Nguum Folgad Ko Tin Ni Kam Filed

“Mmaruwelgad ko tin ni kam filed rog nge tin ni ke yog ngomed rog, ni tin ni yog ngomed ko thin rog nge ngongol rog. I Got ni ir e be pi’ e gapas nga lanin’dad e bayi par romed.”​—PHILIPPIANS 4:9.

1, 2. Be maruwel e Bible u yafas rok e piin ni ma un ko barba’ i teliw, fa? Mu weliy.

“BE MON’OG e Pi Yurba’ I Teliw, Machane Gathi Be Mon’og Yalen e Girdi’.” Aram rogon e thin ko shimbung ni Emerging Trends u tomren ni kan fithfith e girdi’ nu Meriken morngaagen. Ke yoor iyan e girdi’ nu Meriken ni yad be un ko galesiya mi yad yog ni ri baga’ fan e raba’ i teliw rorad u wan’rad. Machane be yog fare shimbung ni gaar: “Boor e girdi’ ni yad be un ko galesiya, machane boor e girdi’ nu Meriken ni yad be lemnag ni dariy angin e pi yurba’ i teliw ko yafas rok e girdi’ maku dariy angin ko nam.”

² Machane gathi goo taab e nam ni bay e re magawon ney riy. U fayleng iyan e be yog e girdi’ ni ke mich e Bible u wan’rad ma yad ma un ko barba’ i teliw, machane dariy angin e Bible ko yafas rorad. (2 Timothy 3:5) I yog be’ ni ke fil morngaagen ni gaar: “Gamad ma tay fan e Bible, machane gathi ri gamad ma bieg ara fil ara fol ko thin riy​—ya aram e ngongol ko tin kakrom e girdi’.”

3. (a) Mang angin e Bible ko yafas rok e piin ni kar manged e tin riyul’ e Kristiano? (b) Uw rogon ni ma fol pi gachalpen Jesus ko fonow rok Paul u Filippi 4:9?

³ Machane ba thil e tin riyul’ e Kristiano. Ke thil lanin’rad nge ngongol rorad ni bochan e yad ma fol ko fonow ni bay ko Thin Rok Got. Ma rib gagiyel ni ke thil pangirad ma rayog ni nge guy yugu boch e girdi’ ni ke thil pangirad. (Kolose 3:5-10) U wan’ pi gachalpen Jesus e gathi yugu ma par e Bible u tagil’ ni dani bieg ni yugu be mokun e fiyath u daken. Danga’, ya i yog apostal Paul ngak piyu Filippi ni gaar: “Mmaruwelgad ko tin ni kam filed rog nge tin ni ke yog ngomed rog, ni tin ni yog ngomed ko thin rog ngongol rog. I Got ni ir e be pi’ e gapas nga lanin’dad e bay i par romed.” (Filippi 4:9) Gathi ke mus ni goo ke mich e Bible u wan’ e pi Kristiano. Ya yad ma fol ko tin ni kar filed ma gubin ngiyal’ e yad ma fol ko fonow ko Bible​—ya yad ma fol u tabinaw, ara u taban e maruwel ara u lan e ulung ara yugu bang.

4. Mang fan nib mo’maw’ ni ngan fol ko pi motochiyel rok Got?

⁴ Gathi mmom ni ngan fol ko pi motochiyel rok Got. Ya gad ma par u fayleng ni be par u tan pa’ Satan ni Moonyan’, me yog e Bible ni ir e “got ko re m’ag ney.” (2 Korinth 4:4; 1 John 5:19) Ere thingar da ayuwgad ko urngin ban’en ni ra magawonnagdad ni ngada yul’yul’gad ngak Jehovah Got. Uw rogon ni nguuda yul’yul’gad?

“Dab Mpag Fapi Thin nib Riyul’”

5. Mang fan e thin rok Jesus ni gaar: “Nguum lekeg”?

⁵ Reb e kanawo’ ni ngada folgad ko tin ni kada filed e ngada yul’yul’gad ko bin riyul’ e liyor ngak Got ni yugu aram rogon ni yima togopuluw ngay. Thingar ni maruwel ngay ni faanra ngan athamgil. Be gaar Jesus: “Faanra ba adag be’ ni nge un ngog, ma thingari pag talin ir, nge fek e kuruth rok nge lekeg.” (Matthew 16:24) De yog Jesus ni ngada leked ni goo reb e wik, ara reb e pul ara reb e duw. Ya i yog ni “Nguuda leked.” Be m’ug ko thin rok ni faan gad ra mang pi gachalpen ma gathi ban’en ni gad ra rin’ u yugu ba ngiyal’ ara liyor ni gad ra tay ngak e daba’ ma dariy ko gabul. Faan gad ra yul’yul’ ko bin riyul’ e liyor ngak Got ma thingar da athamgilgad ngay ni yugu demutrug e n’en nra buch. Uw rogon ni gad ra rin’?

6. Mang fapi thin nriyul’ ni ke fil e tin somm’on e Kristiano rok Paul?

⁶ I yog Paul ngak Timothy ni gaar: “Dab mpag fapi thin nriyul’ ni kug fil ngom, ya ir e nguum fol riy, mu um par u fithik’ e michan’ nge t’ufeg ni ma yog ngodad ko taab girdi’ ni gadad ma tay Kristus Jesus.” (2 Timothy 1:13) Mang fan e thin rok Paul? Fare bugithin nu Greek ni kan pilyeg ni “fapi thin nriyul’” e be yip’ fan yaan ban’en ni ke yoloy be’. Ni gathi yaan ban’en ni ke m’ug urngin riy machane yaan ban’en ni faanra fl’eg i yaliy be’ ma ra nang ko mang. Maku aram rogon fare machib nriyul’ ni ke fil Paul ngak Timothy nge yugu boch e girdi’, ni gathi ke weliy fan urngin ban’en ni ra fith be’. Machane re machib nem e ba gaman​—ya faanra fil be’ e re machib nem ma rayog ni nge nang ko mang e m’agan’ Jehovah ngay ni ngan rin’. Ma faanra nge falan’ Got ngodad ma thingar da folgad ko re machib nem ma nguuda maruweliyed e tin ni kada filed.

7. Uw rogon nrayog ni nge fol e pi Kristiano ko fapi thin riyul’?

⁷ U nap’an e bin somm’on e chibog ma immoy boch e girdi’ ni bod Hymenaeus, nge Alexander, nge Philetus ni ur machibnaged boch ban’en ni de puluw ko “fapi thin nriyul’.” (1 Timothy 1:18-20; 2 Timothy 2:16, 17) Uw rogon ni ke ayuw e tin somm’on e Kristiano ko machib ni yugu ban’en ni yibe machibnag? Ur tedan’rad ko fol Bible ma kar folgad ko tin ni kar filed. Piin ni kar folwokgad rok Paul nge yugu boch e girdi’ nib yul’yul’ e kar poyed ma kar n’aged urngin e machib ni de puluw ko fapi thin nriyul’ ni kan fil ngorad. (Filippi 3:17; Hebrews 5:14) Gathi “kar maluag thin me tugthin ngak be’ u murung’agen yu bugithin” ya kar mon’oggad u rogon ni yad ma liyor ngak Got. (1 Timothy 6:3-6) Aram e n’en ni gad ma rin’ u nap’an ni gad ma maruweliy e pi machib ni kada filed. Ma gel e michan’ rodad u nap’an ni gad be guy bokum million e girdi’ ni yad be pigpig ku Jehovah u fayleng iyan ma yad be par ko fapi thin nriyul’ ni kan fil ngorad.​—1 Thessalonika 1:2-5.

Mu N’ag e “Malulfith”

8. (a) Uw rogon ni be guy Satan rogon ni nge kirebnag e michan’ rodad e ngiyal’ ney? (b) Mang e thin rok Paul u 2 Timothy 4:3, 4?

⁸ Ma guy Satan rogon ni nge kirebnag e michan’ rodad ni be guy rogon ni nge maruwar e machib u wan’dad. Ngiyal’ ney maku aram rogon ko bin somm’on e chibog ni immoy boch e girdi’ ni kar maloggad ni yad be guy rogon ni ngar kirebnaged e michan’ rok e piin nib mich u wan’rad. (Galatia 2:4; 5:7, 8) Yu ngiyal’ ma ra m’ug ban’en ko shimbung ara radio ni be sasalapiy e maruwel ara machib rok e girdi’ rok Jehovah. I yog Paul ni boch e girdi’ e ra thay ko machib nriyul’. I gaar: “Ya ba’ ba ngiyal’ ni bayi taw ngay me dabuy e girdi’ ni ngar motoyilgad ko bin nib riyul’ e machib, mi yad fol ko tin ni yad ba adag, ma bay uranod nguur gayed i yan e piin ni nge machibnagrad ni yad e bay ra machibniged ngorad e tin ni ir e yad be yim’ ni bochan ni ngar rung’aged.”​—2 Timothy 4:3, 4.

9. Sana mang e be lemnag Paul u nap’an ni weliy morngaagen e “sasalap”?

⁹ Gathi be fol boch e girdi’ ko tin nriyul’ e machib ya yad ba adag e “sasalap.” Mang boch e pi sasalap ney? Sana be lemnag Paul boch e yat ni bod e pi yat ni bay ko babyor ni Tobit ni reb e babyor ni kan uneg ko Bible machane gathi thin rok Got.a Ma sana kub muun ko boch e pi sasalap ney e boch e thin ni yugu ban’en ni yibe wereg ara boch ban’en ni yibe sananag ma yibe wereg. Maku bay boch e girdi’ ni ur folgad ko llowan’ rok e girdi’ ni yad be yog ni kaygi mo’maw’ e motochiyel’ rok Got ara yad be fol ko girdi’ ni yad be gathibthibnag e piin ni yad be yog e thin u lan e ulung​—aram rogon ni “yad be fol ko tin ni yad ba adag.” (3 John 9, 10; Jude 4) Yugu demutrug ko mang e magawon rok e pi girdi’ nem ma yad ba adag e sasalap ma gathi machib nriyul’ ko Thin Rok Got. Dabi n’uw nap’an ma dakur folgad ko tin ni kar filed me kireb e michan’ rorad.​—2 Peter 3:15, 16.

10. Mang boch e sasalap ni bay ko ngiyal’ ney, ma uw rogon ni dag John ni thingar da ayuwgad riy?

¹⁰ Rayog ni ngada ayuwgad ko pi sasalap e ngiyal’ ney ni faan gad ra mel’eg e tin ni gad ra motoyil ngay ara ngada bieged. Susun, bay boor ban’en ko television ara babyor nib puwlag. Ma bay boor e girdi’ ni yad be yog ni dariy e Got ma faan manga bay ma dariy fan e girdi’ u wan’. Ma bay boch e girdi’ ni yad be gathibthibnag e machib ko Bible ni yibe yog ni gathi thin rok Got. Ma bay boch e girdi’ ni kar thaygad ko machib ni yad be guy rogon ni ngar kirebnaged e michan’ rok e pi Kristiano ara nge maruwaran’rad. I weliy apostal John morngaagen e pi profet ni yugu ban’en ni gaar: “Pi tafager rog nri gimed ba t’uf rog, dabi pagan’med ngak urngin e piin ni yad be yog ni ba’ fare kan ni thothup rorad, ya ngam sikengniged yad ngam nanged ko re kan ni ba’ rorad e yib rok Got fa dangay. Ya boor e profet ni yugu ban’en ni kar wergad nga urngin yang.” (1 John 4:1) Ere thingar da ayuwgad.

11. Mang reb e kanawo’ nrayog ni ngada skengnaged gadad ko bay e michan’ rodad, fa?

¹¹ Aram fan ni yog Paul ni gaar: “Mu changargad ngomed ko gimed be par ni gimed be ngongol u fithik’ e michan’ romed ngak Kristus fa danga’.” (2 Korinth 13:5) I pi’ e apostal e athamgil nga lanin’dad ni ngada skengnaged gadad ya ngada nanged ko gad be fol ko machib ko Kristiano fa. Faan manga gad ba adag e thin rok e piin ni ma nonnon, ma thingar da skengnaged gadad u fithik’ e meybil. (Psalm 139:23, 24) Gad ba adag ni ngada yaliyed thibngin e girdi’ rok Jehovah, fa? Faan manga gad ba adag, ma mang fan ni gad ba adag? Ke kireban’um ni bochan e thin rok be’ ara ngongol rok be’, fa? Faan manga arrogon, ma kab puluw rogon e lem rodad, fa? Ba ngoch nap’an e pi gafgow ni gad be tay u lan e re m’ag ney. (2 Korinth 4:17) Ma faanra bay ban’en u lan e ulung ni be magawonnagdad, mang ni ngada talgad ko pigpig ku Got? Ma faanra ke kireban’dad nga ban’en, ma ngada rin’ed e tin nrayog rodad ni ngada pithiged ma aram e nge mil fan ngak Jehovah ni nge pithig.​—Psalm 4:4; Proverbs 3:5, 6; Efesus 4:26.

12. Uw rogon ni ke pi’ yu Beroea e kanawo’ ngodad?

¹² Gathi ngada gayed thibngin e machib, ya ngada ted fan e machib ni kada filed ara kada rung’aged u lan e muulung. (1 Korinth 2:14, 15) Ma gathi nge maruwar e Thin Rok Got u wan’dad ya ngada boded piyu Boroea ko bin somm’on e chibog ni ur fl’eged i gay lan e babyor nib thothup! (Acts 17:10, 11) Ma aram e ngada folgad ko tin ni kada filed, ma ngada paloggad ko sasalap ma nge chichiiy pa’dad ko machib nriyul’.

13. Uw rogon nrayog ni nge aw ni gad be wereg e sasalap?

¹³ Ma bay yugu reb e sasalap ni ngada ayuwgad riy. Yima were boor e thin ni yima gin ngay, ma baga’ ni yima wereg ko E-mail u lan e computer. Thingar da ayuwgad ko pi thin nem, ni baga’ ni faanra dada nanged ko mini’ e ani somm’on ni ke weliy e re thin nem. Mus ni faanra yib e re thin nem rok reb e Kristiano ni ir be’ nib fel’, ma sana de nang faanem ni faanra ba puluw fare thin ni ke wereg u computer. Aram fan ni thingar da ayuwgad ni dab da weliyed ara wereg e thin ni dada nanged ko ba puluw fa danga’. Dabi siy ni dubdad ni ngada wereged e “yat ni gathi murung’agen Got ndariy fan ni ngan weliy.” (1 Timothy 4:7; New International Version) Thingar da weliyed e thin nriyul’ ngak pi walagdad ere thingar da gonopiyed ma ngada ayuwgad ni nge dab da wereged e thin ni de riyul’.​—Efesus 4:25.

Wenegan Nib Fel’ Ya Kan Fol Ko Machib Nriyul’

14. Mang flaab nrayog ni bochan e gad be fol ko tin ni kada filed ko Thin Rok Got?

¹⁴ Boor ban’en nib fel’ ni wenegan e fol ko machib ni kada filed ara kada rung’aged ko muulung ko Kristiano. Susun, gad ra pirieg ni ra fel’ thildad e piin ni gadad ni ke mich u wan’rad. (Galatia 6:10) Ku ra fel’ lanin’dad u nap’an ni gad ra maruweliy e tin riyul’ u Bible. (Psalm 19:8) Maku nap’an ni gad ra fol ko tin ni kada filed ma “gad ra girngiy e fel’ ko machib ni murung’agen Got” ma ra adag yugu boch e girdi’ ni ngar liyorgad ngak Got.​—Titus 2:6-10.

15. (a) Uw rogon ni gelnag reb e fel’ yangaren ir ya nge dabi rus ni nge machib u skul? (b) Mang e kam fil ko re thin nem?

¹⁵ Bay boor e piin nib fel’ yangaren u fithik’ e Pi Mich Rok Jehovah ni yad ma maruweliy e pi n’en ni kar filed u lan e Bible ara pi babyor ni ma weliy fan e Bible ara kar rung’aged ko muulung. Ma guy e pi sensey nge yugu boch e fel’ yangaren u skul e ngongol rorad nib fel’ ma ba ga’ angin. (1 Peter 2:12) Bay ba rugod u Meriken ni Leslie fithngan ni 13 e duw rok. I yog nib mo’maw’ ni nge weliy e machib ngak e piin ni yad nga skul, machane reb e rran ke thil. I gaar Leslie: “Be weliy e skul rogon ni ma fol chuway’ e girdi’ u fithik’ e towasar. I tining reb e rugod pa’ nga lang me yog ni aram rogon e Pi Mich Rok Jehovah.” Mang e rin’ Leslie ni ir reb e Mich Rok Jehovah? “Kug weliy e tin ni ke mich u wan’ug. Ma dabi siy ni ke gin e girdi’ ya gathi ri gu ma non.” Mang e buch ni bochan? I gaar: “Kug pi’ boch e babyor ngak fare rugod ni ke non ma bay yugu boch ban’en ni ke fith.” Dabi siy ni ma falan’ Jehovah u nap’an ni ma fol e piin nib fel’ yangaren ko pi n’en ni kar filed mar weliyed e machib u skul ni dariy e marus rorad riy!​—Proverbs 27:11; Hebrews 6:10.

16. Uw rogon ni ke yib e ayuw ngak reb e fel’ yangaren ni bochan fare Theocratic Ministry School?

¹⁶ Bay yugu reb e rugod ni Elizabeth fithngan. Ka nap’an ni medlip e duw rok me pining e pi sensey rok ni ngar bad nga Kingdom Hall ni ngar rung’aged e pi talk rok ko Theocratic Ministry School. Faanra dabiyog rok reb e sensey rok ni nge un ko muulung, me weliy Elizabeth e talk rok ngak fare sensey u skul. Nap’an e bin tomur e duw rok ko high school i yoloy Elizabeth ragag e page u morngaagen felngin e Theocratic Ministry School me weliy e re thin nem u p’eowchen aningeg e sensey. Min nog ngak ni nge dag rogon ni ma welthin u lan fare Theocratic Ministry School, me weliy fare thin ni “Mang Fan ni ma Pag Got e Kireb.” Ke fel’ rogon Elizabeth ni bochan e skul ni ma tay e Pi Mich Rok Jehovah u lan fare Theocratic Ministry School. Maku bay bokum e Kristiano nib fel’ yangaren ni bod Elizabeth ni yad ma fol ko tin ni kar filed ko Thin Rok Got.

17, 18. (a) Mang e fonow ko Bible u morngaagen e yul’yul’? (b) Uw rogon ni ke fel’ rogon be’ ni bochan e ke yul’yul’ reb e Mich Rok Jehovah?

¹⁷ Be yog e Bible ngak e pi Kristiano ni ngar yul’yul’gad u gubin ban’en. (Hebrews 13:18) Faanra dab da yul’yul’gad ma rayog ni nge kireb thildad yugu boch e girdi’, maku rayog ni nge kireb thildad Jehovah. (Proverbs 12:22) Ngongol rodad nib yul’yul’ e ra micheg ni gad be fol ko tin ni kada filed, ma rayog ni nge tay yugu boch e girdi’ fan e Pi Mich Rok Jehovah.

¹⁸ Bay morngaagen be’ ni salthaw ni Phillip fithngan. Ke mul reb e check rok ko bank ni reb e check ni ke sayin ngay ma de yoloy fithngan be’ ngay ara urngin e salpiy ngay. De naab ngay ni ke n’ag fare check machane kan sulweg ngak u Post. Reb e Mich Rok Jehovah e ke pirieg fare check, ma faani sulweg fare check u Post me yoloy e babyor ni be weliy ni ke sulweg fare check ni bochan e aram rogon e machib ni be fol ngay. Kari gin Phillip ngay. I gaar: “Rayog ni nge iring urngin e salpiy rog ni $9,000.” Ma bay biyay ni ke kireban’ Phillip ya kan iring e urwech rok u galesiya. Ke gin ngay ni reb e fager rok e ke iring e urwech rok, machane be’ ni de nang owchen e ke sulweg e check rok ni bokum biyu’ e dollar puluwon! Be m’ug ko re thin ney ni yira yog e sorok ngak Jehovah ni bochan e yul’yul’ ni ma tay e pi Kristiano!

Nguum Maruweliy e Pi N’en Ni Kam Fil

19, 20. Uw rogon nra fel’ rogodad ni bochan egad be fol ko tin ni kada filed ko Bible?

¹⁹ Ra yib e flaab ni boor ngak e piin ni ma maruweliy e pi n’en ni kar filed ko Thin Rok Got. I gaar James: “Machane en nra fal’eg i yaliy ir nga fithik’ fare motochiyel nrib yal’uw ni ir e ma pithig e girdi’ ko kireb, me tiyan’ ngay ma gathi ke mus ni motoyil ngay me pag talin, ya be maruwel ngay​—cha’nem ni aram rogon e Got e ra ayuweg ko tin ni be rin’.” (James 1:25) Arrogon, faan gad ra ngongol nrogon e pi n’en ni kada filed ma ra yib e falfalan’ ngodad ma rayog ni ngada athamgilgad u fithik’ e pi magawon ko yafas rodad. Ma bin ni baga’ fan riy e ra flaabnagdad Jehovah maku rayog e yafas ni manemus ngodad!​—Proverbs 10:22; 1 Timothy 6:6.

²⁰ Ere ngada tedan’dad ko fol Bible. Ma ngada muulunggad e piin ni yad ma liyor ngak Jehovah, ma ngada tedan’dad ko pi n’en ni yibe weliy riy. Ngada folgad ko pi n’en ni kada filed, ma ngada maruweliyed ma “Got ni ir e be pi’ e gapas nga lanin’dad e bayi par romed.”​—Filippi 4:9.

[Footnote]

Ka Ga Manang?

• Mang “fapi thin riyul’,” ma uw rogon nrayog ni ngada folgad riy?

• Mang “sasalap” ni ngada pied keru’dad ngay?

• Mang flaab nrayog ngak e piin ni ma fol ko tin ni kar filed ko Thin Rok Got?

[Picture on page 15]

Uw rogon nrayog ni nge ayuw e tin somm’on e Kristiano ni nge dab ra sorgad nga bang ni bochan e piin ni kar maloggad?

[Pictures on page 16]

Rayog ni nge tugul e maruwaran’ ni bochan e awoch ni yibe wereg ko shimbung, ara Internet nge piin ni kar maloggad

[Picture on page 17]

De fel’ ni ngan wereg e thin ni dariy e mich riy

[Pictures on page 18]

Pi Mich Rok Jehovah e ma fol ko tin ni kar filed ko Thin Rok Got u nap’an ni yad be maruwel ara yad bay u skul ara yugu bang