Fare Meybil Ni Chitamangimad Fan E Thin Riy Ngom

BAY fare Meybil Rok Somol ni ke pi’ Jesus Kristus u nap’an ni i machib u daken Fare Burey u Matthew guruy ni 6 ko verse 9 nge mada’ ko 13. Mang fan ni bay e Meybil Rok Somol u lan e Bible? Ke fil Jesus e re meybil nem ngodad ya ngada nanged rogon ni nge falan’ Got ko pi meybil rodad. U lan e re meybil nem e bay e fulweg ko boch e deer ni ka yima fith. Ere ngada weliyed yu yang fare meybil ni Chitamangimad.

Mini’ Fithngan Got?

“Chitamangimad ni ga bay u tharmiy: ngan tay fan fithingam nib thothup.” (Matthew 6:9) Tin somm’on e thin ko fare meybil e ma ayuwegdad ni ngada chugurgad ngak Got ya gad be pining e “Chitamangimad” ngak. Reb e bitir e ba adag ni nge chugur ngak e gallabthir rok ni ma t’ufeg, ere ku arrogodad ni rayog ni ngada chugurgad ngak e Chitamangidad nu tharmiy ni kari pagan’dad ngak ni ba adag ni nge motoyil ngodad.

Ke fil Jesus ngodad ni ngada yibilayed ni ngan mathangeluwolnag fithngan Got ara nge par e ngochol rok nib thothup. Ma mini’ fithngan Got? Ke fulweg e Bible ni gaar: “I gur ni ngochol rom e Jehovah, goo gur e Ani Th’abi Tolang u fayleng.” (Psalm 83:18) Me gur, kaam bieg e ngochol rok Jehovah u lan e Bible, fa?

U lan e tin kakrom e Bible e bay RIY e ngochol rok Got ni Jehovah ni ke chugur ni 7,000 yay. Machane boch e girdi’ ni kar pilyeged e Bible e kar chuweged e re ngochol nem ko fare Bible ni kar pilyeged. Ere bpuluw ni ngada yibilayed ni nge par e ngochol rok e Ani Tasunmiy nib thothup. (Ezekiel 36:23) Reb e kanawo’ nrayog ni ngada ted nib thothup e ngochol rok Got e nga dogned e re ngochol rok Jehovah nem u nap’an ni gad ra meybil ngak.

Ngan Rin’ E Tin Nib M’agan’ Got Ngay U Fayleng

“Nge yib Gil’ilungum ngomad min rin’ e tin nib m’agan’um ngay u roy u but’ ni bod rogon ni yibe rinˈ u tharmiy.” (Matthew 6:10) Uw rogon ni ngan lebguy e re thin ney ko meybil rok Jesus? Ma tay e girdi’ ni bay e gapas u tharmiy. Be yog e Babyor Nib Thothup ni tharmiy e aram “gini ma par Got riy ni ba thothup ma ba flaab.” (Isaiah 63:15) Aram fan ni gad be yibilay ni ngan rin’ e tin nib m’agan’ Got ngay u roy u fayleng ni “bod rogon ni yima rin’ u tharmiy”! Ra riyul’ e re thin nem, fa?

I yog Daniel ni profet rok Jehovah ni gaar: “Bayi sunumeg e Got nu tharmiy reb e gagiyeg ndariy e rofen nra mus. Ma binem e gagiyeg e dariy be’ nra gel ngay biid, machane bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.” (Daniel 2:44) Re am nem ara Gil’ilungun e Tharmiy e ra maruwel ya nge yog e gapas u ga’ngin yang e fayleng u tan e gagiyeg rok.​—2 Peter 3:13.

Meybil Nge Tin Nib T’uf Rodad

Ke m’ug ko fare meybil ni ke fil Jesus ngodad ni tin ni baga’ fan e aram e tin nib sor fan ko ngochol rok Got ara tin nib m’agan’ ngay. Machane bay ko fare meybil boch e thin ni fan ko tin nib t’uf rodad nib puluw ni ngan yibilay ngak Jehovah.

Ba aray e bin somm’on: “Mpi’ ngomad e daba’ e ggan ni nge yog ngomad.” (Matthew 6:11) Gathi yibe yibilay e fel’ rogon. Ya ke fil Jesus ngodad ni ngada yibilayed e “ggan ni fan ko daba’.” (Luke 11:3) Ere rayog ni ngada yibilayed u fithik’ e michan’ ni nge pi’ Got e tin nib t’uf rodad ni faanra gad ra t’ufeg ma gad fol rok.

Faanra kaygi gel e magafan’ rodad ni bochan e tin nib t’uf rodad, ma rayog ni ngada paged e tirok Got ban’en ma rayog ni nge dab da rin’ed e tin ni ba adag Got ni ngada rin’ed. Machane faanra m’on u wan’dad e liyor ngak Got ma rayog ni ngada pagedan’dad ngay ni ra rung’ag Got e pi meybil rodad ni gad be ning e tin nib t’uf rodad ni bod e ggan nge mad. Be gaar Jesus: “Ere ngam m’oneged u wun’med e gagiyeg rok Got nge tin nib m’agan’ ngay ni ngam rin’ed, ma aram me pi’ urngin e pi ney ngomed.”​—Matthew 6:26-33.

Pi Meybil Rodad Nge Denen Rodad Ni Ra N’ag Got Fan

“Ma ga n’ag fan u wun’um e kireb romad, ni bod ni kug n’iged fan u wun’mad e kireb ni ke rin’ boch e girdi’ ngomad.” (Matthew 6:12) U lan e babyor rok Luke ko gini bay e Meybil Rok Somol riy ma ka nog e “denen” ko pi “malfith” nem. (Luke 11:4) Ba adag e Chitamangidad nu tharmiy ni nge n’ag fan e pi denen rok e piin ni kar kalgad ngan’rad mi yad meybil ngak. Rayog ni ngan thang e malfith ngari chuw ere ku rayog rok Jehovah ni nge thang e pi denen rodad ngari m’ay fan.

Machane bay ban’en ni yog Jesus ni thingar nrin’ u m’on ni ngan n’ag fan e pi denen rodad: thingar da n’aged fan e pi denen rok e girdi’ ni kar rin’ed ban’en nib kireb ngodad. (Matthew 6:14, 15) Faan gad ra rin’ ma ra falan’ Got ngodad ma rayog ni nge runguydad ni bochan e kireb rodad.

Ayuw Ni Nguuda Pared U Kanawoen E Mat’aw

“Dab mu fekmad i yan ko sikeng nib mo’maw’, machane ngam ayuwegmad rok Faanem nib Kireb.” (Matthew 6:13) Dabi pagdad Jehovah u nap’an ni yibe waliydad ma dabi n’igin ni ngada denengad. Be gaar e Thin Rok: “Ya dariy ban’en nib kireb nrayog rok ni nge yan i guy rogon nge waliy Got nge denen, mi Got e der rin’ ngak be’.” (James 1:13) Ma pag Got ni ngan wawliydad machane rayog rok ni nge chuwegdad u pa’ “Faanem nib Kireb” ni Satan ni Moonyan’ ni ir e be wawliydad.

Bay e fayleng u tan pa’ Moonyan’ ere ma fanay e tin nu fayleng ban’en ni nge wawliydad ni ngada rin’ed e pi n’en ni dubun Got ni ngan rin’. (1 John 5:19) Ere baga’ fan ni ngada sapgad ngak Got ni gubin ngiyal’ ya nge ayuwegdad, ma baga’ ni faanra bay ban’en ni yugu be wawliydad. Ma faan gad ma liyor ngak Got nrogon e Thin Rok ni Bible ma ra ayuwegdad ni ngada togopuluwgad ngak Moonyan’. Be gaar e Bible: “Yi Got e dabi thiliyeg e tin ni ke yog nra rin’ ngodad, ma dabiyog ni nge pagmed nge yib ngomed e pi n’en ni ma waliy e girdi’ nge denen nge pag rogon ndabkiyog romed ni ngam taleged gimed riy.”​—1 Korinth 10:13.

Thingari Mich Got U Wan’dad

Ke gel e t’ufeg rodad ngak e Chitamangidad nu tharmiy ni bochan e gad manang ni ri ma lemnagdad ni be’ nge be’! Ke l’og Fak ni Jesus Kristus ni nge fil ngodad rogon e meybil. Ere gad ba adag ni ngada falan’naged Jehovah Got. Uw rogon nrayog ni ngada falan’naged?

Kada weliyed morngaagen fare meybil ni Chitamangimad ma susun e ngam tay fan fare meybil ni bochan e ga manang fan e thin riy. Rayog ni nge gel e michan’ rom ni faan ga ra fil boch morngaagen Jehovah nge pi flaab ni fan ngak e “piin ni be gayiy Got.” Nguum fil boch morngaagen Got nge tin nib m’agan’ ngay ma rayog ni nge fel’ thilmew e Chitamam nu tharmiy ni manemus.​—John 17:3.