Mu Par Ni Ga Be Tayfan E Machib Ni Yib Rok Got

“Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang. Nguum lemnag Somol u fithik’ urngin ban’en ni ga be rin’, me dag ngom e bin nib mat’aw e kanawo’.”​—PROVERBS 3:5, 6.

1. Uw feni yoor e tamilangan’ ko girdi’ e chiney ni rayog ni de bod kafram?

NGIYAL’ NEY, ma sogonapan 9,000 e shimbung u gubin e rran ni yibe wereg u fayleng ni ga’ngin. Ma ke mus nu Meriken ma sogonapan 200,000 ken e babyor nib biech ni yibe ngongliy riy u gubin e duw. Ma kan sananag, ni pul ni March ko duw ni 1998, ma sogonapan 275 milyon e Web pages ni bay ko fare Internet. Kan nog ni re n’ey e be yoor iyan ni gubin e pul ma ke taw ko 20 milyon e pages. De taabrogon ko kakrom, ke mus ni fin chiney e rayog ni nge nang e girdi’ boch ban’en nib thil thil e kenggin riy. Riyul’ ni bay boch ban’en riy nib fel’, machane pi thin ney ni kaygi yoor e ke k’aring boch e magawon.

2. Mang boch e magawon ni ra yib ni faanra ngan fil e pi thin ni kan wereg u fayleng ni kaygi yoor?

² Boch e girdi’ e kar mechamgad ko bieg babyor, ma ri yad baadag ni ngar filed ban’en nib biech ma be par e lem rorad ni aram rogon mi yad pagtalin e pi thin ni baga’ fan. Boch e kar filed boch ban’en ni ir bang ko fare tamilangan’ nib mo’maw’ ni ngan nangfan ma yad be lemnag ni kar cheggad. Bochan ni ke mus ni buchuw e tin ni yad manang, ma sana yad ra dugliy ban’en nra kirebnagrad ara yugu boch e girdi’. Ma bay e riya’ riy ni nge yog ngorad e tamilangan’ ni googsur ara de puluw. Baga’ ni dariy e kanawo’ nib mudugil u rogon ni ngan nang ko ba puluw ara ba thabthabel e pi thin ney ni boor.

3. Mang boch e fonow u lan e Bible ni kan pi’ ngak e piin ni ma athamgil ni nge yog ngorad e llowan’ ko girdi’?

³ Ngan fil ban’en e aram e ngongol ko girdi’ ni ke n’uw nap’an kakrom. Fare magawon ni ngan adbey e tayim ni boor i bieg e thin ni dariyfan ara n’en ni ma kirebnagey e kan nang u nap’an Solomon ni Pilung, ni gaar: “Ngan kol ayuw: Yira ngongliy e babyor ni boor ken ma dabi m’ay, ra ngan tiyan’uy ngay ma ra magawonnag e dowef.” (Ecclesiastes 12:12, New World Translarion) Ke yan boch e chibog nga tomren me yoloy Paul ni apostal ngak Timothy, ni gaar: “Timothy, mu ayuweg e n’en ni gur e kan pag fan ngom ni ngam ayuweg, dabmu un i yog e thin ni ma yog e piin ni dariy fan Got uwan’rad nge tugthin ndariy fan ni murung’agen e llowan’ ni ke balyang boch e girdi’ ka rogned ni bay e re ‘llowan’’ nem rorad, ma wenegan ni be yib ngorad e kar olobochgad da ku ranod u rogon kanawoen nib mich Got uwun’uy.” (1 Timothy 6:20, 21) Arrogon, piin Kristiano e chiney e thingara paloggad ko pi lem ko girdi’ ni ra kirebnagey.

4. Mang reb e kanawo’ ni rayog ni ngada daged ni gad be pagan’ ku Jehovah nge thin rok?

⁴ Maku ffel’ ni nge motoyil e girdi’ rok Jehovah ko pi thin ni bay ko Proverbs 3:5, 6: ni gaar, “Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang. Nguum lemnag Somol u fithik’ urngin ban’en ni ga be rin’, me dag ngom e bin nib mat’aw e kanawo’.” Ra ngani pagan’uy ku Jehovah ma ba l’ag ngay ni dabni fanay urngin e tamilangan’ nib togopuluw ko Thin rok Got, ni yugu demtrug ni yib e re n’ey rodad ara yib ku yugu boch e girdi’ rorad. Ra ngan ayuweg ni nge par nib gel e michan’ rodad, ma baga’ fan ni ngada ayuweged nge par nib fel’ e nangan’ rodad ni rayog ni ngad nanged e tin ni ra kirebnagey ma ngada paloggad riy. (Hebrews 5:14) Gad ra weliy boch ban’en ni ir e ma yib riy e pi tamilangan’ nem.

Fayleng ni Satan e Be Gagiyegnag

5. Mang e lem ni ma kirebnagey, ma mini’ e be ta’tanggin?

⁵ Fare fayleng e ir e gin ni ri ma yib riy e pi tamilangan’ ni ra kirebnagey. (1 Corinthians 3:19) I meybil Jesus Kristus ngak Got ni fan ko pi gachalpen, ni gaar: “Ma gathi gu be wenignag ngom ni ngam fekrad ngar chuwgad u fayleng, machane gu be wenignag ngom ni ngam ayuwegrad rok Faanem nib Kireb.” (John 17:15) Fare meybil ni i tay Jesus e fan ni ngan ayuweg pi gachalpen rok “faanem nib kireb” ya be dag nib gel gelngin Satan u fayleng. Ma gathi bochan ni gadad e piin Kristiano ma ri dabiyog ni nge suruy lanin’dad ko tin kireb ko re fayleng ney. Me yoloy John ni gaar: “Gadad manang nib mil fadad ngak Got, ma tin ni ka ba’ e girdi’ nu fayleng e ke suweyrad Faanem nib Kireb.” (1 John 5:19) Bochan ni gad bay ko tungun e tin tomren e rran, ma yibe sananag ni Satan nge pi moonyan’ rok e yad ra suguy e fayleng ko tamilangan’ ni ra kirebnagey.

6. Uwrogon ni fapi fafel nu fayleng ni ma chuweg e chalban ko girdi’ e ra n’igin ni nge mecham e girdi’ ko tin kireb?

⁶ Maku yibe susunnag ni boch e tamilangan’ ni ma kirebnagey e ra m’ug ni gowa de kireb. (2 Corinthians 11:14) Susun ngam lemnag e pi n’en ni ma chuweg e chachalban ko girdi’ ni bod è n’en ni yima dag ko TV, nge kachido, nge musik, nge tin ni yima bieg. Boor e girdi’ nib puluw e re ney uwan’rad, ni boor yay ni yibe dag boch e fafel ni yima tamra’ ngay mab kireb, ni bod e ngongol ni darngal, nge cham, nge ngan fanay e drug nib pag rogon. Yay ni som’on ni ngan yaliy reb e fafel ni kaygi kireb ma ra da’da’ e girdi’ ngay. Machane ran yaliy ni boor yay ma ra fel’ e pi’ nem uwan’uy. Thingar dabda lemnaged ni ffel’ ma dabi kirebnagey ban’en ko gosgos ni yima dag e tin kireb riy.​—Psalm 119:37.

7. Mit i mang e llowan’ ko girdi’ ni ra kirebnag e pagan’ rodad ko fare Bible?

⁷ Mu lemnag boch ban’en ni ma wereg e tamilangan’ nib kireb​—fapi babyor ni ke yoloy e pi scientist nge pi scholar ni be weliy ni fare Bible e de riyul’. (Mu taarebnag ko James 3:15.) Ma pi n’en ney e baga’ ni bay ko pi magazine nge babyor ni ri ma bieg e girdi’, ma ra m’aynag e pagan’ rorad ko fare Bible ni buchuw nge buchuw ni bochan. Boch e yad be falfalan’ ni ngar warnaged gelngin e Thin rok Got u daken e thin rorad ni boor ni goo yad ma sananag ban’en. Re magawon ney e i sum u nap’an ni immoy e pi apostal, ya pi thin rok Paul ni apostal e ba tamilang ni be gaar: “Mu guyed rogomed ya ri kolmed be’ ngam manged kalbus rok ni be’ ni be maruwel ko gonop rok e girdi’ nge sabanban ndariy rogon nga bayang, ni yib ko machib ni sum rok e girdi’ ni yibe fil ngak reb e mfen nge reb, ma ki yib ko pi kan ni yad be gagiyeg u lan e gin’en ni ba’ urngin ban’en nu lan e lang riy nib muun e fayleng ngay, ma gathi Kristus e yib rok.”​—Colossians 2:8.

Fapi Toogor ko Thin Riyul’

8, 9. Uwrogon ni tin toogor ko thin riyul’ ara apostasy e be m’ug e chiney?

⁸ Piin ni toogor ko thin riyul’ ara apostate e ku reb ni ra magawonnag e pigpig rodad ku Got. Paul ni apostal e ke yog ni ra sum e toogor ko thin riyul’ u fithik’ e piin ni yima yog e Kristiano ngorad. (Acts 20:29, 30; 2 Thessalonians 2:3) Ke lebug e pi thin rok Paul nem, ya tomren ni ke yim’ e pi apostal, me yib e pi toogor ko thin riyul’ nib gel me sum e ulung ko Kristiano ni googsur ara Christendom ni bochan. Ngiyal’ ney, e de sum e toogor ko thin nriyul’ nib gel u fithik’ girdien Got. Machane, boch e girdi e kar chuwgad ko ulung rodad, ma boch i yad e bagel lanin’rad ma yad ma wereg e thin ni de riyul’ ara de puluw nib togopuluw ko Pi Mich rok Jehovah ngar kirebnaged thirad. Ma boch e kar uned ko yugu boch e ulung ni ngar togopuluwgad ko liyor ni machalbog. Bochan ni yad ma rin’ ni aray rogon, ma aram e kar uned ku Satan ni ir e toogor ko thin nriyul’ ni bin som’on e togopuluw.

⁹ Boch e girdi’ ni apostate e yad be fanay yugu boch e kanawo’ nib thil thil ni ngan wereg boch e thin ngak yugu boch e girdi’, ma ba muun ngay fare Internet, ni ngar wereged boch e thin nde riyul’ nib togopuluw ko Pi Mich rok Jehovah. Arfan, ni boch e girdi’ nib yul’yul’ ni be fal’eg i gay murung’agen e teliw rodad e sana yad ra pirieg boch e thin ko piin ni apostate. Ma boch e Pi Mich e kar fanayed e tayim rorad ni ngar bieged e pi thin ney nib kireb. Maku, yu ngiyal’ ma piin ni apostate e yad ma un ko boch e program ko television ara radio. Mang kanawo’ e susun ni ngan fol riy ni bochan?

10. Mang e ba fel’ ni ngan rin’ u murung’agen e pi thin ni ke wereg e piin toogor ko thin riyul’?

¹⁰ I yog John ni apostal ngak e pi Kristiano ni dabra paged ni ngeb nga lan e naun rorad e pi apostate. Me yoloy ni gaar: “Faanra yib be’ ngomed ni gathi tin ni fil Jesus ngodad e ke fek i yib, ma dab mu pininged nga tabinaw romed; ni mus ni nge lungumed ngak, ‘Nge yib e gapas ngom’ ma dab mogned ngak. Ya en nra yog e re bugithin ney ngak e yow ra mang nga bayang nguur rin’ew e kireb ni be rin’ faanem.” (2 John 10, 11) Ngan palog ko piin ni toogor ko thin nriyul’ ma ra ayuwegdad ni nge dabi af e lem rorad nib kireb ngodad. Ngan pag i bieg e thin ko pi apostate ni kar wereged u daken boch e kanawo’ nib biech ngak yugu boch e girdi’ ya taabrogon ko kan piningrad ni ngar bad nga naun rodad. Dabda paged nge l’agan’dad nga boch ban’en nra waliydad ni ngad uned nga reb e kanawo’ nib kireb!​—Proverbs 22:3.

U Lan e Ulung

11, 12. (a) I yib u uw e lem nra kirebnagey nga lan e ulung ko fa bin som’on e chibog? (b) Uw rogon ni de yog rok boch e Kristiano ni ngar pared ni yad be tay fan e machib ni yib rok Got?

¹¹ Mu lemnag yugu boch ban’en ni rayog ni sum riy e lem ni ra kirebnagey. Sana dan lemnag ni ngan fil ban’en ni de riyul’ ngak be’, machane rayog ni nge mecham reb e Kristiano ni nge yog boch e thin ni de lemnag ko som’on. (Proverbs 12:18) Bochan ni daworda flontgad, ma gad gubin e yu ngiyal’ ma gad ma yog e thin nib oloboch. (Proverbs 10:19; James 3:8) Nap’an Paul ni apostal, mab tamilang ni immoy boch e girdi’ u lan e ulung ni de yog ni ra gagiyegnaged blowthrad ma kar uned ko maluwagthin u murung’agen boch e thin. (1 Timothy 2:8) Boch i yad e kar lemnaged ni yad e sororad ma aram e kar rin’ed ban’en nib pag rogon ya kar togopuluwgad ko liw rok Paul. (2 Corinthians 10:10-12) Kar tugthingad ni bochan e re ngongol nem.

¹² Yu ngiyal’ ma de taareban’rad ma ke gel e magawon rorad kar “tugthingad nib gel ko tin nib achichig,” min kirebnag e gapas u lan e ulung. (1 Timothy 6:5, NW; Galatians 5:15) Bocharad ma ke yoloy Paul e pi n’ey ya kar k’aringed ni nge sum e re tugthin nem, me gaar: “En nra machibnag yugu ban’en nde taarebrogon ko tin nib riyul’ e thin ni thin rok Somol rodad i Jesus Kristus nge rogon murung’agen ni gadad ma liyor ngak Got e be ufanthin, ma dariy ban’en ni manang. Ma ri baadag ni nge maluagthin me tugthin ngak be’ u murung’agen yu bugithin, ma ereray e re n’en ni ma sunmiy e awan’, ma ma wereg e girdi’, ma ma k’aring e thin nib tagan nga nog, ma ir e ma pow’iy e girdi’ nga i sana be’ ku be’ nib kireb e n’en ni be lemnag.”​—1 Timothy 6:3, 4.

13. Mang boch e ngongol ku boch e kristiano ko bin som’on e chibog?

¹³ Ffel’ ya nap’an e pi apostal ma baga’ ni Kristiano ko ngiyal’ nem e yad ba yul’yul’ ni yad ma par ni kar tedan’rad ko maruwel rorad ni ngan wereg e thin ko Gil’iliungun Got nib fel’. Boor pa’ u puluwrad ya yad be ayuweg e “bitir ndariy e gallabthir rorad nge piin ni ppin ni ke yim’ e pumoon rorad ma yad be gafgow” mu un ayuwegey “nge dabi kirebnagey e kireb nu fayleng,” ma der ma adbey e tayim rorad ko tugthin u murung’agen boch e thin. (James 1:27) Yad ma palog ko “chag ngak e girdi’ nib kireb” ni mus u lan e ulung ni fan ni ngar ayuweged ni dabi war e michan’ rorad.​—1 Corinthians 15:33; 2 Timothy 2:20, 21.

14. Faanra dabda koled ayuwngidad, ma uwrogon bogi sabethin ni gad ra ta’ ma ra piliyeg nge ngal’ ni maluagthin ni ra kirebnagey?

¹⁴ Taabrogon, ko fare n’en ni kan weliy ko paragraph ni 11 e baga’ dagathi aram rogon e pi ulung ko Pi Mich rok Jehovah ko ngiyal’ ney. Machane, ffel’ ni faanra ngada lemnaged ni rayog ni nge yib ngodad e re magawon ney ni ngan maluagthin ko tin ni dariy fan. Riyul’ ni de kireb ni ngan weliy e pi thin u lan e Bible ara ngan lemnag boch ban’en ko fare fayleng nib biech ni kan micheg ni dawori tamilang. Ma de kireb ni ngan weliy e tin ni baadag be’ ni nge fanay ara tin ni baadag be’ ni nge rin’, ni bod e mad nge rogon ni ngan fal’eg yaan ara mit i mang fafel ni ngan mel’eg. Machane, faanra ngad towasariyed yugu boch e girdi’ ni ngar uned ko tin ni gad baadag ma gad ra damumuw ni faanra dabi fol boch e girdi’ rodad, ma ran ruwraba’nag e ulung ni bochan e tin nib achichig. Ran tababnag e sabethin ni de kireb mab achichig ma sana ra mang tin ni ra kirebnagey.

Ngan Ayuweg e N’en ni Kan Pag Fan Ngodad

15. Uw feni gel gelngin fare “machib ni yib rok e pi moonyan’” ni nge kirebnag e michan’ rodad, ma mang fonow e kan pi’ u lan fare Thin nib Thothup?

¹⁵ I ginangey Paul ni gaar: “Ke yog fare Kan ni Thothup nib tamilang ni boch e girdi’ e bay ra n’iged e michan’ rorad ngak Kristus ko tin tomren e rran; mi yad fol ko pi kan ni yad ma lifith l’ugun’rad, ni aram e kar folgad ko machib rok e pi moonyan’.” (1 Timothy 4:1) Arrogon, lem nra kirebnagey e ba gel e riya’ riy ngodad. Arfan, ni ke wenignag Paul ngak Timothy ni fager rok, ni gaar: “Timothy, mu ayuweg e n’en ni gur e kan pag fan ngom ni ngam ayuweg. Dabmu un i yog e thin ni ma yog e piin ndariy fan Got uwan’rad nge tugthin ndariy fan ni murung’agen e llowan’ ni ke balyang boch e girdi’ ka rogned e ‘llowan’’ ngay.”​—1 Timothy 6:20, 21.

16, 17. Mang e ke pag Got fan ngodad, ma uwrogon ni ngada ayuweged e re n’ey?

¹⁶ Uw rogon ni nge fel’ rogodad ko fonow ni kan pi’ ngodad u fithik’ e t’ufeg? Kan pag fan ban’en ngak Timothy​—n’en ni baga’ fan ma thingar ni ayuweg. Mang e re nem? Be weliy Paul: “Dab mpag fapi thin nib riyul’ ni kug fil ngom, ya ir e nguum fol riy, mu um par u fithik’ e michan’ nge t’ufeg ni ma yog ngodad ko taab girdi’ ni gadad ma tay Kristus Jesus. Fare Kan ni Thothup ni be par u fithik’dad e gelngin e ngam ayuweg ngay fapi n’en nib fel’ ni faan kan pag fan ngom. (2 Timothy 1:13, 14) Arrogon, tin ni kan pag fan ku Timothy e ba muun ngay fare “thin ni ra gelnagey,” “fare machib nib puluw ko pigpig ku Got.” (1 Timothy 6:3, NW) Ba puluw ko pi thin ney, ma piin Kristiano e ngiyal’ ney e ke mudugilanin’rad ni ngar ayuweged e michan’ rorad nge fare thin riyul’ ni kan pag fan ngorad.

¹⁷ Ngan ayuweg e tin ni kan pag fan e ba l’ag ngay ni ngan elmirinnag boch ban’en ni bod ni ngan fil e Bible nib fel’ rogon nge dabni tal ko meybil, ma yibe ngongliy e “ngongol nib fel’ ngak urngin e girdi’, machane nge ga’ fadad ngak e piin ni kad manged girdien e tabinaw rok Got u fithik’ e mich u wun’uy ngak Kristus.” (Galatians 6:10; Romans 12:11-17) Ke pi’ Paul e fonow ni gaar: “Machane gur, e gur be’ ni girdien Got, ere mpar u urel ko pi n’ey ni urngin ndab mu un ngay. Mu athamgiliy e tin nib mat’aw, nge tin nib fel’ u p’eowchen Got, ma ga par nib mich Got u wun’um, ma ba t’uf Got rom nge girdi’,mu um par ni gab k’adan’, ma gab sumunguy.” (1 Timothy 6:11, 12) Bochan ni ke fanay Paul fare bugithin ni “mu athamgiliy e tin nib mat’aw” ma “ga par ni par nib mich Got u wun’um” e ba tamilang ni thingarda togopuluwgad ko tin ni ma kirebnag e michan’ rodad u fithik’ e pasig nge lem nib mudugil.

Bat’uf e Gonop

18. Uw rogon ni ngad pared nib thabthabel lanin’dad ko tamilangan’ nu fayleng?

¹⁸ Riyul’, ni ra ngan athamgiliy e tin nib mat’aw, ma bat’uf e gonop riy. (Proverbs 2:11; Philippians 1:9) Bod rogon, ni ngan dariyfannag urngin e thin ni kan wereg e de gonop. (Philippians 4:5; James 3:17) Gathi urngin e lem ko girdi’ e ba togopuluw ko Thin rok Got. I dag Jesus ni piin ni ke yib e m’ar ngorad e bat’uf ni nga ranod ngar guyed reb e togta​—e aram reb maruwel nu fayleng. (Luke 5:31) Yugu aram rogon ni nap’an ni immoy Jesus u fayleng ma ma fanay e girdi’ e falay ni kakrom, machane manang ni rayog ni nge fel’ rogon e girdi’ ni ma ning e ayuw ku togta. Pi Kristiano ko ngiyal’ ney e yad be par nib thabthabel ko tamilangan’ nu fayleng, machane ngar athamgilgad ni dabra chuchugurgad ko urngin ban’en ni ra kirebnag e michan’ rorad.

19, 20. (a) Uw rogon ni nge ayuweg e piin ni piilal u fithik’ e gonop ko ngiyal’ ni kan piningrad ni ngar ayuweged e piin ni ka rogned boch e thin ni dan gonopiy? (b) Mang e ra rin’ e ulung ku piin ni yad be par ni yad be wereg e machib ni googsur?

¹⁹ Maku bat’uf e gonop rok e piin ni piilal ni kan piningrad ni ngar ayuweged e piin ni karogned boch e thin ni dariy e gonopiy. (2 Timothy 2:7) Yu ngiyal’, ma boch e girdi’ u lan e ulung e kar maluagthingad u murung’agen e n’en nib achichig ni ban’en ni dawori mudugil. Piin ni piilal e thingar dabra adbeyed e tayim rorad ni ngar ayuweged e girdi’ ni ke yib ngorad e magawon ni aram rogon, ma aram rogon ma dabi kireb e gapas ni be par u fithik’rad. Ku arrogon, dabra lemnaged e tin kireb ko pi walagrad mar dugliyed ban’en ni kaygi papey ngar pininged ni yad e toogor ko thin nriyul’ ara apostates.

²⁰ Ke weliy Paul e ngongol nib fel’ nib t’uf u nap’an ni ngan pi’ e ayuw ngak be’. I yog ni gaar: “Pi walageg ni girdien Kristus, faanra rin’ be’ ban’en nib kireb, ma gimed e piin ni fare Kan ni Thothup e be gagiyegnagmed e ngam guyed rogon faanem nge sul nga rogon nge par ni ke mat’aw biyay; machane thingar mu rin’ed u fithik’ e sumunguy.” (Galatians 6:1) Be weliy u murung’agen e pi Kristiano ni yad be tororuw, me yoloy Jude ni gaar: “Mu runguyed e piin ni yad be tororuw; mu girngiyed yad nib tomgin ngar chuwgad u mit e nifiy ngar thapgad ngak Got.” (Jude 22, 23) Machane, faanra kam pi’ e fonow ngak be’ ni boor yay ma ka be par ni ma wereg e machib ni googsur, ma piin ni piilal e susun ni ngar dugliyed ban’en ni ngar ayuweged fare ulung.​—1 Timothy 1:20; Titus 3:10, 11.

Ngan Suguy Lanin’dad ko Tin nib Manigil

21, 22. Mang e thingarda mel’eged u fithik’ e gonop, ma mang e pi n’en ni thingarda suguyed lanin’dad ngay?

²¹ Fare ulung ko Kristiano e ngar paloggad ko pi thin ni ra kirebnagey ni bod rogon “ba malad ni be longuy e ufin u dowey.” (2 Timothy 2:16, 17; Titus 3:9) Ma riyul’ ni aram rogon ni yugu demtrug ko aram e “gonop” nu fayleng ni be pow’iy e girdi’ ngar sorgad nga bang, nge fapi thin ni ma wereg e piin ni apostates, ara thin ni kan wereg u lan e ulung ni dan lemnag ko som’on. Riyul’ ni ngan nameg ni ngan fil boch ban’en nib biech e ba fel’, machane ra dabni gagiyegnag e lem ma ra aw e re ney ko tamilangan’ ni ra kirebnagey. Gad ma nang e maruwel rok Satan. (2 Corinthians 2:11) Gad manang ni be maruwel nib gel ni nge magawonnagdad ni ngad wargad ko pigpig ku Got.

²² Bochan ni gadad e pi tamachib nib fel’, ma ngada ted fan e machib ni yib rok Got. (1 Timothy 4:6) Yibe athapeg ni ngad fanayed e tayim u fithik’ e gonop ma gad mel’eg e thin ni gad ra fanay. Ma dabi kirebnagdad nib papey e pi thin ni ke thagthagnag Satan. Arrogon, ngada suguyed lanin’dad u gubin ngiyal’ ko “fapi n’en nib fel’, ni yira yog fel’ ngay: ni n’en ni riyul’, ma n’en nib yal’uw, ma mat’aw, ma mmachalbog, ma mmanigil, nge tin ndariy thibngin.” Faanra kad suguyed lanin’dad nge gum’ercha’dad ko pi n’en ney, ma Got ni ba gapas e ra par ngodad.​—Philippians 4:8, 9.

Mang e Kada Filed?

• Uw rogon ni nge kirebnag e michan’ rodad fare llowan’ nu fayleng?

• Mang e rayog ni ngad rin’ed ni ngada ayuweged gadad ni dabi kirebnagdad e pi thin ni ke wereg e piin nib togopuluw ko thin nriyul’?

• Mit i mang thin e thingar da paloggad riy ulan e ulung?

• Uw rogon ni ngan dag nib thabthabel laniyan’ e Kristiano ko pi thin ni kan wereg ni kaygi yoor?

[Picture on page 21]

Boor e pi magazine nge pi babyor nib togopuluw ko pi kenggin e motochiyel rodad ni fan ko Kristiano

[Picture on page 22]

Piin Kristiano e rayog ni ngar nonad ni dabra towasariyed be, nge fol ko lem’ rorad