Report Ko Piin Tamachib Ko Gil’ilungun

Kar “Rung’aged” fare Thin ko Gil’ilungun u Brazil

BOOR e Pi Mich rok Jehovah u Brazil e ka ra filed e Brazilian Sign Language ni yugu aram rogon ni rib mo’maw’ ni fan ni ngan wereg fare thin nib fel’ ngak e girdi’ nib biling. Maruwel ni kar ted e kari yib angin, ma tin ni buch ni yira weliy e chiney e ra dag ni riyul’ ni aram rogon.

Eva,a reb e ppin u São Paulo nib biling, e ke tabab ni nge fil fare sign language u tomren ni ir nge dalip e bitir e kar uned nga reb e pumoon nib biling kar pared u taabang. U lan reb e kantin nib baga’, ma Eva nge fare boyfriend rok e kar mada’nagew reb e ulung ko Pi Mich ma kar pininged yow ngar unew nga reb e muulung u Kingdom Hall. Kar adagew, ya bochan yow be lemnag ni reb e social event e re n’em.

Bochan ni gathi ri manang Eva e sign language, kaygi buchuw e tin ni ke nang fan ko thin ni kan weliy u nap’an e muulung. Tomur riy, ma boch e Pi Mich e ka ra pininged yow ngar unew nga tabinaw rorad ngar ked boch ban’en. Kar fanayed boch e sasing ko fare babyor ni Mu Falfalan’ ni Ngam Par u Fayleng ni Manemus!, kar weliyed ngorow e tin ke micheg Got u murung’agen e paradis u roy u fayleng boch nga m’on. Ke adag Eva e tin ke fil me tabab ni nge un ko muulung ni gubin ngiyal’.

De n’uw nap’an nga tomren, me digey Eva e boyfriend rok ni fan ni nge par nib puluw ko kenggin e motochiyel u Bible. Yugu aram rogon ni girdien e tabinaw rok e kar togopuluwgad ngak nrib gel, me par ni be mon’og i yan ko tirok Got ma kan taufenag ko duw ni 1995. Tomren ni ke yan nel’ e duw, me un Eva ko pioneer, ara tamachib ko Gil’ilungun nib polo’ e tayim rok. Ka nap’an e ngiyal’ nem ma ke ayuweg aningeg e girdi’ nib biling kar ognaged yad ku Got min taufenagrad.

Kan gargelnag Carlos nib biling. Ka nap’an ni kab bitir ma ke mecham ko drugs, nge ngongol ni darngal, nge moro’ro’. Bochan ni be magawonnag girdien e gang, ma aram me mil nge yan nga São Paulo me par rok João nib ngoch nap’an. Ma João e taareb rogon ku Carlos nib biling mab kireb e yafas rok.

Me yan boch e duw nga tomren, me nang Carlos e thin ko Gil’ilungun, ni ke k’aring ni nge biechnag e yafas rok me fal’eg e babyor ni fan ko mabgol rok. Tomren ni ke puluwnag e yafas rok ko thin ni yog e Bible ni susun ni ngan rin’, min taufenag ni be dag ni ke ognag e yafas rok ngak Jehovah. Ngiyal’ nem, e de nang Carlos, ni ku ke fil João e thin nib fel’, ma ku kari thiliyeg e yafas rok. Nap’an ni ke nang ni dabun Jehovah ni ngan fanay e pi liyos, me n’ag João “fapi liyos” ni ke chaariy. Tomren ni pag e yafas rok kafram nib kireb, ku ke un João ko taufe.

Uw feni gel e felfelan’ rok Carlos nge João u nap’an ni kar mada’gow u Kingdom Hall ma kar guyew ko uw rogon ni kar thiliyegew e yafas rorow! Yow l’agruw ni kar mangew lolugen e tabinaw nib fel’ nge tamachib ko Gil’ilungun nib pasig.

U Brazil, bay 30 e sign-language congregations nge 154 e ulung ko sign language, ni ke pag 2,500 e tamachib ni bay riy, ma sogonapan 1,500 e girdi’ riy e bbiling. U nap’an e duw ni 2001 ko fare “Teachers of God’s Word” District Conventions ni fan ko girdi’ nib biling, ma ke pag 3,000 e girdi’ ni kar uned ngay, ma 36 e girdi’ e kan taufenagrad. U daken e towath rok Jehovah, yibe athapeg ni ka bay boor e girdi’ nib biling ni ngar adaged e thin ko Gil’ilungun.

[Footnote]