“Gur e Sorom, Yafas e Rib Manigil!”

GA baadag ni ngam nang ko ri mang fan e yafas? Magdalena, ni ragag nge meruk e duw rok ni reb e Mich Rok Jehovah ni ma par u Szczecin, Poland, e ke ayuweg Katarzyna ni yow u high school ni nge rin’ e n’en ni aram rogon. Kafram ma Katarzyna e ir be’ ni atheist ara be’ ni be lemnag ndariy e Got, machane nap’an ni machibnag ngak Magdalena murung’agen fare Bible, me dag ni kari adag.

Yugu aram rogon ni baadag Katarzyna e thin nu Bible ni ke yog Magdalena ngak, ma dabiyog ni ngari fol riy ni gubin. Nap’an ni weliy Katarzyna ngak Magdalena murung’agen fapi fager nib riyul’, ma ba’ biyay ni yog ni gaar: “Bay rom fare Bible; ma ga manang ko mang kenggin e motochiyel ni ngam fol riy nge uw e ngan gay riy e en nge mang fager. Machane uw rogon e piin dabiyog rorad ni ngara folgad ko pi kenggin e motochiyel nem e chiney?”

Kari thil ban’en u nap’an ni un Katarzyna ko milekag nga London, England. Ke yan i guy fare tochuch ko Pi Mich Rok Jehovah u rom, ma gol ni kan dag ngak e ir e ke k’aring. Kari falfalan’ ko tin nib achichig ni kan rin’ ngak ni bod ni kan bing e mab ngak min motoyil ngak u fithik’ e yul’yul’ ko thin ni be yog.

Nap’an ni tabab e skul biyay ko September 2001, me turguy Katarzyna ni nge un ko fol Bible ni gubin ngiyal’. Be maruweliy ni nge gel boch i tayfan rok ko kenggin e motochiyel u Bible me tabab ni nge fol riy ni gubin e rran. Dawori n’uw nap’an, me yog ngak Magdalena, ni gaar: “Kug thamiy ni bod ni kug tababnag reb e yafas nib biech.” Maku ke non ngak buchuw u cellular phone ni gaar: “Karim magar ko fol babyor rodow e daba’! Ma sorom, yafas e rib manigil! Rib fel’ ni ngan nang ko mini’ e susun ngad piningew e magar ngak nbochan e n’en ni ke rin’.”