U Uw E Rayog Ni Ngan Pirieg E Bin Riyul’ E Pagan’ Riy?

“Fare Got ni Chitamangin Jesus Kristus ni Somol rodad . . . e be fal’eg lanin’dad ko urngin e gafgow ni keb ngodad.”​—2 KORINTH 1:3, 4.

1. Mang boch e magawon nra k’aring e girdi’ mi yad lemnag nrib t’uf rorad e n’en nra fal’eg lanin’rad?

BOCHAN e m’ar ni ma marwothnagey e ra k’aring e girdi’ ni nge lemnag ni dakuriy fan e yafas rok. Bochan e durru’, nge yoko’ nge magawon ko ggan e ra gafgownag e girdi’ nib gel. Bochan e mahl ni rayog ni nge yim’ girdien e tabinaw, me kirebnag e pi naun, ara ku rayog ni nge digey boch e girdi’ e naun rorad nge chugum rorad ngar milgad nga bang. Bochan ni ke garer e ngongol nde yal’uw ma aram fan ni be lemnag e girdi’ ni dariy ba yang nrayog ni nga ranod ngay ngar pogofangad. Piin ni keb e gafgow ngorad ni aram rogon e rib t’uf ni ngan fal’eg lanin’rad. U uw e rayog ni ngan pirieg riy?

2. Uw rogon ma ayuw ni ma pi’ Jehovah ni ngan chuweg e kireban’ e bathil feni fel’?

² Boch e girdi’ nge boch e ulung ni yad be maruweliy ni ngar fal’eged laniyan’ e girdi’. Nga nog e thin u fithik’ e gol e yima pining e magar riy. Ngan pi’ boch e chugum ni ayuw ni rayog ni ngan gamaneg e tin nib t’uf ko ngiyal’ nem. Machane kemus ni Jehovah, ni bin riyul’ e Got, e rayog ni nge sulweg nga rogon urngin ban’en ni ke kireb ma ra pi’ e ayuw nib t’uf ma dabki buch biyay e gafgow nib gel ni aram rogon. Fare Bible e be weliy murung’agen ni gaar: “Ngan n’uf fare Got ni Chitamangin Jesus Kristus ni Somol rodad, ni ir e Chitamangin e runguy nge fare Got ni ri ma chuweg e kireban’, ma ir e ma fal’eg lanin’dad ko urngin e gafgow ni ke yib ngodad, ma aram e rayog ni ngad fal’eged laniyan’ e piin ni keb ngorad e gafgow nib thil thil u daken e n’en ni ke fanay Got ni nge fal’eg lanin’dad.” (2 Korinth 1:3, 4, NW) Uw rogon ni ma fal’eg Jehovah lanin’dad?

Ngan Pithig Likngin e Pi Magawon

3. Uw rogon ma ayuw ni ma pi’ Got ni ngan chuweg e kireban’ e ra pithig lik’ngin e magawon?

³ Ke af e yafas ni de flont ngak urngin e girdi’ nbochan e denen rok Adam, ma ra yibnag boor e magawon ma tomur riy e yam’. (Roma 5:12) Ma ke gel e magawon ya bochan ni Satan ni fare Moonyan’ e ir e “be gagiyegnag e girdi’ nu fayleng.” (John 12:31; 1 John 5:19) Jehovah e gathi kemus ni be yog ni ke kireban’ ni bochan e par ko girdi’ ni de felfelan’. I l’og Fak ni kari maagirag rok nge mang reb e maligach ni nge pi’ e ayuw, ma I yog ngodad nrayog ni ngan chuwegdad ko pi magawon ni sum nbochan e denen rok Adam nfaanra ngad daged ko ngongol e michan’ rodad ngak Fak. (John 3:16; 1 John 4:10) Maku ke yiiynag Got ni Jesus Kristus, ni ir e kan pag fan ngak urngin ban’en u tharmiy ngu but’, e ra thang owchen Satan nge birok e m’ag ni polo’ nib kireb.​—Matthew 28:18; 1 John 3:8; Revelation 6:2; 20:10.

4. (a) Mang e ke pi’ Jehovah ni nge gelnag e pagan’ rodad ko tin ke micheg ni nge fal’eg lanin’uy? (b) Uw rogon ni ma ayuwegdad Jehovah ni ngad nanged ko wuin e ra yib e ayuw ni ngan chuweg e kireban’?

⁴ Bochan ni nge gel e pagan’ rodad ko tin ni i micheg Got, me gagiyegnag ni ngan yoloy e mich riy ni boor ni be dag ni urngin ban’en ni ke yiiynag e keb i m’ug nib riyul’. (Joshua 23:14) I uneg nga lan e Bible boch e thin u murung’agen e n’en ni rin’ ni ke ayuweg e pi tapigpig rok ko pi magawon rorad nib mo’maw’ rok e girdi’ ni ngan pithig. (Exodus 14:4-31; 2 Kings 18:13–19:37) Mu daken Jesus Kristus, me dag Jehovah ni tin baadag ni nge rin’ e ba muun ngay ni ngan golnag e girdi’ ko “urngin mit e liliy nge m’ar,” ni kub muun ngay ni ngan faseg e yam’. (Matthew 9:35; 11:3-6) Wuin e ra buch urngin e pi n’en n’ey? Rogon ni ngan pi’ e fulweg riy, e fare Bible e be weliy murung’agen e tin tomren e rran ko re m’ag ney ni ke kakrom, ni ngeb u m’on ko fa bin nib biech e tharmiy nge fa bin nib biech e fayleng rok Got. Tin ni weliy Jesus e ra puluw ko tayim ni gad be par riy.​—Matthew 24:3-14; 2 Timothy 3:1-5.

Pagan’ ni Fan ko Girdi’ ni Kar Gafgowgad

5. Nap’an ni ke fal’eg Jehovah laniyan’ piyu Israel kakrom, ma mang e ke yog ni ngar tayedan’rad ngay?

⁵ Rogon ni ma rin’ Jehovah ban’en ngak piyu Israel kakrom, e gad ra fil riy ko uw rogon ni ma fal’eg lanin’rad ko ngiyal’ ni kar gafgowgad. I puguran ngorad ko mit i mang Got ir. Biney e ke gelnag e pagan’ rorad ko tin ke micheg. I gagiyegnag Jehovah ni nge fanay fapi profet rok boch e thin ni ra dag e thil u thilin nib gagiyel e bin riyul’ e Got mab fas nge pi liyos, ndariy rogorad ni ngar ayuweged yad nge piin ma liyor ngorad. (Isaiah 41:10; 46:1; Jeremiah 10:2-15) Nap’an ni yog Jehovah ngak Isaiah ni gaar, “Mu fal’eged laniyan’ e girdi’ rog, mu fal’eged lanin’rad,” i k’aring e profet rok ni nge fanay e fanathin ma nge weliy murung’agen e n’en ni rin’ ko ngiyal’ ni I sunmiy boch ban’en ni fan ni nge gagiyel ni Jehovah e ir e ani Ga’ ma karimus ni ir e bin riyul’ e Got.​—Isaiah 40:1-31.

6. Mang pow ni ma pi’ Jehovah yu ngiyal’ ni ngan nang ko wuin e ra yib e ayuw ni ngan chuweg be’ ko gafgow?

⁶ Yu ngiyal’, ma ma yog Jehovah e tayim, ni ke chugur ara kab palog, ni ngan ayuweg e girdi’ rok ngan chuwegrad ko magawon. Nap’an piyu Israel ni ke chugur ni ngar chuwgad u Egypt, me yog ngorad ni gaar: “Ri ka taareb e gechig ni nggu pag nga daken Farao nge piyu Egypt. Ma nap’an ni ra mu’, ma aram e bayi pagmed ngam marod.” (Exodus 11:1) Nap’an nib girdien dalip e nam ni kar chaggad nga taabang ngar chamgad ngak piyu Judah u nap’an Jehoshaphat ni Pilung, me yog Jehovah ngorad ni “gabul” e Nge yib i ayuwegrad. (2 Chronicles 20:1-4, 14-17) Ma reb, e rogon ni ngar chuwgad u Babylon, ni ke yoloy Isaiah nib chuchugur ko 200 e duw u m’on riy, ma kan fanay Jeremiah ni ngari tamilangnag e re n’en nem nib chugur i raay e duw u m’on min chuwegrad u rom. Fapi yiiy e ri ma pi’ e athamgil nga laniyan’ e pi tapigpig rok Got u nap’an ni be chugur i yan e tayim ni ngan ayuwegrad!​—Isaiah 44:26–45:3; Jeremiah 25:11-14.

7. Nap’an ni ngan micheg ni ngan chuweg e girdi’ ko gafgow ma mang e n’en ni yima uneg ngay, ma mang e ke rin’ e re n’ey ngak e girdi’ nu Israel nib yul’yul’?

⁷ Ba fel’ ni ngan tiyan’uy ngay ni fapi nen ni micheg ni ma fal’eg laniyan’ e girdi’ rok Got e baga’ ni bay e thin riy ni murung’agen fare Messiah. (Isaiah 53:1-12) U urngin e mfen ni ma yib, ma ireray e n’en ni ma l’agan e girdi’ nib yul’yul’ ngay u nap’an ni kar mada’naged e skeng ni boor. Luke 2:25, e gad ra bieg e thin riy ni be gaar: “Am sap! immoy be’ nib moon u Jerusalem ni Simeon fithingan, ma cha’ ney e ba mat’aw ma bay madgun Got u wan’, ni be sonnag ba ngiyal’ ni ngan fl’eg laniyan’ piyu Israel ko gafgow [ara, ngan pi’ e pagan’ ngorad; ni aram, fare Messiah ni bay yib], ma fare kan ni thothup e bay rok.” Manang Simeon e athap u daken fare Messiah ni kan ta’ nga lan e Bible, ma athap rok ni bayi lebug e pi n’ey e ke gagiyegnag e yafas rok. De nang fan ko uw rogon ni nge lebug ni urngin e pi n’em, ma de yog rok ni nge guy ba ngiyal’ ni nge yib i m’ug nib riyul e re yiiy nem, machane ke felfelan’ u nap’an ni ke poy e En ni ke pi’ Got ni ir e nge “thapeg e girdi’ ngak.”​—Luke 2:30.

Ayuw ni Kan Pi’ u Daken Kristus

8. Mang e thil u thilin e ayuw ni pi’ Jesus ko tin ma lemnag boor e girdi’ ni ireray e n’en nib t’uf rorad?

⁸ Nap’an ni be machib Jesus Kristus u fayleng, ma gathi gubin ngiyal’ ni ma pi’ ngak e girdi’ e tin yad be lemnag nib t’uf rorad. Boch i yad e ur sonniged reb e Messiah ni ra chuwegrad ngar paloggad ko am nu Roma ni ma fanenikay e girdi’. Machane Jesus e de k’aring e cham; me yog ngorad ni ngar “pied ngak . . . Ceasar e tirok ban’en.” (Matthew 22:21) Tin nib m’agan’ Got ngay e gathi ke mus ni ngan chuweg e girdi’ u boch e am ni be gagiyegnagrad. Baadag e girdi’ ni ngar ted Jesus nge mang pilung, machane ke yog ni bayi “pi’ e pogofan rok nge biyuliy boor e girdi’ ngay.” (Matthew 20:28; John 6:15) Gathi eram e tayim ni nge mang pilung, me Jehovah e ra pi’ mat’awun ni nge gagiyeg ma gathi girdi’ ni yoor ndariy e gapas rorad.

9. (a) Mang thin ni ma fal’eg lanin’uy ni i machibnag Jesus? (b) Uw rogon ni dag Jesus ni fare thin ni i machibnag e ba peth ko magawon ni be mada’nag e girdi’? (c) Mang def ni ke ta’ fare machib ni i wereg Jesus?

⁹ Fare ayuw ni i pi’ Jesus e bang ko fare “thin nib fel’ ko gil’ilungun Got.” Ireray e thin ni i wereg Jesus ndemtrug e binaw ni ke yan ngay. (Luke 4:43) Kari weliy ni re thin nem e ba peth ko magawon ko girdi’ u gubin e rran ma aram me dag ko mang e bayi rin’ ni ir fare Messiah ni Pilung. I pi’ tapgin nib biech ngak e piin nib gafgow ngar pared nib fas ya i golnag e girdi’ ni malmit nge girdi’ ndabiyog ni non (Matthew 12:22; Mark 10:51, 52), ma i golnag e piin nib mugutgut (Mark 2:3-12), ma i golnag e girdi’ nu Israel ni bay e m’ar rorad ni ba son gor (Luke 5:12, 13), me golnag yugu boch e m’ar rorad nrib ubchiya. (Mark 5:25-29) Ma kari fal’eg laniyan’ girdien e tabinaw ya ke faseg e pi bitir rorad ko yam’. (Luke 7:11-15; 8:49-56) I dag gelngin ni nge taleg e yoko’ nib gel ma ke duruiy e ulung ko girdi’ nib ga’ ni ke yib e bilig ngorad. (Mark 4:37-41; 8:2-9) Maku, ke fil Jesus ngorad boch e kanawoen e yafas nra ayuwegrad ngar pithiged boch e magawon rorad nra suguy gum’irchaen e girdi’ ko athap ko reb e gagiyeg nib mat’aw u tan fare Messiah. Meere nap’an ni be wereg Jesus e machib, gathi kemus ni ke fal’eg laniyan’ e piin ni ke motoyil ngak u fithik’ e pagan’ ya ku ke tay e def nra pi e athamgil nga laniyan’ e girdi’ ni ra yib gabul nge langlath ni sogonapan l’agruw e biyu’ e duw.

10. Mang e rayog ni ngan rin’ nbochan e maligach ni pi’ Jesus?

¹⁰ Ke pag 60 e duw u tomren ni pi’ Jesus e yafas rok ni maligach min faseg ko yam’ me yan nga tharmiy, min thagthagnag ku John ni apostal ni nge yoloy ni gaar: “Kug yoloy e re n’ey ngomed, pi fakag, ni fan ni nge dabmu denengad; ma faanra chey nge denen be’ ma ba’ Jesus Kristus, ni be’ nib mat’aw, ni ma wenignagdad ngak e en ni Chitamangiy. Yu daken Jesus e ir e be n’ag Got fan e denen rodad riy, ni gathi ke mus ni denen rodad, ya ku er rogon e denen rok urngin e girdi’.” (1 John 2:1, 2) Bochan angin ni yib ko maligach ni pi’ Jesus ni yafas rok nib flont, ma kari fal’eg lanin’dad. Gad manang ni yira n’agfan e kireb rodad, ma nge yog e nangan’ nib biech ngodad, nge tha’ u thildad Got nib fel’, nge fare athap ko yafas ni manemus.​—John 14:6; Roma 6:23; Hebrews 9:24-28; 1 Peter 3:21.

Fare Kan ni Thothup ni Ma Fal’eg Lanin’uy

11. Mang yaram ni ku ra chuweg e kireban’ ni i micheg Jesus ko fare rran u m’on ni dawori yim’?

¹¹ Nap’an ni be chag Jesus ngak e pi apostal rok ko bin tomur e nep’ u m’on ni dawori yim’, me weliy murung’gagen yugu reb e yaram ni ke ngongliy e Chitamangin nu tharmiy ni ra fal’eg lanin’rad. Me yog Jesus ngorad ni gaar: “Baygu wenignag ngak e Chitamangiy ma ra pi’ ngomed yugu reb e ta ayuw [en ma fal’eg lanin’uy; thin ni Greek e, pa·raʹkle·tos] ni nge un ngomed ndariy n’umngin nap’an, fare gelngin e tin riyul’.” Me micheg Jesus ngorad ni gaar: “Fare ta ayuw, ni fare kan ni thothup, . . . e ra fil ngomed urngin ban’en ma ra puguran ngomed urngin ban’en ni kug gog ngomed.” (John 14:16, 17, 26) Uw rogon ni fare kan ni thothup e riyul’ ni ke fal’eg lanin’rad?

12. Uw rogon ma maruwel ko fare kan ni thothup ni ma puguran ngak fapiin gachalpen Jesus e ra fal’eg laniyan’ boor e girdi’?

¹² Ri boor ban’en ni ke fil Jesus ngak e pi apostal rok. Mmutrug ni dar paged talin e pi n’en nem, machane rayog ni ngeb ngan’rad e thin ni yog? Yad ra pag talin e thin ni ka nog ngorad nib ga’fan ya bochan dawora flontgad? I micheg Jesus ngorad ni fare kan ni thothup e ‘ra puguran ngorad urngin ban’en ni ke yog ngorad.’ Meere, sogonapan meruk e duw u tomren ni yim’ Jesus, ma ke yog rok Matthew ni nge yoloy fare Gospel ni bin som’mon, me yoloy riy fare Welthin u daken e Burey, nge fapi fanathin rok u murung’agen fare Gil’ilungun, nge fapi thin ni ke weliy nib tamilang u murung’agen e pow ko wub rok. Ke pag 50 e duw nga tomren, me John ni apostal e ke yog rok ni nge yoloy reb e chep ni yima pagan’uy ngay ni ke sug ko boor e thin ni murung’agen e yafas rok Jesus u fayleng in e rran u m’on ni dawori yim’. Fapi thin ni kan thagthagnag e ri ma pi’ e athamgil nga lanin’uy nge mada’ko ngiyal’ ney!

13. Uw rogon ma fare kan ni thothup e ke mang reb e sensey ko Kristiano kakrom?

¹³ N’en ma rin’ fare kan ni thothup e gathi kemus ni ma puguran ngorad e thin ni yog Jesus, ya ki fil ngak fapi gachalpen me pow’iyrad nge yog ngorad e tamilangan’ ko tin nib m’agan’ Got ngay ni polo’. Nap’an ni ka ba’ Jesus ni be chag ngak fapi gachalpen, me weliy ngorad e pi n’en ni dawori tamilang u wan’rad. Machane, tomur riy, ni ke k’aring e kan ni thothup, me John, nge Peter, nge James, nge Jude, nge Paul e kar yoloyed boch ni be tamilangnag murung’agen e tin nib m’agan’ Got ngay. Meere fare kan ni thothup e ke mang reb e sensey, ni ri be micheg ni Got e be pow’iyrad.

14. Mang boch e kanawo’ ni fare kan ni thothup e ke ayuweg e girdi’ rok Jehovah riy?

¹⁴ Fapi taw’ath ko kan ni thothup u fithik’ e maangang e ku ke ayuweg ni nge gagiyelnag ni daki ayuweg Got fare nam nu Israel me pi’ ngak fare ulung ni Kristiano. (Hebrews 2:4) Fare wom’engin fare kan ni thothup ko yafas ko girdi’ ni be’ nge be’ e ku baga’ fan ni fan ni ngan nang ko mini’ e tin riyul’ i gachalpen Jesus. (John 13:35; Galatia 5:22-24) Ma fare kan ni thothup e be gelnag girdien e re ulung nem ni ngar manged pi mich ndabra rusgad.​—Acts 4:31.

Ayuw ko Ngiyal’ nib Tomal Lanin’uy nib Gel

15. (a) Mang boch ban’en ni ma tomalnag laniyan’ e Kristiano kakrom nge chiney? (b) Mang fan ni piin ni ma pi’ e athamgil nga laniyan’ e girdi’ e yu ngiyal’ mab t’uf ni ngan pi’ e ayuw ngorad ni aram rogon?

¹⁵ Urngin e girdi’ ni ma tiyan’ ko liyor ngak Jehovah ma ma par nib yul’yul’ ngak e yima gafgownagrad. (2 Timothy 3:12) Machane, boor e Kristiano e kan tomalnag lanin’rad nib gel. Ngiyal’ n’ey, ma boch e girdi’ e ke magawonnagrad e piin ma k’aring e wagey minin’rad nga concentration camps, min kalbusnagrad, nge labor camps ni yima towasariy e girdi’ riy ni nge un ko maruwel ma yima magawonnagrad ni bod e gamanman. Fapi am e ma gafgownag e girdi’ nib gel, ara yad ma pag boch e girdi’ nib kireb ni ngar rin’ed e tin nib kireb ngorad ni dabra gechignaged yad. Maku, piin Kristiano e kar mada’naged e magawon ko dowef nib gel ara magawon u tabinaw nib gel. Maku rayog ni nge tomal laniyan’ reb e Kristiano ni ke ilal ko tirok Got ni ke ayuweg boor e girdi’ ni taareb rogon e michan’ rorad ko magawon rorad. Ra aram rogon, ma en be pi’ e athamgil nga laniyan boch e girdi’ e rayog ni nge t’uf rok ni ngaki yog boch ngak.

16. Nap’an ni keb ngak David e n’en ni kari tomalnag laniyan’, ma mang ayuw e ke yib ngak?

¹⁶ Nap’an ni Saul ni Pilung e be gay David ya baadag ni nge li’ ngem’, me chel David ngak Got ni ani Ta Ayuw rok me gaar: “O Got, mu motoyil ko meybil rog,” me wenignag. “Tagalul’ u pom e kugu wan ngay.” (Psalm 54:2, 4; 57:1, NW) Kan ayuweg David? Arrogon. Ngiyal’ nem, i fanay Jehovah Gad ni fare profet nge Abiathar ni fare prist ni nge pow’iy David, ma Ke fanay Jonathan ni fak Saul ni nge pi’ gelngin fare pagal. (1 Samuel 22:1, 5; 23:9-13, 16-18) Maku ke pag Jehovah piyu Philistines ni ngar bad ko fare binaw, ma aram ke tal Saul i gay e cha’ nem.​—1 Samuel 23:27, 28.

17. Nap’an ni ri yibe tomalnag laniyan’ Jesus, ma mini’ e ke yan ngak ni nge ning e ayuw?

¹⁷ Kab gel e gafgow ni keb ngak Jesus Kristus ko ngiyal’ ni ke chuchugur nga tomuren e yafas rok u fayleng. Kari tamilang u wan’ ko mang e ra rin’ e ngongol rok nga fithingan e Chitamngin nu tharmiy ma ku mang e ra rin’ e re n’ey ko yafas ko urngin e girdi’ gabul nge langlath. Ke meybil ni yib u gum’irchaen, ma “kari gafgow riy.” Me gagiyegnag Got ni ngan pi’ e ayuw ngak Jesus ni ireray e n’en nib t’uf rok ko re ngiyal’ nem ni ke mo’maw’ rok.​—Luke 22:41-44.

18. Uw rogon ni ke fal’eg Got laniyan’ e Kristiano kakrom ni kan gafgownagrad nib gel?

¹⁸ Rib gel e gafgow ni kan ta’ ngak e Kristiano u tomren ni kan sunmiy fare ulung ko fa bin som’mon e chibog ma arfan ni ke wer urngin e Kristiano u Jerusalem ni de un fapi apostal ngay. Piin ni pumoon nge ppin e kan giringiyrad u tabinaw rorad. Uw rogon ni ke fal’eg Got lanin’rad? Fare thin rok ni be micheg ni bay “ban’en rorad ni kab fel’, ni bayi par ndabi m’ay biid,” ni aram e yira pi’ e f’oth rorad u tharmiy nib mudugil ngar uned ngak Kristus. (Hebrews 10:34; Efesus 1:18-20) Bochan ni kar ululgad ko machib, ma kar guyed e mich riy ni kan ni thothup rok Got e bay rorad, ma tin ke buch rorad e ke pi’ ngorad boch i tapgin ni ngar felfelan’gad.​—Matthew 5:11, 12; Acts 8:1-40.

19. Yugu aram rogon ni kaygi gel e gafgow ni kan pi’ ngak Paul, ma mang e ke lemnag u murung’agen e ayuw ni ke pi’ Got ni nge chuweg e kireban’ rok?

¹⁹ Me munmun, me Saul (Paul), ni ir e en ni ma gafgownag e girdi’ nib gel kafram, e kan gafgownag ni bochan nke mang reb e Kristiano. U daken bochi donguch ni Cyprus fithingan, e immoy reb e tapig ni i guy rogon ni nge taleg Paul ko maruwel rok ni be machib ni nge rin’ u daken e sasalap ma be thiliyeg e machib. U Galatia, e ni malangnag Paul min digey ya kan lemnag ni ke yim’. (Acts 13:8-10; 14:19) Ma kan toy ko dimow u Macedonia. (Acts 16:22, 23) Tomren e wagey ni tay ba ulung i girdi’ ni ma k’aring e wagey u Efesus, me yoloy ni gaar: “Ya gafgow ntay ngomad e rib gel nib gel nda kug fineyed ni ka gamad ra fos. Gu lemniged ni gamad e girdi’ ni ke m’ay i turguy ni ngan thang e pogofan romad.” (2 Korinth 1:8, 9) Machane u lan e re babyor nem, i yoloy Paul e pi thin nem ni ma fal’eg lanin’uy ni bay ko paragraph 2 ko re article ney.​—2 Korinth 1:3, 4.

20. Mang e gad ra weliy ko bin migid e article?

²⁰ Uw rogon ni ngam un i fal’eg laniyan’ be’? Boor e girdi’ ko ngiyal’ ney e ba t’uf rorad e re ayuw ney u nap’an ni ke kireban’rad, ni sana bochan e gafgow nib gel ni keb ngak bokum biyu’ e girdi’ ara bochan e gafgow ni kari aw ngorad. U lan e article ni bin migid, ma gad ra weliy ko uw rogon ni ngan fal’eg laniyan’uy ni yugu demtrug e magawon.

Ka Ga Manang?

• Mang fan ni ayuw ni yib rok Got ni nge chuweg e kireban’ e ri baga’ fan?

• Mang e ayuw ni ngan chuweg e kireban’ ni kan pi’ u daken Kristus?

• Uw rogon ni kan nang ni fare kan ni thothup e ma fal’eg laniyan’ be?

• Mu weliy boch e ayuw ni pi’ Got ni nge chuw e kireban’ u nap’an ni keb ban’en ngak e pi tapigpig rok ni be tomalnagrad nib gel.

[Pictures on page 23]

Fare Bible e be dag ngodad ni ke ayuweg Jehovah e girdi’ rok ma ke fal’eg lanin’rad

[Pictures on page 24]

I fal’eg Jesus laniyan’ e girdi’ ma aram ke fil ban’en ngorad, me golnagrad, ma ke faseg e yam’

[Picture on page 26]

I yib e ayuw ngak Jesus u lang