Bangi Video ni Ba’ Angin Nga Gum’irchaen e Fel’ Yangaren
BOOR e girdi’ nib fel’ yangaren ni ke athamgil lanin’rad ni ngar lemnaged rogon e ngongol rorad u nap’an ni kar guyed fare video ni Young People Ask—How Can I Make Real Friends?a Re video nem e bay e fonow nib fel’ nu Bible riy ni rib puluw, nge n’en kiiyog boch e pi fel’ yangaren ni Kristiano, nge ban’en nni yan u yaan ni fek u reb n’en u lan e Bible ni murung’agen Dinah. (Genesis, guruy 34) Tin ni migid nnog ni murung’agen ere ngi video nem e yib u Mexico.
Martha e yog ni gaar: “Fare gi video e yib angin nib gel nga gum’irchaeg. Gowa un ngongliy ni fan ngog. Ugu ta’ ni kemus ni nge nang e sensey nge piin gamad nga skul ni gag reb e Pi Mich rok Jehovah ma ke gaman. De yog rog ni nga gu micheg ko machib ni nga gu tay ngorad. Ri gu be pining e magar nga urngin e pi n’en ni be pi’ Jehovah, ni rib ga’ ni faanra taw nga gum’ircha’mad nib fel’ rogon ni bod ni ke rin’ e re gi video ney.”
Juan Carlos e gaar: “Re gi video ney e ri ma k’aringem ngam lem. Wod ni kugub pagal, ma u gu rin’ boch e oloboch nib taareb rogon nga boch e n’en ni yibe yan u yaan. Boch e duw ni ke yan, e u gu par ni l’agruw mit e par ni ugu par riy, machane mu gu nang ni par ni aram rogon e rayog ni ngeb angin nib kireb. Tomuren ni kug guy fare gi video, ma kugu dugliy u wan’ug ni nga gu yul’yul’ ngak Jehovah.”
Sulem e yog ni riyul’ ni gaar: “Nap’an ni ug yaliy fare gi video, mi yib e kireban’ ngog nib gel. U m’on riy, ma kugu taleg i bieg e Bible, ma daku gur meybil ni boor yay ngak Jehovah. Ma nap’an ni gu motoyil ko pi n’en ni be yog e piin ni fel’ yangaren ko re ngi video nem, me k’aringeg ni nga gu tabab i fil e Bible biyay ma nga u gu meybil ngak Jehovah.”
Piin ni fel’ yangaren e chiney e boor e magawon ni be yib ngorad, ma rogon ni yad ra mel’eg e fager rorad e baga’ ni nge gel gelngin nga rogon ni nge par e yafas rorad. (Psalm 26:4; Proverbs 13:20) Fare video Young People Ask—How Can I Make Real Friends? e boor e piin ni be ayuwegrad ni ngar lemniged e ti nib fel’ ni ngar rin’ed ko re ney.
[Footnote]
a I fal’eg e Pi Mich rok Jehovah.