“Mang e N’en ni Ga Ma Rin’ ni Dan Nang?”

RE DEER ney e ke fith be’ ni ke pilibthir Muriel riy, ni dalip e bitir rok, u lan ba tafen e abich ni ka nog e fast-food restaurant ngay, ya ke gin. Ke magawon Muriel ko maruwel rok me fek e pi fak ni nge guyrad e togta, ma ke sagaal. Dakuriy e tayim rorad ni ngar sulod nga tabinaw ni ngara abichgad u m’on ni ngara uned ko muulung rorad e Kristiano. Ere ke fek e pi bitir rok nga reb e tafen e abich nib chuchugur ma rayog ni ngar pirieged boch e ggan ni ngar ked.

Nap’an ni ke chuchugur ni ngar mu’gad ko abich, meb reb e pumoon ngak Muriel me yog ni gaar: “Gu be yaliymed ni ka nap’an ni kam bad ngaray. Ma kug guy ni bay ban’en nrib thil u thilin e pi bitir rom ko pi bitir ni gu ma mada’nagrad. Thingar mu guyrad ko mang e yad be rin’ ko pi tebel nge chiya. Kar ted ayrad nga daken e tebel. Kar thuruyed e pi chiya. Machane pi bitir rom e yad ba gapas mab fel’ e ngongol rorad. Mang e ga ma rin’ ndan nang?”

I fulweg Muriel ni gaar: “Gag nge pumoon rog e gamow ma fil e Bible ngak e pi bitir romow, ma gamad be guy rogon ni nggu fanayed ko yafas romad e tin kugu filed. Gamad e Pi Mich Rok Jehovah.” Ngemu’, me yog fare pumoon ni gaar: “Gag reb e Jewish ni kug magey nib fas ko fare Magothgoth nib Ga’. Keb ngan’ug ni kug guy e Pi Mich Rok Jehovah ni kan gafgownagrad u Germany. Yugu aram rogon ma kan guyrad ni yad ba thil. Ngongolen e pi bitir rom e kari gu gin ngay. Thingar gu yaliy e teliw romed.”

Fare Bible e ir e babyor ni ma pow’iyey ni rib fel’ ni ngan fanay ni fan ni ngan ayuweg e pi bitir. Pi Mich Rok Jehovah e ri yad baadag ni ngar ayuweged boch e girdi’ ni nge fel’rogorad ko thin ni bay u lan e Bible. Ri gamad be piningem ni ngam fol ko thin ni bay u but’ ni yibe ognag.