Ngan Fl’eg Laniyan’ e Piin Ke Kireban’rad ni Bochan e Kem’ Be’ nib T’uf Rorad
1. Mang fan nib t’uf ni ngan fal’eg laniyan’ e piin ni kem’ be’ nib t’uf rorad?
1 Ra yim’ be’ nib t’uf rodad ma ri ma kireban’dad, ma baga’ ni aram rogon e piin ndariy e athap rorad ni fan ko fare Gil’ilungun. (1 Thess. 4:13) Boor e girdi’ ni yad ma lemnag ko: ‘Mang fan ni ma yim’ e girdi’? Uw e yad ma yan ngay? Ra taw nga ba ngiyal’ mu kug guy e piin ni yad ba nib t’uf rog ni kar m’ad, fa?’ Pi thin ni beer nga but’ e boch ban’en nra ayuwegdad nge yog nda fl’eged laniyan’ e piin ni kad mada’naged u nap’an e machib ni ke kireban’rad ni bochan e kem’ be’ nib t’uf rorad.—Isa. 61:2.
2. Faanra kad mada’naged be’ u nap’an e machib ma ke yog ngodad ni keb e magawon ngak, ma gur ngad machibnaged yad nib n’uw nap’an fa danga’?
2 Nap’an e Machib u Mit e Tabinaw: Sana ra yog be’ ngom ni ka fini yim’ reb i girdien e tabinaw rok. Gabe guy nrib gel e kireban’ rok, fa? Ba sug e girdi’ u tabinaw rok ni ke kireban’rad, fa? Faanra aram rogon, mab fel’ ndab mu machibnag nib n’uw nap’an. (Eccl. 3:1, 7) Sana rayog ni ngad weniggad ngak, ma gad pi’ reb e tract, ara magazine, ara brochure nib m’ag ngak, ma gad chuw. Rayog ni nga fin ki ba ngiyal’ ma gad sul ngak ngkud fl’eged laniyan’ u daken boch e thin ko Bible.
3. Faanra kad guyed nrayog ni ngad machibnaged facha’, ma mang boch e thin nu Bible nrayog ni ngad daged ngak?
3 Yu ngiyal’ e rayog ni ngad guyed nrayog ni nge yoor buchuuw ban’en ni ngad machibnaged ngak. Yugu aram rogon ni gathi ireram e ngiyal’ ni ngad yal’uweged e lem rok facha’ nde puluw, machane rayog ni ngad bieged e thin nu Bible ngak ni be weliy murung’agen e fas ko yam’. (John 5:28, 29) Fa rayog ni ngad daged ngak e n’en ni be yog e Bible u murung’agen rarogon e yam’. (Eccl. 9:5, 10) Ku rayog ni ngad daged ngak murung’agen reb e fas ko yam’ ni kan tay nga Bible. (John 11:39-44) Ku reb e ban’en nrayog ni ngad rin’ed e ngad daged ngak e thin ni yog Job ni i dag ni be l’agan ngak Jehovah. (Job 14:14, 15) U m’on ni ngad chuwgad, ma rayog ni ngad pied ngak fare tract ni, Mang E Athap Rodad Ni Fan Ko Piin Ni Kar M’ad Ni Yad Ba T’uf Rodad? Fa rayog ni ngad pied fare babyor ni Knowledge ngak, ma gad dag ngak e thin ni bay ko guruy ni 9, mu kud yarmiyed ni ngad weliyed boch ko yay ni migid ni gad ra sul.
4. Mang boch e kanawo’ nrayog ni ngkud fl’eged laniyan’ e girdi’ riy?
4 Yugu Ba Ngiyal’: Yu ngiyal’ ma thin u murung’agen be’ ni kem’ ni kan tay nga shimbung e ra bing e kanawo’ ngodad ni ngad yoloyed e babyor ngak girdien e tabinaw rok facha’ ni kem’. Tomren ni kan pi’ bangi babyor nge ba tract ngak be’ nib moon ni kem’ leengin nge bochi pin ni fak, ma ranow nga tafen fare publisher mar fithew ni lungurow: “Gimed e kam pied e gi babyor ney ngog? Gu baadag ni nggu nang boch ban’en u murung’agen e Bible!” I m’agan’ fare moon nge fachi pin ni fak ni ngar unew ko fol Bible ma aram mar tabab i un ko muulung.
5. Mang fan ni susun e ngad tedan’dad ngak e piin ni ke kireban’rad nge yog nda fal’eged lanin’rad?
5 Baga’ nib mom boch rok e piin ni ke kireban’rad ngak be’ ni kem’ ni ngar motoyilgad ko Thin Rok Got ko piin ni yad be mon’eg e fafel nge felfelan’. Gad gubin nsusun e ngad tedan’dad ngak e piin ni ke kireban’rad nge yog nda fl’eged lanin’rad.