Ngan Rin’ E Tin Nib Fel’ Ko Ngiyal’ Ni Yibe Gafgow

BE GAAR apostal Paul: “Ngad ngongliyed e ngongol nib fel’ ngak urngin e girdi’, machane nge ga’ fadad ngak e piin ni kad manged girdien e tabinaw rok Got u fithik’ e mich u wun’uy ngak Kristus.” (Galatia 6:10) Ma athamgil e Pi Mich Rok Jehovah ni ngar folgad ko re thin nem, ni ngar ngongliyed e tin nib fel’ ngak urngin e girdi’ ma baga’ ni fan ngak e piin ni yad ni ke mich u wan’rad. Boor yay ni yad ma rin’ u nap’an ni yibe gafgow. Ngada weliyed e n’en ni buch u l’agruw e nam.

U nap’an e December ko 2002 e ke aw e yoko ni baga’ nga Guam ni ke pag 190 mile per awa gelngin e nifeng. Boor e naun ni ke kireb ma boch e kan gothey. Chi ngiyal’ nem e ke yarmiy e pi ulung ko Pi Mich Rok Jehovah e ayuw ni ngan ayuweg e pi tabinaw ni ke gel e gafgow rorad min ayuwegrad ko klin. Fare branch ofis u Guam e ke pi’ talin e maruwel nge girdi’ ni ngar fl’eged e pi naun ni kan kirebnag, ma fare branch ofis u Hawaii e ke pi’ e ayuw. U lan in e wik me yib boch e daykusang nu Hawaii ngar pied e ayuw, ma boch e girdi’ rodad u Guam e kar feked e vacation ko maruwel rorad ya ngar pied e ayuw. Ke guy e girdi’ nu Guam e girdi’ rodad ni yad be maruwel u taabang u fithik’ e falfalan’.

U lan fare duw ni ke yan e ke yib e uyungol nga Mozambique ni bochan e de aw e n’uw ma ke kireb e galwog. Fare branch ofis ko re nam nem e ke pi’ e ggan ni fan ko piin nib gafgow. Un f’oth e ggan u Kingdom Hall, ma yu ngiyal’ e un rin’ u tomren e muulung. Reb e ppin ni girdi’ rodad ni dariy e pumoon rok e ke gaar: “Ku gub ko muulung ni kari tomal lanin’ug ya dariy ban’en ni nggu pi’ nge kay pi fakag u tomren e muulung.” Fare ayuw ni ke pi’ pi walagdad e ke falan’nag fare ppin. Be gaar: “Gowa kug fas ko yam’!”

Ku ma “ngongliy e Pi Mich Rok Jehovah e tin nib fel’” ni yad ma wereg e machib nu Bible u morngaagen e falfalan’ nge athap. Taareb rogon e michan’ rorad ko facha’ nib gonop kakrom ni be gaar: “Machane en nra i rung’ag e tin ni gu be yog e dabi buch ban’en rok. Ra i par nib pagan’ ndariy rogon ni nge rus.”​—Proverbs 1:33.

[Pictures on page 31]

1, 2. Yibe f’oth e ggan ni fan ko piin nib gafgow u Mozambique

3, 4. Boor e naun ni ke kirebnag fare yoko’ nu Guam

[Credit Lines]

Fare tir, ko gilay’: Andrea Booher/FEMA News Photo; fare ppin, u lang: AP Photo/Pacific Daily News, Masako Watanabe