Ma Runguydad Got, Fa?

KARI tomal lanin’um ni bochan e magawon u tabinaw, ara m’ar u fithik’ i dowam, ara magawon u taban e maruwel ara yugu boch e magawon nib tomal ni ke mil fan ngom, fa? Arrogon boor e girdi’. Ma mini’ e chiney ni de gafgow ni bochan e tin nde yal’uw ara togopuluw ko motochiyel ara bugel? Ba riyul’ e thin ko Bible ni gaar: “Gadad manang ni urngin e tin ni ke sunumiy Got e be gel’gel’ ko amith ni bod rogon e amith ko gargel, ni kab kakrom i yib ke mada’ ko chiney.” (Roma 8:22) Aram fan ni ma fith e girdi’: “Ma runguydad Got, fa? Ra ayuwegdad, fa?”

I meybil Solomon ni Pilung ngak Got ni gaar: “Ke mus ni goo gur e kari mu nang gumerchaen pi fak e girdi’.” Ppagan’ Solomon ngay ni manang Got rarogodad maku ma runguydad ni be’ nge be’. I meybil ngak Got ni nge “motoyil u tharmiy” ma nge fulweg taban e meybil rok ra be’ ni bay madgun Got u wan’ ni ra tamilangnag ngak Got e “pi gafgow rok nge pi amith rok.”​—2 Chronicles 6:29, 30.

Ka ma runguydad Got e ngiyal’ ney, ma ma piningdad ni ngada meybilgad ngak. (Psalm 50:15) Ke micheg ngodad ni ra fulweg taban e meybil rodad ni ke yib u fithik’ i gumercha’dad mab puluw ko tin nib m’agan’ ngay. (Psalm 55:16, 22; Luke 11:5-13; 2 Korinth 4:7) Arrogon, ma motoyil Jehovah ko “pi meybil, ni yugu demutrug e n’en ni ra wenignag yugu demutrug be’ ko pi girdi’ rok.” Ere faan gad ra pagan’dad ngak Got ma gad yibilay e ayuw rok ma gad chuchugurgad ngak, ma gad ra guy e ayuw rok ni be runguydad ma be gagiyegnagdad. (Proverbs 3:5, 6) I micheg James ngodad u lan e Bible ni gaar: “Mu chugurgad ngak Got, me chugur ngomed.”​—James 4:8.