Rayog ko Girdi’ ni Nge Chuweg e Gafgow?

BOKUM million e girdi’ ni nap’an ni ka yad ba bitir nge mada’ ko ngiyal’ ni kar ilalgad ma dawor ra nanged e gafgow. Dariy ba ngiyal’ ni kar molod ni dar abichgad ara kar dada’gad nbochan ni keb e ulum ngorad. Machane, boor ko pi girdi’ nem e kar runguyed e girdi’ nib gafgow ma kar athamgilgad ni ngar ayuweged yad.

Machane, gafgow e ka be par ni ireray e magawon ko piin ni yibe mahl u lan e binaw rorad, ara ke yib e ran ni boor ni nge tharey e binaw rorad, nge yu ngiyal’ ni dakuriy e ran, nge ku yugu boch e magawon. Pi n’ey e be k’aring e marus ngak e piin tamilay’ u Africa nib gafgow. Boch e girdi’ e kan towasariyrad ni ngar digeyed e naun rorad ma ranod ko pi mach ni baga’ ara ka ranod nga reb e nam. Yugu boch e girdi’ ni ma par u arrow e ka ranod ko fapi mach ya n’en ni kan micheg ngorad e nge fel’ boch e yafas rorad ma ir e ke k’aringrad.

Fapi mach ni kaygi yoor e girdi’ ni ma par riy e be yoor i yan e girdi’ nib gafgow riy. Faanra ba’ bayang ni rayog ni ngan yung e woldug riy ma kaygi achichig. Rib mo’maw’ ni ngan pirieg e maruwel. Bochan ni boch i yad e kar chachalbangad nrib gel, boor i yad e kar uned ko ngongol nib togopuluw ko motochiyel. Girdi’ ni ma par u mach e yad be ning e ayuw, machane am ko girdi’ e dabiyog rorad ni ngar chuweged e gafgow ni be gel i yan. Be weliy murung’agen e thin ni ke yog fare United Nations ni kan wereg ko November 2003, fare The Independent nu London e yog ni gaar: “Ke yoor i yoor e girdi’ nu fayleng ni be yim’ ko bilig.” Miki yog ni gaar: “U fayleng ni ga’ngin e sogonapan 842 million e girdi’ ni gathi fel’ e ggan ni yad ma kay​—ma ku be yoor i yan e girdi’ ni aram rogon, ni urngin e duw ma 5 million e ke mun ngay.”

Tochuch ko Pi Mich Rok Jehovah u Yimuch u Africa e yu ngiyal’ ma bay e girdi’ nib gafgow ni ma pi’ e babyor ngorad. Aray rogon ni ke yoloy reb e pumoon ni gaar: “Dariy e maruwel rog, ma gu ma iring boch ban’en u lan e mach u nap’an ni ke mab e kanawo’ ngog. Faanra dab gu rin’, ma gamad ra yim’ ko bilig u lan in e rran​—maku reb e magawon romad e ulum nib gel. Ri dariy e maruwel. Boor e girdi’ ni be yan yan u kanawo’ ni yad be gay e maruwel nge boch ban’en ni ngar ked. Gu manang boch e girdi’ ni yad ma gay e ggan u lan tafen e dow. Boch i yad e kar lied yad. Boor e girdi’ e ke kireban’rad ma dakuriy e athap rorad ni bod gag. Be m’ug ni dariy e athap ko gabul nge langlath. Gur, fare Got, ni ir e i sunmiydad nib t’uf rodad e ggan nge mad e der guy e re magawon ney?”

Bay boch e fulweg ni ma fal’eg lanin’uy ko tin ni be magafan’ e re pumoon ney ngay. Rogon ni ra dag e bin migid e article, ma pi fulweg ney e bay ko Thin rok Got, ni fare Bible.