Kan Pug Lanin’rad Ni Bochan E “Tirok Got Ni Rib Pag Fene Fel’”

“Kug rung’aged ni yad be non ko thin rodad ni murung’agen e tirok Got ni rib fel’.”​—ACTS 2:11.

1, 2. Mang e n’en ni buch u Jerusalem ko Pentekost 33 C.E. ni kan gin ngay?

REB e rran ni kakadabul u nap’an ni ke chuchugur ni nge m’ay fare spring ko duw ni 33 C.E., me buch ban’en ni kan gin ngay u fithik’ e piin pumoon nge ppin, ni yad e pi gachalpen Jesus Kristus ni yad be muulung u lan reb e naun u Jerusalem. “Ma yugu ni gin ma ke yib lingan ban’en u lan e lang ni bod lingan bangi nifeng nib gel ni ke thow, me sugnag fare naun ni polo’ ni kar pired riy nga but’. Mi yad guy e nifiy ni bod yaan e yunmon ni ke wer; . . . , Mi yigoo sugnagrad e Kan ni Thothup mi yad tabab ko numon nlungun boch e nam, ni bod rogon ni ke maruweliyrad fare Kan ni Thothup ni ngar nonod.”​—Acts 2:2-4, 15.

² Reb e ulung ni baga’ e yad be muulung u mit fare naun. Ma ba muun ngay piyu Jew ni kan gargelnagrad u bang, ni “girdi’ ni yad ma tiyan’rad ko motochiyel” ni karbad nga Jerusalem ni ngar uned i madenomnag fare madenom ko Pentekost. Kar gingad ngay ya bochan ra bagayad ma ke rung’ag pi gachalpen Jesus ni yad be non ni thin ko nam rok ni “murung’agen e tirok Got ni rib pag fene fel’.” Uw rogon me buch ni aram rogon ya urngin e pi cha’ nem ni be non e yad e girdi’ nu Galilee?​—Acts 2:5-8, 11.

3. I weliy Peter ni apostal ngak e girdi’ ni yoor ko Pentekost murung’agen e mang?

³ Bagayad u fithik’ e pi cha’ nem ni piyu Galilee e Peter ni apostal. I weliy ni in e wik u m’on riy, ma girdi’ ni de mat’aw e kar lied Jesus Kristus kem’. Machane, ke faseg Got fak ko yam’. Ma tomur riy, me m’ug Jesus ngak boch pi gachalpen, nib muun ngay Peter nge yugu boch e girdi’ ni ur moyed ko ngiyal’ nem. Nni ka ragag e rran u m’on riy, me yan Jesus nga tharmiy. Ir e ke puog fare kan ni thothup nga daken fapi gachalpen. Bay fan e re n’em ngak e piin ni yad be madenomnag fare Pentekost? Riyul’ ni arrogon. Yam’ ni tay Jesus e i fal’eg rogon fare kanawo’ ni fan ni ngan n’agfan e denen rorad min “pi’ ngorad fare kan ni thothup ni taw’ath ndariy puluwon” nfaan yad ra dag ko ngongol rorad ni ke mich u wan’rad. (Acts 2:22-24, 32, 33, 38) Ere mang e ke rin’ e piin ni ur moyed nbochan e “tirok Got ni rib pag fene fel’” ni kar rung’aged? Ma uw rogon ni re chep ney e ra ayuwegdad ni ngad thabthabelnaged e pigpig ni gad ma ta’ ngak Jehovah?

Kan K’aring ni Ngar Maruwelgad!

4. Mang yiiy rok Joel ni ke lebug ko rorran ni Pentekost 33 C.E.?

⁴ Bochan kan pi’ ngorad fare kan ni thothup, me tabab e pi gachalpen u Jerusalem e chi ngiyal’ nem mar wereged murung’agen e thin nib fel’ ngak yugu boch e girdi’ nge rogon ni ngar thapgad ngak Got, mi yad tabab i machibnag fapi girdi’ ni ur muulung gad u rom ko re kakadabul nem. Fare maruwel ni kar ted ni kar machibgad e ke lebuguy fare yiiy nib ga’ fan, ni Joel ni fak Pethuel e ke yoloy ni nga meruk e chibog ni ke yan ni gaar: “Ma tomur riy e bay gu pi’ e kan ni thothup rog nga daken urngin e girdi’, ma piin ni pagel nge piin ni rugod ni fakmed e bay ur yiiygad. Ma piin ni pumoon ni kar pillibthirgad e bay ur lik’ay gad. Ma piin ni kab pagal romed e bay ni piliyeg e changar rorad nguur guyed bogi ban’en. Re ngiyal’ nem e bay gu pi’ e kan ni thothup rog ngak e girdi’ ni mus ngak e piin ni tapigpig ni pumoon nge ppin . . . u m’on ndawori taw e re Rran rok Somol nem, ni reb e rran ni baga’ ma ba gel e gafgow nra fek i yib.”​—Joel 1:1; 2:28, 29, 31, NW; Acts 2:17, 18, 20.

5. Mang e be yip’ fan ni piin Kristiano ko fa bin som’mon e chibog e bod ni ka ra yiiynaged boch e thin? (Mu guy fare footnote.)

⁵ Re ney e be yip’ fan ni ra gagiyegnag Got ni nge sum reb e mfen ni piin ni pumoon nge ppin ni yad boch e profet ni bod rogon David, nge Joel, nge Deborah, ma ngan fanayrad nga u rogned boch ban’en nra buch boch nga m’on? Danga’. Ya pi fak e Kristiano ‘ni pumoon nge ppin, nge piin sib ni pumoon nge ppin’ e bay ur yiiynag ya bochan e kan ni thothup rok Jehovah ni ke suruyrad ni ngar machibnaged murung’agen e “tin nrib pag fene fel’” ni ke rin’ Jehovah nge tin nbayi rin’. Ere yad ra mang piin tayog e thin ko En Th’abi Tolang.a Ere mang e rin’ fapi girdi’?​—Hebrews 1:1, 2.

6. Nap’an ni yibe rung’ag e welthin rok Peter, ma kan k’aring boor e girdi’ ni ngar rin’ed e m’ang?

⁶ Tomren ni ke rung’ag fare ulung i girdi’ e thin ni ke weliy Peter fan ngorad, ma boor i yad e ke k’aring ni nge rin’ ban’en. Me “mich e thin ni ke weliy u wan’rad” ma aram “min taufenagrad; gonapan dalip i biyu’ e girdi’ ni mun ko re ulung rorad nem e chirofen nem.” (Acts 2:41) Bochan boch i yad e riyul’ ni girdi’ nu Israel ma boch i yad e girdi’ nu bang ni kar uned ko teliw rorad, ma aram kar nanged kenggin e Thin rok Got. Re tamilangan’ nem, nge michan’ ni ke yog ngorad e bochan e n’en ni ke fil Peter ngorad, ni ir tapgin ma kan taufenagrad “nga fithingan e Chitamangin nge Fak nge fare kan ni thothup.” (Matthew 28:19) Tomren ni kan taufenagrad ma “kar pared nib yul’yul’ ko tin ni ke fil e pi apostal ngorad.” Maku, kar tababgad i wereg e thin ni kefini mich u wan’rad ngak yugu boch e girdi’. Ma “gubin e rran ni ur muulunggad nga lan e tempel, . . . ma yad be pining e magar ngak Got, ma yad be par ni yad be fel’ u wan’ urngin e girdi’.” Ma bochan e re maruwel nem ni ngan wereg e machib, “ma gubin e rran ni be uneg Jehovah ngorad e piin ni kefin nni ayuwegrad.” (Acts 2:42, 46, 47) Fapi ulung ko Kristiano e rib papey ni kan sunmiy u lan boor e binaw ni ma par e piin ni kefin ra uned ko re ulung nem riy. Dariy e maruwar riy ni reb i fan ni ke yoor e girdi’, e bochan kar athamgilgad ngar machibnaged fare “thin nib fel” u fithik’ e pasig u nap’an ni kar sulod ko binaw rorad.​—Kolose 1:23.

Thin Rok Got e Ba Gel Gelngin

7. (a) Mang e n’en ni ke k’aring e girdi’ ko urngin e nam ni ngar adaged e ulung rok Jehovah ko ngiyal’ ney? (b) Mang e n’en ni kam guy ni be dag ni ku rayog ni nge mon’og e maruwel rodad u ga’ngin yang e fayleng ngu lan e binaw rom? (Mu guy fare footnote.)

⁷ Ma uw rogon e piin ni yad baadag ni ngar manged e pi tapigpig ku Got e chiney? Kub t’uf ni ngar filed e Thin rok Got ni rib fel’ rogon. Ra ngar yodoromgad, ma yad ra nang ni Jehovah e ir Got ni “ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ri ma dag e t’ufeg nib yul’yul’ ngorad nge tin riyul’.” (Exodus 34:6; Acts 13:48) Yad manang e biyul ni i pi’ Jehovah u daken Jesus Kristus u fithik’ e gol, ni racha’en e bay rogon ni nge klinnagrad ko urngin e denen rorad. (1 John 1:7) Maku kar felfelan’gad ni kar nanged murung’agen e tin nib m’agan’ Got ngay ni yira faseg “e piin nib mat’aw nge piin de mat’aw.” (Acts 24:15, NW) T’ufeg ngak e en ni Ir i Yib Rok e “tin nrib pag fene fel’”, e suguy gum’ircha’rad me k’aringrad ni ngar machibnaged e pi thin riyul’ ney. Ma aram kar manged pi tapigpig rok Got ni kar ognaged e yafas rorad ku Got min taufenagrad, me par ni “yad be mon’og ko tamilangan’ rok Got nib puluw.”b​—Kolose 1:10b, NW; 2 Korinth 5:14, NW.

8-10. (a) Uw rogon ma n’en ni buch rok reb e ppin ni Kristiano e be micheg ni Thin rok Got e bay “gelngin”? (b) Mang e be fil ngom e re n’en ney u murung’agen Jehovah nge rogon ni ma rin’ ban’en ngak e pi tapigpig rok? (Exodus 4:12)

⁸ Fare tamilangan’ ni bay ko pi tapigpig rok Got nbochan nkar filed e Bible e gathi ban’en ni de mit ngorad. Re tamilangan’ ney e ke k’aring gum’ircharad, me thiliyeg rogon ni yad ma lemnag ban’en, mar pared ni aram rogon. (Hebrews 4:12) Ni bod fare pin ni Camille fithingan’ ni be un ko maruwel ni ma ayuweg e piin ni kar pillibthirgad. Bagayad e piin ni be ayuweg e Martha ni bagayad e Pi Mich rok Jehovah. Bochan keb ngak Martha fare m’ar ko man’ey nib gel, mab t’uf rok e ayuw ni gubin ngiyal’. Ba t’uf ni ngan puguran ngak ni nge abich​—makub t’uf ni ngan puguran ngak ni nge ful’ e ggan. Machane, ba’ ban’en ni kari mit nga laniyan’ Martha, ni aram e n’en ni gad ra guy.

⁹ Reb e rran ma ke guy Martha Camille ni be yor ni ke kireban’ nbochan ba’ boch e magawon ni keb ngak. Me gumuchmuch Martha ngak Camille me pining ni ngar filew e Bible. Machane rayog rok be’ ni bod rogon Martha ni nge fil e Bible ngak be’? Arrogon! Yugu aram rogon ni boor ban’en ni ke pagtalin Martha, ma de pagtalin e Got rok nrib fel’; ma ku de pagtalin e thin riyul’ nib ga’ fan ni ke fil u Bible. Nap’an e fol Bible, ke yog Martha ngak Camille ni nge bieg urngin e paragraph, nge boch e thin nu Bible ni dan weliy fan, nge fapi deer ni bay u but’, ma nge pi’ e fulweg. Kar filew e Bible ni aram rogon nib n’uw nap’an boch, ma yugu aram rogon ni Martha e ba’ e magawon rok ni aram rogon, ma ke yoor boch e thin nu Bible ni ke nang Camille. Ke guy Martha ni thingari chag Camille ngak yugu boch e girdi’ ni baadag ni ngar pigpiggad ku Got. Bochan’ e re n’en ney, ma aram ke pi’ ngak Camille reb e mad nge bawu’ e sus nib fel’, nrayog ni nge fanay ko ngiyal’ ni ra un ko muulung u Kingdom Hall ko yay ni som’mon.

¹⁰ T’ufeg, nge ngongol nib fel’, nge michan’ ni dag Martha e ke k’aring Camille ni nge rin’ ban’en. Ke yog ni thin ni bay u Bible ni be guy rogon Martha ni nge fil ngak e rib ga’ fan, ya ke chuchugur ni nge pagtalin urngin ban’en ma thin ni ke fil u Bible e danga’. Munmun, ma nap’an ni kan tay Camille nga yugu reb e naun ni ku yima ayuweg e piin ke pillibthir riy, me guy ni keb e tayim nib puluw ni nge rin’ ban’en. Nap’an ni ke pirieg e tayim, me yan nga Kingdom Hall, ni be chuw ko fare mad nge sus ni ke pi’ Martha ngak, me yog ni baadag ni nge fil e Bible. Kari mon’og Camille min taufenag.

Kan K’aring ni Ngan Dag Kenggin e Motochiyel Rok Jehovah

11. Kub muun ngay ko ngan machibnag e thin rok Got u fithik’ e pasig, uw rogon ni ngad daged ni be k’aringdad fare thin ko Gil’ilungun?

¹¹ Chiney, ke pag nel’ e milyon e Pi Mich Rok Jehovah, ni kar boded Martha nge Camille, ni yad be machibnag fare “thin nib fel’ ko Gil’ilungun” u ga’ngin yang e fayleng. (Matthew 24:14; 28:19, 20) Bod rogon e piin Kristiano ko fa bin som’mon e chibog, ni karni k’aringrad ko “tirok Got ni rib pag fene fel’.” Kar pininged e magar ma kan fanayrad ni ngar feked fithingan Jehovah me puog gelngin nga dakenrad. Angin e re n’en ney, mu ur athamgilgad ni ngar “ngongolgad nrogon ni baadag Jehovah, mu ur rin’ed e tin nib m’agan’ ngay ni gubin ngiyal’,” mu ura folgad ko kenggin e motochiyel rok u gubin yang ko yafas rorad. Mab muun ngay e kenggin e motochiyel rok Got ni fan ko munmad nge rogon ni ngan fal’eg yaey.​—Kolose 1:10a; Titus 2:10, NW.

12. Mang fonow nib tamilang u murung’agen e mad nge rogon ni ngan fal’eg yaay ni bay ko bin 1 Timothy 2:9, 10?

¹² Arrogon, ki tay Jehovah kenggin e motochiyel ni fan nga yaadad. I dag Paul ni apostal e tin ni baadag Got ni ngan rin’ riy ni gaar. “Gu baadag ni piin ni ppin e ngar fal’eged yaarad ngar munmadgad nib yalen, ma ba fel’rogon nge lem nib fel’, ma gathi ngar ngongliyed piyan lolugrad ni nge thum’ nga wuru’, ara ra tiyed e nunuw ni gol ara nunuw nni ngongliy ko churuwo’ nu l’ugun e yar ara mad nib tolang puluwon, machane ngar ngongliyed e ngongol nib fel’ nib m’ag ngak e ppin ni rogon girdien Got.”c Mang e kad filed ko pi thin ney?​—1 Timothy 2:9, 10, NW.

13. (a) Mang fan fare “mad nib yaram”? (b) Mang fan ni rayog ni nga dogned ni kenggin e motochiyel rok Jehovah e de pag rogon?

¹³ I dag Paul ni piin Kristiano e thingara “fal’eged yaarad ni ngar fanayed e mad nib yaram.” Dabra paged ni nge kireb yaarad u owchen e girdi’. Ke chuchugur ni urngin e girdi’, ni kub muun ngay e piin nib gafgow, ma rayog rok ni nge fol riy ma aram nge athamgil ni mad rok e ra par nib yaram, mab klin, mab fel’ u owchen e girdi’. Ni bod ni, urngin e Pi Mich u reb e nam nu South America e yad ma yan u fithik’ e gerger ni boor e mile ma yad ma un u bowoch u lan boor e awa ni fan ni ngar uned ko muulung rorad ni district convention. Baga’ ni ra n’en me mul be’ nga lan e lul’ ara ke mit e mad rok nga pa’ngin e gek’iy me magochoth u nap’an e milekag rorad. Ere nap’an ni kar tawgad ko gin ni yira tay e convention riy, ma gathi rib fel’ yaarad u owchen e girdi’. Ere ba t’uf rorad e tayim ni nga ruped e labiy ko mad rorad, ma ngar fal’eged rogon e zipper ko mad rodad, ma ngar lukniged ma ngar ironniged ni ngar fanayed u nap’an e convention rorad. Yad ma tay fan e pong ni ngar abichgad u tebel rok Jehovah, ma yad baadag ni ngar munmad gad nib yalen.

14. (a) Mang e be yip’ fan ni ngan fanay e mad nib “fel’ rogon nge lem nib fel’”? (b) Mang ni ba l’ag ngodad ni ngad fanayed e mad nrogon ni ‘gadad e girdi’ ni ri gad ma pigpig ku Got?

¹⁴ Maku i dag Paul ni thingarda fanayed e m’ad “nib fel’ rogon nge tafinay nib fel’.” Re n’en ney e be yip’ fan ni mad rodad e susun dabi m’ug riy ni gad be uf, ma gathi ban’en ni yira gin ngay, ma dabi k’aring e arar ku be’, ara mad ni be gagiyelnag bang u dowdad ni yima upunguy, ara mad ni ri be fol ko stayil. Maku, munmad rodad e thingari m’ug riy ni ‘ri gad be tay fan Got.’ Ba t’uf ni ngad fal’eged i lemnag e re n’en nem, fa? Gathi kemus ni ngan fanay e mad nib fel’ u nap’an e muulung ma dabni rin’ e re n’en ney u yugu reb e tayim. Yaadad e susun ni nge dag ni gadad e piin ni yima tay fadad ni gubin ngiyal’, ya gadad e Kristiano nge tapigpig u lan 24 e awa u reb e rran. Ba tamilang ni mad rodad u nap’an ni gad be un ko maruwel nge mad u nap’an ni gad be un ko skul e be yan rogon e maruwel ni gad ra rin’. Yugu aram rogon, ba t’uf ni ngad munmadgad nde pagrogon nge rogon ni yima tayfadad. Faanra mad rodad e ma dag e michan’ rodad ku Got u gubin ngiyal’, ma ri dabi talegdad ban’en ni ngad machibnaged e girdi’ u fithik’ e sabethin nbochan yaadad ni be k’aring e tamra’.​—1 Peter 3:15.

‘Dabi T’uf e Fayleng Romed’

15, 16. (a) Mang fan nib ga’ fan ni dabda folwokgad rok e girdi’ nu fayleng u rogon e munmad rorad nge rogon ni yad ma fal’eg yaarad? (1 John 5:19) (b) Ri mang fan ni dabda folgad ko munmad nge rogon ni ma fal’eg e girdi’ nu fayleng yaarad?

¹⁵ Fare fonow ni bay ko 1 John 2:15, 16 e ku be pow’iydad u rogon ni ngad mel’eged e mad rodad nge rogon ni ngad fal’eged yaadad. Gad ra bieg ni gaar: “Dabi t’uf romed e tin ni ba’ u fayleng ara n’en nib mil fan nga fayleng. Faanra t’uf romed e tin ni bay u fayleng, ma aram e de t’uf e en ni Chitamangiy romed. Gubin ban’en nib mil fan ngaray nga fayleng - ni aram e tin nib tagan ban’en ni yima ar’arnag, ni tin nra guy e girdi’ ma yad baadag ni nge yog ngorad, nge urngin ban’en ni bay u roy u fayleng nri ma uf e girdi’ ngay - dariy reb e pi n’ey ni yib rok e en ni Chitamangiy; ya urngin me yib rok e fayleng.”

¹⁶ Re fonow nem e rib puluw ko tayim! Ngiyal’ ney ni kari yoor e girdi’ ni ma k’aring laniyan’ yugu boch e girdi’, ko tin de fel’, ni kari gel ko kafraf ere thingar dabda paged ni nge mang fayleng e nge gagiyegnag murung’agen e mad ni ngad fanayed. Boch e duw ni ke yan, ma yaan e munmad nge rogon ni ma fal’eg e girdi’ yaarad e ke kireb iyan. Maku arrogon u fithik’ e piin ta fol chuway nge piin ni ka nog e professional ngorad e gathi gubin ngiyal’ ni munmad rorad e ba puluw nga rogon nib fel’ ko piin Kristiano. Ireray reb i fan ni gubin ngiyal’ e thingarda lemnaged ni rib t’uf ni “dabda folgad ko ngongol ni yibe rin’ u fayleng” nfaanra gad baadag ni yafas rodad e ra par nib puluw ko kenggin e motochiyel rok Got ma aram gad be “nunuwnag fare machib ko En Taayuw rodad, ni ir fare Got, ko urngin ban’en.”​—Roma 12:2; Titus 2:10, NW.

17. (a) Mang boch e deer e ngad fithed gadad riy u nap’an ni gad ra chuw’iy e mad rodad ara gad ra mel’eg ko mang yaan? (b) Mang fan ni en lolugen e tabinaw e susun ni nge tiyan’ ko uw rogon yaan e girdi’ u lan e tabinaw rok?

¹⁷ U m’on ni ngam chuw’iy reb e mad, ffel’ ni ngam fithem ni: ‘Mang fan ni gu baadag e re mad ney? Bochan e ir e ke fanay fa cha’ ni ka nog entertainer ngak ni ri yimanang​—ma ir be’ ni gu ma pining e sorok ngak? Kan folwok rok e piin girdien reb e gang u kanawo’ ara reb e ulung ni be mon’eg e lem ni ndubun ni bay be’ ni yad be par e tan pa’, ara yad e piin tatogopuluw?’ Maku ngada fal’eged i yaliy rogon fare mad. Faanra ba mad ara sikato, ma uw rogon n’umngin? Ma uw rogon ni kan fal’eg? De pag rogon fare mad, ba fel’ gaangin, mab fel’ u owchen e girdi’, ara kaygi k’ad nga dowey, ma ra k’aring e ar’ar rok be’, ara de yaram? Ngam mu fithem, ‘Ra gu ra fanay e re mad ney ma ra magawonnag yugu boch e girdi’?’ (2 Korinth 6:3, 4) Mang fan ni thingarda lemnaged e re n’en ney? Ya bochan be yog e Bible ni gaar: “Yi Kristus e de yan nga laniyan’.” (Roma 15:3) Piin lolugen e tabinaw e thingara daged ni ri yad be lemnag yaan chon e tabinaw rorad. Bochan ni yad be tayfan fare Got nib felfelan’ ni yad be liyor ngak, ma piin lolugen e tabinaw e thingar dabi maruwaran’rad ni ngar pied e fonow nib mudugil, ngu fithik’ e t’ufeg ko ngiyal’ nib t’uf.​—James 3:13.

18. Mang e ke k’aringem ni ngarim tiyan’um nga rogon yaan e mad rom nge uw rogon ni ga ma fal’eg yaam?

¹⁸ Fare machib ni gad be fek e i yib rok Jehovah, ni ir e en ni ri ma dag e ngongol ni yima tayfan mab thothup. (Isaiah 6:3) Be fonownagdad e Bible ni ngad folgad rok ni “bod pi fak nib t’uf rok.” (Efesus 5:1) Munmad rodad nge rogon ni gad ma fal’eg yaadad e ra rin’ ban’en nib fel’ ara ba kireb ngak e Chitamangidad nu tharmiy. Ma ba mudugil ni gad baadag ni ngad falfalan’naged gum’irchaen!​—Proverbs 27:11.

19. Ra ngan weliy e “tirok Got nrib pag fene fel’” ngak yugu boch e girdi’ ma mang angin nra yib?

¹⁹ Uw rogon ni ga be lemnag murung’agen e “tirok Got nrib pag fene fel’” ni kam fil? Riyul’, karid taw’athgad ya kad filed e tin riyul’! Bochan kada daged ko ngongol rodad ni racha’en Jesus Kristus ni kan puog nga but’ e ke mich u wan’dad, ma kan n’agfan e denen rodad. (Acts 2:38) Bochan e re n’en ney, ma ke puf rogodad ni ngad nonad u p’eowchen Got. Gathi gad be rus ko yam’ ntaab rogon ko piin dariy e athap rorad. Ya ke micheg Jesus ni ra reb e rran ma “gubin e yam’ ni bay u lan e low ni bayi rung’ag laman, mi yad yib u lan e low rorad nga wuru’.” (John 5:28, 29) Jehovah e rib fel’ ni ke dag urngin e pi n’en ney ngodad. Maku ke puog e kan ni thothup rok nga dakendad. Ere, bochan gad be pining e magar ko urngin e pi taw’ath ney e susun nra k’aringdad ni ngad ted fan kenggin e motochiyel rok nib tolang ma ngad pininged e sorok ngak u fithik’ e pasig, ngad wereged e pi n’en “ni rib pag fene fel’” ney ngak yugu boch e girdi’.

[Footnotes]

Uw Rogon ni Ngam Pi’ e Fulweg?

• Mang e “tin nrib pag fene fel’” ni ke rung’ag e girdi’ murung’agen ko Pentekost 33 C.E., ma mang e ka ra rin’ed?

• Uw rogon ni nge mang be’ reb i gachalpen Jesus Kristus, ma mang e ba muun ko re maruwel nem?

• Mang fan ni ngad tedan’dad nga rogon yaan e munmad rodad nge rogon ni gad ma fal’eg yaadad?

• Mang boch ban’en ni susun ngan lemnag u nap’an ni ngan turguy ko ba fel’ fare mad ara fare yaan fa danga’?

[Picture on page 25]

I machibnag Peter ni kan faseg Jesus ko yam’

[Pictures on page 27]

Riyul’ ni ri be m’ug yaam nib puluw rarogon ko fare Got ni ga be liyor ngak?

[Pictures on page 28]

Pi gallabthir ni Kristiano e thingara tiyan’rad nga rogon yaan e girdi’ u lan e tabinaw rorad