Ngan Pi’ e Athap ko Piin nib Gafgow
1 I tiyan’ Jesus ko piin nib gafgow. I ngongliy e maangang ni nge ayuweg e girdi’ ko tin nib t’uf rorad ma be golnag e liliy, machane i tay nib ga’ fan ni nge wereg fare “thin nib fel’” ko piin nib gafgow. (Matt. 11:5) Ku arrogon e ngiyal’ ney ni machib ko Kristiano e ma yib angin ko piin nib gafgow nge ku boch e girdi’.—Matt. 24:14; 28:19, 20.
2 Bin Riyul’ e Athap: Pi tamachib ko Kristendom e ma micheg ko girdi’ nib gafgow ni yad ra flaab ni faan yad ra pi’ e ayuw ko galesiya. Machane be yog e Bible ni kari mus ni Gil’ilungun Got e ra chuweg e gafgow ma ra pithig urngin e magawon ko girdi’. (Ps. 9:18; 145:16; Isa. 65:21-23) Gad ra dag ko piin nib gafgow e n’en ni be yog e Bible ma ra pi’ e athap nga lanin’rad me fl’eg lanin’rad ko tirok Got ban’en.—Matt. 5:3.
3 Pi Farise u nap’an Jesus e ur sapgad nga but’ ko piin nib gafgow mar pininged e ‘am-ha·’aʹrets, ara “girdi’ nu but’ ngorad.” Machane i lemnag Jesus ni “racha’rad” ara yafos rorad e “ba ga’ fan.” (Ps. 72:13, 14) Rayog ni ngad folwokgad rok Jesus ‘ngad golgad’ ngak e piin nib gafgow ma gad runguyed yad ma gad ayuweged yad. (Prov. 14:31) Dubdad ni ngad darifannaged e piin ni be par u lan e binaw nib gafgow ara da siyeged ndab da wereged e machib ngorad. Boor e girdi’ ni be motoyil ko thin ko Gil’ilungun Got ni yad ba gafgow.
4 Ayuw e Chiney: Gad ra weliy e pi motochiyel nu Bible ko piin nib gafgow ma ra ayuwegrad ko gafgow e chiney. Ni bod ni, be yog e Bible ni dabkun chingaw ara ni gamble, ara ni par ni yi ba malmal, ara ni tamagow, ara yugu boch e ngongol ni ma yibnag e gafgow. (Prov. 6:10, 11; 23:21; 2 Kor. 7:1; Efe. 5:5) Be yog e Bible ni ngan yul’yul’ ma ngan maruwel nib elmirin ya aram rogon ni ba adag e piin nib ga’ ko maruwel. (Kol. 3:22, 23; Heb. 13:18)Reb e survey e tamilangnag ni pi employer e rogned ni n’en nth’abi ga’ fan ko pi tamaruwel e yad ba yul’yul’ ma darur lifithed l’ugunrad.
5 Gathi der lemnag Jehovah e gafgow ko girdi’. Dabki n’uw nap’an ma ra ayuweg Jesus Kristus e “piin ni gafgow ni yad be wenig ngak ni nge ayuwegrad ko gafgow ni ke yib ngorad.” (Ps. 72:12) Nge mada’ ko re ngiyal’ i nem ma gad ba tow’ath ya rayog ni ngad fl’eged laniyan’ e girdi’ nib muun ngay e piin nib gafgow ko thin ko Bible ni ma pi’ e athap.