Be’ nu Africa nib Sobut’an’ ni Ba T’uf e Thin Rok Got Rok P
IIN ni ma yan nga Africa e baga’ ni yad ma gin ngay ni yad ma pirieg ni rib mom ni ngar tababnaged e sabathin ko girdi’ nu rom u murung’agen e Bible. Boch e deer ni bod e, “Mang fare gil’ilungun Got” ara deer ni “Yira pithig e magawon ko ggan, nge m’ar, nge mahl, nge maangach ni manemus?” Boor e girdi’ ni yad ma pag e girdi’ nu bang ni ngar pied e fulweg ni kan fek u Bible ko pi deer ney u fithik’ e felfelan’. Sabathin ni aram rogon e baga’ ni ma tababnag e fol Bible. Nap’an ni ke mon’og ko tirok Got e piin ni be fil e Bible, ma yad ra mang Kristiano ni kan taufenagrad.
Bin som’mon e girdi’ nu Africa ni ke rin’ e n’en ni aram rogon e kan ta’ nga Bible ko Acts 8:26-40. Ir be’ nu Ethiopia ni ke yan nga Jerusalem ni fan ni nge liyor ngak e bin riyul’ e Got ni Jehovah.
Rogon ni be dag e sasing er nga but’, e fare pumoon nu Ethiopia e be sul nga tabinaw rok ko karro rok ni be giringiy e os, ni be bieg e babyor ni kan bachiy. Be’ ni de nang e keb ngak me fith ni gaar: “Mog, ga be nang fan e pi n’ir ni ga be bieg?” Me yog facha ni be’ nu Ethiopia u fithik’ e sobut’an’ nib t’uf rok e ayuw me wenignag ko cha’ nem ni de nang, ni Filip ni ba tamachib ko Kristiano ni nge yan nga lan fare karro. Ngemu’, me wenig ngak Filip ni nge weliy fan fare thin nu Bible ni kafini bieg. Me weliy Filip ni ireray e yiiy ni be yip’ fan Jesus Kristus ni fare Messiah ni kafin ni yim’. Maku i weliy Filip u murung’agen e “Thin Nib Fel’ ni murung’agen Jesus,” ni dariy e maruwar riy nib muun ngay e fas ko yam’ ni tay Jesus.
Tomren ni ke rung’ag e tin riyul’, me adag facha’ ni be’ nu Ethiopia ni nge mang gachalpen Jesus me fith ni gaar: “Mang ni dab ntaufenigeg?” Tomren ni kan taufenag, ma re pumoon nem ni be’ nu Africa e ke sul nga kanawo’ nge yan nga tabinaw rok u fithik’ e felfelan’, ma daki yog e Bible ban’en u murung’agen.
Ngiyal’ ney, e Pi Mich Rok Jehovah e yad be ayuweg bokum milyon e girdi’ u fayleng ni ga’ngin u murung’agen e re “thin nib fel’ ney.” Sagonapan nel’ milyon e girdi’ e yibe fil e Bible ngorad u tabinaw rorad.