Deer ko Piin Ma Bieg

Mang fan ni yog e Bible ni faanra yibe n’en ni ngan kol reb e ppin u gelngiy ma thingari tolul?

Be’ ni dawori pirieg e gafgow nge marus ko cham ni rogon ni ma tay e piin ma mkol ppin u yargel e ri dabiyog ni nge nang feni riyul’ ni ra gothgothey e yafas ku be’. Re n’enem e rib gel e marus riy ya re pin ni kan rin’ ngak e rayog ni par ni ba gafgow nge mochuch u nap’an e yafas rok.a Reb e Kristiano ni kab rugod ni og be’ ngak ni ba takol ppin u gelngin e yan boch e duw me yog ni gaar: “Ri dabiyog i weliy ko thin gelngin e marus ni gu tay e re nep’ i n’em ara maadad ni ke tay ko lem rog ni dabi chuw ke mada’ko chiney.” Yimnang fan, ya oren e girdi’ e baadag ni dabi i lemnag e re n’eney nib gel e faatal riy. Machane, magar ko ngan kol be’ u gelngiy e ban’en nib riyul’ ko re fayleng ni kireb ney.

Fare Bible e der pag i weliy murung’agen boch e ma kol girdi’ u gelngiy ni kaan rin’ nge tin un lemnag ni ngan kol ma de yog kakrom. (Genesis 19:4-11; 34:1-7; 2 Samuel 13:1-14) Machane ku be pi’ e fonow u rogon e n’en ni nge rin’ be’ ni yibe guy rogon ni ngan kol u gelngiy. N’en ni be yog fare Motochiyel u murung’agen ere n’enem e yira pirieg u Deuteronomy 22:23-27. Re n’ey e ke weliy murung’agen l’agruw pa’ i ban’en. Bin som’mon, e be’ nib moon e pirieg ba rugod u lan ba mach me moleg. Yugu aram rogon, ma fare pin e de tolul ara tolul ni ngan ayuweg. Ere angin, e ni dugliy nib buch e rok “ni bochan ni de tolul u lan fare mach.” Faan manga tolul, ma sana piin ni yad ba chuchugur e yad ra yib ngar ayuweged. Ma bin l’agruw, e be’ nib moon e pirieg ba rugod u wuru’ e mach, me “malle’ ngak nge moleg.” Ma rogon ni ayuweg ir rok, e i “tolul fare pin, machane dariy be’ ni yib i ayuweg.” Bathil ko fa binem e ppin ko som’mon, biney e ppin e ba tamilang ni de pag ir ngak facha’ ni ke og ngak. Ba elmirin ni i guy rogon ni nge taleg fare moon, be tolul ni ngan ayuweg, machane ba gel ngak. Tolul ni i tay ere pin nem e mich riy ni be’ nni kol ni de m’agan’ ngay; ere de buch e rok ko kireb ni ke rin’.

Yugu aram rogon ni Kristiano e chiney e dakura moyed u tan e Motochiyel rok Moses, machane kenggin e motochiyel ni kan weliy u rom e ka be pow’iyrad. Bin baaray e n’en ni buch ngalang e be gagiyelnag feni ga’ fan ni ngan togopuluw ngak min tolulnag e ayuw. Tolul ko ngiyal’ ni yibe n’en ni ngan kol be’ u gelngiy e ku yibe sap ngay ni aram e n’en nib puluw ni ngan rin’. Be’ nib cheg u murung’agen rogon i taleg e cham e gaar: “Faanra be’ ni ppin ni kani yan ni ngan kol u gelngiy, ma talin e cham rok ni th’abi fel’ e laman nib ga’.” Be’ nib ppin ni be tolul e ra ulunguy boch e girdi’, ni aram e rayog ni ngar ayuweged, ara ginang e ani keb ni nge kol me chuw. Reb e rugod ni Kristiano ni ke og be’ ngak ni ma mkol girdi’ u gelngin e yog ni gaar: “Gu tolul ni kari musmus gelngig me sul nga keru’. Ma nap’an ni ki yib ngog biyay, mu gu tolul me mil. Kafraf i yib ni yuggu ma lemnag, ‘Uw rogon ni ra ayuwegeg e tolul ni faanra malle’ be’ nib moon nib gel ngog ni kemus ni taareb e n’en ni bay u laniyan’?’ Machane ku gu nang ni baga’ angin!”

Ku aram rogon fa bin ba aram nib kireban’ ni murung’agen be’ nib ppin nni gel ngak ngan kol u gelngiy, e ku de m’ay fan e tolul nge togopuluw ni i tay. Ya n’en nib thil riy, e ke dugliy ni nge rin’ urngin e n’en nrayog rok ni nge rin’ ni nge taleg e cha’ ni baaram ni keb ngak. (Deuteronomy 22:26) Dariy fan ni yugu aram rogon nni kol, ma de alit e nangan’ rok, ma ka ba’ e ta’ fan u wan’, ma kab mich u wan’ ni be par nib biech u p’eowchen Got. Fare marus ni ke yan u fithik’ e ra par ni be maadadnag laniyan’, machane bochan ni manang ni rin’ urngin e tin rayog rok ni nge taleg e cha’ ni baaram ni ke bi kol e baga’ fan ko lem rok ni bay i fel’ i yan.

Ppin ni Kristiano ni yad be par ni be gafgow e lem rorad ni angin dar lemniged ma kar mada’gad be’ ke kolrad u gelngin e rayog ni nge pagan’rad ni Jehovah e ri manang nib polo’ feni amith e lem ni yad be ta’. Maku reb e ayuw ni ra yib ni fan ko maadad ko lem rorad e nge fel’ u wan’rad ni riyul’ ni ke nangfan e piin ni yad taab mich u lan e ulung nge ayuw ni yad ra pi’ u fithik’ e gol. (Job 29:12; 1 Thessalonika 5:14) Maku reb, e gelngin e piin ni ke buch e pi n’em rorad ni yad be tayan’rad ko lem nib manigil e ku ra ayuwegrad ni ngar nanged ni bay e “gapas rok Got ni dabi chuchugur ni nge nang e girdi’ fan.”​—Filippi 4:6-9.

[Footnote]