‘Baara’ Rogon Ni Ngam Meybilgad’

GA MANANG fare meybil ni Chitamangimad, fa? Aram e meybil ni ke fil Jesus Kristus ngak pi gachalpen. U nap’an ni i machib Jesus u daken Fare Burey, i yog Jesus ni gaar: “Baara’ rogon ni ngam meybilgad.” (Matthew 6:9) Yima yog e Meybil Rok Somol ko re meybil nem ya Jesus e ke fil fare meybil maku yima yog e Chitamangimad ngay.​—Thin nu Latin, Paternoster.

Bokum million e girdi’ u fayleng iyan nrayog rorad ni ngar bieged e re meybil nem ya bay u lanin’rad ma yad ma sul u daken e re meybil nem ni boor yay u gubin e rran. Boor e girdi’ ni kar bieged e re meybil ney u skul ara nap’an ni ra muulung e girdi’ ni yoor. Mang fan ni yima tay fan fare Meybil Rok Somol?

U lan e chep ni thothup rok e Galesiya ni Katolik, kar ted ni fare meybil ni Chitamangimad e ir “kenggin e meybil rok e pi Kristiano.” Machane boor e girdi’ ni yad ma bieg e re meybil nem e dar nanged fan e thin riy. Be gaar fare shimbung ni Ottawa Citizen ni ba shimbung nu Canada: “Faanra gab Kristiano ma sana rayog ni ngam bieg fare meybil ni Chitamangimad ni dab mu tal biyay ni fan ko pogofan. Machane sana ga ra magawon ni ngam bieg nib sagaal boch ni ga manang fan e thin riy.”

Baga’ fan ni ngada nanged fan e thin ko pi meybil rodad ngak Got, fa? Mang fan ni ke pi’ Jesus fare meybil ni Chitamangimad ngodad? Mang fan e thin riy ngom? Ngada weliyed e fulweg ko pi deer ney.