“Thin Ni Yog Jehovah Ni Ngan Rin’” E Dabi Aw Nib M’ay Fan

“Nggog e thin ni yog Jehovah ni nggu rin’; i yog ngog ni gaar: ‘Gur e fakag . . . Mu ning ngog, mu gu pi’ urngin e nam ngom.’”​—PSALM 2:7, 8, NW.

1. Mang e n’en nib thil u thilin e tin nib m’agan Got ngay nge tin nib m’agan’ e pi nam ngay?

JEHOVAH Got e bay e tin nib m’agan’ ngay ni fan ko girdi’ nge fayleng. Fapi nam e ku ba’. Machane tin ni yow be nameg riy e rib togopuluw reb nga reb! Ba puluw ni ngad lemnaged ni ra buch e n’en ni aram rogon, ya be yog Got ni gaar: “Rogon feni tolang lan e lang u puluwon e fayleng nga lang, e aram feni thil e tirog e kanawo’ nge lem rog ko tiromed.” Tin nib m’agan’ Got ngay e mmutrug ni bayi lebug, ya ke ulul ngay ni gaar: “Thin rog e bod e ayis nge n’uw ni ma aw u lang nga but’ ya nge tarannag e but’, me ayuweg e woldug nge ga’; me yib awochngin ni nga ni yung me yib e ggan ngay ni nga ni kay. Ku aram rogon e thin ni ma yib u l’ugunag, ndabiyog ni nge dabi rin’ e tin ni ke m’ay i lemnag rog; ya ra rin’ urngin ban’en ni kug l’og ni nge rin’.”​—Isaiah 55:9-11.

2, 3. Mang e kan tamilangnag ko bin l’agruw e psalm, machane mang boch e deer ni i sum riy?

² Bin lagruw e psalm e ke tamilangnag ni tin nib m’agan’ Got ngay ni murung’agen Kristus ni Pilung e bayi lebug. En ni yoloy, e David ni Pilung nu Israel kakrom, e ke thagthagnag Got ni nge yiiynag ni bayi yib ba ngiyal’ ni ngari wagey e pi nam. Pi pilung rorad e bayra togopuluwgad ngak Jehovah Got nge ngak e En ni ke Dugliy. Machane, miki tang fare psalmist ni gaar: “Nggog e thin ni yog Jehovah ni nggu rin’; i yog ngog ni gaar: ‘Gur fakag . . . Mu ning ngog, mu gu pi’ urngin e nam ngom ma re fayleng ney ni polo’ e bayi mil suwon ngom.’”​—Psalm 2:7, 8, NW.

³ Mang fan fare “thin ni yog Jehovah’” ngak e pi nam ni ngara rin’ed? Mang e ra rin’ e re n’en ney ngak e girdi’ ni gubin? Tin riyul’ riy, mang fan e re n’ey ngak urngin e girdi’ ni ma bieg e bin l’agruw e psalm ni bay madgun Got u wan’rad?

Ke Wagey e Pi Nam

4. Uw rogon ni ngam weliy e tin baga’ fan ko Psalm 2:1, 2?

⁴ Be weliy murung’agen e tin ma rin’ e pi nam nge fapi pilung rorad, me tabab fare psalmist i yon’ e tang ni gaar: “Mang fan ni ke wagey e pi nam ma girdien e pi nam e yad be nonon ni dabin nangfan ni ban’en ni dariy fan? Piin ni pilung u fayleng e kar sak’iygad ma piin nib tolang e liw rorad e kar taarebgad ni ngar togopuluwgad ngak Jehovah nge ngak e en ke dugliy.”​—Psalm 2:1, 2, NW.a

5, 6. Girdi’ ko pi nam e “yad ma nonon ni dabin nangfan” mang “thin ni dariy fan”?

⁵ Mang “ban’en ni dariy fan” ni “be nonon” nag e girdi’ ko pi nam e ngiyal’ ney ni dabin nangfan”? Fapi nam e de m’agan’rad ko En ke Dugliy Got​—ni fare Messiah, ara Kristus—y​a tin yad ma rin’ e yad “be nonon ni dabin nangfan,” ara yad be fal’eg i lemnag, ngar ayuweged ni nga i par ni kargon e liw rorad. Pi thin nem ko bin l’agruw e psalm e ku ke lebug ko bin som’mon e chibog C.E. u nap’an ni girdien e am ni piyu Jew nge piyu Roma e kar maruwelgad u taabang ngar li’ed e Pilung ni Got e ke Dugliy, ni Jesus Kristus. Machane, kari lebug e re n’em ni tabab ko 1914 u nap’an ni kan ta’ Jesus nge mang Pilung u tharmiy. Ka nap’an e ngiyal’ nem, dariy reb ko pi am nu fayleng ni ke m’agan’ ko fare Pilung ni be par u tagil’ ni Got e ke dugliy.

⁶ Mang e be yip’ fan u nap’an ni fare psalmist e ke fith ni mang fan ni girdien e pi nam e yad be nonon ni dabin nangfan ni ban’en ni dariy fan’? Tin nib m’agan’rad ngay e ireray e n’en ni dariy fan; ma ngari aw nib m’ay fan. Dabiyog rorad ni ngar feked e gapas nge taareban’ i yib ko re fayleng ney. Yugu aram rogon, kar togopuluwgad ko gagiyeg rok Got. Tin riyul’ riy, e kar taarebgad ma kar ulunguyed yad ngar chamgad ngak e En Th’abi Tolang nge ngak e Ani ni ke Dugliy. Kaygi gel e balyang riy!

Pilung ni Ke Dugliy Jehovah ni Ke Gel

7. Uw rogon ni i fanay e pi gachalpen Jesus e thin ni bay ko Psalm 2:1, 2 ko meybil rorad?

⁷ Pi gachalpen Jesus e kar fanayed e thin ni bay ko Psalm 2:1, 2 ni fan ngak. Kan togopuluw ngorad ni bochan e michan’ rorad, ma kar meybilgad ni lungurad: “Somol ni Th’abi Tolang [Jehovah], i gur Faen ni ke sunmiy e tharmiy nge fayleng nge day nge urngin e pi n’en ni bay riy, ma u daken e kan ni thothup e kam mog u l’ugun David ni ga’ ko pi llabthir romad, ni tapigpig rom ni lungum, ‘Mang fan ni kaygi wagey e pi nam ma girdi’ e be fal’eg i lemnag e tin dariy fan? Piin pilung u fayleng e kar sak’iygad ma kar ulunguyed yad kar taarebgad ni ngar togopuluwgad ngak Jehovah nge ngak e en ke dugliy.’ Me, Herod [Antipas] nge Pontius Pilate e ba muun ngorow girdien e pi nam ni kar muulunggad nga taabang u lan e re mach ney kar togopuluwgad ngak Jesus ni fare tapigpig rom nib thothup, ni kam dugliy.” (Acts 4:24-27; Luke 23:1-12)b Arrogon, kan makath nib togopuluw ku Jesus ni tapigpig rok Got ni kan dugliy ko bin som’mon e chibog. Machane, re psalm ney e ki lebug u tomren ni ke yan boch e chibog.

8. Uw rogon ni nge puluw e Psalm 2:3 ko fapi nam e ngiyal’ ney?

⁸ Nap’an piyu Israel kakrom e immoy e pilung rorad nib girdi’, ni bod David, ma fapi nam ni gathi girdien Got nge pi pilung rorad e kar ulunguyed yad kar togopuluwgad ngak Got nge ngak e en ni ke dugliy ni be par u tagil’. Machane uw rogon e ngiyal’ ney? Fapi nam e ngiyal’ ney e dubrad ni ngar folgad ko tin be yog Jehovah nge fare Messiah ni ngan rin’. Arfan ni, kan dag yaarad ko thin ni gaar: “Nga darod ngad tha’bed nge math’ ma ngad n’aged e gaf rorad nga orel rodad!” (Psalm 2:3, NW) Piin ni pilung nge fapi nam e ra togopuluwgad ko urngin e motochiyel ni tay Got nge Ani ke Dugliy. Riyul’, ni urngin e athamgil ni ngan ta’ ni ngan kirebnag min n’ag e pi gaf nem e ra aw nib m’ay fan.

Ke Pagrad Jehovah ni Nguun Moningnagrad

9, 10. Mang fan ni ma gagiyegnag Jehovah e pi nam ni ngan moningnagrad?

⁹ Dariy ban’en ni ra buch rok Jehovah nbochan urngin ban’en ni ma rin’ e pi pilung ko pi nam ni ngar gelgad ko gagiyeg rorad nib dar rok Got. Fa bin l’agruw e psalm e ki ulul ngay ni gaar: “Ra minmin e En ni be par u tharmiy; ra pagrad Jehovah ni nguun moningnagrad.” (Psalm 2:4, NW) Ra ulul Got i rin’ e tin nib m’agan’ ngay ni gowa be ta’ ni ri dariy fan e pi pilung ney u wan’. Ma ra minmin nbochan e lem rorad nib tolang ma ra gagiyegnag ni ngan moningnagrad. Ke pagrad ni ngar ufgad ko tin yad baadag ni ngar rin’ed. Be tay Jehovah ni yad e girdi’ ni yima minmin ngorad. Be minmin ni bochan e togopuluw ni yad be tay ni dariy fan.

¹⁰ U yu yang ko pi psalm rok David, e weliy riy fapi girdi’ ni pi toogor nge fapi nam me yon’ e tang ni gaar: “Gur, O Jehovah ni Got ko pi salthaw, e Got rok piyu Israel. Mu od ni ngam tiyan’um ngak urngin e nam. Dab mu runguy urngin e girdi’ nib kireb ni ma yognag e girdi’. Yad ma sul nga tabinaw rorad ni nep’; ma yad ma tolul ni bod e pilis ma yad ma yan ngar liyeged fare mach. Amsap! Yad be yibnag e wuth u l’ugunrad; ma bay e sayden u dap’pi lugunrad, me mini’ e be motoyil? Machane gur, O Jehovah, e ga ra minmin ngorad; mag pag ni urngin e nam e nguun moningnagrad.” (Psalm 59:5-8, NW) Ma ra minmin Jehovah nbochan e uf nge balyangan’uy ni tay e pi nam ko wo’ rorad ni ri dariy fan nib togopuluw ngak.

11. Mang e ra buch u nap’an ni ra guy e pi nam rogon ni ngar togopuluwgad ko tin nib m’agan’ Got ngay?

¹¹ Thin ni bay ko Psalm 2 e ra gelnag e michan’ rodad ni Got e rayog rok ni nge pithig urngin e magawon ndemtrug rogon. Kari l’agan’dad ngay ni ri ma lebuguy e tin nib m’agan’ ngay ma ri der ma pag e pi tapigpig rok nib yul’yul’. (Psalm 94:14) Me ere, mang e ra buch u nap’an ni ra athamgil e pi nam ni ngar togopuluwgad ko tin nib m’agan’ Jehovah ngay? Rogon ni yog ko re psalm ney, e Got e “ra non ngorad u fithik’ e damumuw,” ni bod lingan e dirra’. Maku, “u fithik’ e damuwmuw rok nib gel,” ma “ra wageynagrad” ni bod e uluch nib gel ni aw ngorad​—Psalm 2:5, NW.

Kan Ta’ ni Nge Par nga Tagil’ e Pilung Rok Got

12. Psalm 2:6 e be weliy murung’agen be’ ni kan ta’ nga tagil’ ni nge mang pilung u uw?

¹² Tin migid e thin ni yog Jehovah u daken fare psalmist e dariy e maruwar riy nra magawonnag laniyan’ e pi nam. Be yog Got ni be gaar: “Gag, ni goo gag, e kug tay e pilung rog nga daken Zion, ni aram e burey rog nib thothup.” (Psalm 2:6, NW) Fare Burey nu Zion e reb e burey u Jerusalem ni kan ta’ David ngay ni nge mang pilung u Israel ni ga’ngin yang. Machane fare Pilung ni Messiah e dabi par tagil’ ko re mach nem ara yuyang u fayleng. Tin riyul’ riy, e ke ta’ Jehovah Jesus Kristus nga daken e Burey ni Zion u tharmiy ni ir e Messiah ni Pilung ni ke mel’eg.​—Revelation 14:1.

13. Mang e m’ag ni ke fal’eg Jehovah u thilrow Fak?

¹³ Fare Messiah ni Pilung e ke non e chiney. Me yog ni gaar: “Nggog e thin ni yog Jehovah ni nggu rin’ [ke fal’eg e m’ag u thilrow Fak ni fan ko Gil’ilungun]; i [Jehovah Got] e yog ngog ni gaar: ‘I gur fakag; daba’, e kug mang chitamam.’” (Psalm 2:7, NW) I weliy Kristus murung’agen fare m’ag ko Gil’ilungun u nap’an ni yog ngak e pi apostal ni gaar: “Gimed e kam pared rog u nap’an ni keb boch e skeng ngog; ma nggu fal’eg e m’ag u thildad, ni bod ni fal’eg e Chitamag e m’ag u thilmow, ni fan ko gil’ilungun.”​—Luke 22:28, 29, NW.

14. Mang fan ni rayog ni nga nog ni dariy be’ ni nge yog ni dariy mat’awon Jesus ni nge yog ngak e liw ko pilung?

¹⁴ Rogon ni yog ko Psalm 2:7, i dag Jehovah ni Jesus e ir Fak u nap’an ni kan taufenag me faseg ko yam’ ni reb e kan. (Mark 1:9-11; Roma 1:4; Hebrews 1:5; 5:5) Arrogon, fare Pilung ko Gil’ilungun u tharmiy e ir Fak Got ni kari maagirag rok. (John 3:16) Bochan David ni Pilung e ir e ga’ rok Jesus, ma dariy be’ nrayog ni nge yog ni dariy mat’awon ni nge mang pilung. (2 Samuel 7:4-17; Matthew 1:6, 16) Rogon ni yog ko re psalm ney, e yog Got ngak Fak ni gaar: “Mu ning ngog, mu gu pi’ urngin e nam ngom; ma re fayleng ney ni polo’ e bayi mil suwon ngom.”​—Psalm 2:8.

15. Mang fan ni ning Jesus ni nge mil suwon ngak fapi nam?

¹⁵ Fare Pilung​—ni Fak Got—​e bay e liw rok nib migid ku Jehovah. Kan skengnag Jesus, ma i par nib yul’yul’, ma rayog ni nge pagan’ Jehovah ngak. Maku, bay ban’en ni f’oth rok Jesus ya ir Fak Got ni bin nganni. Tin riyul’ riy, Jesus Kristus e “ir yaan Got ni danir guy, ni bin nganni ko urngin ban’en ni kan sunmiy.” (Kolose 1:15) N’en ni rib t’uf ni nge rin’ e nge ning ngak Got me ‘pi’ ngak urngin e nam ma fare fayleng ni polo’ e bayi mil suwon ngak.’ Ra ning Jesus e re n’en ney ya ir be’ nib fel’ u wan’ e pi n’en nib peth ko pi fak e girdi’ ma bochan ri baadag ni nge lebuguy e tin nib m’agan’ e Chitamangin nu tharmiy ngay ni fan ko fayleng nge girdi’.​—Proverbs 8:30, 31.

Thin ni Yog Jehovah ni Ngan Rin’ nib Togopuluw ko Pi Nam

16, 17. Rogon ni yog Psalm 2:9, mang e bayi buch rok fapi nam?

¹⁶ Bochan ni bin l’agruw e psalm e be lebug i yan e ngiyal’ ney, ma nap’an e ngiyal’ ni ba’ Jesus Kristus ni danir guy, ma mang e ra buch rok e pi nam? Dabki n’uw nap’an ma ra rin’ fare Pilung e tin ni yog Got ni gaar: “Bay mu te’t’arrad [pi nam] nga baley i sog ni wasey, nge nnochiyang ni bod ba th’ib ni but’.”​—Psalm 2:9, NW.

¹⁷ Fapi sog ko pi pilung kakrom e be dag yaan mat’awon e pilung. Boch e sog e kan ngongliy ko wasey, ni bod rogon e n’en ni be weliy e re psalm ney. Thin ni be yip’ fan ban’en ni kan fanay u roy e be dag ni rib mom rok Kristus ni fare Pilung ni nge gothey e pi nam. Ngan fanay e sog ni wasey ni ngan toy nib gel ko th’ib ni but’, ma ra kireb ni dabkiyog ni ngan sulweg nga rogon.

18, 19. Rogon ni ngar fel’gad u wan’ Got, mang e ba t’uf ni nge rin’ e pi pilung nu fayleng?

¹⁸ Gur thingari guy e pi pilung ko pi nam e re magothgoth nem nib gel? Danga’, ya bochan fare psalmist e ke wenig ngorad u daken e pi thin ney ni gaar: “Gimed e pi pilung, chiney, e ngarim gonopiyed; mu paged ni ngan yal’uwegmed, gimed e pi tapuf oloboch u fayleng.” (Psalm 2:10, NW) Ka nog ngak e pi pilung ni ngar ra tiyan’rad, ngar gonopiyed e re n’en ney. Thingara fal’eged i lemnag ni ri dariy fan e n’en ni yad be nameg, mab togopuluw ko n’en ni ra rin’ Gil’ilungun Got ni fan ni nge ayuweg e girdi’.

¹⁹ Rogon ni ngar fel’gad u wan’ Got, ma ba t’uf rok e pi pilung nu fayleng ni ngar thiliyeged e ngongol rorad. Kan fonownagrad ni ngar “pigpiggad ngak Jehovah ni ba’ madgun u wan’rad mar tongad u fithik’ e felfelan’.” (Psalm 2:11, NW) Mang e ra buch nfaara ngar rin’ed ban’en ni aram rogon? Dabi wagey laniyan’rad, ya yad ra felan’ ko tin bay yib nra pi’ fare Messiah ni Pilung ngorad. Piin pilung nu fayleng e ba t’uf ni ngar n’aged e lem nib tolang ni kar daged u rogon ni yad be gagiyeg. Maku, thingar ra thiliyeged pangirad ni papey ndabi sowath ma ngar gonopiyed e gagiyeg rok Jehovah nib tolang ni dariy ban’en ni taareb rogon ngay nge gelngin Got nge fare Messiah ni Pilung ndabiyog ni ngan taleg.

“Mu Fray Owchen Fak”

20, 21. Ngan “fray owchen fak” e be yip’ fan e mang?

²⁰ Psalm ni bin 2 e be pining e pi pilung ko pi nam u fithik’ e runguy. Dabkura taarebgad ngar togopuluwgad, ya kan fonownagrad ni gaar: “Mu frayed owchen fak, ma dabi [Jehovah Got] damumuw ngomed ma gimed ra par ko fare kanawo’ ndab mm’ad, ya rib papey ni nge gel e damumuw rok.” (Psalm 2:12a) Jehovah ni Ir e Somol ni Th’abi Tolang e thingar ni fol rok u nap’an ni ra yog e tin ni ngan rin’. Nap’an ni ke yog Got ngak Fak ni nge par nga tagil’, ma pi pilung nu fayleng e susun ni dab kuura nonongad ni dabin nangfan ni “ban’en ni dariy fan.” Susun ngara ted fan fare Pilung nib tomgin ma ra folgad rok ni polo’.

²¹ Mang fan ni ngan “fray owchen e en fak”? Nap’an ni kan ngongliy e re psalm ney, ma fray owchey e aram ban’en ni yima rin’ ko fager ma yima fanay ni gowa yibe pining e magar u nap’an ni ra yib be’ ko tabinaw ku be’, ma ra felan’rad ko t’ufeg nge ayuw ni ngan pi’ ngorad. Maku ngan fray owchey e rayog ni fan ko yul’yul’. (1 Samuel 10:1) U lan e re verse ney ko psalm ni bin l’agruw, e be ta Got chilen ngak e pi nam ni ngar frayed owchen Fak, ara ra felan’gad ni keb ni reb e Pilung ni kan dugliy.

22. Pi pilung ko pi nam e thingara folgad ko mang thin ni be ginangey?

²² Piin ni dubrad ni ngar ted fan mat’awon e en ke mel’eg Got ni nge mang Pilung e yad be dariy fannag Jehovah. Darur ted fan e gagiyeg rok Jehovah Got ntha’bi tolang u palpalthib nge mat’awon nge gelngin ni ke mel’eg fare Pilung ni ir e pilung ko girdi’ nth’abi fel’. Pi pilung ko pi nam e ra pirieged ni ra yib e damumuw rok Got ngorad nib tomgin, u nap’an ni yad be guy rogon ni ngara lebguyed e n’en ni yad be nameg. “Damumuw rok e rib papey ni ngari gel,” ara dabiyog ni ngan taleg. Pi pilung ko pi nam e gowa thingara folgad ko pi thin ney ni be ginangrad ma ngar pininged e magar ma ngar ngongolgad nib puluw ngay. Yira rin’ ma aram e yafas.

23. Ka bay e tayim ni fan ko girdi’ ni be’ nge be’ ni ngar rin’ed e mang?

²³ Tin tomren e thin ko re psalm ney e be gaar: “Ba felan’ urngin e piin ni yad ma yan ngak [Jehovah] ni nge yoror rorad.” (Psalm 2:12b, NW) Ka bay e tayim ni fan ko girdi’ ni be’ nge be’ ni ngar pirieged e gin ni bay e pagan’ riy. Maku arrogon e piin ni pilung ni be’ nge be’ ni yad be ayuweg e tin ni be nameg e pi nam. Rayog ni ngar milgad i yan ngak Jehovah, ni ma pi e ayuw u tan e gagiyeg rok ko Gil’ilungun. Machane thingara rin’ed ban’en u m’on ni fare Gil’ilungun fare Messiah e ra gothey e pi nam ni ma togopuluw ngak.

24. Uw rogon ma ku rayog ni ngada pared ni ke gaman urngin ko yafas rodad u wan’dad u lan e re fayleng ney nib wagey?

²⁴ Faanra ngada filed e thin nu Bible nib elmerin ma ngad folgad ko fonow ni bay riy, ma ku rayog ni nge par ni gad ba felfelan’ ko yafas rodad e chiney ni gad bay ko fayleng nib wagey. Ra nge fol reb e tabinaw ko fonow u Bible ma ra felan’rad ko tha’ u thilrad ma dabi yib e magafan’ ngorad ni boor nge marus ni be gafgownag e re fayleng ney. Ngan fol ko thin nu Bible e ra ayuweg ni ngad pagedan’dad ni gad be felfelan’nag e en ke Sunmiydad. Kemus ni fare Somol ko Palpalthib ma dariy yugu be’ nrayog ni nge pi’ “e yafas e chiney nge tin bayi fini yib” u tomren ni ke chuweg u fayleng e piin ni ma togopuluw ko tin nib mat’aw ban’en ya yad be dariyfan’nag e gagiyeg ko Gil’ilungun.​—1 Timothy 4:8.

25. Bochan ni “thin ni yog Jehovah” e dabi aw nib m’ay fan, ma mang e rayog ni nge buch ko tayim rodad?

²⁵ “Thin ni yog Jehovah ni ngan rin’” e dabi aw nib m’ay fan. Bochan ni Got rodad e ir e en Tasunmiy, ma manang e n’en ni rib fel’ ni fan ko girdi’ ma ra lebuguy e tin nib m’agan’ ngay ni nge taw’athnag e girdi’ ni ma fol ma ra aw e gapas nga dakenrad, ma ra gaman ban’en u wan’rad, ma nga i par e par ni bay e pagan’ rorad u tan Gil’ilungun Fak nib t’uf rok. Murung’agen e tayim rodad, me yoloy Daniel ni profet ni gaar: “Ngiyal’ ni bay i gagiyeg e pi pilung nem, e aram e bayi sunumeg Got nu tharmiy reb e gagiyeg ndariy e rofen nra mus. . . . Machane bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.” (Daniel 2:44) Ere, mmutrug, ni chiney e ri ireray e tayim ni ngan “fray owchen Fak”, min pigpig ku Jehovah, ni fare Somol ni Th’abi Tolang!

[Footnotes]

Uw Rogon ni Ngam Pi’ e Fulweg?

• Mang “ban’en ni dariy fan” ni girdi’ ko pi nam e “yad be nonon ni dabin nangfan”?

• Mang fan ni ra pag Jehovah ni ngan moningnag e pi nam?

• Mang e ke yog Got ni ngan rin’ nib togopuluw ko fapi nam?

• Mang e be yip’ fan ni ngan “fray owchen fak”?

[Picture on page 12]

I yon’ David e tang ni murung’agen fare Messianic ni Pilung ni ke gel ko mahl

[Picture on page 13]

Piin ni pilung nge girdi’ nu Israel e kar makathgad nib togopuluw ngak Jesus Kristus

[Picture on page 14]

Kan ta’ Kristus nga daken e Burey ni Zion u tharmiy ni nge mang Pilung