Kan Lemnag E Pi Mich Rok Jehovah Ni Kan Li’rad Kar M’ad

RORRAN ni March 7, ko duw ni 2002, ma reb e plaque ni be puguran murung’agen ban’en e kan dag ko fare mach nu Körmend u western Hungary. Re n’em e reb e puguran ko yam’ ni tay fa dalip i Mich rok Jehovah ni piyu Chiyamen (Nazis) e kar li’ed yad kar m’ad ko duw ni 1945.

Kan gabdiy fare plaque ko rungrung u ba naun ni chiney e ireray fare headquarters ko fire department u Hunyadi Road, ni aram e gin nni li’rad riy. Kan ngongliy fare plaque ni fan ni nge puguran e piin ‘Kristiano ni kan li’rad kar m’ad ko March 1945 ya kan lemnag ni yad e piin tatogopuluw ya bochan ni kar folgad ko nangan’ rorad. Pi cha’ nem ni Antal Hőnisch (1911-1945), nge Bertalan Szabó (1921-1945), nge János Zsondor (1923-1945), 2002, e yad e pi Mich rok Jehovah.’

Kan li’rad u nap’an ni ka l’agruw e pul me tal fare Mahl ko Fayleng ni bin II. Mang fan ni pi cha’ nem ni Kristiano e kan li’rad kar m’ad? Fare shimbung u Hungary ni Vas Népe fithingan e be weliy ni gaar: “Nap’an ni tabab Hitler ko gagiyeg rok u Chiyamen, ma gathi kemus ni goo piyu Jew ya kub muun ngay boch e Pi Mich rok Jehovah nib yul’yul’ ni dugliy ni ngan togopuluw ngorad min gafgownagrad’ ma ngan tayrad nga concentration camp min pag ni ngar m’ad nfaan dabra paged e pagan’ rorad ko teliw rorad. . . . Nap’an e March 1945, ma marus nib gel e kari wer u ler ni ngal u Hungary. . . . Bang ko re marus nem e aram e ngan tuluf ma ngan li’ e girdi’ ni Pi Mich rok Jehovah.”

Fare muulung ni kan yarmiy ni fan ni ngan dag fare plaque e kan ruwraba’nag nge mang l’agruw yang. Bin som’mon e kan ta’ u lan fare theater u Batthyány Castle, ma piin kar pied e welthin e ba muun ngorad e Professor Szabolcs Szita, ni ir e en ga’ ko fare Holocaust Documentation Center u Budapest; László Donáth, ni ir bang ko fare Parliament’s Committee for Human Rights, Minority nge Religious Affairs; nge Kálmán Komjáthy, ni cha’ ney e i guy u nap’an ni kan li’rad kar m’ad ma chiney e ke mang be’ ni ma weliy murung’agen e n’en ni buch ko re binaw nem. Pi cha’ nem ni kar uned ko re muulung nem nib pag 500 e girdi’ e ka ranod u but’ nga barba’ e binaw ni fan ni ngar uned ko fa bin l’agruw yang ko re muulung nem​—ni József Honfi ni ir fare Mayor nu Körmend e ke dag fare plaque.

U lan e babyor, ni ke yoloy Ján Žondor (János Zsondor) u m’on ni dawori yim’ e i fonownag e pi walagen ni Kristiano ni pumoon nge ppin ni dabi kireban’rad. I yoloy ni gaar: “Dawor gu pagtalin e thin rok John ni bay ko Revelation 2:10: ni gaar ‘Nguum dag ni gab yul’yul’ nge yan i mada’ko yam’.’ . . . Mmog ngak girdien e tabinaw rog, nge piin tafager rog, nge pi walag u lan e ulung ni dabi kireban’rad, ya bay gum’ nbochan e tin riyul’ ma gathi bochan kug rin e tin nib kireb.”

[Picture on page 32]

Bertalan Szabó

[Picture on page 32]

Antal Hőnisch

[Picture on page 32]

Ján Žondor