“Ni Gafgownag ni Bochan e Michan’ Rok”

FARE mach nu Cernobbio ko len lel’uch yu Italy e kar fal’eged bangi n’en u lan e park rorad ni puguran ni nga i puguran ko girdi’ ni kan gafgownag ni fan ni yibe th’ab e motochiyel ko mat’awun e girdi’. Bayang e n’en nib ngan’rad e ni fal’eg ni fan ngak Narciso Riet. Ni gargeleg u Chiyamen ni gallabthir rok e piyu Italy, mang Riet reb e Mich Rok Jehovah u lan e pi duw ko 1930. Nap’an e gagiyeg rok Hitler, ma un i gafgownag e Pi Mich Rok Jehovah ni bochan ni ur siyeged ni ngar mon’eged Hitler rok e bin riyul’ e Got, ni Jehovah.

Nap’an ni pirieg e Gestapo ni ma un Riet i fek i yib e babyor ni Fare Wulyang Ntagil’ e Damit nga lan fare concentration camp, me mil nge yan nga Cernobbio. Mi nog ngak u rom ni nge thiliyeg e babyor ni Fare Wulyang Ntagil’ e Damit ko thin ni Italy me wereg ngak e piin yad taab mich ni yad ba chuchugur. Feni pasig ko maruwel rok e de yan ni dan tiyan’uy ngay. Reb e tayugang’ ni SS nge girdi’ rok e ranod nib tomgin nga naun rok Riet, ngar koled mar feked e mich ko “kireb nib gel” ni ke rin’ ni aram e​—l’agruw e Bible nge in yang i babyor! Min chuweg Riet u rom ngan pi’ nga Chiyamen, ngan kalbusnag ko fare kalbus nu Dachau, min li’ ngem’ u nap’an ni ke chugur ni nge m’ay e bin l’agruw e mahl ko fayleng. Rogon i yog e re gin n’en ni ba aram ni murung’agen ni Cernobbio plaque e “kan gafgownag kan li’ ni bochan e michan’ rok.”

Michan’ rok Narciso Riet nge ku bokum miriay e Pi Mich ni gafgownagrad e salthaw ni Nazi e ra pi’ e athamgil nga laniyan’ e piin Kristiano e ngiyal’ ney ngar pired ni yad ba yul’yul’ ngak Jehovah, fa Cha’ ni kari mus ni ir u palpalthib e bay rogon ni ngar liyorgad ngak. (Revelation 4:11) I gaar Jesus: “Nge felan’ e piin ni yibe gafgownagrad ni bochan e yad be rin’ e tin nib m’agan’ Got ngay.” Dabi pag Got talin e maruwel rorad ma ra taw’athnagrad ni bochan e pasig rorad.​—Matthew 5:10; Hebrews 6:10.