“L’agruw Ni’ E Kar Tugtuguwew Daken E Mab Romad”

“KA NAP’AN l’agruw e duw e chiney ni ke yim’ fachi buliyal romow.” Aram rogon tobolngin e babyor nu Post ni kan pi’ nga reb e shimbung nu France ko binaw ni Saint-Etienne ni Le Progres.

“Melissa fithngan fakmow ma dalip e pul yangaren ma ke yib e m’ar ngak ni yima yog e trisomy 18 ngay. Ke magawon lanin’mow ni bochan e ke m’ar fare tir me yim’; ma u wan’mow e de puluw ni nge arrogon. Yugu aram rogon ni gamow ba Katolik, ma yugu gamow be lemnag ni lungumow: “Got, faan manga ga bay, mang fan ni kam pag ni nge yodor?” Ba tamilang ko thin rok fare matin ni ke yoloy e re babyor nem ni kari kireban’. Ke ul’ul e babyor rok ni gaar:

“De n’uw nap’an nga tomren me yib l’agruw ni’ ni kar tugtuguwew daken e mab romad. Kug poyrow ni yow e Mich Rok Jehovah. Kug lemnag ni nggog ngorow ni nga ranow, machane kug guy e babyor ni yow be wereg. Bay riy morngaagen fan ni ke pag Got e gafgow. Ere kug piningrow nga lan e naun rog mu gu lemnag ni nggu togopuluw ko thin rorow. Ya rogon lanin’ug e manang chon e tabinaw rog ko mang e gafgow, ma kug rung’aged e thin ni yima yog ni “Got e ke pi’ fare buliyal ngodad ma ir e ke fek.” Ke par fa gali Mich Rok Jehovah u tabinaw rog ni gonapan reb e awa. Kar motoyilgow ko thin rog u fithik’ e runguy, ma tomren e thin romad e ke baud lanin’ug mu gog ni rayog ni ngar sulow nggu machibgad. Ka nap’an l’agruw e duw e chiney. Dawor gu un ko Pi Mich Rok Jehovah machane yad ma fil e Bible ngog ma gu ma un ko pi muulung rorad ko ngiyal’ ni rayog rog.”