‘Mu Uned Ko Meyor ngak e Piin ni Yad Be Yor’

1, 2. Mang fan nib t’uf ni ngad weliyed rogon ni ngad fal’eged laniyan’ e piin ni ke kireban’rad? (Mu guy e sasing ni bay u tabolngin e re article ney.)

I YOG Susi ni gaar: “Nap’an ni yim’ ba pagel ni fakmow, mab chugur i gaman reb e duw ni ug parew nrib kireban’mow.” Ki yog reb e walag ni Kristiano nnap’an ni yim’ leengin nib tomgin, ma “rib gel e amith ni tay laniyan’ ndabiyog i weliy ko thin.” Rib gel e kireban’ riy ni bochan e boor e girdi’ ni ma yib e mit ney e kireban’ ngorad. Sana boor e walag u lan e ulung ni Kristiano e darur lemnaged nra yim’ be’ nrib chugur ngorad u m’on ko Armageddon. Ere, demtrug ko ke yim’ be’ nib t’uf rom fa bay be’ ni ga manang ni ke yim’ be’ nib t’uf rok, ma sana rayog ni ngam lemnag ko, ‘Uw rogon nrayog ni ngan ayuweg e piin ni ke kireban’rad ni ngar athamgilgad u fithik’ e kireban’ rorad?’

² Sana kam rung’ag ni ka nog ni faanra kari kireban’um nga ban’en, ma ra i n’uw nap’an i yan ma ra war e kireban’ rom. Machane gur, gubin ngiyal’ ni ma buch ni aray rogon? I yog reb e ppin ni ke yim’ figirngin ni gaar, “Gu be lemnag ni kab puluw ni nga nog ni n’en nra rin’ be’ ko tayim rok e aram e n’en nra ayuweg ni nge war e kireban’ rok.” Arrogon, kireban’ nge amith ni ma tay lanin’dad e rayog ni ngan taareb rogonnag nga bang u dowdad ni ke maad’ad. Faan yira tafalaynag min ayuweg nib fel’ rogon, ma aram e ra munmun me gol fagi maad’ad. Ere, mang e ra ayuweg e piin ni ke yim’ be’ nib t’uf rorad ni nge war e kireban’ rorad?

JEHOVAH E IR FARE “GOT NI URNGIN MIT E AYUW ME IR E BE YIB ROK”

3, 4. Mang fan nib pagan’dad ni manang Jehovah nib t’uf ni ngan fal’eg laniyan’ e piin ke kireban’rad?

³ Dariy e maruwar riy ni kemus ni yigoo Jehovah ni Chitamangidad ni bay u tharmiy e aram e en nrayog ni ngari fal’eg lanin’dad. (Mu beeg e 2 Korinth 1:3, 4.) Ir e en ni ke dag e bin th’abi fel’ e kanawo’ ngodad u rogon ni ngad nanged rogon gelngin e amith ni ma tay laniyan’ yugu boch e girdi’, ya micheg ko girdi’ rok ni gaar: “Bay gu fal’eg lanin’med.”​—Isa. 66:13, BT; Ps. 119:50, 52, 76.

⁴ Mus ngak ni ir e Chitamangidad nri ma runguydad, ma kki yim’ boch e girdi’ nri yad ba t’uf rok ni bod rogon Abraham, Isak, Jakob, Moses, nge David ni Pilung. (Num. 12:6-8; Matt. 22:31, 32; Acts 13:22) Be micheg e Thin rok ngodad ni be athapeg ni nge taw ko ngiyal’ nra faseg e pi tapigpig rok nem ko yam’. (Job 14:14, 15) Nap’an ni yad ra fos ko yam’, ma aram e yad ra par u fithik’ e felfelan’ ni ke fel’ fithik’ i dowrad. Kum lemnag Fak Got nrib t’uf rok ni ‘i par ni gubin e rran ni be felfelan’ ngak,’ ya mus ngak miki yim’ nrib gel e amith ko yam’ ni tay. (Prov. 8:22, 30) Dariy bagadad nrayog ni nge weliy gelngin e kireban’ ni tay Jehovah u nap’an ni guy Fak ni ke yim’.​—John 5:20; 10:17.

5, 6. Uw rogon nrayog ni nge fal’eg Jehovah lanin’dad?

⁵ Rayog ni nge pagan’dad nra ayuwegdad Jehovah. Ere, susun e dab da magagawongad ni ngad weliyed fiti lanin’dad ngak u daken e meybil, ma gad weliy e kireban’ rodad ngak. Ri ma fel’ lanin’dad u nap’an ni gad ra nang ni manang Jehovah rogon lanin’dad nge kireban’ ni gad ma tay, ma ra fal’eg lanin’dad! Machane, uw rogon ni ma rin’ e re n’ey?

⁶ Reb e kanawo’ ni ma fal’eg Jehovah lanin’dad riy e u daken gelngin nib thothup. (Acts 9:31) Ke micheg Jesus nra pi’ e Chitamangidad ni bay u tharmiy gelngin nib thothup ngak e “piin ni yad ra ning ngak.” (Luke 11:13) Susi ni faan kan weliy murung’agen e yog ni gaar: “Boor yay ni bayi n’en ma gamow ragbug nga but’ nggu meybilgow ngak Jehovah ni nge fal’eg lanin’mow. Ma gubin yay ni gamow ra meybil, ma ri gamow ma thamiy e gapas rok Got ni ke yororiy gum’ircha’mow nge tafinay romow.”​—Mu beeg e Filippi 4:6, 7. 

KU ARROGON JESUS NI MANANG RAROGON LANIN’DAD

7, 8. Mang fan nrayog ni nge pagan’dad nra fal’eg Jesus lanin’dad?

⁷ Nap’an ni immoy Jesus u fayleng ma ir e en nrib fel’ rogon ni i folwok rok Jehovah u rogon ni i dag ko thin nge ngongol rok ni manang rogon gelngin e amith ni ma tay laniyan’ e girdi’. (John 5:19) I l’og Got Jesus nga fayleng ni nge fal’eg laniyan’ e “piin ni ke kireban’rad.” (Isa. 61:1, 2; Luke 4:17-21) Ere, manang e girdi’ ni manang Jesus e gafgow ni u ranod u fithik’ ma ri baadag ni nge ayuwegrad.​—Heb. 2:17.

⁸ Nap’an ni kab fel’ yangaren Jesus, ma dariy e maruwar riy ni i guy boch i girdien e tabinaw rok nge boch e fager rok ni ur m’ad. Bod ni, Josef ni ir e chitamangin Jesus ni pof e sana yim’ u nap’an nri kab bitir Jesus.a Aygum lemnag, ya dabisiy nrib mo’maw’ e re n’em ngak Jesus, ya ngiyal’ nem e sana dawori gaman reliw’ e duw rok fa reb e ka fini pag. Ere, dabisiy nib gel e kireban’ ni tay, maku arrogon e chitiningin nge pi walagen.

9. Uw rogon ni dag Jesus ni manang gelngin e amith ni ma tay laniyan’ e girdi’ u nap’an ni yim’ Lazarus?

⁹ Nap’an ni tabab Jesus ko machib, ma i dag nri manang rarogon e girdi’ maku ma lemnag gelngin e amith ni ma tay lanin’rad. Am lemnag e n’en ni buch u nap’an ni yim’ Lazarus ni fager rok. Yugu aram rogon ni manang ni bayi faseg Lazarus ko yam’, machane ki thamiy e kireban’ ni tay Maria nge Martha. Bochan nri thamiy gelngin e kireban’ ni kar tew, ma aram e n’en ni k’aring ni nge yor.​—John 11:33-36.

10. Mang fan nib pagan’dad ni manang Jesus rarogon lanin’dad e ngiyal’ ney?

¹⁰ Uw rogon nrayog ni nge ayuwegdad e thin ni i yog Jesus ni i fal’eg laniyan’ e girdi’ kakrom? Be tamilangnag e Bible ni Jesus e “ka rogon ni fowap, nge daba’ nge chiney i yan nga m’on ndariy n’umngin nap’an.” (Heb. 13:8) Bochan ni ir “tabolngin e yafas,” ma aram fan ni manang rogon e kireban’ ni gad ma tay, ma “rayog ni nge ayuweg e piin ni ke yib ngorad e n’en ni ma waliy e girdi’ nge denen.” (Acts 3:15; Heb. 2:10, 18) Ere, rayog ni nge pagan’dad ni manang Kristus e kireban’ nge amith ni ma tay laniyan’ e girdi’, ma rayog rok ni nge fal’eg lanin’rad ko ‘ngiyal’ ndabi siy ni ngari ayuwegrad’ riy.​—Mu beeg e Hebrews 4:15, 16.

“ATHAMGIL LANIYAN’ NI BE PI’ E THIN KO BABYOR NIB THOTHUP NGODAD”

11. Mang boch e thin nu Bible nri ma fal’eg lanin’um?

¹¹ Fare thin nu Bible ni be weliy gelngin e kireban’ ni tay Jesus u nap’an ni yim’ Lazarus e aram reb ko pi thin ni bay u lan e Bible ni ma fal’eg lanin’uy. Ma gad manang nib puluw e re n’ey ni bochan e “urngin ban’en nni yoloy nga lan e babyor nib thothup e ni yoloy ni nge fonownagdad, ni bochan e nge yog e l’agan’ ngodad u fithik’ e gum’an’ nge athamgil laniyan’ ni be pi’ e thin ko babyor nib thothup ngodad.” (Rom. 15:4) Ere, faanra be kireban’um, maku baaray boch e thin nu Bible nrayog ni nge fal’eg lanin’um:

• “I Somol e ba chugur ngak e piin ke mulan’rad; ma ma ayuweg e piin dakuriy ban’en ni be l’agan’rad ngay.”​—Ps. 34:18, 19, BT.

• “Yu ngiyal’ ni der paslagan’ug ma ke magafan’ug, ma [gur Jehovah e] ga [ma] fal’eg lanin’ug nggu felan’.”​—Ps. 94:19, BT.

• “Somol rodad i Jesus Kristus nge Got ni ir e Chitamangidad, ni gadad ba t’uf rok e ir e ke runguydad ke ayuwegdad, ya ke pi’ e pagan’ ngodad nge reb e l’agan’ nib mudugil ni bay i par ndariy n’umngin nap’an, me ir e nge suguy lanin’med ko athamgil me gelnagmed.”​—2 Thess. 2:16, 17.b

RAYOG NI NGE FAL’EG E ULUNG LANIN’DAD

12. Uw rogon nrayog ni ngad fal’eged laniyan’ yugu boch e girdi’?

¹² Ku reb e ban’en nrayog ni nge fal’eg laniyan’ e piin ni ke kireban’rad e aram e ulung ni Kristiano. (Mu beeg e 1 Thessalonika 5:11.) Ere, uw rogon ni ngam pi’ e gel nga laniyan’ e piin ni ke ‘kireban’rad’ mu kum fal’eg lanin’rad? (Prov. 17:22) Dab mu pagtalin ni bay “ngal’an ni ngan th’ab gulungey nge ngal’an ni ngan welthin.” (Ekl. 3:7) I yog reb e ppin ni ke yim’ figirngin ni ka nog Dalene ngak ni gaar: “Piin ni ke kireban’rad ya ke yim’ be’ nib t’uf rorad e ba t’uf ni ngar weliyed lanin’rad nge tafinay rorad. Ere, n’en nth’abi ga’ fan nrayog ni ngam rin’ ni fan ngak be’ ni ka nim’ rok e aram e ngam motoyil ngak, ma dab mu th’ab e thin rok.” Junia, ni bay reb e pagel ni walagen ni ke li’ ir ke yim’ e ki yog ni gaar: “Yugu aram rogon nsana dabiyog ni ngar mu nang gelngin e kireban’ ni yad be tay, machane n’en nib ga’ fan e ngam adag ni ngam nang rogon lanin’rad.”

13. Mang e susun ndab da paged talin u murung’agen e kireban’ ni ma tay e girdi’?

¹³ Maku reb e, dab da paged talin nib thilthil rogon ni ma thamiy e girdi’ e kireban’ nge rogon ni yad ma weliy e kireban’ rorad. Bay yu ngiyal’ ni kemus ni yigoo facha’ e ir e manang gelngin e kireban’ ni be tay, mab mo’maw’ ngak ni nge weliy gelngin e kireban’ nge amith ni be tay laniyan’. Be gaar e Thin rok Got: “Felfelan’ rom e fanam; kireban’ rom e fanam. Dariy be’ nra fanay boch.” (Prov. 14:10, BT) Ere, mus ni faanra weliy be’ laniyan’, ma gathi gubin ngiyal’ nib mom ni nge nang yugu boch e girdi’ fan e n’en ni be gay facha’ rogon ni nge weliy.

14. Uw rogon nrayog ni nga dogned boch e thin nra fal’eg laniyan’ e piin ni ke kireban’rad?

¹⁴ Maku reb e, rayog nib mo’maw’ ni ngad nanged e n’en ni nga dogned ngak be’ ni kari kireban’. Machane, be yog e Bible ni “thin nnog nib gonop e rayog ni golnagey.” (Prov. 12:18, BT) Boor e girdi’ ni kar pirieged boch e thin nra fal’eg lanin’uy nrayog ni ngar weliyed ngak e piin ni ke kireban’rad ko fare brochure ni kenggin e When Someone You Love Dies (Nap’an Nra Yim’ Be’ nib T’uf Rom)c ni thin ni Meriken. Machane, ba ga’ ni n’en nth’abi fel’ nrayog ni ngam rin’ e ngam “un ko meyor ngak e piin ni yad be yor.” (Rom. 12:15) Gaby nreb e ppin ni ke yim’ figirngin e yog ni gaar: “Meyor ni gu ma tay e ke mang bang u dowag. Aram fan ni ma fel’ boch lanin’ug u nap’an nra un e pi fager rog ngog ko meyor. Nap’an ni yad ra un ngog ko meyor, ma aram e dab kug lemnag ni yigoo gag e be kireban’ug.”

15. Mang e rayog ni ngad rin’ed ni faanra ba mo’maw’ ngodad ni nga darod da guyed be’ ngad fal’eged laniyan’? (Kum guy fare thin ni kenggin e “Boch e Thin Nra Fal’eg Lanin’uy.”)

¹⁵ Faanra ba mo’maw’ ngom ni ngam man mu guy facha’ ngam non ngak, ma sana rayog ni ngam yoloy boch e thin nra fal’eg laniyan’ nga daken bang e card, ara babyor, ara email ngam pi’ ngak, ara mu textnag. Rayog ni ngam yoloy reb e thin nu Bible nra fal’eg lanin’uy, ara mu weliy ban’en nib manigil ndawor mu pagtalin u rarogon facha’ ni ke yim’, ara ban’en ni kam rin’ew u taabang ni kam felfelan’ ngay. I yog Junia ni gaar: “Nap’an nra yoloy be’ boch yang i babyor nge pi’ ngog ni bay boch e thin riy nra pi’ e athamgil nga lanin’ug ara piningeg boch e walag ni nggu rin’ed boch ban’en u taabang, ma rib gel e ayuw ni ma pi’ ngog nrib mo’maw’ rogon ni nggu weliy ko thin. Pi thin nem ni yima yog ngog e ma puguran ngog ni gub t’uf ko pi walag ma yad be lemnageg.”

16. Ku mang reb e kanawo’ nrib ga’ angin nrayog ni ngan fal’eg laniyan’ be’ riy ni ke kireban’?

¹⁶ Dab mu lemnag ndabi yib angin e meybil ni gimed ma tay e piin ni ke kireban’rad u taabang, ara meybil ni ga ma tay ni fan ngorad. Yugu aram rogon nrayog nib mo’maw’ rogon ni ngam weliy e n’en ni bay u lanin’um u daken e meybil ni bochan e ga manang ni ga ra yor, machane faan ga ra rin’ ni yugu aram rogon ni ga be yor ara be da’da’ lungum, ma rayog ni nge fel’ boch laniyan’ faen ni ke kireban’. I yog Dalene ni gaar, “Bay yu ngiyal’ nra yib boch e walag nib pin ni ngar fal’eged lanin’ug, ma gu ma yog ngorad ni nge fek bagayad e meybil romad. Ere, nap’an nra tabab facha’ ko meybil ma rib mo’maw’ rogon ni nge non, machane tomuren nra yog in bug e thin ma aram mug rung’ag lungun ni ke fel’ rogon ma aram me yag ni ngari weliy laniyan’ nib fel’ rogon. Gelngin e michan’, nge t’ufeg ni bay rorad, nge rogon nri yad ma lemnageg e aram e n’en ni kari gelnag e michan’ rog.”

UM FAL’EG LANIYAN’ E PIIN KE KIREBAN’RAD

17-19. Mang fan nib t’uf ni ngad ululgad i fal’eg laniyan’ e piin ni ke kireban’rad?

¹⁷ Ba thilthil n’umngin nap’an ni ma par be’ nib kireban’, ya ra be’ ma rogon. Ra ka fini yim’ be’, ma boor e fager nge girdien fa piin ni ka nim’ rorad ni yad ma yib ni ngar fal’eged laniyan’ fapi cha’. Ma in e pul nga tomuren ni kan mu’ ko fare magawon, ma aram e ra be’ miki sul ko pi n’en ni ma rin’ u reb e rran ngu reb. Machane, fapi cha’ ni ka nim’ rorad e kab t’uf ni ngan fal’eg lanin’rad. Ere, mu tay e tayim ni ngam ayuwegrad. Ya “pi tafager e gubin ngiyal’ ni yad ma dag e t’ufeg rorad. Mang gam’engin e walag ni faanra dab ra puruy’naged e gafgow rorad?” (Prov. 17:17, BT) Rayog ni nge fal’eg e pi walag u lan e ulung laniyan’ reb e walag ni ka nim’ rok u n’umngin nap’an nib t’uf ni ngan fal’eg laniyan’.​—Mu beeg e 1 Thessalonika 3:7.

¹⁸ Dab mu pagtalin ni be’ ni ka nim’ rok e rayog ni nga yigi kireban’ nib tomgin ni bochan e ke rung’ag ba mit e musik, ara ke taw ko rofen nra mabgolgow facha’ riy, ara ke guy e sasing rok, ara ke rin’ boch ban’en, ara ke farabon, ara ke rung’ag ban’en, ara bochan e ke taw nga ba ngiyal’ u reb e duw. Nap’an nra rin’ be’ ni ke yim’ e en mabgol rok ban’en ko yay nth’abi som’on ndaki moy e en mabgol rok, ni bod rogon ni nge un ko assembly ara Puguran, ma rayog ni ngari kireban’ nib gel. I yog reb e walag ni pumoon ni gaar: “Gu manang nra taw ko rofen nug mabgolgow e ppin rog riy ma rib gel e kireban’ ni gu ra tay. Ma riyul’ nrib mo’maw’ e re n’em. Machane, i yarmiy in e walag ni pumoon nge ppin bochi abich nde ga’ mi yad pining in e walag nrib pach e thin romad ni nggu abichgad u taabang ya nge dabki kireban’ug ni yigoo gag.”

¹⁹ Machane, ku dab mu pagtalin ni gathi goo ireray e ngiyal’ nib t’uf ni ngan fal’eg laniyan’ e piin ni ke kireban’rad. I yog Junia ni gaar: “Rib ga’ angin e ayuw ni ma pi’ e pi walag ni yugu aram rogon ni gathi bochan e ke taw ko rofen ni mabgol fagali cha’ riy. Ma nochi n’em ni yad ma rin’ e ba ga’ fan, ma ma fal’eg lanin’uy.” Riyul’ ndabiyog ni ngad chuweged e kireban’ nge tawreng rok be’ ni ka nim’ rok, machane rayog ni ngad fal’eged laniyan’ ni faan gad ra rin’ boch ban’en ni fan ngak. (1 John 3:18) I yog Gaby ni gaar: “Rug be pining e magar ngak Jehovah ni ke pi’ boch e piilal nri yad ma t’ufegey ni ngar ayuweged gag u fithik’ e kireban’ rog. Rag lemnag ma gowa bay Jehovah u toobeg ni ke longobiy pa’ ngog.”

20. Mang fan nra fal’eg e pi n’en ni ke micheg Jehovah lanin’dad?

²⁰ Ri ma fel’ lanin’dad ni bochan e kad nanged ni Jehovah ni fare Got ni ma fal’eg lanin’uy, e ra chuweg urngin ban’en ni ma k’aring e kireban’ me fal’eg laniyan’ urngin e girdi’ u nap’an nra rung’ag “gubin e yam’ ni bay u lan e low” laman Kristus “mi yad yib u lan e low rorad nga wuru’.” (John 5:28, 29) Ke micheg Got nra “kirebnag gelngin e yam’ ni manemus! Bayi faley e lu’ u owchen gubin e girdi’.” (Isa. 25:8, BT) Ra taw ko ngiyal’ nem ma aram e dab kud uned ko “meyor ngak e piin ni yad be yor,” ya aram e gubin e girdi’ u fayleng e yad ra un ko “felfelan’ ngak e piin ni kar felfelan’gad.”​—Rom. 12:15.