Ngan Gay E “Churuwo’ Nu L’ugun E Yar Ni Rib Tolang Puluwon” E Ngiyal’ N’ey

“Re thin nib fel’ ney ko gil’ilungun e bay ni machibnag u gubin yang u fayleng ni nge nang gubin e nam.”​—MATTHEW 24:14, NW.

1, 2. (a) Mang e be lemang piyu Jew u murung’agen Gil’ilungun Got? (b) Mang e ke rin’ Jesus ma yira nang fan fare Gil’ilungun nrogon nib puluw, ma mang e ke buch?

FARE Gil’ilungun Got e ireray kenggin e machib ni kari pug e tafinay rok piyu Jew u nap’an nib Jesus nga fayleng. (Matthew 3:1, 2; 4:23-25; John 1:49) Machane som’mon, ma oren i yad e gathi ri manang ga’ngin yang nrayog ni nge yan i taw e re gagiyeg ney ngay nge gelngin; maku dar nanged fan ni ireray e am nu tharmiy. (John 3:1-5) Mus ngak boch ko piin ni kar manged gachalpen Jesus ma dar nanged fan nib fel’ rogon ko mang Gil’ilungun Got ara n’en ni thingara rin’ed ma rayog ni nge yog ngorad e flaab ni ngar uned ngak Kristus ko gagiyeg.​—Matthew 20:20-22; Luke 19:11; Acts 1:6.

² Tomren ni yan e tayim, i fil Jesus boor ban’en ngak pi gachalpen u fithik’ e gum’an’, mab muun ngay fare fanathin ko churuwo’ nu l’ugun e yar nib tolang puluwon ni kan weliy ko fare article ni ke yan, ni be dag ngorad feni ga’ fan ni ngar athamgilgad ni ngar gayed fare gil’ilungun nu tharmiy. (Matthew 6:33; 13:45, 46; Luke 13:23, 24) Dabisiy ni ke bit’ nga gum’ircharad e re n’em ya bochan de n’uw nap’an nga tomren ma kar manged e pi tamachib ko thin nib fel’ ko Gil’ilungun ko pi binaw nrib palog ni yad ba pasig ma dar rusgad, ni fare babyor ni Acts e bay boor e mich riy ni aram rogon.​—Acts 1:8; Kolose 1:23.

3. Murung’agen e tayim rodad, ma mang e ke yog Jesus u murung’agen fare Gil’ilungun?

³ Ere, uw rogon e chiney? Fapi flaab u paradis u fayleng u tan fare gil’ilungun e kan machibnag ngak bokum million e girdi’. U lan e re yiiy rok Jesus ney nib ga’ fan ni murung’agen e “tomren urngin ban’en u fayleng,” me weliy nib tamilang ni gaar: “Ma re thin ney nib fel’ ni murung’agen e gagiyeg rok Got e bay ni machibnag u gubin yang u fayleng ni nge nang gubin e nam, ma aram mfini yib e tomur.” (Matthew 24:3, 14, NW; Mark 13:10) Maku ke weliy ni re maruwel ney nrib ga’ e yira rin’ nyugu demtrug ko bay e magawon ni ra yib riy nib gel, ni kub muun e togopuluw nge gafgow ngay. Yugu aram me micheg ni gaar: “En nra athamgil nge mada’ ko tomur e ra yog e yafas ngak.” (Matthew 24:9-13) Urngin e pi n’ey e ba t’uf fare pagfay nge yul’yul’ ni dag facha’ ni ma fol chuway’ ni ma milekag ni ba’ ko fanathin rok Jesus. Gur bay e girdi’ e ngiyal’ ney ni ma dag e michan’ nge pasig ni aram rogon ni fan ni ngar gayed fare Gil’ilungun?

Felfelan’ ni Bochan ni Kan Pirieg e Tin Riyul’

4. Mang e be rin’ e tin riyul’ ko Gil’ilungun ngak e girdi’ e ngiyal’ ney?

⁴ Facha’ ni ma chuway’ ko fanathin rok Jesus e kari felfelan’ u nap’an ni pirieg e n’en ke mich u wan’ ni eram e “churuwo’ nu l’ugun e yar nib tolang puluwon.” Re felfelan’ nem e ke k’aring ni nge rin’ urngin ban’en nrayog rok ni fan ni nge yog ngak fare churuwo’ nu l’ugun e yar. (Hebrews 12:1) Maku ngiyal’ ney, ma fare thin riyul’ u murung’agen Got nge Gil’ilungun e ba fel’ u wan’ e girdi’ ma ra k’aringrad ni ngar rin’ed ban’en. Re n’ey e ra k’aring ni ngeb ngan’uy fare n’en ni yog Brother A. H. Macmillan, ni ir e yoloy u murung’agen e n’en ni rin’ ni be fal’eg i gay Got nge tin nib m’agan’ ngay ni fan ko girdi’ u lan fare babyor ni Faith on the March. I yog ni gaar: “Tin ni kug pirieg e ka be gay bokum biyu’ e girdi’ e re n’en ney u gubin e duw. Ma yad e girdi’ ni bod gur nge gag, ya kar bad u gubin e nam, nge ramaen dowey, nge rarogon e par nib thilthil nge yangarrad. Tin riyul’ e gathi ba laniyan’. Urngin mit e girdi’ ni ma adag.”

5. Mang angin nib fel’ e rayog ni ngan guy ko fare 2004 service year report?

⁵ Rayog ni ngan guy nib riyul’ e pi thin ney ya, gubin e duw, ma bokum biyu’ e girdi’ nib yul’yul’ gum’ircharad e ke k’aringrad fare thin nib fel’ ko Gil’ilungun Got ni ngar ognaged e yafas rorad ngak Jehovah ma ngara rin’ed e tin nib m’agan’ ngay. Fare 2004 service year, ni tabab ko September 2003 nge mada’ ko August 2004, e kub muun ngay. U lan fare 12 e pul, ma 262,416 e girdi’ e kar daged ngak e girdi’ ni yoor ni kar ognaged yad ngak Jehovah u daken e taufe. Ireray e n’en ni buch ko 235 e nam, ni Pi Mich Rok Jehovah riy e yad be fil e Bible ngak 6,085,387 e girdi’ u gubin e wik ni fan ni ngar ayuweged urngin e girdi’ nib thilthil rarogorad ni ra bad u boor e nam, nge ganong, nge thin ni ngar feked e thin riyul’ ni Thin rok Got ni ma pi’ e yafas.​—Revelation 7:9.

6. Bochan e mang ma be yoor i yan u lan e pi duw e pi tapigpig rok Got?

⁶ Bochan e mang ma ke yog ni aram rogon ni urngin? Dariy e maruwar riy ni Jehovah e ir e ke giringiy e piin ni yad ba adag e tin nib mat’aw ngak. (John 6:65; Acts 13:48) Machane, dabni dariy fannag e lem ni de siin nge maruwel nib elmerin ni be tay e piin ni kar fanayed yad ni ngar gayed fare Gil’ilungun. Nap’an ni ke 79 e duw rok Brother Macmillan, me yoloy ni gaar: “Ka som’mon ni kug fil e tin’ ni kan micheg ngak e girdi’ ni ma yib e m’ar nge yam’ ngorad ma athap rog ko n’en ni be dag e re thin nu Bible ney e de war. Ngiyal’ i n’em mug dugliy u wan’ug ni nggu fil boch ban’en ni be fil e Bible ma rayog ni nggu ayuweg boch e girdi’ ni bod gag ni yad be gay e tamilangan’ u murung’agen Got ni Gubin ma Rayog Rok, ni Jehovah, nge tin nib m’agan’ ngay nib fel’ ni fan ko girdi’.”

7. Mang e n’en ni ke buch ni be dag e felfelan’ nge pasig rok e piin ni kar pirieged e thin riyul u Bible?

⁷ Re lem nem e ku rayog ni ngan pirieg u fithik’ e pi tapigpig rok Jehovah e ngiyal’ ney. Mu lemnag Daniela ni ma par u Vienna, Austria. I yog ni gaar: “Ka nap’an ni ku gub bitir, ma Got e ke mang fager rog nrib fel’. Ri gu baadag ni nggu nang fithingan ya u wan’ug fare liw ni ‘Got’ e ri dabi ayuwegey ni ngan nang ko ir mini’. Machane susun ni nggu son nge mada’ ko ngiyal’ ni ke taw ko 17 e duw rog, u nap’an ni ra yib e Pi Mich Rok Jehovah nga tabinaw romad. Kar weliyed ngog urngin ban’en ni gu baadag ni nggu nang u murung’agen Got. Kug pirieg e tin riyul’, ma rib fel’ u wan’ug e re n’em! Ri gub felfelan’ ma aram e kug tabab ni nggu machib ngak urngin e girdi’.” Bochan ni ke dag nrib pasig, ma de n’uw nap’an mi i moningnag e piin ni yad nga skul. “Ma, rogon ni gu be lemnag, bod ni kug guy ni ke lebug e yiiy u Bible,” me ulul Daniela ngay ni gaar, “ya bochan ni kug fil ni i yog Jesus ni pi gachalpen e yira fanenikayrad ma yira gafgownagrad ni bochan fithingan. Ri kug felfelan’ ma ri kug gin ngay.” De n’uw nap’an, me ognag Daniela e yafas rok ngak Jehovah, min taufenag, me tabab ni nge nameg nge mang reb e missionary. Tomren ni ke un Daniela ko mabgol, ma ir nge Helmut ni pumoon rok, e kar machibnagew e girdi’ nu Africa, yu China, nge Filipino, nge yu India ni yad ma par u Vienna. Daniela nge Helmut e yow be pigpig ni missionary u southwest Africa.

Dar Talgad

8. Mang reb e kanawo’ ni ba’ angin ni boor e girdi’ ni kar daged e t’ufeg rorad ku Got nge yul’yul’ rorad ko fare Gil’ilungun?

⁸ Tin riyul’ riy, e maruwel ko missionary e reb ko fapi kanawo’ ni ma dag e girdi’ rok Jehovah e t’ufeg rorad riy ngak nge yul’yul’ rorad ko Gil’ilungun e ngiyal’ n’ey. Ni bod facha’ ni ma chuway’ ko fanathin rok Jesus, piin ni kar uned ko re maruwel ney e ke m’agan’rad ni ngar milekaggad ko gin nrib palog ni bochan fare Gil’ilungun. Riyul’, ni piin missionary e dar ma milekag ni be gay fare thin nib fel’ ko Gil’ilungun; ya yad be fek i yan ngak e girdi’ ni yad ma par ko binaw u fayleng nrib palog, ni yad be fil ngorad ma yad be ayuwegrad ngar manged pi gachalpen Jesus Kristus. (Matthew 28:19, 20) U lan e pi nam ni boor, ma thingara k’adedan’dad ko gafgow nrib gel. Machane k’adan rorad e ni pi’ puluwon ni boor.

9, 10. Mang e n’en ni buch rok e piin missionary nib fel’ ko pi binaw nib palog, ni bod Central African Republic?

⁹ Mu lemnag e Central African Republic, ni fa binem e duw e immoy 16,184 ni kara uned ko Puguran ko yam’ ni tay Kristus, ni re namba ney e kab boor ko pi tamachib ko Gil’ilungun ko re binaw nem ni sagonapan dalip yay. Bochan boor yang ko re nam nem ni dariy e gamig rorad, ma baga’ ni ma rin’ e girdi’ e maruwel rorad u wen u tan e gek’iy ni bay e tagalul’ riy. Ere piin missionary e ku ma rin’ e maruwel rorad ni aram rogon​—yad ma fil e Bible ngak girdi’ u wen u tan e gek’iy ni bay e tagalul’ riy. Gathi kemus ni ba tamilang ma ba garbeb u wen ya ku bay reb nib fel’ riy. Girdi’ u rom e rib t’uf e Bible rorad, ma rogon e yalen ko boch e girdi’ e ri yad ma weliy u murung’agen e teliw. Ma baga’ ni girdi’ ni yad be yan u kanawo’ e kar naabgad ko mang e yibe rin’ mi yad yib ra uned ko fol babyor.

¹⁰ Ere, nap’an ni reb e missionary e be fil e Bible ngak be’ u wen, ma reb e pagal ni ma par u barba’ e kanawo’ e ke yib me yog ni bochan ni dariy be’ ni keb i guy, maku baadag ni ngeb fare missionary ngak ngar filew e Bible. Mmutrug ni baadag fare missionary ni nge rin’ e n’en ni ka nog ngak, ma papey ni ke mon’og fare pagal. U lan e re nam ney, ma baga’ ni piin polis e ma taleg e Pi Mich u kanawo’, gathi ni bochan ni ngan pi’ e summon ara fine ngorad, ya yad ma ning e babyor ni Wulyang Ntagil’ e Damit nge Awake! nib biech ara ngar pininged e magar ni bochan ni kar bieged reb e article ni ri yad baadag.

11. Yugu demtrug rogon ni keb boch e skeng ngorad, ma uw rogon u wan’ e pi missionary u murung’agen e pigpig ni yad ma tay?

¹¹ Boor u fithik’ e piin ni ra tababgad ko maruwel ni missionary ni 40 ara 50 e duw kafram e ka yad ma un ko machib e chiney u fithik’ e yul’yul’. Rib fel’ ni ngad folgad rorad ko michan’ nge k’adan’ ni kar daged! U lan fa 42 e duw ni ke yan, ma ba wu’ i mabgol e kar pigpiggow ni missionary u taabang u dalip e nam nib thilthil. En figirngiy e ke yog ni gaar: “Immoy boch e magawon. Ni bod ni, gu chamgad e malaria u lan 35 e duw. Yugu aram rogon, ma dagu kalgowngan’mow ni kug dugliyew ni nggu maruwelgow ni missionary.” Me ulul leengin ngay ni gaar: “Rib boor ban’en ni thingar gu piningew e magar riy. Ri ma k’aring e felfelan’ e machib u mit e tabinaw u rom, ma ba mom ni ngan tababnag e fol Bible. Ga ra guy e girdi’ ni be un ko fol Bible ni ngar uned ko muulung mi yad be sabethin, ma yad bod girdien ba tabinaw ni yab be muulung u taabang.”

Yad Ma “Lemnag ni Urngin Ban’en e Ke Mul u Pa’rad”

12. Uw rogon ni ngan dag ni baga’ fan u wan’uy fare Gil’ilungun?

¹² Nap’an ni ke pirieg facha’ ni ma chuway’ ni ma milekag e churuwo’ nu l’ugun e yar nib tolang puluwon, “me yan i pi’ ni chuway’ urngin ban’en ni ba’ rok, me fek e salpiy nge chuw’iy fare churuwo’ ngay.” (Matthew 13:46) Re lem ni aram rogon nem nib m’agan’ ngay ni nge pag urngin ban’en ni sana yibe lemnag nib ga’ fan e aram e lem rok e piin ni riyul’ nib ga’fan fare Gil’ilungun u wan’rad. Paul ni apostal ni ir be’ ni ra un ngak Kristus ko flaab ko Gil’ilungun Got, i yog ni gaar: “Tin riyul riy e kug tay ni urngin ban’en e ke mul u paag ni bochan puluwon e tamilangan’ rok Kristus Jesus ni Somol rog e rib tolang. Ma bochan e kug ta’ ni ke mul urngin ban’en u paag ni gu be finey ni goo chubung, ni fan ni nge yog Kristus ngog.”​—Filippi 3:8, NW.

13. Uw rogon ni dag be’ nu Czech Republic e t’ufeg rok ni fan ko fare Gil’ilungun?

¹³ Maku arrogon, ni boor e girdi’ e chiney ni ke m’agan’rad ni ri ngara thiliyeged e yafas rorad ni fan ni nge yog ngorad e pi flaab ko Gil’ilungun. Ni bod ni, u nap’an e October 2003, ma reb e prinsipal u reb e skul u Czech Republic ni 60 e duw rok e ke yog baken e babyor ni ayuw ko fol Bible ni Knowledge That Leads to Everlasting Life. Tomren ni ke bieg, me yan ni nge guy e Pi Mich Rok Jehovah ko binaw rok ni ngar filed e Bible. Fel’ e mon’og ni tay ko tirok Got ma de n’uw nap’an me tabab ni nge un ko urngin e muulung. Machane, uw rogon fare n’en ni be lemnag ni baadag ni nge un ko towal nge mang mayor ma tomur riy e baadag ni nge mang senator? I mel’eg yugu reb e maruwel​—ni ba tamachib ko Gil’ilungun. Me yog ni gaar, “Kug pi’ boor e babyor ni kan fek u Bible ngak e pi student rog.” Me dag ni ke ognag ir ngak Jehovah u daken e taufe u nap’an reb e convention ko July 2004.

14. (a) Fare thin nib fel’ ko Gil’ilungun ni ke k’aring bokum million e girdi’ ni ngara rin’ed e mang? (b) Mang boch e deer ni ra k’aringey ni ra bagadad ma rayog ni nge fith ir riy?

¹⁴ Bokum million e girdi’ u ga’ngin e fayleng e kar folgad ko thin nib fel’ ko Gil’ilungun ni aram rogon. Kar bad u fayleng nib kireb, ma kar paged pangiyrad kafram nib kireb, ma kar paged e chag nib kireb, ma kar paged e tin nu fayleng ni ur nameged kafram ni nge yog ngorad. (John 15:19; Efesus 4:22-24; James 4:4; 1 John 2:15-17) Mang fan ni kar rin’ed e pi n’en ney ni urngin? Ya bochan kab ga’ fan u wan’rad ndabi chuchugur e pi flaab ko Gil’ilungun Got ko urngin ban’en nrayog ni nge ognag e pi n’en nu fayleng. Maku aram rogon ni ga be lemnag u murung’agen e thin nib fel’ ko Gil’ilungun? Kan k’aringem ni ngam thiliyeg boch ban’en ni fan ni nge puluw rarogon e yafas rom, nge ngongol, nge n’en ni ga be nameg ko tin baadag Jehovah ni ngam rin’? Ga ra rin’ ni aram rogon ma ra yibnag e flaab ngom ndariy n’umngin nap’an, e chiney nge gabul nge langlath.

Fare Mokun Woldug e Ke Taw ko Tungun

15. Mang e kan yiiynag ni bayi rin’ e girdi’ rok Got ko tin tomren e rran?

¹⁵ Fare psalmist e ke yoloy ni gaar: “Rofen ni ga ra mahl ngak e pi toogor rom e ra un e tirom e girdi’ ngom nra bagayad me ir e ra ognag ir.” Piin ni kar ognaged yad e ba muun ngay e “ulung ko piin pumoon ni ka yad ba pagal ni ri yad bod e pi waangchol” nge “ba ulung ni baga’” ko “piin ni ppin ni yad be machibnag fare thin nib fel’.” (Psalm 68:11; 110:3) Mang e ke buch ya bochan ni girdi’ rok Jehovah e yad ma maruwel nib gel ma yad ma pag farad​—ni piin ni pumoon nge ppin, nge piin ni ka yad ba pagel nge piin ni kar ilalgad—​ko ngiyal’ n’ey ni tin tomren e rran?

16. Mu dag ko u rogon ni pi tapigpig rok Got e yad be athamgil ni ngar ayuweged boch e girdi’ ngar nanged murung’agen Gil’ilungun.

¹⁶ Reb e pioneer, ara be’ ni tamachib ko Gil’ilungun ni polo’ e tayim rok, u India e ke magafan’ ko uw rogon ni ngan ayuweg e girdi’ ni biling ni ke pag l’agruw e million ko re binaw nem ngar nanged u murung’agen Gil’ilungun. (Isaiah 35:5) Me dugliy ni nge ta’ fithingan ko reb e skul ni fan ni nge fil e sign language. Ke yog rok ni nge wereg fare athap u tan Gil’ilungun ngak boor e girdi’ u rom nib biling, ma kan tababnag boch e ulung ni ma un ko fol Bible. U lan in e wik, ma boor ko ragag nge l’agruw e girdi’ e kar bad ni ngar uned ko pi muulung u Kingdom Hall. Tomur riy, u nap’an e abich ko m’agpa’, me mada’nag fare pioneer reb pagal nib biling ni ma par u Calcutta ni bay boor e deer rok me dag nrib baadag ni nge nang boch murung’agen Jehovah. Yugu aram rogon, ma ba’ reb e magawon. Fare pagal e nge sul nga Calcutta, ni sogonapan 1,000 miles palongin, ni nge tabab ko college, ma dariy e Pi Mich u rom ni manang e sign language. Kari athamgil ni nge ta’ ir ko chitamangin ni nge pag ni nge un ko skul u Bangalore ni nrayog ni nge ulul ko fol Bible. Kari mon’og ko tirok Got ban’en, ma tomren sogonapan taareb e duw, me ognag e yafas rok ngak Jehovah. N’en ni rin’ e ki fil e Bible ngak boch e girdi’ nib biling, mab muun ngay be’ ni fager rok ni ka yow bbitir. Fare tochuch u India e kan yarmiy e chiney ni piin pioneer e ngara filed e sign language ni fan ni ngar ayuweged e re maruwel ney.

17. Mu weliy e n’en ni kam pirieg ni ra pi’ e athamgil nga lanin’uy u murung’agen fare 2004 service year report ko page 25 nge mada’ ko 28.

¹⁷ Page 25 nge mada’ ko 28 ko re ke babyor ney, ma rayog ni ngam pirieg e report u ga’ngin e fayleng ko tin ke rin’ e Pi Mich Rok Jehovah ko fare 2004 service year. Mu tay boch e tayim ni ngam yaliy, ma ngam guy e mich riy ni girdi’ rok Jehovah u ga’ngin e fayleng e ri yad be tiyan’rad e ngiyal’ ney ni ngar gayed fare “churuwo’ nu l’ugun e yar nib tolang puluwon”.

Nguun “Gay fare Gil’ilungun ni Som’mon”

18. Mang boch ban’en ni de uneg Jesus ko fanathin rok ko faen ma chuway’ ni ma milekag, ma mang fan?

¹⁸ Gad ra lemnag biyay fare fanathin rok Jesus ko en ma chuway’ ni ma milekag, ma ga ra guy ni de yog Jesus ko uw rogon ni nge ayuweg e en ma chuway’ e yafas rok u tomren ni ke pi’ ni chuway’ urngin ban’en ni bay rok. Rayog ni nge fith boch e girdi’ ni: ‘Uw rogon ni nge gay facha’ ni ma chuway’ e ggan, nge mad, nge naun rok e chiney ni dakuriy ban’en rok? Mang e n’en nib fel’ e rayog ni nge pi’ fare churuwo’ nu l’ugun e yar nib tolang puluwon ngak?’ Ireray e gali deer ni bay fan ni rogon ni ma changar e girdi’ ngay. Machane gathi ke fonownag Jesus pi gachalpen ni gaar: “Ere, nguum gayed fare gil’ilungun nsom’mon nge tin nib mat’aw ban’en rok, ma urngin e pi n’ey e bayni pi’ ngomed”? (Matthew 6:31-33, NW) Kenggin i fan fare fanathin e aram ba t’uf ni ngan dag e pigpig ku Got u polo’ i gum’irchaey nge pasig ni fan ko Gil’ilungun. Gur bay ban’en ni gad ra fil riy?

19. Mang e gad ra fil ni rib ga’ fan ko fanathin rok Jesus ko churuwo’ nu l’ugun e yar nib tolang puluwon?

¹⁹ Demtrug ko kafin da filed murung’agen e thin nib fel’ ara gad ma gay fare Gil’ilungun ma gad ma yog ngak yugu boch e girdi’ u murung’agen e pi flaab riy, ma thingar uda tedan’dad ko Gil’ilungun. Ngiyal’ ney ni gad ba’ riy e ba mo’maw’, machane ri bay fan ni nge mich’ u wan’dad ni n’en ni gad be gay e riyul’ ma dariy ban’en nib taareb rogon ngay​—ni bod fare churuwo’ ni ke pirieg facha’ ni ma chuway’. Tin be buch u fayleng nge fapi yiiy u Bible ni ke lebug e ri be micheg ni gad be par ko “tomur ko pi n’en u fayleng.” (Matthew 24:3, NW) Manga yigi uda daged ni ri gadad ba pasig ni fan ko Gil’ilungun Got ma nguuda felan’gad ko taw’ath rodad ni gad be machibnag fare thin nib fel’ ni bod facha’ ni ma chuway’ ni ma milekag.​—Psalm 9:1, 2.

Ka Ga Manang?

• U lan e pi duw, ma mang e ke ayuweg ni nge yoor e pi tapigpig nib riyul’?

• Mang lem e yima guy u fithik’ e piin ni yad be pigpig ni missionary?

• Uw rogon ni ke thil e girdi’ ni be’ nge be’ nbochan e thin nib fel’ ko Gil’ilungun?

• Mang e gad ra fil nib ga’ fan ko fanathin rok Jesus ko churuwo’ nu l’ugun e yar nib tolang puluwon?

[Chart on page 25-28]

2004 SERVICE YEAR REPORT OF JEHOVAH’S WITNESSES WORLDWIDE

(See bound volume)

[Picture on page 23]

“Ra adag . . . urngin mit e girdi’ e tin riyul’.”​—A. H. Macmillan

[Picture on page 24]

Ke machibnag Daniela nge Helmut e girdi’ nu Vienna ni ma non ni thin nu bang

[Pictures on page 29]

Ni bod e en ma chuway’ ni ma milekag, ma fapi missionary e ngiyal’ ney e kari ni tawathnagrad

[Picture on page 30]

“Girdi’ rom e bayra ognaged yad ngom ni lem rorad”