Ba Fayleng NI Dariy e Gafgow Riy e Ke Chugur

SASING ko paradis, ni bod e bin ni bay yaan u keru’ e re ke babyor ney, e ke felfelan’nag e girdi’ ni ma par u fithik’ e gafgow. Paradis e ban’en nib riyul’ ngak fa gal ni som’mon e girdi’, ni Adam nge Efa. Fare milay’ nu Eden e tabinaw rorow. (Genesis 2:7-23) Yugu aram rogon ni dakuriy fare paradis, ma michan’ ni fan nga reb e Paradis boch nga m’on​—ko reb e fayleng ni dariy e gafgow riy—​e gathi kemus ni ba lik’ay. Pi n’ey e ba m’ag ko pi n’en ni kan micheg ni ba’ u lan e Bible.

Amu lemnag e n’en ni ke micheg Jesus ko rorran ni tomur ko yafas rok u fayleng. Reb fapi girdi’ nib kireb ni ra m’ow Jesus e dag nib mich u wan’ ni rayog rok Got ni nge taleg e magawon ko girdi’. I yog ni gaar: “Jesus, ri ga ra lemnigeg u nap’an ni ga ra yan nga lan gil’ilungum.” Pi thin ney e be dag ni fare moon nib kireb e ba mich u wan’ ni ra gagiyeg Jesus nib pilung ma piin ni kar m’ad e yira fasegrad ko yam’. Me fulweg Jesus ni gaar: “Nga ri gog ngom e daba’, ni ga ra un ngog nga Paradis.”​—Luke 23:42, 43, New World Translation.

Girdi’ ni ra par u Paradis, e be yog e Bible ni gaar: “Bay ra toyed e naun mi yad par u lan, ma gathi yugu be’ e bay yib i par ngay. Bay ra yunged e woldug ni grapes me fel’ rogorad u logowen.” (Isaiah 65:21) Arrogon, “Gubin e girdi’ ni bayi be’ me par u fithik’ e gapas, u tooben e woldug rok ni grapes nge woldug ni yu ke gek’iy ni fig, ma be par ndakuriy be’ nra k’aring e marus ngak; I Somol ni Gubin ma Rayog Rok e ke micheg e pi n’ey.”​—Mikah 4:4.

Mang fan ni bay e gafgow e chiney? Mang ayuw e ma pi’ Got ko piin ni ke aw e gafgow ngorad? Wuin e ra m’ay e gafgow?

Mang Fan Ni Bay E Gafgow?

Fare Paradis ni kan tay Adam nge Efa nga lan e ke m’ay ni bochan e togopuluw ni tay fare engel nib kireb, ni Satan ni Moonyan’. I fanay Satan e porchoyog ni nge wawliy Efa ni nge th’ab e motochiyel rok Got nge kay fare wom’engin e gek’iy. I k’aring ni nge mich u wan’ ni faanra par nib dar ku Got ma ra yog reb e yafos ngak ni kab fel’ boch. Nap’an ni pi’ Efa fare wom’engin e gek’iy ni susun dab ni kay ngak Adam, mi ki un i kay boch, ma de fol ku Got ni bochan e ppin rok.​—Genesis 3:1-6; 1 Timothy 2:14.

Fagali mabgol ni ra togopuluwgow e ni chuwegrow u Paradis ma ka ngiyal’ nem e ura athamgilgow ni ngar parew ni yow ba fos. Ke yib i mada’ ko chiney, ma Jehovah e ka be pag Satan ni nge gagiyegnag e girdi’, be gagiyelnag angin e togopuluw ngak Got. N’en ni kan dag u lan chepin e girdi’ e ke micheg ni girdi’ e dabiyog rorad ni ngar Paradis naged e fayleng. (Jeremiah 10:23) Par nib dar rok Got e ke k’aring e magawon nib gel, nib muun ngay e gafgow.​—Eklesiastes 8:9.

Machane, piin nib gafgow e dawor ni digeyrad ni da ni ayuwegrad u lan e re fayleng ney nib sug ko magawon. Thin rok Got, ni Bible, e be dag e kanawo’ ngorad.

“Dabi Magafan’med”

Nap’an ni be non ngak boch e girdi’ ni kar muulunggad ni yad boor, me yog Jesus ni gaar: “A mu guyed e arche’ ni be chachangeg, darir yunged awochngin e woldug fa ra kunuyed e woldug ni ke el ngar tiyed nga naun; ma chitamangimed nu tharmiy e be ayuwegrad. Gathi kab ga’ famed ngak e arche’? Ere dabi magafan’ be’ nge gaar: U uw e bay yib e ggan rog riy?’ fa, ‘Bu uw e n’en ni nggu garbod ngay?’ fa, ‘Bu uw e mad ni nggon’? Ereray e pi n’en ni gubin ngiyal’ ma be nameg yugu boch e girdi’. Chitamangimed ni bay u tharmiy e manang ni pi n’ey ni urngin e dabi siy ni nge yog ngomed. Ere ngam m’oneged e gagiyeg rok Got nge tin nib m’agan’ ngay ni ngam rin’ed, ma aram me pi’ urngin e pi n’ey ngomed.”​—Matthew 6:26-33.

Be’ nib gafgow e de t’uf ni nge moro’ro’. (Proverbs 6:30, 31) Yira pi’ e tin ni ba t’uf rok ni faanra ta’ Got ni ba m’on u lan e yafos rok. Ngan iring ban’en ni fan ni ngan par nib fos e gathi aram e n’en ni nge dugliy e piin Kristiano. Machane, bay e pagan’ rorad ngak Jehovah Got ni rayog ni nge pi’ e tin nib t’uf rorad. (Hebrews 13:5, 6) Reb e kanawo’ ni ma pi’ Jehovah e tin nib t’uf ko girdi’ rok e u daken e ulung ko pi tapigpig rok u fayleng, ni ba t’uf bagayad rok bagayad.

Ku reb e kanawo’ ni ma ayuweg Jehovah e girdi’ nib gafgow e ma pi’ e kanawo’ ngorad ni rayog ni ngar folgad riy. Be motochiyelnag e Bible ni gaar: “Cha’ ni be moro’ro’ e nge tal ko moro’ro’ nge tabab ko maruwel nge thognag e salpiy ni fan ko par rok, nge yog ni ayuweg e piin ni gafgow.” (Efesus 4:28) Boor e girdi’ ni dariy e maruwel rorad ni ke yog ni ngar tababniged boch e maruwel, yad ma ngongliy e maruwel nib gel, ni bod e woldug ara ngan ayuweg e milay’. Bible e be ayuweg e girdi’ nib gafgow ni ngar chaariyed e salpiy rorad maku be fil ngorad rogon ni ngar paged boch ban’en ni kar mecham gad ngay ni ba kireb, ni bod rogon e muun rrum nib pag rogon.​—Efesus 5:18.

Fayleng Ni Dariy E Gafgow Riy​—Wuin?

Be dag e Bible ni gad be par ko “tin tomuren e rran” u tan e gagiyeg rok Satan. (2 Timothy 3:1) Dab ki n’uw nap’an ma ra l’og Jehovah Jesus ni nge pufthinnag e girdi’. Mang e ra buch e ngiyal’ nem? I pi’ Jesus e fulweg riy ko reb e fanathin rok. I yog ni gaar: “Ngiyal’ nra yib e en ni fak e girdi’ riy ni ke pilung, ni ke un urngin e pi engel ngak, e bayi par nga tagil’ nib pilung. Ma urngin girdien e pi nam nu fayleng ni bay ni kunuyrad nga p’eowchen. Me weregrad ngar l’agruw ulunggad, ni bod rogon e en ni ma gafaliy e gamanman ni ma fek e saf nge chuwegrad u fithik’ e kaming.”​—Matthew 25:31-33.

Fapi saf ko re fanathin ney e fan ngak e pi cha’ nib m’agan’rad ko gagiyeg ni ra tay Jesus. Ke taarebnagrad Jesus ko saf ya yad ma lek ni wod e en ma gafaliyrad. (John 10:16) Pi girdi’ ney ni bod e saf e ra yog e yafos ngorad u tan e gagiyeg rok Jesus. Yad ra par u fithik’ e falfelan’ u lan reb e fayleng ni dariy e gafgow riy. Girdi’ ni bod e kaming, ni dab ra folgad ko thin rok Jesus, e ran thangrad ni dariy n’umgin nap’an.​—Matthew 25:46.

Gil’ilungun Got e ra taleg gubin e kireb. Ma gafgow e ra m’ay. Fayleng e bayi sug ko girdi’ ni yad ma t’ufeged yad. Re fayleng nem nib biech e rayog ni ngan guy u fithik’ e pi walag ni yad e Pi Mich Rok Jehovah, ya yog Jesus ni gaar: “Ma aram e urngin e girdi’ ni yad ra nang ni gimed pi gachalpeg.”​—John 13:35.