Gur Ra M’ay E Gafgow Biid?

“AM SAP! ko lu’ rok e piin ni kan gafgownagrad, machane dariy be’ ni be fal’eg lanin’rad; ma piin ni ma gafgownagrad e bay gelngirad, ma arfan ni dariy be’ ni ma fal’eg lanin’rad,” ireray e n’en ni yog Solomon ni Pilung nu Israel Kakrom. (Eklesiastes 4:1) Dariy e maruwar riy, ni boor ko piin ni kan gafgownagrad ni keb ngan’ e ku yad e girdi’ nib gafgow.

Gafgow e dabiyog ni ngan nang ni kemus nbochan e salpiy ku be’. Rogon e pi n’en ni ke pi’ fare World Bank ko June 2002, “e kan susunnag ni lan e duw ni 1998 ma 1.2 billion e girdi’ u ga’ngin yang e fayleng ni ma fanay e salpiy nib lich ko $1 u reb e rran . . . ma 2.8 billion e girdi’ ni ma fanay e salpiy nib lich ko $2 u reb e rran.” Kan guy ni yugu aram rogon ni namba ko girdi’ u roy e ke lich ko kafram, “machane ra ngan weliy murung’agen e gafgow ni ma tay e girdi’ ma ka be par nri kab tolang e re namba ney.”

Gur ra m’ay e gafgow biid fa? Ke yog Jesus Kristus ngak pi gachalpen ni gaar: “Ya piin nib gafgow e gubin ngiyal’ ni ba’ romed.” (John 12:8) Machane biney e be yip’ fan ni gafgow nge wenegen e ra ulul i yan ndariy n’umngin nap’an fa? Danga’, ya yugu aram rogon ma de micheg Jesus ngak pi gachalpen ni yad urngin e ra fel’ rogorad nge yoor e chugum rorad, ma susun ri dab dogned ni bochan e re thin ney ni yog ma dakuriy e athap ni fan ko piin nib gafgow.

Yugu demtrug rogon e maruwel nge tini micheg e girdi’ ni ngan chuweg e gafgow e baga’ ndariy angin, ma Thin rok Got, ni fare Bible, e be micheg ni boch nga ram ma ra m’ay e gafgow ko girdi’. Tin riyul’ riy, e i machibnag Jesus fare “thin nib fel’ ngak e piin nib gafgow.” (Luke 4:18) Re thin nib fel’ ney e ba muun ngay fare n’en nni micheg ni ngan chuweg e gafgow. Ma ra buch e re n’eney u nap’an ni Gil’ilungun Got e ra yibnag rarogon e tin nib mat’aw nga fayleng.

Uw feni ra thil e fayleng ni bay yib! Jesus Kristus ni fare Pilung ni ma par u tharmiy ma ra “runguy e piin ni meewar ma ba gafgow, ma ra ayuweg e pogofan rok e piin ni gafgow.” Tin riyul’ riy, e ra “chuwegrad u fithik’ urngin mit e gafgow nib gel ni yibe tay ngorad.”​—Psalm 72:13, 14.

Gil’ilungun Got e ra pithig urngin e magawon ni be gafgownag e girdi’, ma ra chuweg e m’ar nge yam’. Rayog ni ngam pagan’um ko pi n’en ni ke micheg ney ya bochan ni Got e ir e ke thagthagnag. Mang fan ni dabni yaliy e mich riy ni be micheg ni fapi yiiy u Bible e rayog ni ngan pagan’uy ngay?

[Picture Credit Line on page 32]

FAO photo/M. Marzot