Bay Angin E Pi Meybil Rom, Fa?

BAY be’ ni dawori aw ko reb e magawon ni dariy kanawoen ni nge chuw riy, fa? Ma tamilangnag e Bible ni manang apostal Paul ni bay angin e meybil ni nge thilyeg e n’en nra buch ko pi magawon nem.

Nap’an ni kan kalbusnag Paul u Roma ni dariy ban’en ni ke bucheg, me yog ngak e piin ni ke mich u wan’rad ni ngar yibilayed, ni gaar: “Ri gu be wenig ngomed ni ngar mu yibilayed gag ngak Got nge yog ni pieg nggu sul ngomed ni papey.” (Hebrews 13:18, 19) Ku bay biyay ni ke mich u wan’ Paul ni ra rung’ag Got e pi meybil rok e girdi’ ni yad be yibilay ni ngan pag u kalbus ni papey. (Philemon 22) Kan pag Paul u kalbus me rin’ e maruwel rok ni ir reb e missionary.

Me gur, rayog rok e pi meybil rom ni nge thilyeg rogon r pi magawon rom, fa? Sana rayog. Machane dab mu pag talin ni meybil e gathi ke mus ni ban’en ni ka yima rin’ ko pi yurba’ i teliw. Ya aram rogon ni gad ma non ngak e Chitamangidad nu tharmiy. Thingari puf e thin rodad ngak ni gad be weliy e magawon rodad ma aram e ngada sonnaged ngada guyed ko uw rogon ni ra fulweg Jehovah taban e meybil rodad.

Sana dabi fulweg Got taban urngin e meybil, ara dabi fulweg taban u rogon ni gad ba adag ara ngiyal’ ni gad ba adag. Boor yay ni ke yibilay Paul fare magawon rok ni bod e “rachangel u downgin.” De chuweg Got e magawon rok Paul machane ke gelnag Paul me fl’eg laniyan’ ni gaar: “Ayuw rog ngom e ke mus e taare n’en ni ir e thingari yog ngom; ya gelngig e rib gel ko ngiyal’ ni gab meewar.”​—2 Korinth 12:7-9.

Ku rayog ni ngada pagedan’dad ngay ni faan manga dabi chuweg Got e magawon rodad, ma rayog ni nge “pi’ e kanawo’ ngodad ni ngada bad riy nga wuru’ e pi n’em.” (1 Korinth 10:13) Dabi n’uw nap’an ma ra chuweg Got urngin e gafgow rok e girdi’. Machane chiney iyan nga aram ma bay angin e pi meybil rodad ni gad be pi’ ngak e “Ani Ma Rung’ag e Meybil.”​—Psalm 65:2.