“Gamow Baadag ni Ngagognew e, ‘Arrogon!’ ”

FARE tochuch ko Pi Mich Rok Jehovah u Nigeria e dawori n’uw nap’an ni keb bangi babyor ngay, ni bang riy, e yog e pi thin ni baaray:

“Ba pagal ni fakmow, ni Anderson, e yim’ ni ke 14 e duw rok. U m’on ni yim’, mi i chuguliy l’agruw i nimen. Ni baadag ni nge pi’ ni chuway’ ngeb e salpiy riy me pi’ nga tochuch ni pa’ ko fare maruwel ko machib u fayleng i yan. Machane me yim’ u m’on ni dawori yog ni ngan pi’ row ni chuway’.

“Ere lem rok ni baadag ni ngan pi’ e salpiy riy ko fare tochuch, e aram e gamow, ni gallabthir rok, e kugu chuguliyew fa gal nimen kugu piew ni chuway’. Kugu piew e salpiy riy ngomed ni pa’ Anderson. Bochan e n’en ni micheg Jehovah, ma ba mich u wan’mow ni dabki n’uw nap’an​—ma gamow ra—​guy Anderson biyay. Gamow baadag ni nga gognew e, ‘Arrogon!’ ni faanra deeriy ko gu rin’ew e tin nib m’agan’ ngay ni ngan pi’ e salpiy ko tochuch. Rriyul’, ni ri gamow be son ni nga gu guyew ni gathi goo Anderson ya ku arrogon ba ‘ulung e pi mich’ ni boor ni bayni fasegrad ko yam’.”​—Hebrews 12:1; John 5:28, 29.

Bod ni rib tamilang ni kan dag u lan fagi babyor i er nga lang, ni michan’ ko fas ko yam’ e ba athap ni ma pi’ gelngin e tin riyul’ e Kristiano. Bokum milyon e tabinaw e yad ra pirieg e falfalan’ u nap’an ni yad ra bod, e tabinaw rok Anderson, ni yad ra falfalan’ ni ke sul e piin nib t’uf rorad ni kar m’ad ka ranod ko fare toogor ni yam’!​—1 Korinth 15:24-26.

Thin rok Got e be ta’ e re athap ney ni be pagan’uy ngay ko fas ko yam’ ni reb fapi n’en ni yira ngat ngay ni dabki n’uw nap’an me m’ug u lan fa binem e fayleng ni biech mab mat’aw u tan Gil’ilungun Got. (2 Peter 3:13) Ni weliy e n’en ni bayi rin’ Got ni fan ko girdi’ e ngiyal’ nem, ni yog e Bible ni gaar: “Ma bayi n’ag urngin e lu’ u owcherad, ma aram e dab ku unim, ma dabki i kireban’uy ma dab ku un yor, ma dab ku un amith. Ya tin kakrom ban’en e ke chuw.”​—Revelation 21:4.