Ga Be Dimow Nga Daken E Mang Def?

ROGON gelngin ba naun e ma yan u rogon ni kan toy nge rogon e def riy. Bible e ku ma fana’ e re n’ey ni be yip’ fan yugu reb e kanawo’.

Fare prophet ni Isaiah e ke ta’ Jehovah ni Fa en ni “ke ngongliy e def ko fayleng”. (Isaiah 51:13) Re def ney e bay riy e pi motochiyel rok Got ni dabi thil ni ir e be maruweliy rogon e mithmith ko fayleng me ta’ u gil’ nib mudugil. (Psalm 104:5) Fare thin rok Got nu Bible e be weliy murung’agen “fare def” ni be par e girdi’ u daken. Pi n’ey e aram e taareb u thilin e girdi’, nge motochiyel, nge yaram. Nap’an ni ra “kireb” ara ra war ni bochan ni der taareb lungun e girdi’, ma dariy e yul’yul’ u rogon mat’awuy, nge bugel, ma aram e dakuriy e yaram u thilin e girdi’.​— Psalm 11:2-6; Proverbs 29:4.

Re kenggin e motochiyel ney e ku bay rogon ngodad ni be’ nge be’. U tungun fare welthin ni tay Jesus u daken e burey, me yog ni gaar: “Gubin e girdi’ ni rung’ag e pi thin ney mi yad fol riy e yad bod be’ nib gonop ni toy e naun rok nga daken e war. Me aw e n’uw nge sugubur e lul’ nge yib nga daken e binaw, me yib e nifeng nib gel i aw ko fare naun, ma de puth ya kan toy nga daken e war. Urngin e girdi ni yad ra rung’ag e pi thin ney ma dar folgad riy e yad ra bod be’ nib balyang ni toy e naun rok nga daken e yan’. Me aw e n’uw nge sugubur e lul’ nge yib nga daken e binaw, me yib e nifeng nib gel i aw ko fare naun me puth, nrib ga’ lingan ni puth.”​—Matt. 7:24-27.

Mang def e kam dimow nga daken? Kam toy nga daken e yan’ ni de mudugil, ni aram e llowan’ ko girdi’ ma ra puth? Ara kam toy nga daken e war ni aram e ngam fol ko fare thin rok Jesus, ni rayog ni nge ayuwegem u fithik’ fare nifeng nib gel ni be yip’ fan e magawon ko yafas?