“Mu Chugurgad Ngak Got, Me Chugur Ngomed”

U M’on Nge Tomur Yafas Rok e Kari Thil ni Polo’

UW FENI kireban’ nge dariy fan e yafas rok Matsepang! Ir reb e rugod nu Lesotho, ni reb e nam ni bay u lukngun e Yimuch u Africa. Kan chuguliy Matsepang ni teliw rok e Catholic. Machane, dan ayuweg ni nge par nib chuchugur ku Got, ya u lan boor e duw e ke magawonnag boch e sibester ur pied boch e salpiy ngak ngar banniged nge un ko ngongol ni darngal.

Ma wenegen nib riy, e i par ni ke dariy fan u wan’ Matsepang e teliw ma dakir mich u wan’ ni bay reb e Ta Sunmiy ni ma lemnag e girdi’ ni ke sunmiyrad. Bochan nkari thamiy ni kan dariyfannag min gafgownag, ma aram me par ni kari kireban’ Matsepang me magay u laniyan’ ni kari m’ay fan e yafas rok. Me ilal ni ke mang be’ nib maangach ma ma k’aring e cham. Ma re n’ey e fek i yan ko ngongol nib kireb.

Ma tomur riy e ke mang Matsepang bang ko reb e gang ara ulung ko girdi’ ni ma iring e salpiy ko girdi’ ni be un ko train. Kan kol min ta’ nga kalbus u Yimuch u Africa. Me taaboch, kan chuweg u rom min sulweg ko binaw rok, ni Lesotho fithingan, mu rom e ke ulul ko yafas rok ni ma un ko ngongol nib kireb, ya ma un ko chingaw, nge ngongol ni maangach, nge ngongol ni darngal.

Ngiyal’ ni keb e keriban’ ngak nrib gel, me meybil Matsepang ku Got ni nge ayuweg ni be thamiy ni dakuriy e athap rok. Me micheg ni gaar, “Got, faanra nggu magay nib fas, ma baygu rin’ e tin rayog rog ko pigpig ngom.”

De n’uw nap’an, me yib boch e missionary ni Pi Mich Rok Jehovah ngak Matsepang. Ka rogned ni yad baadag ni ngar filed e Bible ngak. Bochan e fol Bible ni kar ted, me naab ngay ni Got e gathi be’ ni dariy fan e girdi’ u wan’. Tin riyul’ riy, ke tamilang u wan’ ni Satan, e ir e “chitamangin urngin e malulifith,” e ke fanay reb e kanawo’ u fithik’ e sasalap ni nge m’oneg ngak yugu boch e girdi’ e lem ni dariy fan e yafas rorad me k’aringrad ngar lemnaged ni dabi pirieg Jehovah ban’en rorad ni baadag.​—John 8:44; Efesus 6:11.

Tin nib thil riy, e kari fal’eg laniyan’ Matsepang u nap’an ni ke nang ni rayog ni ngarda ted fadad ni faan gad ra kalngan’dad ko denen ni kad rin’ed, ma ngad ninged ku Got ni nge n’agfan u wan’ e denen rodad, ma ngad athamgilgad ni ngad felfelan’naged! Kan ayuweg ni nge tamilang u wan’ ni “Got e kab ga’ ko gum’irchadad” ma ma sap ngodad nib thil nga rogon ni gad ma yaliydad.​—1 John 3:19, 20.

Ke felfelan’ Matsepang ni nge beeg e pi thin ney ni thin rok David ni fare psalmist ni gaar: “Jehovah e ba chuchugur ngak e piin ni kari kireban’rad; nge piin ni ke m’ingan’rad e ma ayuweg.” (Psalm 34:18) Bagayad e piin ni “ke m’ingan’rad,” me tamilang u wan’ ni dabi digey Jehovah e pi tapigpig rok, ni yugu aram rogon ni boch i yad e kar mochuchgad ara kar lemnaged ni dariy farad. Kari felfelan’ ni ke nang ni Got e ri ma lemnag urngin e pi saf rok ma ma ayuwegrad u nap’an ni kar magawongad. (Psalm 55:22; 1 Peter 5:6, 7) Ma kari pug laniyan’ ko pi thin ni be gaar: “Mu chuchugur ngak Got, me chugur ngomed.”​—James 4:8.

Gelngin e Thin rok Got, ni fare Bible, e ke chuchugur ni nge gagiyel ko yafas rok Matsepang. Me tabab ni nge un ko muulung ko Kristiano me pag e ngongol rok nib kireb nib togopuluw ko thin u Bible. Ma angin ni yib? Dakir thamiy e chiney ni dariy rogon ni nge yog ngak e t’ufeg rok Got nge runguy. Ka nap’an ni kan taufenag ke mang bagayad e Pi Mich Rok Jehovah, me thognag bokum biyu’ e awa ni fan ko machib ni aram e maruwel ko piin Kristiano ni yad e tamachib ko fare thin nib fel’ ko Gil’ilungun. Yugu demtrug rogon ma tin ke buch rok kafram ni rib mo’maw’ ni ngan pagtalin, ma yafas rok Matsepang e chiney e ba falfalan’ ma ri bay fan. Kari dag u roy ni fare Bible e bay gelngin ni nge mon’ognag e yafas!​—Hebrews 4:12.

[Blurb on page 31]

“Got, faanra nggu magey nib fas, ma baygu rin’ e tin rayog rog ko pigpig ngom”

[Box on page 31]

Kenggin e Motochiyel u Bible ni Be Ayuwegey

Kenggin e motochiyel u Bible ni ke fal’eg laniyan’ e piin ni kan gafgownagrad e ba muun ngay e tin ni baaray:

“Nap’an ni ke yoor e lem ni be magawonnag fithik’ag, ma thin rom [Got] ni ma fal’eg lanin’uy e ra tabab ni nge ayuweg e yaal rog nib sasaf’og.” (Psalm 94:19, NW) Thin rok Jehovah ni “ma fal’eg lanin’uy” ni bay ko Thin rok ni fare Bible e ri ma fal’eg lanin’uy. Ngan tiyan’uy ko pi n’en nem u nap’an ni yibe fal’eg i lemnag ma yibe meybil e ra ayuweg ni nge war e lem ni be magawonnagey ma ma gelnag e pagan’ ngak Got ni bod e Tafager ni rib fel’.

“Ma [Jehovah] ma golnag e piin ni kari kireban’rad, ma ma m’ag e yu yang u dowrad ni ke maadad ma ba amith.” (Psalm 147:3, NW) Faanra gad be pining e magar ko runguy rok Jehovah nge ayuw ni ke pi’ ni fan ni nge opunguy e denen rodad u daken e maligach ni ke pi’ Jesus, ma rayog rodad ni ngad chuchugurgad ngak Got ni dabkuuda thamiyed ni ka bay ban’en ni be magawonnagdad u lan gum’irchadad. Ma ra fal’eg lanin’uy ma ma yibnag e gapas ni dariy ban’en ni ngan taarebrogonnag ngay.

“Dariy be’ nrayog ni nge yib ngog [Jesus Kristus] ni faanra gathi en ni Chitamangiy e pow’iy nge yib ngog, ni ir e ke l’ugeg ku gub; ma bay gu faseg ko yam’ ko chirofen ni tomur ko rran.” (John 6:44) U daken e kan ni thothup rok ngu daken fare maruwel ni ngan wereg e thin ko Gil’ilungun, ma ma ayuwegdad Jehovah ni ngad bad ngak Fak ma ma pi’ ngodad e athap ko yafas ni manemus.