“Ngan Par Nib Fel’ E Nangan’”

“BOOR e girdi’ ni ma lemnag ni ngara folgad ko nangan’ rorad u nap’an ni ngar turguyed ban’en”. Machane rogon ni ngan pagan’uy ngay ni rayog ni nge pow’iyey, e ba t’uf ni ngan skulnag ko tin nib mat’aw nge tin nib kireb, ma thingar ud nanged rogon ni be pow’iydad.

Mu lemnag e n’en ni rin’ be’ nib pumoon ni Zacchaeus fithingan, ni bod ni kan yoloy nga lan e Bible. Zacchaeus, ni i par u Jericho, e immoy ni ba ga’ ko tamokun tax ma be’ nib moon ni boor ban’en rok. Ir e ke yog, ni ke yog e pi fel’ rogon nem ngak ni bochan ni i sasalapiy i kunuy e tax ni yu gub tolang​—binem e ngongol e ri ma gafgownag boch e girdi. Ere nangan’ rok Zacchaeus’ e magawonnag u daken e ngongol rok ni de mat’aw fa? Faan manga i rin’, ma ke micheg ni i fek ya thin.​—Luke 19:1-7.

Mebi m’ug reb e ban’en, machane, aram e n’en ni k’aring Zacchaeus nga ki fal’eg i lemnag e gin be sor ngay. I yib Jesus nga Jericho. Me Zacchaeus ni be’ nib ngochngoch e baadag ni nge guy, ma dabiyog ni bochan ni boor e girdi’ni ke muulung. Ere mil nga m’on nge gararaw nga l’ugun’ bake gek’iy ni nge fel’ rogon e changar rok. Ba fel’ u wan’ Jesus feni gel i lemnag rok Zacchaeus’ e re n’enem, me yog Jesus ngak ni bay yib i guy nga tafen. Mi ri falfalan’ me yog e ke fel’ ngak e en ngeb i guy nib gilbuguwan.

N’en ni guy me rung’ag Zacchaeus ko ngiyal’ nem ni yow be chag Jesus e ri bit nga gum’irchaen me k’aring nge thiliyeg kanawoen. Me weliy ngan nang ni gaar: “Mu sap Somol! Baley ko tini fanag ban’en, e nga gu pi’ ngak e piin ni gafgow, ma demtrug e pi n’en ni ka gu fek rok be’ u fithik’ e towasar nge ban ma bay gu fulweg ngak ni aningeg yay e ke mun ngay.”​—Luke 19:8, NW.

Nangan’ rok Zacchaeus’ e kani skulnag, ma ke motoyil me fol riy. Angin ni yib nib fel’ e rib ga’ felngin. Ayugu mu lemnag rogon laniyan’ Zacchaeus u nap’an ni yog Jesus ngak ni gaar: “Re rran ney e kanawoen min thap ku Got e ke taw ko re naun ney!”​—Luke 19:9.

Uw feni be pi’ e athamgil e re n’em nga lanin’dad! Be dag ni yug demtrug e kanawo’ ni ud leked kakrom, ma rayog ni ngad thiliyeged. Ni bod Zacchaeus, rayog ni ngad tayedan’dad ko thin rok Jesus​—ni kan yoloy nga lan e Bible—​ma gad skulnag e nangan’ rodad ko tin nib mat’aw nge tin nib kireb. Ma aram rayog rodad, ni bod rogon ni i ta’ apostal Peter ir ngay ni, “ngan par nib fel’ e nangan’.” Rayog ni ngad motoyilgad ko nangan’ rodad ni kan skulnag ma gadad rin’ e tin nib mat’aw.​—1 Peter 3:16.