“Somol, Mfil Ngomad Rogon Ni Ngan Meybil”

“Reb ko fapi gachalpen e gaar ngak: ‘Somol, mu fil ngomad ko uw rogon ni ngan meybil.’”​—LUKE 11:1, NW.

1. Mang fan ni yog reb i gachalpen Jesus ngak ni nge fil rogon e meybil ngorad?

BA’ BA ngiyal’ u lan e duw ni 32 C.E., ni i yaliy reb i pi gachalpen Jesus ni i meybil. Ma de rungaag e n’en i yog ngak e Chitamangin, ya sana be meybil ni der yan lungun. Yugu aram rogon, nap’an ni mu’ Jesus, me gaar faani gachalpen ngak: “Somol, mfil ngomad ko uw rogon ni ngan meybil.” (Luke 11:1, NW) Mang e k’aring ni nge yog e re n’ey? Meybil nge liyor e ka bayang ko yafas rok piyu Jew. Fagi n’em ko Bible ni thin ni Hebrew e boor e meybil ni ba’ riy u lan e babyor ko Psalms nge ku yuyang riy. Ere fa eni gachalpen e gathi be yog ni ngan fil ban’en ngak ni ban’en ni de nang murung’agen ara ban’en ni der ma rin’. Dariy e maruwar riy, ni manang rogon yalen e meybil ko pi tayugang ko teliw ko Judaism. Ma ke chiney ni ke yaliy Jesus ni be meybil, ma ba dake ke pirieg nib ga’ e thil u thilin e meybil ni ma ta’ e pi tayugang ko teliw ko Jew ni ke thum’ nga wuru’ i dag ni yad ba thothup ma yad ba mat’aw nge rogon ni ma meybil Jesus.​—Matthew 6:5-8.

2. (a) Mang e be dag ni de lemnag Jesus ni ngaud sulod u daken fare meybil ni ngan folwok riy ni bbugethin nge bbug? (b) Mang fan ni gadad baadag ni ngad nanged rogon e meybil?

² Sogonapan 18 e pul ni ke yan, ma fare Machib rok Jesus u daken e Burey, e pi’ ngak pi gachalpen e kanawo’ ko meybil ni ngan folwok riy ngaur ted e meybil rorad nga daken. (Matthew 6:9-13) Rayog ni biney i gachalpen e da immoy ko ngiyal’ nem, ma fan e rib gol me sul Jesus u daken e pi n’en nib ga’ fan ko re meybil nem ni ngaun folwok riy. N’en ni yira guy e mich riy ni de sul u daken fapi thin ni bbug nge bbug, ni aram e be dag ni gathi be pi’ e meybil ni yibe sul u daken me mit ngoyiy ma danir lemnag fan. (Luke 11:1-4) Ku bod rogon e ani gachalpen nem ni da nog fithingan, ni ka gad baadag ni ngan fil ngodad rogon ni ngaun meybil ni bochan ni meybil rodad e ra chugurnagdad ngak Jehovah. Ere ngad fal’eged i lemnag nge mus rogon i nang fan fare meybil ni ngan folwok riy, ni bod ni yoloy apostal Matthew. Ba’ medlip e wenig riy, ni aram e dalip e fan ko tin nib m’agan’ Got ngay ma aningeg e fan ko tin nib t’uf rodad ni fan ko chugum nge tirok Got ban’en. U lan e biney e article, e gadad ra weliy riy fa dalip ni som’on e wenig.

Ba Matam ni Ma T’ufegey

3, 4. Mang e n’en ni be yip’ fan ni faan gad ra yog ku Jehovah e “Chitamangidad”?

³ Aram ko tabolngin, me dag Jesus ni pi meybil rodad e thingari m’ug riy nib fel’ thildad machane gadad be ta’ fan e tha’ u thildad Jehovah. I non nib ga’ ni fan ni ngeb angin ngak pi gachalpen ni kar muulunggad nga tooben u rom u sigire’en e burey, me yog Jesus ngorad ni ngau ra nonad ngak Jehovah ni “Chitamangimad nu tharmiy.” (Matthew 6:9) Rogon ni yog reb e llowan’, e demtrug ko non Jesus ni thin ni Hebrew fa Aramaic, ma n’en ni fanay ko “Matam” e bod e thin ko madway ni ma non ko chitamangin nib fel’ thilrow, ‘ni thin ko bitir.’ Ra uda nonad ngak Jehovah ni bod e “Chitamangidad” ma be dag ba tha’ nib fel’ ni yira pagan’uy ngay.

⁴ Ra lungudad “Chitamangimad,” maku kad micheged ni gadad bang u ba tabinaw nib ga’ ni pumoon ma ppin ni kar nganged Jehovah ni ir e Ma Pi’ e Yafas. (Isaiah 64:8; Acts 17:24, 28) Piin ni Kristiano ni kan dugliyrad ko kan ni thothup e kan pofrad kar manged “pi fak Got,” ni ir e rayog ni ngar nonad nib ga’ lamrad ngak ni nge “lungurad: ‘Abba, Chitamag!’” (Roma 8:14, 15) Bokum milyon e girdi’ e kar manged bochi i yad nib yul’yul’. Picha’ ney e kar ogniged e yafas rorad ngak Jehovah ma kar daged e pow ni kar ogniged yad ko taufe ko ran ni ka ta’ ngorad. Urngin e pi cha’ ney ni “yugu boch e saf” e ku rayog ni ngar chugurgad ngak Jehovah u daken fithingan Jesus mar pininged ni “Chitamangimad.” (John 10:16; 14:6) Rayog ni ngau darod ngak e Chitamangidad nu tharmiy u fithik’ e meybil ni ngan tolangnag, mi nog e magar ngak ko urngin e tin ni ma yog ngodad nib manigil, ma gad yog ngak e pi magafan’ rodad, nib mich u wan’dad ni ma lemnagdad.​—Filippi 4:6, 7; 1 Peter 5:6, 7.

Ngan T’ufeg Fithingan Jehovah

5. Mang e bin som’mon ko fare meybil ni ngan folwok riy, ma mang fan nib puluw e re n’eney?

⁵ Bin m’on e wenig e gurnag nge tay e bin ba t’uf ni nge m’on nge migid migid. I ta’ ni: “Ngan ta’ fan fithingan nib thothup.” (Matthew 6:9) Arrogon, fare n’en ni ngan ta’ fithingan Jehovah nib thothup e rib th’abi ga’ fan ngodad ni bochan nib t’uf rodad ma gad be fanenikay ni ngad guyed urngin e gathibthib ni kan ta’ nga fithingan. Togopuluw rok Satan nge rogon ni wawliy e gal ni som’mon e girdi’ ni nge dab kur folgow rok Jehovah Got e ke gathibthibnag fithingan ni aram e ke maruwarnag rogon ni be maruwel Got ni ir e th’abi tolang u palpalthib. (Genesis 3:1-6) Maku reb, e ka nap’an e re togopuluw nem, i yib ni yibe kirebnag fithingan Jehovah ko ngongol nib tamra’ nge n’en ni be fil e piin ni yad be yog ni yad e yad be yog lungun.

6. Mang e n’en ni dabda rin’ed ni faanra ngada yibiliyed ni ngan thothupnag fithingan Jehovah?

⁶ Meybil rodad ni ngan thothupnag fithingan Jehovah e be dag e gin gad ba’ riy ko fare n’en ni ani th’abi tolang u palpalthib​—ni gadad be pi e ayuw ni polo’ nga mat’awun Jehovah ni nge gagiyegnag e palpalthib. Jehovah e baadag e palpalthib ni nge par e piin ni ba tamilangan’rad ni rib m’aguwun’rad ma ri yad ba falfalan’ ngay ni ngar m’inggad nga tan mat’awun ni ir e th’abi tolang ya ba t’uf rorad maku ba t’uf rorad urngin ban’en ni bay fithingan riy. (1 Chronicles 29:10-13; Psalm 8:1; 148:13) T’ufeg rodad nga fithingan Jehovah e ra ayuwegdad ngad talgad i rin’ ban’en ni ra kirebnag e re ngachal ni thothup nem. (Ezekiel 36:20, 21; Roma 2:21-24) Bochan ni gapas ko palpalthib nge girdi’ ni be par riy e ba mil fan nga daken ni ngan thothupnag fithingan Jehovah ma ngad folgad ni bochan e t’ufeg nga feni tolang ma, meybil rodad ni “ngan thothupnag fithingan” e ban’en ni be yognag e pagan’ rodad ko pi n’en nib m’agan’ Jehovah ngay e ra lebug mi nog e sorok ngak.​—Ezekiel 38:23.

Fare Gil’ilungun ni Gadad Be Yibilay

7, 8. (a) Mang e re Gil’ilungun ni fil Jesus ngodad ni ngad yibiliyed? (b) Mang e gadad ra fil u murung’agen e re Gil’ilungun ney u lan fare babyor ni Daniel nge Revelation?

⁷ Bin l’agruw e wenig ko fare meybil ni ngan folwok riy e: “Mag par ni gur e ga be gagiyegnagmad.” (Matthew 6:10) Biney e wenig e bay rogon ni rib chuchugur ko fa bin som’mon. Talin e maruwel rok Jehovah ni ngan tay fan fithingan nib thothup e fare Gagiyeg ko fare Messiah, am rok nu tharmiy, ni aram e Fak, ni Jesus Kristus, e ir e kan dugliy ni ir e Pilung riy. (Psalm 2:1-9) Fare yiiy rok Daniel e be dag yaan fare Gagiyeg rok fare Messiah ni “ba malang” nni th’ab u ba “burey.” (Daniel 2:34, 35, 44, 45) Fare burey e be yip’ fan feni tolang Jehovah u palpalthib, e re fare Am ni be yip’ fare malang fan e ban’en nib biech ni ke bi m’ug ko gagiyeg rok Jehovah u palpalthib. U lan fare yiiy e, fare malang, e chel, ‘nge mang ba burey nib ga’ nge suguy ga’ngin e fayleng,’ ni be yip’ fan fare Gagiyeg ko fare Messiah e ngeb ni owchen mat’awun Got nib tolang ni nge gagiyegnag e fayleng.

⁸ Piin yad ba chag ngak Kristus ko re Gil’ilungun e am ney e yad boch e girdi’ ni yad 144,000, ni “kan chuw’iyrad u fithik’ e girdi’” ni ngar uned ngak ko gagiyeg ni yad e pi pilung nge prist. (Revelation 5:9, 10; 14:1-4; 20:6) I yog Daniel e pi cha’ ni fa “piin nib thothup rok fa eni Th’abi Tolang,” ni piin, ni yad ra chag ngak Kristus ni Lolugrad, nge yog ngorad “fare gil’ilungun nge fare gagiyeg nge fare gelngin nib th’abi gel ko pi gil’ilungun u tan e pi tharmiy . . . Gagiyeg rorad e dariy nap’an ba gagiyeg ni dabi m’ay, ma urngin e pi gagiyeg ni yad ra pigpig mi yad fol rorad.” (Daniel 7:13, 14, 18, 27) Ba puluw ni ireray fare am nu tharmiy ni fil Kristus ngak pi gachalpen rogon ni ngar yibiliyed.

Mang Fan ni Ki Yibe Yibilay fare Gil’ilungun ni Ngeb?

9. Mang fan nib puluw ni ngada yibiliyed Gil’ilungun Got ni nge yib?

⁹ U lan fare meybil rok ni ngan folwok riy, e ke fil Kristus ngodad ni ngad meybilgad ni fan ko fare Gil’ilungun Got ni bay yib. Rogon ni be lebug e pi yiiy nu Bible e be dag ni fare Gagiyeg ko fare Messiah e ni tababnag u tharmiy ko duw ni 1914.a Ere, arfan, ni kab puluw ni nga ku udi yibiliyed ere Gil’ilungun nem ni “ngeb”? Ri arrogon. Ya yiiy rok Daniel, e fare Gagiyeg rok fare Messiah, e m’ug yaan nib malang, ni keb ni nge bi chafin ko pi gagiyeg ko ko girdi’, ni be m’ug yaan ni ba liyos ni rib ga’. Fare malang e bay yib nge bi aw ko re liyos nem, me pirdiiy nge ngal ni fiyath. Yiiy rok Daniel e gaar: “Fare gagiyeg e dabni pi ngak yugu boch e girdi’. Ra masingsingnag me taleg urngin e pi gagiyeg ney, me mang ir e par ni dariy n’umngin nap’an.”​—Daniel 2:44, NW.

10. Mang fan ni gadad be yim’ ni bochan Gil’ilungun Got ni nge yib?

¹⁰ Kad m’ad ni bochan ni ngada guyed Gil’ilungun Got ni ngeb nge togopuluw ko m’ag nib kireb rok Satan ya re n’ey e be yip’ fan ni ngan thothupnag fithingan Jehovah nib thothup min chuweg urngin e piin tatogopuluw nga feni tolang Got. Gadad ma meybil nib elmerin ni ma lungudad: “Ngeb gil’ilungun,” ma gad ma un ngak apostal John, nge lungudad: “Amen! Somol Jesus, Moy.” (Revelation 22:20) Arrogon, ngeb Jesus nge thothupnag fithingan Jehovah me tamilangnag feni tolang, ya fapi thin ko fare psalmist e nge riyul ni gaar: “Ya nge nangem e girdi’ ni gur, ni fithingam e Jehovah, e yi goo gur e Th’abi Tolang u daken ga’ngin e fayleng.”​—Psalm 83:18, NW.

“Ngan Rin’ e Tin nib M’agan’um Ngay”

11, 12. (a) Mang e n’en ni gadad be ning u nap’an ni gadad be yibilay e n’en nib m’agan’ Got ngay “ni ngan rin’, ni bod u tharmiy, maku arrogon u fayleng”? (b) Maku mang e n’en ni ku be yip’ fan e meybil rodad ni ngan rin’ e tin nib m’agan’ Jehovah ngay?

¹¹ Bin migid ni fil Jesus ngak pi gachalpen ni ngan yibilay e: “Min rin’ e tin nib m’agan’um ngay u roy u but’ ni bod rogon ni yibe rin’ u tharmiy.” (Matthew 6:10) Fare palpalthib e sum ni bochan e ba m’agan’ Jehovah ngay. Pi n’en ni kan sunmiy u tharmiy e ra tolulgad nga lang ni lungrad: “Somol romad ma Got romad! Ba’ rogom ni nga nog e sorok ngom, min ta’ fam, ma ba’ rogom ni nge mil suwon urngin ban’en ngom. Yi gur e mu sunmiy urngin ban’en, yi gur e mu lemnag mi yad sum ni yad ba fas.” (Revelation 4:11) Jehovah e bay e n’en nib m’agan’ ngay ni fan ko “pi n’en nu lan e tharmiy nge pi n’en u daken e fayleng.” (Efesus 1:8-10, NW) Gadad ra meybil ni ngan rin’ e tin nib m’agan’ ngay, ma gadad, e riyul’, ni gadad be yog ku Jehovah ni nge rin’ e tin nib m’agan’ ngay. Maku reb, e aram e gadad be dag ni kad m’ad ni bochan ni ngad guyed e tin nib m’agan’ Got ngay ni ngan rin’ u ga’ngin yang u palpalthib.

¹² Pi meybil ney e ka gadad be dag feni m’agan’dad ngay ni ngad m’aged e yafas rodad ko tin nib m’agan’ Jehovah ngay. Jesus e gaar: “Ggan rog e nggu fol ko tin ni be finey e en ni ke l’ugeg ku gub, ma nggu mu’nag e maruwel ni ke pi’ ngog ni nggu maruweliy.” (John 4:34) Gadad e Kristiano ni kad ogniged gadad, e gadad ma falfalan’ ni bod Jesus, ni gadad ma rin’ e tin nib m’agan’ Got ngay. T’ufeg rodad ngak Jehovah nge Fak e be k’aringdad ni ngad ted e yafas rodad “ni gathi fan ko tin ma yim’ e girdi’ ni bochan, ya fan ko tin nib m’agan’ Got ngay.” (1 Peter 4:1, 2; 2 Korinth 5:14, 15, NW) Gad be athamgil ni ngad pilo’gad i rin’ e pi n’en ni gadad manang nib togopuluw ko tin nib m’agan’ Jehovah ngay. (1 Thessalonika 4:3-5) Gad ra ta’ e tayim ko pow nge fol Bible, ma aram e “bay u wan’dad ko mang e n’en nib m’agan’ Jehovah ngay,” ni ba muun ngay ni gadad be un ni gadad ba pasig i machibnag e “re thin nib fel’ ko gil’ilungun ney.”​—Efesus 5:15-17; Matthew 24:14.

N’en nib M’agan’ Jehovah Ngay u Tharmiy

13. Uw rogon ni ku un rin’ e tin nib m’agan’ Got ngay ni ke n’uw nap’an u m’on ko ngiyal’ ni togopuluw Satan riy?

¹³ N’en nib m’agan’ Jehovah ngay e kan rin’ u tharmiy ni ke n’uw nap’an mi fini togopuluw reb i pi fak nib kan me mang Satan. Fare ke babyor ni Proverbs e be weliy rogon e bin som’mon ni sum i Fak Got ni be’ nib gonop. Be dag ni kaygi n’uw nap’an ni dab kiyog i foleg nap’an, ni Fak Got ni kari maagirag e “immoy u p’eowchen nib falfalan’ ni gubin ngiyal’,” ni be rin’ e tin nib m’agan e Chitamangin ngay. Munmun, me mang “be’ nib salap i maruweliy ban’en” rok Jehovah u nap’an ni sunmiy urngin ban’en “u tharmiy ngu but’, ni pi n’en ni yima guy nge tin ndanir guy.” (Proverbs 8:22-31; Kolose 1:15-17) I fanay Jehovah Jesus ni ir e Thin rok, ara mit e Thin rok.​—John 1:1-3.

14. Mang e n’en ni rayog ni ngada filed ko Psalm 103 u murung’agen rogon ni rin’ e pi engel e n’en nib m’agan’ Jehovah ngay u tharmiy?

¹⁴ Fare psalmist e dag ni feni tolang Jehovah e ba tolang nga urngin ban’en ma engel ni gathi ba lich e yad ma motoyil ko thin ko fonow rok nge tin ni ke yog ni ngan rin’. Gadad ra bieg ni gaar: “I Jehovah e ir e ke ngongliy tagil nib mudugil u lan e tharmiy; ma daken urngin ban’en e feni pilung e be gagiyegnag. Mu ted fan Jehovah, O gimed e pi engel rok, nib gel gelngimed, ma gimed be rin’ e tin ke yog, ni gimed be motoyil nga lungun ni ere thin rok. Mu ted fan Jehovah, gimed e pi salthaw rok, ni gimed gubin, gimed e pi tapigpig rok ni gimed be rin’ e tin nib m’agan’ ngay. Mu ted fan Jehovah, gimed gubin e pi maruwel rok, u gubin yang ni be gagiyeg riy [ara, “feni tolang,” footnote].”​—Psalm 103:19-22, NW.

15. I yog mat’awun fare Gil’ilungun ngak Jesus ma uw rogon e n’en ni rin’ ko ngan rin’ e n’en nib m’agan’ Got ngay u tharmiy?

¹⁵ Tomuren e togopuluw ni tay Satan, ma kab puf rogon ni ma yan nga tharmiy, ni bod ni be m’ug ko fare babyor rok Job. (Job 1:6-12; 2:1-7) Machane, fare babyor ko Revelation e ke yiiynag ni bayi taw nga nap’an min tharbog Satan nge pi kan rok nib kireb nga wuru’ e tharmiy. Re ngiyal’ i nem e yib i m’ug u tomuren ni kafin yigi yog ngak Jesus Kristus mat’awen fare Gil’ilungun ko duw ni 1914. Ka nap’an e ngiyal’ nem, me chuw tagil e piin baaram ni yad ma togopuluw u tharmiy. Kan nin’rad ko gin bay e fayleng riy. (Revelation 12:7-12) Dab kun rungaag laman e maluagthin u tharmiy, kemus ni goo lamey nib ga’ u taabang ni yibe falfalan’ ma yibe yog e sorok ngak fare “fak e Saf,” i Kristus Jesus, nge kan m’ing nga tan mat’awen Jehovah yibe pining e sorok ngak. (Revelation 4:9-11) Tin nib m’agan’ Jehovah ngay e rib mudugil ni ke m’ay i rin’ u tharmiy.

N’en nib M’agan’ Jehovah Ngay ni Fan ko Fayleng

16. Uw rogon ni fare meybil ni ngan folwok riy e de micheg ni riyul’ e n’en ni be fil e pi Kristiano nde riyul’ u rogon e athap ko girdi’?

¹⁶ Pi galesiya ko Kristiano ni de riyul’ e da ra uneged e fayleng ko tin nib m’agan’ Got ngay, ya yad ma yog ni urngin e girdi’ nib fel’ e yad ra yan nga tharmiy. Machane ke fil Jesus ngodad ni ngad meybilgad ni nge lungudad: “Ma ga par ni gur e ga be gagiyegnagmad, min rin’ e tin nib m’agan’um ngay u roy u but’ ni bod rogon ni yibe rin’ u tharmiy.” (Matthew 6:10) Ere rayog ni nga nog, ni urngin e pi n’en nib m’agan’ Jehovah ngay e ke lebug e chiney u daken ba fayleng ni ke sugnag e ngongol ni maangach, nge kireb, nge tin nde mat’aw, nge m’ar, nge yam’? Ri danga’! Arfan, ni thingarda elmeringad i yibilay e tin nib m’agan’ Got ngay ni ngan rin’ u but’, nib puluw ko n’en kan micheg ni ke yoloy apostal Peter ni gaar: “Machane ke yog Got ni bay sum e bin nib biech e lan e lang [fare Gagiyeg rok Kristus] nge bin nib biech e fayleng [par ko piin nib mat’aw] ni aram e tin nib mat’aw e ngongol e bay i par riy, ni ireray e pi n’en ni gadad be sonnag.”​—2 Peter 3:13.

17. Mang e n’en nib m’agan’ Jehovah ngay ni fan ko fayleng?

¹⁷ Bay fan u wan’ Jehovah me sunmiy e fayleng. I thagthagnag u daken fare profet ni Isaiah ni nge yoloy ni gaar: “Aray e n’en ni ke yog Jehovah, fa Ani sunmiy e pi tharmiy, I ir fare Got nib riyul’, fa ani ke Ngongliy e fayleng me ir e Fal’eg rogon, I ir e Ani Sunmiy nib fel’ rogon, nde sunmiy ni yugu dariy fan, me ngongliy rogon ni rayog ni ngan par riy: ‘I gag Jehovah, ma dakuriy be nga bang.’” (Isaiah 45:18, NW) Me ta’ Got e gal ni som’mon e girdi’ nga lan bangi milay’ ni ba paradis me ta’ chilen ngorow ni gaar: “Mu diyengow nge yoor pi fakmew, nge wer e piin owchenmew nga gubin yang u fayleng ngar pired riy mi yad suwey.” (Genesis 1:27, 28; 2:15) Rib tamilang, ni rogon u wan’ e Ani Tasunmiy e fare fayleng e nge par e girdi’ riy ni yad e girdi’ nib flont ni yad ba mat’aw ni yad ba falfalan’ u tan gelngin Jehovah mar pired ni manemus u lan fare Paradis ni faani micheg Kristus.​—Psalm 37:11, 29; Luke 23:43.

18, 19. (a) Mang e n’en ni thingar ni rin’ u m’on ni ngan rin’ e tin nib m’agan’ Got ngay u fayleng? (b) Mang boch ban’en ko fare meybil rok Jesus ni ngan folwok riy ni gad ra fal’eg i guy ko bin migid e article?

¹⁸ N’en nib m’agan’ Jehovah ngay ni fan ko fayleng e ri dabiyog ni nge fel’ rogon ko ngiyal’ ni ka be par e girdi’ riy ni pumoon nge ppin ni yad be togopuluw nga gelngin. Ra fanay Got gelngin e pi kan nib gel u tan e gagiyeg rok Kristus, “nge gothey e piin ni yad be gothey e fayleng.” Gaangin e re m’ag rok Satan ney nib kireb, nge thang e pi yuraba’ i teliw ni de riyul’, nge am ni kireb, nge chogow, nge fol chuway ni sasalap, nge yuraba’ i salthaw ni rayog ni ngar mogothgothgad e bay ni thirifrad u but’ ni manemus. (Revelation 11:18, NW; 18:21; 19:1, 2, 11-18) Tolangin nge gelngin Jehovah e ra chuweg e kireb u daken min thothupnag fithingan. Urngin e pi n’eney e gadad ma yibilay u nap’an ni ma lungudad: “Chitamangimad ni ga bay u tharmiy: Ngan tay fan fithingam nib thothup, ma ga par ni gur e ga be gagiyegnagmad, min rin’ e tin nib m’agan’um ngay u roy u but’ ni bod rogon ni yibe rin’ u tharmiy.”​—Matthew 6:9, 10.

¹⁹ U lan fare meybil rok ni ngan folwok riy, e yugu aram rogon, ma ki dag Jesus ni ku rayog ni ngada yibilayed ban’en ni fan ngodad. Tiney ban’en ko rogon ni i yog rogon e meybil e bay da fal’eged i guy ko bin migid e article.

[Footnote]

Kanawoen Ni Ngan Sul Ngay Biyay

• Mang fan ni ba puluw ni ngad nonad ngak Jehovah ni bod “Chitamangidad”?

• Mang fan ni rib ga’ fan ngodad ni ngada yibiliyed ni ngan ta’ fan fithingan Jehovah?

• Mang fan ni gadad ma yibilay ni ngeb Gil’ilungun Got?

• Mang e n’en ni be yip’ fan ni faan gadad ra yibilay ni ngan rin’ e tin nib m’agan’ Got ngay u roy u but’ ni bod rogon u tharmiy?

[Picture on page 19]

Pi meybil rok Jesus e rib gel e thil riy ko pi meybil ko Pharisees ni kaygi thum’ nga wuru’

[Picture on page 20]

Piin ni Kristiano e yad ma yibilay ni nge yib Gil’ilungun Got, min ta’ fan fithingan, min rin’e tin nib m’agan’ ngay