Fare Magawon Ni Ngan Chuguliy E Bitir E Ngiyal’ Ney
KE N’UW E NEP’ ma ani fen e tafen e abich e be n’en ni ke ning e kantin rok nge sul nga tabinaw. Me yib l’agruw e ppin nge reb e bitir ngar abichgad. Ke magar e ani fen fare kantin ma ba adag ni nge yog ngorad ni kan ning fare kantin, machane ke pi’ e ggan ngorad ni ngar abichgad. Me abich fagali ppin ni yow be sabathin, ma fare tir e ke mil mil u lan tafen e abich ni be pag e birel u but’ ni be yot’ yot’ daken. Chitiningin fare tir e ke siminmin ngak machane de guy rogon ni nge taleg. Nap’an ni ke chuw fa pi cha’ me klin e ani fen fare kantin ni kari gel e magar rok.
Re n’en ney e ma tamilangnag e magawon u boor e tabinaw ni mo’maw’ rorad ni ngar chuguliyed e bitir nrogon. Ma ke thilthil fan ni ke mo’maw’. Boch e gallabthir e ma pag e bitir rorad ni ngar rin’ed e tin ni yad ba adag ya yad ma lemnag nib fel’ ni ngan chuguliy e bitir ni aram rogon nib puf rogorad. Ma boch e gallabthir e kari yoor e maruwel rorad ma dariy e tayim rorad ni ngar tedan’rad ko bitir rorad ma ngar filed e yalen ngorad. Yugu boch e gallabthir e ma lemnag ni ri baga’ fan e skul ma rayog ni nge puf rogon e bitir ni faanra fel’ e skul rorad mi yad yan ko college.
Machane ma yog boch e girdi’ ni thingar ni yal’uweg rogon yalen e gallabthir ara yalen e girdi’. Ya be un e bitir ko boor mit e kireb ma ke yoor iyan e tacham u skul. Ere reb e principal u reb e middle skul u Seoul u Republic of Korea e ke yog ni thingar ni tay ni baga’ fan ni ngan skulnag e bitir u rogon ni nge fel’ pangiy. Be gaar: “Somm’on ma ngan fil rogon ni nge fel’ pangiy ma migid ma ngan skulnag.”
Boor e gallabthir e ba adag ni nge un e bitir rorad ko college ma nge fel’ rogorad ere dar motoyilgad ko ginang rok yugu boch e girdi’. Faanra gur reb e gallabthir, miti mang girdi’ e ga ba adag ni nge mang e bitir rom? Ga ba adag ni nge ilal nge fel’ pangin ma nge rin’ e tin nib mil fan ngak ni nge rin’, fa? Ga ba adag ni nge runguy yugu boch e girdi’ ma ba fil munguyan’ ma nge fel’ laniyan’, fa? Faanra arrogon ma ga bieg e bin migid e thin.