Ngam Fal’eg Laniyan’ E Piin Kari Kireban’rad

“Jehovah e ke dugliyeg . . . ni nggu fal’eg laniyan’ e piin ni ke kireban’rad.”​—ISAIAH 61:1, 2, NW.

1, 2. Mini’ e susun ni ngad fal’eged laniyan’, ma mang fan?

JEHOVAH, ni fare Got ko urngin e ayuw nib riyul’, e ma fil ngodad ni ngaud lemnaged yugu boch e girdi’ u nap’an ni keb e gafgow ngorad nib gel. Me fil ngodad ni “ngad nonod ngak e piin ni ke kireban’rad ni ngad fal’eged lanin’rad” ma ngad fal’eged laniyan’ urngin e piin ni yad be yor ni bochan e kireban’. (1 Thessalonika 5:14) Ngiyal’ nib t’uf e ayuw ni aram rogon, ma ngad pied e re n’en ney ngak e piin taareb rogon e michan’ rodad. Maku gad ra dag e t’ufeg rodad ngak e piin ni gathi yad bang ko ulung rodad, ni mus ngak e piin ni dawori dag e t’ufeg ngodad kafram.​—Matthew 5:43-48; Galatia 6:10.

² I bieg Jesus Kristus reb e yiiy ni be tay chilen me yog ni ireray e thin ni fan ngak ni gaar: “Gelngin Jehovah ni Somol ni Th’abi Tolang e kan puog nga dakenag, ya bochan ni ke duguliyeg ni fan ni ngagu machibnag e thin nib fel’ ngak e piin nib sobut’anrad. Ke l’ugeg ni fan ni nggu m’ag nga taabang e piin ni ke m’ingan’rad. . . mug fal’eg laniyan’ urngin e piin ni yad be yor.” (Isaiah 61:1, 2; Luke 4:16-19, NW) Piin Kristiano ko ngiyal’ ney ni kan dugliyrad e ke n’uw nap’an ni kar naabgad ni re motochiyel ney e ku fan ngorad, ma “yugu boch e saf” e kar felfelan’gad ni ngar uned ngorad ko re maruwel n’ey.​—John 10:16.

3. Nap’an ni ra fith e girdi’ ko, “Mang fan ni ma pag Got ni ngeb e gafgow nib gel?,” ma uw rogon ni ngad ayuweged yad?

³ Nap’an ni ra yib e gafgow nib gel ma ma m’ing laniyan’ e girdi’, ma baga’ ni yad ma fith ko, “Mang fan ni ma pag Got ni ngeb e gafgow nib gel?” Fare Bible e be fulweg e re deer nem nib tamilang. Machane, ba t’uf rok be’ ndawori fil e Bible e tayim ni ngari nang fan e fulweg riy. Rayog ni ngan pirieg e ayuw u lan boch e babyor ko Pi Mich Rok Jehovah.a Machane, rogon ni ngan tababnag, me m’ug ni boch e girdi’ e kan fal’eg lanin’rad ni ke mus ni kar guyed u lan e Bible e thin ni bay ko Isaiah 61:1, 2, ya bochan ni be dag ni baadag Got ni nge yog e ayuw ko girdi’ nge chuw e kireban’ rorad.

4. Uw rogon ma reb e Mich u Poland e ke yog rok ni nge ayuweg reb e ppin ni ma un ko skul ni ke kireban’, ma uw rogon ni ra ayuwegem e re n’en nem ni rin’ ni nge yog rom ni ngam ayuweg yugu boch e girdi’?

⁴ Piin ni ka yad ba pagel, maku arrogon e piin ni kar ilalgad, ni ba t’uf ni ngan fal’eg lanin’rad. Reb e fel’ yangaren u Poland e ke kireban’ me wenignag ngak reb e fager rok ni nge fonownag. Fare fager rok e bagayad e Pi Mich Rok Jehovah e fith boch e deer ngak, me tamilang u wan’ ni boch e deer nge lem ni de mudugil e ir e be magawonnag fare ppin: “Mang fan ni kaygi yoor e tin kireb? Mang fan ni ma yib e gafgow ngak e girdi’? Mang fan nib gafgow walageg ni ppin nib yaf? Mang fan ni bay e m’ar u gum’irchaeg? Fare Galesiya e be yog ni baadag Got ni nge buch e tin aram rogon. Machane faanra riyul’ ni aram rogon ma dabki pagan’ug ngak!” Me meybil fare Mich ngak Jehovah ni dani rung’ag laman me gaar: “Gub felfelan’ ni kam fitheg u murung’agen e pi deer ney. Gu baadag ni nggu ayuwegem.” Ke weliy ni nap’an ni kab bitir ma bay boch ban’en ni de mudugil u laniyan’ ma Pi Mich Rok Jehovah e ke ayuweg. Me weliy ni gaar: “Kug nang ni gathi Got e be gafgownag e girdi’. Yad ba t’uf rok, ma baadag ni nge yog ngorad e tin th’abi fel’, ma dabki n’uw nap’an me thiliyeg e tin bay u fayleng. Liliy, nge fapi magawon ko piin kar pillibthirgad, nge yam’ e bayi m’ay, ma girdi’ ni ma fol e ra par ndariy n’umngin nap’an​—u daken e re fayleng ney.” Me dag ngak fare pin ni fel’ yangaren fare Revelation 21:3, 4; Job 33:25; Isaiah 35:5-7 nge 65:21-25. Tomren e sabethin rorow nib n’uw nap’an, me yog fare pin ni ke baud laniyan’ ni gaar: “Ku gu nang fan e yafas rog e chiney. Rayog ni nggub ngagu guyem biyay?” Kar filew e Bible ni l’agruw yay u gubin e wik.

U Daken e Ayuw ni Pi’ Got ni Nge Chuw e Kireban’

5. Nap’an ni nga dogned e runguy rodad ngak e girdi’, ma mang e n’en ni riyul’ nra fal’eg laniyan’?

⁵ Nap’an ni gad be gay rogon ni ngad fal’eged laniyan’ yugu boch e girdi’, thin ni be dag e runguy e ba puluw ni nga dogned ngorad. Ngad athamgilgad ni ngad daged ni ri gad be lemnag rogorad u daken e thin rodad nge lamdad. Dabi yib angin ngodad ni faanra ngad fanayed e thin ni de riyul’ ma dariy fan. Be yog ngodad fare Bible ni “u daken e athamgil laniyan’ ngu daken e thin nib thothup ni be fal’eg lanin’uy ma rayog ni nge yib e athap ngodad.” (Roma 15:4, NW) Bochan rogon e pi’ n’en ney, ma rayog ni ngad weliyed ba ngiyal’ nib puluw ko mang fare Gil’ilungun Got, ma rayog ni ngad daged u Bible ko uw rogon ni ngan pithig e pi magawon e chiney. Ma aram, e rayog ni ngad pied e ayuw me chuw e kireban’ rorad.

6. Mang e thingarda ayuweged e girdi’ riy ni nge nang murung’agen ma aram e rayog ni ngari fel’ rogorad ko ayuw ni bay u lan e Bible?

⁶ Bochan ni ngari yib angin ngak be’ ni kad ayuweged, mab t’uf ni nge nang murung’agen e Got nib riyul’, nge miti mang Got, nge uw feni riyul’ e thin ni ke micheg. Nap’an ni gad be guy rogon ni ngad ayuweged be’ ni chiney e der ma un ko liyor ngak Jehovah, mab fel’ ni ngad weliyed ngak aningeg i ban’en ni baaray. (1) Ayuw ni ngan chuweg e kireban’ ni bay u Bible i yib rok Jehovah, ni bin riyul’ e Got. (2) Jehovah e ir e en Gubin Ma Rayog Rok, ni ir e ke Sunmiy e tharmiy nge fayleng. I ir e Got ni ma dag e t’ufeg ma ri ma dag e t’ufeg nib yul’yul’ nge tin riyul’. (3) Rayog ni ngeb gelngidad ni ngad guman’gad ko pi magawon nfaanra ngad chuchugurgad ngak Got u daken e fol Bible ni nge yog ngodad e tamilangan’ nib puluw. (4) Fare Bible e bay e thin riy ni be weliy nib tamilang boch e thin u murung’agen boch e skeng ni ke mada’nag e girdi’ nib thilthil.

7. (a) Mang angin nfaanra ngan tamilangnag ni ayuw ni ma pi’ Got e “ri ma yib u daken Kristus”? (b) Uw rogon ni ngam fal’eg laniyan’ be’ ni ke naab ni ba kireb e ngongol rok?

⁷ Boch e girdi’ e kar pied e athamgil nga laniyan’ e piin ni manang boch e thin nu Bible u daken e thin ni bay ko 2 Korinth 1:3-7. Nap’an ni yad be rin’ ni aram rogon, ma kar gagiyelniged fare bugithin ni “fare ayuw ni yib ngomad e ku ra yib ni boor u daken Kristus.” Re thin nu Bible ney e ra ayuweg be’ ni nge guy ni fare Bible e ir e ma yib riy e ayuw me chuw e kireban’ nib t’uf ni ngari tiyan’ ngay. Maku rayog ni nge ayuweg ni ngan tababnag e sabethin ni ngan weliy boch ban’en, ni sana ngan ta’ u yugu reb e tayim. Faanra be lemnag e girdi’ ni keb e magawon ngak nbochan e tin kireb ni ke rin’, ere sana rayog ni ngad daged ngak ni dabda turguyed e kireb nga daken, ma rayog ni nge fal’eg laniyan’ ni nge nang e thin ni bay ko 1 John 2:1, 2 nge Psalm 103:11-14. U daken e pi n’en ney ma rayog ni ngad fal’eged laniyan’ yugu boch e girdi’ u daken e ayuw ni ma pi’ Got.

Nap’an ni Kari Magawon e Yafas ni Bochan e Ngongol ko Bugel ara Magawon ko Salpiy

8, 9. Uw rogon ni ngan pi’ e ayuw ni rogon nib m’ag ko girdi’ ni kar gafgowgad nbochan e bugel?

⁸ Yafas ko girdi’ ndabiyog i theeg e ke magawon nbochan e ngongol ni bugel​—ni kan rin’ e tin nrib kireb ngak e girdi’ ara kan dag u nap’an e mahl. Uw rogon ma rayog ni ngad fal’eged lanin’rad?

⁹ Tin riyul’ e Kristiano e ngar ayuwgad ni dabra rin’ed ban’en ni be dag ni yad be un nga reb e ulung ara yugu reb e ulung ko girdi ni be un ko cham u fayleng. (John 17:16) Machane yad ma fanay e Bible nrogon ni ngar daged ni ngongol ko girdi’ ni maangach e dabi par ndariy n’umngin nap’an. Rayog ni ngar bieged Psalm 11:5 ni ngar daged ko uw rogon u wan’ Jehovah e piin ni baadag e ngongol ni bugel ara Psalm 37:1-4 ni be dag u murung’agen e fonow rok Got ni dabda fulweged taban e kireb ni ke rin’ be’ ya ngad pagan’dad ngak Got. Thin ni bay ko Psalm 72:12-14 e be dag ko uw rogon u wan’ Solomon ni Ga’, ni Jesus Kristus, ni chiney e be gagiyeg ni ke Pilung u tharmiy, e girdi’ ni kar gafgowgad ndawor ra bucheged ban’en.

10. Faanra kam par ko pi duw ni un mahl riy, ma uw rogon ni nge fal’eg lanin’um e pi thin nu Bible ni kan dag u roy?

¹⁰ Boch e girdi’ e kar pared u fithik’ e mahl ni boor ni ra reb e ulung riy ma be athamgil ni ir e nge gagiyegnigey. Goo yad be lemnag ni fare mahl nge wenegan e bang ko yafas. Ma reb e athap ni yad be guy riy e ra fel’ boch e par rorad nfaanra rayog ni ngar milgad nga ranod nga yugu reb e binaw. Machane boor i yad e de yib angin ngorad, ma boor i yad e kar guyed rogon ngar yodoromgad ma kar m’ad. Piin ni ka ranod nga yugu reb e binaw e kar pirieged ni goo kar thiliyeged boch e magawon rorad nga yugu reb. Psalm 146:3-6 e rayog ni ngan fanay ni ngan ayuweg e pi cha’ nem ni ngar ted e athap rorad nga ban’en ni ri yima pagan’ ngay ma gathi ngan yan nga bang. Fare yiiy ni bay ko Matthew 24:3, 7, 14 ara bin 2 Timothy 3:1-5 e rayog ni nge ayuwegrad ni ngari tamilang ban’en u wan’rad nge mang fan ni keb e magawon ngorad, ya fan e re n’ey, e gad be par ko tomur ko fare m’ag u boch ban’en ni ke kakrom. Thin ni bay ko Psalm 46:1-3, 8, 9 nge Isaiah 2:2-4 e sana ra ayuwegrad ni ngeb ngan’rad ni riyul’ ni bay e athap ko yafas ni ba gapas ko gabul nge langlath.

11. Mang e thin nu Bible ni ke fal’eg laniyan’ reb e ppin nu Ngal u Africa, ma mang fan?

¹¹ Nap’an ni ka be ulul iyan e mahl u Ngal u Africa, ma reb e ppin e ke mil ke yan ko gin nib palog ko tabinaw rok u nap’an ni yibe boyoch u rom. Yafas rok e ke sug ko marus, nge kireban’, ma kari mulan’. Me munmun, u nap’an ni be par e tabinaw rok u yugu reb e nam, me dugliy e pumoon rok ni nge urfeg e babyor ko mabgol rorow, me tuluf leengin nib diyen nge fakrow ni ragag e duw rok, me mang reb e padre. Nap’an ni kan bieg ngak e thin ni bay ko Filippi 4:6, 7 nge Psalm 55:22, nge boch e articles ko fare Fare Wulyang nge Awake!, me pagan’ fare pin ma ke pirieg fan e yafas.

12. (a) Mang ayuw ni be pi’ e Thin nu Bible ngak e piin kar magawongad ko salpiy nib gel? (b) Uw rogon ma reb e Mich u Asia e ke yog rok ni nge ayuweg reb e customer rok?

¹² Bochan ni kari mo’maw’ e salpiy e chiney ma arfan ni ke mo’maw’ e par ko bokum milyon e girdi’. Maku yu ngiyal’ e bochan e mahl nge wenegan ni keb. U yugu boch e tayim, ma motochiyel ko am ni de puluw nge girdi’ riy ni bay mat’awrad e yad be maruwel u taabang ni ngar feked urngin e salpiy ko girdi’ ni kar chaariyed ma kar towasariyed ni ngar pied e chugum rorad ngorad. Ma boch e girdi’ e dawori yoor e chugum rorad ko re fayleng ney. Pi cha’ nem ni yad gubin e ra felfelan’gad ni kar nanged ni ke micheg Got ni bayi chuweg ko gafgow e piin ni yad be pagan’rad ngak me micheg ni ngeb reb e fayleng nib mat’aw ni ireray e gin ni ra par e girdi’ riy ma ra felan’rad ko maruwel rorad. (Psalm 146:6, 7; Isaiah 65:17, 21-23; 2 Peter 3:13) Nap’an ni reb e Mich u reb e binaw nu Asia e ke rung’ag u reb e customer ni be yog ni kari magafan’ ko magawon ko salpiy u rom, me weliy ngak ni n’en ni be buch u rom e bang ko tin be buch u ga’ngin yang u fayleng i yan. Sabethin rorow u murung’agen e thin ni bay ko Matthew 24:3-14 nge Psalm 37:9-11 e ke fek i yan ko fol Bible ni gubin ngiyal’.

13. (a) Nap’an ni ke mulan’ e girdi’ nbochan e thin ni kan micheg ni de riyul’, uw rogon ni ngad fanayed e Bible ngad ayuweged yad? (b) Faanra ke thamiy e girdi’ ni pi ngongol nem nib kireb e be micheg ni dariy e Got, ma uw rogon ni ngam athamgil ngam tamilangnag fan ban’en ngorad?

¹³ Nap’an ni ke par e girdi’ nib gafgow u lan boor e duw ara ke chalbarad ko tin ni kan micheg ngorad ni de riyul’, ma rayog ni ngar boded piyu Israel u Egypt nbochan ni ke “mulan’rad” ma dar motoyilgad. (Exodus 6:9) Ra aram rogon, ma sana ba fel’ ni ngan weliy boch e kanawo’ ni be dag ni ra ayuwegrad fare Bible ni ngar pithiged e pi magawon e ngiyal’ ney mi yad siyeg e wup nra kirebnag e yafas rok boor e girdi’. (1 Timothy 4:8b) Boch e girdi’ e yad be lemnag ni par rorad ni de fel’ e ir e mich riy ni dariy e Got ara der ma lemnag rogorad. Rayog ni ngam weliy ni ngam fanay boch e thin nu Bible nib puluw ni fan ni ngam ayuwegrad ni ngeb ngan’rad ni ke pi’ Got e ayuw machane boor e girdi’ ni der fanay.​—Isaiah 48:17, 18.

Nap’an ni Yib Fapi Yoko’ nge Durru’

14, 15. Nap’an ni ke rus boor e girdi’ nbochan e gafgow nib gel ni keb, ma uw rogon ni dag e Pi Mich Rok Jehovah ni ri yad ma lemnagrad?

¹⁴ Rayog ni ngeb e gafgow nib gel nbochan e yoko’, nge durru’, nge nifiy, ara ban’en ni ke pil. Ma kireban’ e rayog ni nge garer. Mang e rayog ni ngan rin’ ni fan ni ngan fal’eg laniyan’ e piin kar magaygad nib fas?

¹⁵ Girdi’ e ba t’uf ni ngar nanged ni bay be’ ni be lemnag rogorad. Tomren ni keb e terrorist nga reb e nam ni nge cham ngay, ma boor e girdi’ ni kar rusgad nib gel. Boor i yad e ke yim’ boch e girdi’ u tabinaw rorad, ni be’ ni ma ayuweg e tabinaw rok ko ggan, nge pi fager. Boch i yad e dakuriy e maruwel rorad, ara lem rorad kafram ni pagan’ ni immoy kafram e dakuriy. Pi Mich Rok Jehovah e kar pied e ayuw ngak e piin ni bay ko binaw rorad, ma yad ma yog ni ke kireban’rad ko gafgow ni keb ngorad mi yad pi’ boch e thin ni ra fal’eg lanin’rad u Bible. Boor i yad e kar pininged e magar nbochan e runguy ni kada daged.

16. Nap’an ni ke yib e gafgow nib gel nga reb e binaw u El Salvador, ma mang fan ni kari yib angin e machib u mit e tabinaw ni i tay e Pi Mich u rom?

¹⁶ U El Salvador ni ke yib e durru’ riy nib gel ko duw ni 2001 ma tomur riy e muchubu’ e bar nib dib’ag me li’ boor e girdi’. Reb e pumoon ni 25 e duw rok ni fak reb e Mich nge l’agruw e ppin ni walagen fare pin ni fager rok fare pumoon e kar m’ad. Chingiyal’ nem ma chitiningin fare pumoon nge fare pin ni ngar mabgol e kar uned i wereg e machib u mit e tabinaw i yan nib elmirin. Boor e girdi’ e ke yog ngorow ni Got e ke fek e pi cha’ nem ni kar m’ad ara fare n’en ni buch e ba m’agan’ Got ngay. Gali Mich nem e kar bieged e thin ni bay ko Proverbs 10:22 ni ngar dagew ngorad ni dabun Got ni ngeb e gafgow ngodad. Kar biegew Roma 5:12 ni ngar dagew ngorad ni keb e yam’ nbochan e denen ko girdi’, ma gathi bochan e ir e m’agan’ Got ngay. Maku ka ra biegew boch e thin ni ma fal’eg laniyan’ e girdi’ ni bay ko Psalm 34:18, nge Psalm 37:29, nge Isaiah 25:8, nge Revelation 21:3, 4. Kari motoyil e girdi’ ngorow, ni baga’ ni bochan ni gali ppin nem e ku bay e girdi’ u tabinaw rorad ni ke yim’ ni bochan fare n’en ni buch, ma boor e girdi’ ni kan tababnag e fol Bible ngorad.

17. Nap’an ni ra yib e gafgow nib gel, ma mit i mang e ayuw e rayog ni ngad pied?

¹⁷ Nap’an ni ra yib e gafgow nib gel, ma rayog ni ngam mada’nag be’ e chingiyal’ nem nib t’uf e ayuw rok ko tin nib t’uf ko dowef. Sana ba muun ngay ni ngan pining reb e togta, min fek fa cha’ nga reb e aspital, ara ngan rin’ ban’en ndemtrug ko mang ni fan ni ngan ayuweg e girdi’ ko ggan nge naun rorad. U nap’an ni ke yib e gafgow nib gel u Italy ko duw 1998, ma reb e ta yol e ke naab ni Pi Mich Rok Jehovah e yad “ma rin’ ban’en nrogon, ma yad ma ayuweg e piin nib gafgow, ni dar ma lemnag ko mang e teliw rorad.” U yu yang, ma pi n’en ni kan yiiynag ni ra buch ko tin tomren e rran e ke gafgownag e girdi’ nib gel. U lan e pi binaw nem, me weliy e Pi Mich Rok Jehovah murung’agen e pi yiiy u Bible, ma yad ma fal’eg laniyan’ e girdi’ u daken e tin ni ke micheg e Bible ni fare Gil’ilungun Got e ra yibnag e bin riyul’ e pagan’ ko girdi’.​—Proverbs 1:33; Mikah 4:4.

Nap’an ni Kem’ Be’ u Tabinaw

18-20. Ngiyal’ ni bay be’ u reb e tabinaw ni ke yim’, ma mang e rayog ni nga mog ara ngam rin’ ni fan ni ngam fal’eg lanin’uy?

¹⁸ Gubin e rran ma bokum milyon e girdi’ e ma kireban’ nbochan e en nib t’uf rorad ni kem’. Sana ga ra mada’nag e piin ni yad be yor u nap’an ni ga be un ko machib ni aram e maruwel ko Kristiano ara ngiyal’ ni ga be rin’ boch e maruwel ni yima rin’ ni gubin e rran. Mang e rayog ni nga mog ara n’en ni ngam rin’ nra fal’eg lanin’rad?

¹⁹ Gur kari kireban’ fa cha’ fa? Ke sug e naun rok ko girdi’ rok ni ke kireban’rad? Sana boor ban’en ni ga baadag ni nga mog ngak, machane baga’ fan ni ngan rin’ ban’en u fithik’ e gonop. (Eklesiastes 3:1, 7) Sana ban’en nib puluw ni ngan rin’ e nga nog e thin nra fal’eg lanin’uy, min pi’ boch e babyor nib puluw (reb e brochure, magazine, ara tract), ma ngan yan ngan guyrad u tomren in e rran ni ngan nang ni faanra bay boch e ayuw ni rayog ni ngan pi’ ngorad. Ngiyal’ nib puluw, ma nga mog ngak ni ga baadag ni ngam bieg boch e thin nu Bible ni ra gelnag. Biney e rayog ni ngan gapasnag lanin’uy ma ma golnagey. (Proverbs 16:24; 25:11) Dabiyog ni ngam faseg e yam’, ni bod rogon e n’en ni rin’ Jesus. Machane rayog ni ngam weliy e n’en ni be yog e Bible u murung’agen rarogon e yam’, ni yugu aram rogon ni gathi ireray e tayim ni ngan dag ngan nang e lem ko girdi’ ni de puluw ko thin nu Bible. (Psalm 146:4; Eklesiastes 9:5, 10; Ezekiel 18:4) Rayog ni ngam biegew e tin ni ke micheg e Bible u murung’agen e fas ko yam’. (John 5:28, 29; Acts 24:15) Rayog ni ngam weliyew ko mang fan e re n’ey, ni rayog ni ngam fanay e thin ni yog e Bible u murung’agen reb e fas ko yam’ ni ngam weliyew e re n’en ney. (Luke 8:49-56; John 11:39-44) Maku, ngam weliy murung’agen felngin Got ni ma t’ufegey ni ir e ke pi’ ngodad e re athap ney. (Job 14:14, 15; John 3:16) Mu weliy ko uw rogon ni ke fel’ rogom ko pi machib ney ma mang fan ni ke pagan’um ngay.

²⁰ Ngan pining e piin ni ke kireban’rad ngar ranod nga Kingdom Hall ma rayog ni nge ayuwegrad ngar nanged e girdi’ nriyul’ nib t’uf e piin buguli yoror rorad ma yad manang rogon ni ngar gelnaged laniyan’ bagayad. Reb e ppin u Sweden e ke pirieg ni ireray e n’en ni be gay u nap’an e yafas rok ni polo’.​—John 13:35; 1 Thessalonika 5:11.

21, 22. (a) Mang e n’en nib t’uf rodad nfaanra ngad fal’eged lanin’uy? (b) Uw rogon ma rayog ni ngam fal’eg laniyan’ e en ri manang e Thin nu Bible?

²¹ Nap’an ni kam nang ni bay be’ ni ke kireban’, ni demtrug ko lan e ulung ko Kristiano ara wuru’, ma ga ma thamiy yu ngiyal’ ni de mudugil lanin’um ko n’en ni ga ra yog nge n’en ni ngam rin’? Fare thin nu Greek ni kan thilyeg ni “ngan fal’eg lanin’uy” u lan e Bible e ri be yip’ fan ni “ngan pining ni fan ni ngan chuchugur nga charen.” Ga ra mang en ta fal’eg lanin’uy ma be yip’ fan nib mom ni nge chuchugur ngom e piin ni ke kireban’rad.​—Proverbs 17:17.

²² Ma uw rogon ni faanra be’ ni ga baadag ni ngam fal’eg laniyan’ e manang ko mang e be yog e Bible u murung’agen e yam’, nge fare biyul, nge fare fas ko yam’? Nge yib be’ nge guy e fager rok ni taareb rogon e n’en ni ke michan’row ngay ma ra fal’eg laniyan’. Faanra baadag ni nge yog ban’en, mmotoyil ngak nib fel’ rogon. Dab mu lemnag nib t’uf ni ngam pi’ e welthin. Faanra yibe bieg e thin nu Bible, mu lemnag ni ireray e thin rok Got ni be gelnag gum’irchamew. Mu weliy murung’agen e michan’ romew nib gel ni riyul’ e tin ni ke micheg e thin nu Bible. Ra ngan fal’eg i lemnag e runguy rok Got ma ngan weliy ngak e girdi’ e thin riyul’ ni bay u lan e Bible ni Thin rok Got, ma rayog ni ngam ayuweg e piin ni ke kireban’rad ni ngam fal’eg lanin’rad ma ngam pi’ gelngirad ni yib rok ni “fare Got ni ma fal’eg lanin’uy,” i Jehovah.​—2 Korinth 1:3, NW.

[Footnote]

Mang e Fulweg Rom?

• Ma lemnag e girdi’ ni ma yib e gafgow nib gel ni bochan mini’, ma uw rogon ni ngad ayuweged yad?

• Mang e rayog ni ngad rin’ed ni fan ni ngad ayuweged boch e girdi’ ni ngari fel’ rogorad ko ayuw ni be pi’ e Bible?

• Mang e magawon ni bay ko binaw rom ni ma kireban’nag boor e girdi’, ma uw rogon ni ngam fal’eg lanin’rad?

[Pictures on page 30]

Ngan wereg e thin nriyul’ ni ma fal’eg lanin’uy u nap’an ni keb e gafgow

[Credit Line]

Refugee camp: UN PHOTO 186811/J. Isaac