug ko ngal’an e yal’ fa garbeb.”
Kan pi’ fare madalia ngak e Pi Mich Rok Jehovah u Rosendahl Hotel u Tampere, Finland, ni immoy 400 e girdi’ ni boch e professional nge tafolchuway. Fare Finnish Association of Landscape Industries e ku kara ted reb e article ko shimbung, ni be gaar: “U yu yang u lan fare nam, ma ke chuchugur ni nge urngin e Kingdom Hall ko Pi Mich Rok Jehovah e kan fal’eg nib fel’ rogon. Rogon ni kan fal’eg yaan e tooben i yan urngin e girdi’ ni yad ra yan u tooben ni yad ra guy ma ri yad baadag. Fare Kingdom Hall u Tikkurila e reb ni bay e milay’ rorad ni rib fel’ yaan ni ga’ngin. Fare naun nge milay’ nib ga’ e be dag yaan e gapas nge yaram.”
U Finland e bay 233 e Kingdom Hall riy, ma boor yang riy e ba liyeg bogi milay’ nib fel’ yaan. Machane, fan ni rib fel’ yaan e pi naun nem e bochan ni ireray e gin’en ni fan ko fare liyor nib riyul’ ma yima fil e Bible riy. Pi Mich Rok Jehovah u ga’ngin yang e fayleng ni ke pag nel’ i milyon, ma fare Kingdom Hall—ni kan yarmiy nib fel’ rogon ma de pag rogon—i ir e gin ni ri yad baadag. Aram fan ni ri yad ma ayuweg e gin n’ey. Urngin e girdi’ ko binaw rom e rayog ni ngar ranod nga Kingdom Hall nib puf rogorad!